Matayo 6
6
Eriha erihitya
1Muyitegaye simuyire obugenge bwenyu emuliro wabandu erilolwako nabo; kusangwa mwamayira mutya simuri nolu hembo luku Tata wenyu oyuri elubula. 2Nibya omugulu ukahitaya, subuhe engubi emuliro wawe, nga batebya ko bakakola omo manyumba werihindana nomo syombalu, bati basimawe nabandu. Kwenene ngabuga nenyu, bawite oluhembo lwabo. 3Nikwa omugulu ukahitaya, ebyala bwaye byamalembe sibiminye ekyo ebyala byamali bikakola, 4erihitya ryawe ribye bubi-sobiso; na Tata wawe oyu kalebaya bubi-sobiso asyakuhemba.
Erisaba
5Nomugulu mukasaba, isimwabya nga batebya; kusangwa banzire eriimana nerisabira omo manyumba werihindana nomo ngonde yesyombalu, bati balolaweko nabandu. Kwenene ngabuga nenyu, banawite oluhembo lwabo. 6Nikwa omugulu ukasaba, wingire mo kisenge kyawe ukinge oluyi usabe Tata wawe oyuri bubi-sobiso; na Tata wawe oyu kalangira bubiso biso asyakuhemba. 7Nenyu omugulu mukasaba simusube omo binywa bityabitya kandi nakandi ngoko Ebihanda bikakola; kusangwa bakaganiraya basyogubwa busana nebinywa byabo bingi. 8Simubye ngabo, kusangwa Tata wenyu anasi ebibari bwaga isimwemwamusaba. 9Musabe mutya muti:
Tata wetu oyuri elubula,
Erina ryawe riyirawe mo ribuyirire.
10Obwami bwawe bwase,
Erisonda ryawe riyirawe,
Omo kihugo ngoko riri omo lubula.
11Utuhe munabwire obundu bwetu bwekirokiro;
12Utubuyire emyinda yetu.
Ngoko netu tukabuyira abari kwemyinda yetu;
13Sutulete omwilengwako,
Nikwa utulamaye oko kibi.
Kusangwa obwami ni bwawe,
Na kagala nolukengerwa,
Na kera na kera. Bibye bitya.
14Kusangwa mwamabuyira abandu kwa malolo wabo, Tata wenyu welubula asyababuyira; 15nikwa mwamatindabuyira abandu amalolo wabo, Tata wenyu naye siendisyababuyira amalolo wenyu.
Eritsira
16Kandi omugulu mukatsira akaryo, simubye nobusu bwengitsi, nga batebya, kusangwa bakatsandaya amasu wabo bati balolaweko nabandu. Kwenene, ngabuga nenyu, banawite oluhembo lwabo. 17Nikwa omugulu ukatsira karyo, uhakabaye omutwe wawe gwamauta unabe omo busu bwawe, 18eritsira ryawe sirilolaweko nabandu nikwa nina Tata wawe oyuri bubi-sobiso; na Tata wawe oyu kalebaya bubi-sobiso asyakuhemba.
Eribika ebindu
19Simuyibikire ebindu mona kihugo, aho ehinyurugunzu namakenge bikaheraya naho abarahi bakatula ibiba, 20nikwa muyibikire ebindu elubula, aho ebinyurugunzu kutse amakenge siariheraya naho abarahi sibetula neriiba. 21Kusangwa ahari ebindu byawe, ho mutima wawe akabya. 22Oluseke lwomubiri rye riso. Eriso ryawe ryamuwana, omubiri wawe gosi asyusula nekyakakala; 23nikwa eriso ryawe ryamabya ritowene, omubiri wawe gosi asyusula nomwirimya. Neryo ekyakakala omwisi wawe kyamabya mwirimya, omwirimya oyo ni mungi! 24Sihari oyo wangakolera abakama babiri; kusangwa asyakwa muguma ekiniga inianza ogundi, kutse asyabegera oko muguma neripona ogundi. Simwangatoka erikolera Mungu nebindu. 25Neryo ngababwira nyiti, simubye namaganiryo busana nengebe yenyu muti mwasyaryaki kutse mwasyapulyaki, kutse busana nomubiri wenyu nga mwasyambalaki. Engebe silabire karyo, nomubiri sialabire esyongimba kwehi? 26Musamalire esyonyonyu syomo kyanya; sisyebiba kutse erigesa kutse erihunika omo mbiso, nikwa Tata wenyu welubula akarisayasyo. Simuri benzwere eyilengiresyo kutsibu kwehi? 27Kandi nindi kwinywe busana na maganiryo angatoka eritomeka emituta yengebe yiwe kolulengero luguma kwehi? 28Kandi busana naki mukabya na maganiryo busana nesyongimba kwehi? Muganiraye ebirangaranga byomoli, ngoko bikalasa; sibyehinga kutse eriluka; 29nikwa ngababwira nyiti, Solomono omo lukengerwa luwe losi siabya ambite ebiringene nge kiguma kyebi. 30Nikwa Mungu amabya akambalaya ebiti byomoli atya, ebiriho lino nomungyakya bikagusawa omo riko, siendisyabambalya kwilaba aho, inywe bandu berikirirya ike kwehi? 31Neryo simubye namaganiryo, muti, Twasyaryaki kwehi? kutse Twasyapulyaki kwehi? kutse twasyambalaki kwehi? 32Kusangwa Ebihanda bikasonda-sonda emyatsi eyi yosi; na Tata wenyu welubula anasi ebyosi ebi ebibari bwaga. 33Nikwa mutsuke erisonda-sonda obwami buwe neritunganene riwe, nemyatsi eyi yosi yasyabya yenyu nibya. 34Kandi simubye na maganiryo busana nomongyakya, kusangwa mongyakya yasyabya namaganiryo wayo. Amalige wekiro kiguma abye angaho busana nekiro ekyo.
Currently Selected:
Matayo 6: NTN62
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Le Nouveau Testament et les Psaumes en Ndandi © British and Foreign Bible Society, 1962.