Matayo 5
5
Eritulago oko kitwa
1Abere alangira esyondeko, mwahetukira oko kitwa, abere abikala abiga buwe mobahika hari. 2Neryo mwakumbula obuno buwe mwakangiriryabo ati:
3Omuyisa ari nabera omo kirimu, kusangwa
obwami bwelubula ni bwabo.
4Omuyisa ari nabo bakarira,
kusangwa basyasibikibwa.
5Omuyisa ari na bomutima molo,
kusangwa basyarya e kihugo mo mwandu.
6Omuyisa ari nabakwire enzala nenyota busana neritunganene,
kusangwa basyagutibwa.
7Omuyisa ari nabakagenyera,
kusangwa basyabana erigenyerwa.
8Omuyisa ari nabomutima mubuya,
kusangwa basyalola oko Mungu.
9Omuyisa ari nabakayira obuholo,
kusangwa basyabirikirwa mo bagala boMungu.
10Omuyisa ari nabo abakendereribawa busana neritunganene,
kusangwa obwami bwelubula ni bwabo.
11Omuyisa ari nenyu omugulu bandu basyabatsuma neribendererya neribuga emisindo yosi yebibi busana nenyu namabihi busana nage. 12Mutseme, mutsange kutsibu, kusangwa ebihembo byenyu ni binene elubula, kusangwa ko banendereraya abaminyereri batya ababya emuliro wenyu.
Omunyu nekyakakala
13Muri munyu we kihugo; nikwa omunyu amatalya obusi bwago, obusi bwago ibwasyasubibwa mugo mobuti kwehi? isiyowene busana nekindu, rye neriguswa eyihya neriryatangirirwa omwisi we bisandu byabandu. 14Muri ekyakakala kye kihugo. Omuyi ahirirwe oko kitwa siangatoka eribisama. 15Kutse abandu sibeakaya oluseke bakahiralo omwisi wekitiri, nikwa oko kikahamba oluseke, ilwakolerya abosi bari omo nyumba. 16Muleke oluseke lwenyu lukoleraye embere syabandu, balangire emibiri yowene yenyu bapipe Tata wenyu oyuri elubula.
Ehamuri ya Yesu ilabire ebihano
17Simuganiraye muti nasa erilusya ebihano nabaminyereri; sinasa erilusyabyo nikwa eriberereryabyo. 18Kusangwa kwenene, ngabuga nenyu, erihika aho elubula ne kihugo byasyalengera, sihari akakwarari, nakatondi, ebikandisyalwa oko bihano erihika aho ebyosi byasyabererera. 19Nikwa oyu kaketa ekiguma kyebihano ebi bike nerikangirirya abandu atya, asyahulwa mo muke kutsibu omo bwami welubula; nikwa oyu kakolabyo nerikangiriryabyo asyahulwa mo mukulu omo bwami bwelubula. 20Kusangwa ngababwira, nyiti, eritunganene ryenyu ryamatindalaba eryabasaki na baFarisayo, simwendisingira na hake omo bwami bwelubula.
Isiwita
21Mwabiriowa ekyabugawa nabandu bakera, bati Susita: noyu kita ryangaleka iniatswerwa lubi. 22Nikwa ngababwira nyiti, oyu kahitana ku mugala wabo ryasyaleka iniatswerwa olubi; noyu wasyatsuma mugala wabo ati, uwe mbulamugasu ryasyaleka iniahika oko batsweri, noyu kabuga ati, uwe kikiru! ryasyaleka iniaya omo muliro wekulimu. 23Neryo wamaha erihitya ryawe aheriherera, neyo wamibuka mugala wenyu ari nomwatsi kuwe, 24usiganaye erihitya ryawe embere syaheriherera ugende; utsuke erisangana na mugala wenyu, neryo iwasa uhe erihitya ryawe. 25Usangane luba nomutsongeri wawe, mukinagenda okwibugiro, omutsongeri wawe siakuhe oko mutsweri, nomutsweri iniakuha oko musoda, neryo iwaguswa omo nyumba yomuliki; 26kwenene, ngababwira, siwendisyalwamo na hake utewabiriha esenge yenyumanyuma.
Isiwasingira
27Mwabiriowa ngoko kyabugawa kiti, Susyesingira. 28Nikwa ngababwira nyiti, oyu kalangira omukali nengumbu nyibi iniamabimusingira omo mutima wuwe. 29Eriso ryawe ryamali ryamaleka ukakola ebibi, ukureryo uguseryo hali; ryowene kuwe ekitsuko kiguma kyawe erihera kwilaba omubiri wawe gosi eriguswa omo muliro wekulimo. 30Nebyala byawe byamali byamaleka ukakola ebibi, utwebyo ugusebyo; ryowene ukuwe ekitsuko kiguma kyawe erihera kwilaba omubiri wawe gosi eriya omo muliro wekulimo.
31Kandi mokyabugwa ambu, Oyu wasyakomola omukaliwe, amuhe engomolo yerimuhiga. 32Nikwa ngababwira nyiti, oyu kakomola omukahwe, butsira busana nerisingira, akamuyira mo musingiri; noyu kahikaya oyu riakomolawa iniamasingira.
Isiwalahiraya
33Kandi mwabiriowa ko kyabwirawa bandu bakera kiti, Susyelahiraya na mabihi, nikwa wasyakola oko Mukama ebyo walahiriraya. 34Nikwa ngababwira, nyiti, Sulahiraye na hake, kutse nelubula, kusangwa ni kitumbi kyobwami kyoMungu, 35kutse ne kihugo, kusangwa ni kitumbi kyebisandu biwe, kutse neYerusalema, kusangwa ni muyi woMwami mukulu. 36Susyelahiraya nomutwe wawe, kusangwa siwangatoka eriyira oluywiri luguma mo lwero kutse lwiragulu. 37Nikwa ebyo mukabuga bibye Ega, Ega, kutse eyihi, eyihi; ebirengire ebi bikalwa oko bibi.
Erianza esyonzigu
38Mwabiriowa ngoko kyabugawa kiti, Eriso busana neriso nerina busana nerina. 39Nikwa ngababwira nyiti, Simulwe nomundu mubi. Nikwa omundu amakuswirya oko ritema ryamali, umubindulire erindi; 40nomundu amakutsongera amaheka ekanzu yawe umusigire nolukimba lwawe; 41omundu amakuhatikana erigenda naye kilometre kiguma, ugende naye nekyakabiri. 42Uhe kwoyu kakusaba, sugane eribweka oyu kayibweka kuwe.
43Mwabiriowa ngoko kyabugawa kiti, Wanze mulikyenyu ukwe enzigu yawe ekiniga. 44Nikwa ngababwira nyiti, Mwanze esyonzigu syenyu musabire abakabendereraya, 45imwatoka eribya abagala baTata wenyu oyuri elubula; kusangwa akahanganaya eryuba riwe oko babi noko babuya, akatuma embula oko batunganene noko batatunganene. 46Kusangwa mwamanza ababanzire mwasyahembwaki kwehi? Abasolesya sibekola batya kwehi? 47Mwamabukya abagala benyu basa, mukakola ebilengire abandi byahi kwehi? Ebihanda nabo sibekola batya kwehi? 48Nenyu mubye abahikene, ngoko Tata wenyu welubula ahikene.
Currently Selected:
Matayo 5: NTN62
Highlight
Share
Copy
Want to have your highlights saved across all your devices? Sign up or sign in
Le Nouveau Testament et les Psaumes en Ndandi © British and Foreign Bible Society, 1962.