Matayo 9

1Ko aoyokela en’atu, ko aoleka lose, ko aoya en’onyang’onandamene. 2Ko lenda, baoya l’oto on’ise nkangi ena nkenyenyala, aeci ena ntange; ko eneki Yesu oenaka imeedyo iniyo, aosumol’ende onowa nkangi ena nkenyenyala, ate, Bona, nyangela, omotungwa en’aoyi’owe’ane. 3Ko lenda, batengi’amoi ban’ekanda baotenda en’etem’eniyoamene, iy’ate, Boto’one asaiya Yakomba. 4Ko Yesu aeyaki nkanyi inik’iy’okanelaka, ko ate, Bokanela baoyi ban’owe ena nkanyi in’etem’enino lanai? 5La njila, Omotungwa en’aoyi’owe’ane, la njila, Etwa, ko kenda: l’ah’afe, yoi linalileki locili en’etendelo liya? 6Koko lacin’eho ino beye oka Bon’on’oto ayali la lifoka ena loko lacina atungole bato en’aoyi’owe (aosumol’oto on’ise nkangi ena nkenyenyala), Etwa, ambola itunda ine, ko coaka en’otumb’one. 7Ko ende aemala, aocoa en’otumb’onande. 8Eneki bato’aho bik’ike oenaka, baoka losomo, ko baokumya Yakomba onofaki bato locili lon’okotu’one.

9Ko eneki Yesu olindak’isisali, aena boto, lina linande lika Matayo, ayakisase en’efutelo ena mpuci; ko amosumola, ate, Onkil’emi. Ko ende aemala, ko amokila.

10Enema Yesu okisak’ase en’otumba, noka, basusanyi bana mpuci l’ato ban’owe bike baoya oyokisase l’ende ko l’akili’anande. 11Eneki Bafalusi oenaka yoi liho, baufola bakili’anande, Mbo, bolaki’onino ala toma ende l’asusanyi bana mpuci l’ato ban’owe lacina nai? 12Koko eneki Yesu ookaka, amasumola, ate, Bato banakika locili bafalele mpanji: ohonde banawa nkangi. 13Bocoak’ononganya ncina en’aoyi’ane: Enalang’emi nk’isei, efa mbeka. Lacin’emi ntaya oyelela bato banakoli: moya oyelela bato ban’owe.

14Nkwaho bakili bana Yoane baoya eneyal’ende, iy’ate, Iso la Bafalusi tokila toma bekila bike, koko bakili’ane bafakile toma lanai? 15Yesu amasumola, ate, Bifili bina nsongi baoka nde lokeseli kum’ende ayakisase l’iyo? Koko bina bengoya benengi nsongi oumolama eneyal’iyo, ko bangokila toma en’esik’eho. 16Efan’oto onosola etate en’esenda ena ntoto en’esenda enekindaki; lacin’oka eho enosolamaka en’okole engokambola esenda lakina, ko bokole bongofula bokolo. 17Nk’osamb’oho, bato bafangole baana ban’atoto ena bikoto bin’alale, bikoto bitongoyodya, ko baana batongoyutsa, ko bikoto biehyama: baangolaka baana ban’atoto ena bikoto bin’itoto, ko yok’oho le baana le bikoto baomonyama.

18Enem’end’osumol’iyo baoyi’ane, lenda, chef emoi ena sunagoga aoya oyoosamela, ate, Bon’onami’on’oyoto amosilwa nk’isanga; koko yaka oyotadya likasa line eneyal’ende, ko angika. 19Ko Yesu aemala, amokila, ende l’akili’anande. 20Ko lenda, boyoto’omoi onoyaaki la nkangi, bakil’anande baetaki mbula jo l’ife, aoya ena mbusa enande, ko aosuka boseleka bon’esenda enande; 21lacin’oka akanelaki en’otem’onande, ate, Nko lasuka bokoto’onande kei, tumbe nongika. 22Koko Yesu aohalingwa, ko amena, ate, Bona, nyangela, imeedyo ine imokoikya. Ko boyoto aika nk’ena heure eho. 23Eneki Yesu otuaka en’otumba bona chef ena sunagoga, ko aena bafomi bana tofonge, ko l’ato bike bayatome etomoko, 24amasumola, ate, Buma, lacina bonome’one bon’oyoto atawu: aeci nk’en’ilo. Koko iyo baoseka nko tolo. 25Eneki bato ofodyamaka, ende aotua, ko amosuka la likasa; ko bonome aetwa. 26Koko lokumo lona yoi liho losekola en’onyang’oho bohotu.

27Eneki Yesu oumaka meho, mpame ife banodyak’aiso bamokila, baololomwa, iy ate, Bon’ona Dawidi, otookamel’isei. 28Koko eneki’nd’otuaka en’otumba, banodyak’aiso baoya eneyal’ende; ko Yesu amaufola, ate, Bimedya nde emi lakambisa ekambwa ene? Bamosumola, iy’ate, O, Nkolo. 29Nkwaho aosuka baiso’ aniyo, ate, Yoi yilame eneyal’ ino yoka bosamb’on’imedy’ino. 30Ko baiso’aniyo baolifwa. Ko Yesu amasumola, ate, Lenda, botasumolake boto’omoko yoi line tu. 31Koko iyo, enek’iy’ofolaka, baocoa osekodya lokumo lonande en’onyang’oho bohotu.

32Ko enem’iy’ofola, lenda, baoy’eneyal’ende l’oto ona bokukuluku, onoyaaki la demona. 33Ko eneki demona ofodyamaka, boto’ona bokukuluku aotenda; ko bik’ike bon’ato baofefa, iy’ate, Yengo tene yok’one ena Yisalaele. 34Ohonde Bafalusi bailaki, iy’ate, Aofodya bademona la lifoka lina bademona.

35Ko Yesu aeta en’engili behetu l’ena bicimo bihitu nselasela, ayalake bato ena basunagoga, ko ayasekodya bositno bon’olotsi bona lifoka, ko ayaiky’ato nkangi ina bekotua l’ekotua la tongitongi tona bekotua behetu. 36Ko enem’end’oena bik’ike bon’ato, amaokamel’isei, lacin’oka baolemba ko baofalangasana yoka mpate inifana botombanyi. 37Koko aosumola bakili’anande, ate, Enukwelo eseki bike, solosolo, koko basali bafan’ike. 38Lacin’eho, boonda Nkolo en’enukwelo lacina atome basali en’enukwelo enande.

Currently Selected:

Matayo 9: BBY62

Highlight

Copy