Matayo 10

1Koko aelela bakili’anande jo l’afe, ko amafa lifoka eneyali bafoi bana nsefo lacina bafodya baho, ko baiky’ato ena nkangi ihatu la tongitongi tohatotu.

2Baina bana bikima jo l’ife bah’ane: on’oso Simona onotangama Petelo, la Andelo onotwa l’ende en’ecimo; Yakobo la Yoane, ban’ana Zebedayo; 3Filipo la Balutolomayo; Toma la Matayo, bosusanyi bona mpuci; Yakobo bon’ona Alafayo, la Tadayo; 4Simona Zelote, ko la Yudasa ona Keliota onoangelaki. 5Yesu aotoma bato’ane jo l’afe, ko amalaka, ate,

Botacoake ena mboka ena Befenda, ko botafolake benyanga bena baise Samalia: 6bocoaka nk’eneyali mpate ina bondongo bona Yisalaele ineyokungaka. 7Ko enaco’ino, bosumoiak’ato bosimo, in’ate, Lifoka lina loola yoolama. 8Biky’ato banawa nkangi, betola banawaki, bikya ban’aise nkangi en’okenge, bofodya bademona. Ino botambaki l’akasa: bofaka nko bofakafaka. 9Botatolake wolo, la argent, la francs ena totatombe tonino; 10botatolake ntombe en’okita, efana bekoto’efe, efana sapata en’akaka, efana bombele bona lokendo: lacina bosali akoli la toma tonande. 11En’onyanga l’en’ecimo enafol’ino, bofona boto onokoli; ko boyala nk’enek’ende yengoko bemwa lakina. 12Enatu’ino en’otumba, boes’oho. 13Yombo botumba bokoli, mwi enino eyalake nkwaho; koko yombo boho bofakoli, mwi enino eutake nk’eneyal’ino. 14Yombo boto afakosangel’ino, ko afalofe baoyi’anino, eneng’in’ouma en’otumb’oho yombo bonyang’oho, botitola betoko beneyali en’akak’anino. 15Solosolo, lakosumol’ino, ekoiyelo en’onyang’oho engoleka ekoiyelo ena Sodomo la Amola en’ina bon’etendelo en’akambo.

16Lenda, lakotom’ino yoka mpate ena ntoto ena nkoi; lacin’eho, boyalamaka la bomwu yoka njua, koko la mwi yoka bikoso. 17Koko boongya lilend’ato; lacin’iyo bangokotol’ino en’oso bona bakita ban’alimo, ko bangokofom’ino nko mpomi ena basunagoga baniyo; 18koko bongotolama en’oso bona gouverneurs la bafoka bana rois lacin’ena lina linami, yoka ndembi eneyal’iyo l’eneyali Befenda. 19Koko eneng’iy’okoleky’ino yok’oho, botakandakandake lacin’ena bokotua bonong’in’otenda la baoyi banang’in’otenda; lacina baoyi banang’in’otenda bangofama eneyal’ino nk’ena heure eho. 20Onongotenda ef’ino: Bolimo bona Bafango’onino kongoatenda en’etem’enino. 21Botoolo angolekya bakune en’ewedi, ko bafango angolekya bona; ko bana bangangela bafango l’oyango, ko bangatoma en’ewedi. 22Ko bahatu bangokook’ino bowe lacin’ena lina linami; koko onongocindelana locinji yengoko nsimbo angika. 23Koko eneng’iy’okonyom’ino en’ecimo ene, bolota en’ecimo emoi; solosolo, lakosumol’ino, kuma botakadya litianya bicimo bina Yisalaele, Bon’on’oto angoya.

24Bokili afaleki bolaki’onande, ko boombo afaleki nyangetuke enande. 25Yoi yakolana la bokili lacina ayale yoka bosamb’onoyali bolaki’onande, ko boombo ayale yoka nyangetuke enande. Yombo batangaki mene’otumba Balazebuba, bangoleka litanga iy’anayali en’omboi’onande nkoho. 26Lacin’eho, botaangake bato’aho; lacina efana yoi linalikundama linalifakundwa linga, efana yoi linalifisi linalifeyana linga. 27Baoyi banakosumol’emi en’ilima, botendaka baho ena fololo; ko baoyi banok’ino ena litoi, botendaka baho ena liko lina nsamba ina betumba. 28Ko botaangake iy’anayaka yonge, koko bafayakisa bolimo: boanga nk’ende onoyakisa le bolimo le yonge ena Ngena. 29Bisodya bife bifasombama nde la likota limoko? Koko efana esodya emoko enakwa ena loko yombo Bafango’onino afimedya. 30Koko ino, bese bena lifo linaliyali en’ete’enino bemosila yalama. 31Lacin’eho, botaangake: ino boleki bisodya bike l’otuya. 32Lacin’eho, onongonjimedy’emi en’oso bon’ato, nongimedy’ende en’oso bon’afang’onami onoyali ena loola. 33Koko onongonjangan’emi en’oso bon’ato, nongangan’ende en’oso bon’afango’onami onoyali ena loola.

34Botakanelake emi njaki otoma mwi ena loko; ntaya otoma mwi ena loko: njaki otoma lokula lon’ita. 35Lacin’oka emi njaki oyokambwanya bona l’afango, ko bon’on’oyoto l’oyango’onande, ko booli’on’ona la nyango en’ome; 36ko boto angosungya baokyi’owe banande nk’en’omboi’onandamene. 37Ende onok’afango yomb’oyango nganji eneleki nganji enanjok’ende, afakoli l’emi; ko onoka bon’ona mpame yombo bon’on’oyoto nganji eneleki nganji enanjok’ende, afakoli l’emi. 38Ko ende onofambole ekulusu enande, ko afankile, afakoli l’emi. 39Onosungya liiko lonande angungya loho; ko onungya liiko lonande lacin’enami, angosungya loho.

40Onokotamb’ino antamb’emi; ko onontamb’emi aotamb’ende onontomaki. 41Ende onotamba bosumoli ena lina lina bosumoli, angotamba boluko bon’osumoli; ko onotamba boto’ona mbongi ena lina lin’oto’ona mbongi, angotamba boluko bon’oto’ona mbongi. 42Koko onongofa omoi ona ban’ane bana tosalisali nko nkofo kei en’asi bana ncici bana mmela ena lina lina bokili, solosolo, lakosumol’ino, ende afaindaki boluko’onande tu.

Currently Selected:

Matayo 10: BBY62

Highlight

Copy