Matayo 11

1Koko eneki Yesu okadyaka lilaka bakili’anande jo l’afe, aumaki meho, lacina alake lilako ko asumole bosimo ena bicimo bin’onyang’oho.

2Koko eneki Yoane ookaka en’otumba bon’enyolo bikambwa binakamba Masiya, aotoma bakili’anande bafe, 3ko amoufola, ate, Oyali nde nk’ende onoyayi, yombo tolendedy’okina? 4Yesu amautodya, ate, Bocoaka boyosumole Yoane baoyi banok’ino ko la baoyi banen’ino: 5banodyak’aiso baena, bitumbe bayakende, bekenge beokulwa, ban’itaki’atoi baoka, banawaki baetwa, ko bosimo bon’olotsi bosekodyama eneyali bato b’iinda. 6Ko boto onofene ncina en’ekumbelo eneyal’emi akik’ekiko. 7Koko enem’ato’aho ocoaka, Yesu aomatsa litenda la bik’ike bona bato lacin’ena Yoane, ate, Onok’in’ocoaka oyena ena sengelenge oka nai? Iyongongwa ineyalile la lofongo? 8Nde bocoaki oyena nai? Boto onolota bisenda bin’okoka? Lenda, iy’analota bisenda bin’okoka bayali nk’en’etumba ben’afoka. 9Ohonde bocoaki lacina nai? Oyena nde bosumoli? O, ko lakosumol’ino, aleki’osumoli. 10One nk’ende onok’iy’otengelaka,

Lenda, latom’ekima enami en’oso bon’elongi ene,

Ende angongya mboka ene en’oso’one.

11Solosolo, lakosumol’ino, l’iyatu banotwaki l’ayato, etaata boto’omoko onoleki Yoane Bini; ohonde oninda lokumo ena lifoka lina loola aolek’ende. 12En’esike ena Yoane yengoko esik’ene, lifoka lina loola yundama la locili, ko bato bana bolema baunda liho la locili. 13Lacina basumoli bahatu la basangya balakaki yengoko esike ena Yoane. 14Ko (yombo bolanga lacina botambe yoi line) one nk’Eliya onoyayi. 15Ende onoyali l’atoi lacina aoke, aongya lilofa. 16Koko nongokolanya eotwelo ene la nai? Bayali yoka banatome banakisase en’edye en’esombe, ko baelelana, 17iy’ate, Tokofomelak’ino tofonge, koko botina bomina; tolelaki eneyal’ino, koko botafoma befwi bena lilelo. 18Yoane ayaki, ko atala toma ko atamela, ko iyo Mbo, ayali la demona. 19Bon’on’oto ayaki, ayale toma, ayamele, ko iyo Mbo, lenda, boto onoseki’opomo la bomeli bona vina, efili ena basusanyi bana mpuci ko la bato ban’owe. Koko bomwu bolongyama la bikambwa bina boho.

20Nkwaho amatsaki lifela baise benyanga beneki bikambwa binande bina mpefa bike okambamaka; lacin’oka iyo batayosuma en’aoyi’owe. 21Ate, Bino eneyal’e, Kolazina? Bino eneyal’e, Betesaida! Yombo bikambwa bina mpefa binikambamaki eneyal’e bikambamaki’ale ena Tula la Sidona, tumbe baumbelaki baoyi’owe alale, nk’en’enuko l’etoko. 22Koko lakosumol’ino, ekwelo enino en’ina bon’etendelo en’akambo engoleka ekwelo ena Tula la Sidona nko ndeka. 23Ko e, Kapalanauma, oniledyama ena loola, ongokitsama nk’ena Adese; lacin’oka, yombo bikambwa binikambamaki eneyal’e bikambamaki’ale ena Sodomo, tumbe bonyang’oho bomoyala nko njalama bon’in’one. 24Koko lakosumol’ino, ekwelo enengokw’e en’ina bon’etendelo en’akambo engoleka ekwelo ena Sodomo.

25En’esik’eho Yesu aotenda, ate, Lakokumy’e, Bafango, Nkolo ena loola l’ena loko, lacin’oka ofiselaki bamene bomwu la bamene nnonganya baoyi’ane, ko ofisolaki baho nk’eneyali banatome. 26O, Bafango, lacina eango enem’olangaka nd’eho. 27Baoyi bahatu bamofam’emi eneyali Bafango’onami; ko efan’oto oneya Bona, umola nko Bafango; ko efan’oto oneya Bafango, umola nko Bona, la boto onongi Bona olanga lacina aotume. 28Inatu banalemba l’ikambwa, l’inatu banok’olito, boyak’eneyal’emi, ko nongokof’ino lifomya. 29Bambana l’emi en’eambanelo enami, ko bolakama l’emi; lacin’emi nde nde la mwi la njofima en’otema, ko bongosungya lifomya lacin’ena belimo’enino. 30Lacina eambanelo enami efana locili, ko bolito’onami boyali nko fo.

Currently Selected:

Matayo 11: BBY62

Highlight

Copy