Matayo 27

1En’esike en’ekedyo ena bina, nkanga ina toome ihatu la bingambe bin’ato baangela Yesu eango lacina baoyake. 2Enek’iy’okakelaka, bamotola, ko bamolekya eneyali gouverneur, nko Pilato.

3Nkwaho Yudasa, onoangelaki, eneki’nd’oenak’oka Yesu amokoiyama, aoyokanya, ko aoya oyutodya mpata ntuk’isaso eneyali nkanga ina toome la bingambe, 4ate, Njilaki’owe eneki’m’olekyaka en’ewedi boto onofana nkwaka ena likambo. Koko iyo, Mbo likambo liniso? Likambo nko lineamene. 5Koko aofusa francs ena loko en’otumba bona Yakomba, ko auma, aocoa oyokom’endamene. 6Ko nkanga ina toome baotamba francs iho, taila, iy’ate, Efakolana til’iho en’emonyedyo ena toma tonatofama eneyali Yakomba, lacin’oka botuya bon’akila nd’iho. 7Enek’iy’oangak’eango, baosomba lisala lina bokengi’ona mpoke la francs iho, lacina bakunja befenda nko meho. 8Lacin’eho, lisala liho yotangama Lisala lina Bakila nko le bon’in’one. 9Yok’oho baoyi banaki Yelemaya bosumoli otendak’ale bailamaki, ate, Batambaki mpata ntuk’isaso, nk’otuya bon’oto onombukama l’otuya, onoki ban’amoi bana Yisalaele ombukaka botuya; 10ko balekyaki iho lacin’ena lisala lina bokengi’ona mpoke, yok’onoki Yawe onsumolaka.

11Koko Yesu aemala en’oso bona gouverneur; ko gouverneur amoufola, ate, E oyali nde Lifoka lina Roi lina Ba-Yuda? Ko Yesu amoutodya, ate, Nk’oko bonatend’e. 12Eneki nkanga ina toome la bingambe oakolak’ende bakambo, ataamba tu. 13Nkwaho Pilato amolokwela, ate, Ofoke baoyi bike banakoakol’iyo? 14Koko atokutwela, efana nko le yoi limoko; ko gouverneur aofefa bike mene. 15Mbula la mbula en’esike en’elambedya, gouverneur atungwelaki bato lisungu limoko linalik’iy’osonaka. 16En’esik’eho baataki lisungu limoi oneyanaki bike, lina linande Balaba. 17Enek’iy’osolonganaka, Pilato amaufola, ate, Onalang’ino nkotungwel’ino oka nai? yombo Balaba, yombo Yesu onotangama Masiya? 18Lacin’ende aeyak’oka bamololekya lacin’en’ekuku. 19Nk’enem’end’okisase ena nkici en’etendelo en’akambo, booli’onande amotomela yoi, ate, Tilake yoi ena likambo lin’oto’oho ona mbongi, lacin’oka emi lenaka bino ena lilotua bon’in’one lacin’enande. 20Koko nkanga ina toome la bingambe baosomya bato losomo lacina baufole Balaba, ko Yesu ayakame. 21Koko gouverneur amaufola, ate, L’iy’afe, onalang’ino nkotungwel’ino oka nai? Iy’ate, Balaba. 22Pilato amaufola, ate, Iya Yesu, onotangama Masiya: njil’oya l’ende? Iyatu bamosumola, iy’ate, Aakamake en’ekulusu! 23Gouverneur ate, Lanai? Yoi lin’owe linaliki’nd’oilaka lika nai? Koko iyo baokusa lilolua bike mene, Mbo, aakamake en’ekulusu! 24Eneki Pilato oenak’oka bafoke baoyi’anande, koko baotom’etomoko, aotamb’asi, ko aosong’akasa en’oso bon’ato’aho bik’ike, ate, Emi mpoli ena likambo lin’oto’one ona mbongi; likambo lininoamene. 25Ko bato bahatu baokutola, iy’ate, Bakila banande bayalamake likambo liniso la lina ban’aniso. 26Nkwaho amatungwela Balaba; ko eneki’nd’ofomaka Yesu lofomi amolekya oyakama en’ekulusu.

27Nkwaho soldats ina gouverneur baotola Yesu en’otumba bona gouverneur, ko baosusanya eneyal’ende boloi bona soldats bohotu. 28Ko baumola beko to’enande, ko bamolotsa bokoto bon’écarlate. 29Ko baoloha likuka lina beenge, ko baokoiya liho en’ote’onande, ko bamosukya bokombi ena likasa linande y’ome, ko baun’aongo en’oso’onande, bamosisedya, iy’ate, Mbote, Lifoka lina Roi lina Ba-Yuda! 30Ko bamoutela nsoi, ko baotamba bokombi ko bamofoma en’ote. 31Enek’iy’okadyaka lisisedy’ende, baumola bokoto’oho, ko bamolotsa bisenda binandamene, ko bamotola oyoaka en’ekulusu.

32Enem’iy’ofola, baosungya boto’ona Kulene, lina linande Simona; bamounda lacina atole ekulusu ena Yesu. 33Enek’iy’oyelaka en’edye enetangama Ngolongota, nko Edye ena Lalika 34bamofa vina nko nsanganya l’onganga bon’ololo; koko eneki’nd’omekak’eho, atalanga limela. 35Koko enek’iy’oakak’ende en’ekulusu, baokafa bekoto’enande la mpusa ena lobese; lacina yoi linaliki bosumoli otendak’ale yilame, ate, Bakafaki bisenda binami eneyal’iyoamene, ko bakafaki bokoto’onami la mpusa ena lobese. 36Ko baokisase, ko bamotombanya meho. 37Ko baila etengelo ena likambo linande ena liko lin’ote’onande, ONE NKO YESU, LIFOKA LINA ROI LINA BA-YUDA. 38Koko baiya bafe baakama l’ende ena bikulusu: omoi en’ili bona likasa linande y’ome, omoi ena likasa y’ooli. 39Ko iy’aneta meho bamosaiya, baofukusa bete’eniyo, 40Mbo e onehya botumba bona Yakomba ko onofak’oho lakina en’in’esaso, oyoiky’eamene; yomb’oyali Bon’ona Yakomba, kita en’ekulusu. 41Koko nkanga ina toome l’atengi ban’ekanda la bingambe bamosisedya nk’osamb’oho, iy’ate, 42Ende aikyaki bakin’ato, afayoikyis’endamene. Yomb’ayali Lifoka lina Roi lina Yisalaele, akite en’ekulusu isanga, ko tongiimedya. 43Ailaki botema eneyali Yakomba: yombo Yakomba amololanga, ayoloikya isanga; lacin’oka atendaki, ate, Emi njali nko Bon’ona Yakomba. 44Ko baiya banakamaki l’ende ena bikulusu bamosaiya nk’osamb’oho.

45Ko bilima bokwela loko lohalotu ena midi yengoko trois heures. 46Ko yoka ena trois heures Yesu aololua la lofoso lona lokolo, ate, Eli, Eli, lama, sabakatani? ncina en’aoyi’aho nko, Yakomba enami, Ya komba enami, onjumbelak’emi lanai? 47Eneki bamoi banemali meho ookaka baoyi’aho, baila, iy’ate, Aelela Eliya. 48Ko isasanga omoi’oniyo aocoa la laango, ko aotamba wusuwusu, aila vinaigre ena boho, ko aak’oho en’okombi, ko amofa lacina amele. 49Koko bamoi baila, Mbo bocike, toyoena yombo Eliya angoya oyoikya. 50Eneki Yesu ololuaka lakina la lofoso lona lokolo, aolisa bolimo’onande. 51Ko lenda, esenda en’otumba bona Yakomba eokambwa l’ena liko l’en’ase, bitate bife; ko loko lolila, ko baufe baokambwa; 52ko nketa yokombwa, ko beduo ben’ato bana Yakomba banakunji bike beetwa en’ewedi. 53Enek’iy’ofolaka ena nketa ena mbusa en’eetwelo enande en’ewedi, baotua en’onyanga bon’oeka, ko baenya eneyali bato bike. 54Koko capitaine l’iy’anayaaki l’ende banatombanyaki Yesu, enem’iy’oena elilelo ena loko, ko la baoyi banilama, baanga bike mene, iy’ate, Solosolo, one ayaaki nko Bon’ona Yakomba. 55Ko bayato bike banakilaki Yesu nk’ena Ngalilaya ko banokambyaki, bayaaki meho, bayalende en’osana; 56bamoi’aniyo nko Malia Mangandala, la Malia nyango ena Yakobo la Yose, ko la nyango ena ban’ana Zebedayo.

57Eneki likolo oyelaka, boto’omoi ntuki ena toma, lina linande Yosefa, on’onyanga bona Alimataya, onoyaaki endamene bokili’ona Yesu, aoya. 58Ko aocoa eneyali Pilato, ko aolomba boduo bona Yesu. Ko Pilato aotom’onyua bayofe boduo. 59Yosefa aotamb’oduo, ko aofuta boho l’esenda ena soto; 60aamby’oho ena nketa enandamene ena ntoto eneki’nd’ocimaka ena lufe, ko aokilimodya lufe lina likolo mene en’ofolo bona nketa, ko aocoa. 61Malia Mangandala la Malia emoi bayaaki meho, bayakisase en’ili bona nketa.

62En’ina bona loi, nko bina bonoya ena mbusa ena bina bon’ekoedyo, nkanga ina toome la Bafalusi baosolongana eneyali Pilato, 63iy’ate, Nyangetuke, tomokanedya yoi linaliki bofoci’oho oilaka kum’atawu, ate, Nko bin’esaso beosila, emi nongetwa en’ewedi. 64Lacin’eho, toma yoi lacina baake nketa la locili yengoko bina bon’esaso, bakili’anande batongoyiya boduo, ko basumol’ato, Mbo amoletwa en’ewedi, ko liunga lina mbusa litoleka liho lin’oso. 65Pilato amasumola, ate, Boyali l’oloi bona batombanyi: bombocoa, boake la locili, bosamb’on’iny’ino. 66Ko baocoa, baaka nketa la locili, ko baaka ndembi ena lufe, iyo l’oloi bona batombanyi.

Currently Selected:

Matayo 27: BBY62

Highlight

Copy