Marcos 4
4
Heshe banakiri miyuiwẽ Jesusũ hatu yusĩnikiaki, na hãtxarã
(Mt 13.1-9; Lc 8.4-8)
1-2Iãnẽwã kesha anushũ Jesusũ ana hatu yusĩkĩ taewaya yura itxapabũ nĩkanũ ika beabu iãnẽwã kesha anu dasibi tsaushũ nĩkaibũ iã kesha shashu namaki Jesus tsaushũ miyui betsa betsapawẽ hamapaikiri hatu yuikĩ:
3—Miyuiwẽ matu yusĩnũ nĩkakãwẽ. Huni betsa hawẽ bai anu shekiwã heshe sa aki kashũ 4sa akubaina heshe betsa hanu kati bai namaki niri aka peiyabu beshũ keyu sheabũ 5heshe betsa mixki ewapabu mania anu mai eskarabes bemãtximea anu kawanarã, hawaira peshei benekaunaya 6bari hui kukĩ hawẽ tapũ bemakis beweshekea kua utsi shanamiski. 7Ha inũ, heshe betsa musha hukũriamanu niri aka shekiwã beneai musha hukũkĩ yabua haskatã bimitirumaki. 8Hakia heshe betsa mai pepa anu niri aka benei bimi itxapahaira hayamiski, heshe betsa yumetã 30 hesheyai inũ, heshe betsa yumetã 60 hesheyai inũ, heshe betsa yumetã 100 hesheyairã— iwanã, 9ana hatu yuikĩ:
—Mã pabĩkiyabuki. Nĩkatã hakimayamashãkãwẽ— hatu wanikiaki.
Heshe miyuikiri shabakabi Jesusũ hatu unãmanikiaki, na hãtxarã
(Mt 13.10-23; Lc 8.9-15)
10Hanũkaĩ yurã kaiãnẽ ma Jesus henebainabũ ha mesti tsaukẽ hawẽ 12 tsumabu inũ haki txiti ika betsabũ haska miyuiwẽ hatu yusĩshu yukabu— 11Jesusũ hatu yuikĩ:
—Maturã, haskai Deus shanẽ ibumiskiri Deusũ hawẽ pepa huneni shabakabi mã ẽ tsumabu matu yusĩkĩ unãmaikiki. Hakia habũ Deusũ hãtxa nĩka bestiaibu miyuiwẽs besti ẽ hatuki txanikũkainaii, 12habũ txakabu Deusũ hatu buashũkatsi ikamawẽ taeshũ nĩkabiakubaĩkĩ hau shabakabi nĩkayamanũbũ inũ uĩbiakubaĩkĩ hau hatũ txakabu beshteketã Deus ikũwãyamanũbunã— akĩ
13—Haska hãtxa huneawẽs ẽ hatu yusĩshurã, mã nĩkama ishumẽ? Dasibi miyuiwẽ ẽ matu yusĩanã, mã daka tapĩkĩ nĩkama ikubaĩkanai?— iwanã, 14ana hatu yuikĩ: —Miyui heshe niri akakiri matu shabakabi yusĩnũ nĩkakãwẽ. Huni betsã Deusũ hãtxa kenenibu yusĩnanãmisrã, heshe sa aka keskaki. 15Ha heshe betsa hawẽ kati bai namaki niri ikarã, yurabũ Deusũ hãtxa nĩkabiaibũ hamakiria Satanás hushũ hawẽ hãtxa pepa nĩkatanais mebĩmiski, hakimawakinã. 16Ha inũ, heshe betsa mixki ewapabu mania anu mai eskarabes bemãtximea anu niri akarã, tsuãra Deusũ hãtxa nĩkakĩ taewai benimabiaya 17xinã pewamawẽ taeshũ hawẽ hiwepanã Deusũ hãtxa danãmakĩ hatu bika wakĩ hawẽ hamapaiwẽ hatu itxakawabu tenei hawawẽ haskatima ha uĩtã ana hawẽri txĩtũbaĩmisbuki. 18Ha inũ, heshe betsa musha hukũriamanu niri akarã, yura betsabũ Deusũ hãtxa txibã taewabiai 19hamapai hawẽ hiweawẽs kemui heneama hawẽs besti nuitxakayamakĩ Deusũ hãtxa nĩkabiakĩ ana tapĩkatsi ikama mabuwẽs besti kemui itxa bestiwanũ ika pepaisbumaki, haskatũ yabua hãtxa pepa txibãma yurabu mibã bimiuma keskabuirã. 20Haska inũ, heshe betsa mai pepa anu sa akarã, Deusũ hãtxa nĩkashũ yura betsabu hatu yusĩkĩ ikũwãmamisbuki, mai pepa anu heshe niri aka ewai benei bimiai betsa 30 hesheyai keska inũ, betsa 60 hesheyai keska inũ, betsa 100 hesheyai keskarã— iwanã,
Bĩ dekutã shabakabi tsaũtikiri miyuiwẽ Jesusũ hatu yusĩnikiaki, na hãtxarã
(Lc 8.16-18)
21Jesusũ ana hatu yusĩkĩ:
—Bĩ dekutã hi bau merã hunetima inũ tapu namã tsaũtima mã unaiĩ. Hakia bĩ dekushũ hau hawenabu hikikĩ uĩxaranũbũ manaũri tsaũmisbuki. 22Haskakẽ hawara ẽ matu yusĩkubainai yura betsabu hatu yusĩkĩ huneyamakubaĩshãkãwẽ. Haska inũ, hamapai tibi hunekĩ mã hatu ashũamarã, dasibi Deusũ hatu shabakabi washũkĩ keyushanikiki. 23Haskakẽ mã pabĩkiyabunã, na hãtxa nĩkatã hakimayamakubaĩkãwẽ— iwanã,
24hanushũ ana hatu yusĩkĩ:
—Mã yura betsa merabewakĩ pewamis habiaskari wakĩ Deusũ matu manakukĩ pepawẽri mã amis keskama ana matu binumashanikiki. Hanushũ mã hatu merabewatxakamis habiaskari wakĩ Deusũ matu inãtxakariakĩ manakukĩ pemawẽri matu kupishanikiki, nuitapawakinã. 25Haska inũ, tsuabũra ẽ hãtxa besti nĩkakĩ txibaĩbu itxapa ẽ ana hatu shabakabi yusĩkubaĩshanaii. Hamẽ tsuabũra eskarabes nĩkabiakĩ ea txibaĩsbuma ha eskarabes ẽ hatu mebĩshanaii, hakimawakinã— iwanã,
Miyuiwẽ yunu bana ewamiskiri Jesusũ hatu yusĩnikiaki, na hãtxarã
26haska keskai na mai anua Deus shanẽ ibumiskiri Jesusũ ana hatu yuikĩ:
—Deus shanẽ ibuirã, eskamiski, matu yusĩnũ nĩkakãwẽ. Hunĩ shekiwã banatanima 27uĩamas usha itxapa binutã hanua shekiwã hukuĩ yumei ewamiski. Haskai yumeai ha hunĩ unãmabiakẽ 28maĩ yunu benemakĩ ha dukũ hawẽ pei kaĩmakĩ ewa wakubauna ha katxu hawẽ tashuri kaĩ ewatã hanua huatã bimiai beruyai kanimiski. 29Hanua txuxiaya ibuã tsekakĩ meshtekĩ itxawamiski. Haska keskari wakĩ Deus ikũwaĩbu itxawariashãkanikiki— iwanã,
Heshe peshemixtĩkiri Jesusũ hatu yusĩnikiaki, na hãtxarã
(Mt 13.31-35; Lc 13.18-19)
30ana Jesusũ hatu yuikĩ:
—Deus shanẽ ibu haska keskamiskiri miyui betsawẽ ana matu yusĩnũ nĩkakãwẽ. 31Mibã betsa mostarda heshe pesheixtahairabia 32mai anu bana bestibiabu ewakĩ mibã betsa tibi binumiski. Haska inũ, hawẽ pũyã ewapaxinaki peiyabu haki huĩrukuĩ utamisbuki. Deus shanẽ ibuirã, haska keskariki— iwanã,
33-34yura dasibibu hãtxa hunea miyuiwẽs Jesusũ hatu yusĩkĩ hawara nĩkatirubu hatu yuiakeakeaya hanushũ hawẽ tsumabũ hawa shabakabi unãkĩ tapĩriabumakẽ miyuiwẽs hatu yusĩxina hanushũ hawẽ tsumabu Jesusũ hatu yui tapĩmakĩ hatu shabakabi yuinikiaki.
Niwewã kuxipahaira inũ iãnẽwã buspu tsaubiranai Jesusũ nemanikiaki, na hãtxarã
(Mt 8.23-27; Lc 8.22-25)
35Hanua bari kai mexuaya hawẽ tsumabu Jesusũ yuikĩ:
—Iãnẽwã kesha betsauri buyunãkãwẽ— hatu wabaini 36hanushũ yurã kaiã shunũbaini Jesus hawẽ tsumabube shashũ inatã shutubaini buaibũ hanua shashu betsawẽ txibaĩ habe buriaibũ 37hanua niwẽwã kuxipahaira besubainaibukiria bekĩ hene buspu tsaunbirãkĩ shashu hene mata waya 38Jesus hawẽ teratametiki shashu txishukiri daka ushakẽ hawẽ tsumabu datekĩ bestẽwãtã yuikĩ:
—Yusĩnaã, nũ hikiairã, mĩ nukuwẽ dabanã ikamamẽ?— akabu
39hanua Jesus bestẽkãwã benitã niwẽwã kuxipa inũ iãnẽwã nemakĩ:
—Peswe. Nesewe— aka niwẽwã maĩ neseaya iãnẽwãri buspu tsaubiranai maĩ neseaya 40Jesusũ hatu yuikĩ:
—Haskai mã dateai? Ea xinaĩnã, mã dateama ikeanaii— hatu wa
41e iki dateyabi yuinamekĩ:
—Na hunirã, hawa hunimẽ? mĩ atirumakirã, niwe inũ iãnẽwanẽri nĩkakanikikirã— ibaini bui
Currently Selected:
Marcos 4: cbsBR
Highlight
Share
Copy
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
