Marcos 5

Gadara anu kashũ Jesusũ huni yushĩ txakabu haya kaĩmanikiaki, na hãtxarã

(Mt 8.28-34; Lc 8.26-39)

1Hanua iãnẽwã kesha betsauri Gadara mai pakeanu Jesus kai keti itã 2shashu anua bututã hawẽ tsumabube mapekekainaya hanu mawabu maiwamisbu anu huni yushĩ txakabu haya Jesus betxitã huaya 3-4ha huni yushĩ txakabu haya hawawẽ haska watima mane dispiwẽ neshakĩ mestẽwãbiakubainabu hawẽtxaĩs mane dispi nasakĩ tesaya hawẽ tae taneshkĩ inũ hawẽ mekẽ meneshbiabu dasibi pekakĩ ha mane dispi tesakĩ txuri mixtĩwãkĩ keyuaya ana haska washũ tsuã nematirumarã, 5hanua mexu merã inũ bariri nia bis ikĩ mawabu maiwamisbu anu inũ mati anua bis iriai inũ mixki maniaki ibubis tĩ tĩ iki datxakamemiskẽ 6hakia Jesus txai huai betxibirani kuxitxakayamakirã ha dapi dãti ikaya 7-9Jesusũ yuikĩ:

—Yushĩ txakabuũ, ha huni anua kaĩwẽ— atã yukakĩ:

—Harakiri mĩ kena ikai?— aka yuikĩ:

—Ẽ kenarã, “Itxapahaira Ẽ Hayaki”, ẽ yushĩ mirimayarã— iwanã, bis ikĩ hãtxa kuxipawẽ yuikĩ:

—Jesusuũ, mĩ Deus kuxipahairatũ bakerã, ẽ unaiĩ. Deusũ nuku uĩayã nukurã, kupikĩ nuku nuitapawayamawe!— itã bis ikĩ 10ana yushĩ txakabũ Jesus ea akĩ yuikĩ:

—Nũ nãta kakatsi ikamaki. Nuku nãta nitxĩyamawe— iwanã, 11ha mati anushũ ina yawa itxapabũ piaibũ 12yushĩ txakabũ uĩtã ea akĩ yuikĩ:

—Ha ina yawa anu nuku nitxĩwẽ, ha merã nũ hikinunã— akabu

13hanushũ Jesusũ hari hatu yunua ha huni anua kaĩbaini ina yawa merã hikibainaibũ ha ina yawa 2.000 datei mawa keyatapa butei niri ibaini iãki pukui hasai keyuaibũ

14hanua ha ina yawa mekenikabu datei kuxibaĩkĩ mae tibi anu hiweabu inũ bai putxinĩ hiweabu hatu banabimakeakebainaibũ yura itxapabũ nĩkatã uĩ beaibũ 15-16hanu Jesuski nukushũ itxapahaira ha huni yushĩ txakabu haya ikũkirãxina ma tari sawea ana unaĩsmapa keskama hanu Jesusbe tsauwa ana haska dabanẽ ikĩ datekĩ ha huni haskashu habũ uĩtã hatu yuikĩ ha yushĩ txakabu ina yawa merã hikibaĩshu txaniaibũ 17nĩkatã ha mae anuabũ mesekĩ Jesus nitxĩkĩ:

—Nukũ mae anua kariwe— akabu

18hanua Jesus shashũ naneaya hanua ha huni yushĩ txakabu kaĩmashutũ Jesus ea akĩ yuikĩ:

—Mibe kapa?— aka 19nemakĩ yuikĩ:

—Ebe kayamawe. Hakia minabu anu kashũ haska Deus miwẽ nuikĩ yushĩ txakabu mia kaĩmashu minabu yuiritãwẽ, hau miwẽ benimarinũbunã— abaini kaya

20hanushũ ha huni yushĩ txakabu haya Jesusũ kaĩmabaina kashũ nawa betsabũ mae Decápolis yuiarã, huni kuĩ hãtxarã, Mae Mekẽ Dabeti anu kashũ ha huni haska Jesusũ duahairawakĩ ha yushĩ txakabu kaĩmabaĩshu hatuki txanikũkainaya nĩkai dasibi benimai Habaa! iki keyunibukiaki.

Aĩbũ himi bashneni neseisma Jesusũ maĩwãtã Jairõ bake mawa bestẽwanikiaki, na hãtxarã

(Mt 9.18-26; Lc 8.40-56)

21Hanua Jesus iãnẽwã kesha betsauri katani ana hawẽri txĩtũkirani hui keti ikaya hanua iãnẽwã kesha anu yurã kaiã Jesus uĩnũ ika bei itxabirãbiranaibũ 22hanua hanu itxati hiwe mekemis shanẽ ibu betsa hawẽ kena Jairõ Jesus betxibirani hushũ dãti ishũ 23ea akĩ yuikĩ:

—Ẽ bake aĩbu mawakatsis ikikiki. Ebe kashũ ẽ hiwe anushũ uĩkĩ hau shushanũ ea meshuniyuwe— aka

24hanua Jesus habe kaya yurã kaiãri haberi bukĩ Jesus naxui akĩ teshke abainaibũ 25hanua aĩbu himi bashneni ha isĩ tenei ma 12 ano kabia hawa neseisma bari betsa tukama ikũkaĩmis 26hanua nuitapaya huni dauyabũ hau ea shushawanũ, iwanã, hawẽ pei dasibi putakĩ keyubia hawa maiãma ikũkaini hakia ana pikuhairakĩ 27-28Jesuskiri hãtxakĩ yuiaibu nĩkatã ha yurã kaiã supu ibaini habe buaibu anu ha aĩbu isĩ teneya txipu kakĩ: “Hawẽ tari kesha besti mea ẽ shushatiruki”, iwanã, xinãbaini kakĩ naxui ikaĩ Jesusũ tari kesha metsatuxia 29hawaira hawẽ himi nesei maĩtã: “Ma ẽ shushashubiĩ!” iwanã, xinãyã 30hawẽ kuxipa kaĩkaĩ tsuara ma shushashu Jesusũ unãkĩ yurã kaiã hatxũ beaibu uĩbaũkĩ Jesus niti itã hatu yukakĩ:

—Tsuã mã ẽ tari metsashumẽ?— hatu wa

31hanushũ hawẽ tsumabũ yuikĩ:

—Na yura itxapa bei miki supu ibirãkĩ mia akanikiki. Tsuã mia ashu nũ unãmaki— akabu 32hatũ Jesus metsashu aĩbu uĩnũ ika nasaukekawanaya 33aĩbũ unaĩ datei saki saki ikĩ hawara Jesusũ ashu unaĩ ha bebũ dãti itã shabakabi Jesuski txaniaya 34Jesusũ yuikĩ:

—Aĩbuũ, mĩ ea ikũwãyã ẽ mia shushawashuki. Ana isĩ teneama unãnuma kai periwe—

35aki nikẽ hanua Jairõ hiwe anua hawẽ tsumabu beshũ Jairo yuikĩ:

—Mĩ bakerã, ma mawashuki. Ana huni yusĩnã daketapa wayamawe— akĩ 36yuiaibu Jesusũ nĩkakĩ Jairo yuikĩ:

—Dateama ea besti ikũwãkubaĩwẽ— abaini kakĩ 37hanua Pedro inũ Tiago inũ hawẽ betsa João besti Jesusũ hatu iyukĩ 38Jairõ hiwe anu habe buaibũ hanua hãtxa biski ikaibu nĩkakĩ yura itxapa kashai saĩ iki bau bau ikaibũ 39hanua Jesus hatu anu hikikaĩ yuikĩ:

—Haskai e iskaũ kashai mã biski ikanai? Hawẽ bake mawa kayabiamaki. Ushaki— hatu waya 40hanushũ Jesusũ haska yuiai yura itxapabũ usãbaunaibũ hanushũ Jesusũ habu kaĩmatã hawẽ epa inũ hawẽ ewa inũ hawẽ tsumabu habe buabube ha aĩbu bake hanu daka anu dĩtu merã hikikaĩ 41metsũshũ yuikĩ:

—Talitá, cumi— iwanã, nukũ hãtxarã —Txipaxaã, beniwe— aka 42hawaira ha txipax 12 bariya benikaunaya hawẽ ibubu inũ hawẽ tsumabu e itã yuikĩ: “Habaa!” ikaibũ 43hanushũ Jesusũ hatu nemakĩ hau tsuki txaniyamayunũbũ ana yuikĩ:

—Matũ bake pimakãwẽ— hatu wabainikiaki.

Currently Selected:

Marcos 5: cbsBR

Highlight

Copy