Marcos 3

Sábado huĩrukũtitiã huni meyuxki Jesusũ kaya wanikiaki, na hãtxarã

(Mt 12.9-14; Lc 6.6-11)

1Hanua ana itxati hiwe merã Jesus hikiaya huni mekẽ meyuxki hari hatube hikia tsaukẽ 2hanushũ habũ hawẽ yusĩa danãkĩ Jesus txitenũ, iwanã, huĩrukũtitiã ha huni mepeai uĩnũ, ishũ manai maniabũ 3huni mekẽ meyuxki betxitã Jesusũ yuikĩ:

—Benikirã ha maniabu namakis niwe— aka benia nikẽ 4ha dapi maniabu hatu yukakĩ:

—Moisés hãtxa pepa txibãkĩ huĩrukũtitianã, haska watimẽ? Pewakĩ merabewatiraka? Txakabuwakĩ itxakawatiraka? Hawẽ hiwea meketiraka? Hawẽ hiwea yamawatiraka?— hatu wa habũ hawa yuiama manishũ 5yuinameakeakekĩ hatũ xinã bikawaibũ Jesus nĩkakatsis ikabumakẽ hanua Jesus sinatai huĩti nixmashũ hatu uĩkĩ keyutã ha huni mekẽ meyuxki yuikĩ:

—Mĩ mekẽ mexãwẽ— aka mexãyã hawẽ mekẽ ma mepekei peaya 6fariseubu kaĩ keyubaina judeu shanẽ ibu Herodeski txiti ikabube itxa haska washũ Jesus tenãtimẽ ika yuinamei yubakai taenibukiaki.

Iãnẽwã kesha anu Jesus kakẽ yurã kaiã haki itxanibukiaki, na hãtxarã

7Hanua Jesus hawẽ tsumabube iãnẽwã kesha anu kaya yurã kaiã Galiléia anuabũ hatu txibaĩbũ 8hanushũ hamapai betsa betsapa Jesusũ akai nĩkabirãbiranaibũ uĩtanũ ika bei, Judéia anua bei, Jerusalém anuari bei, Iduméia anuari bei, Jordão hene kesha betsauriari bei, Tiro inũ Sidom anuari beake beakeaibũ 9-12isĩ teneaibu itxapa shushawaxĩkẽ habũri hawenabu isĩ teneaiburi iwekĩ Jesus mematanũ ika bei haki itxai keyuabũ habianuri yushĩ txakabu yura merã hiweshũ Jesus uĩtã ha yura Jesus anu dãti imatã hãtxa kuxipawẽ yuimakĩ:

—Miarã, mĩ Deusũ bake kayabiki— ibirã ibiranaibu hatu hãtxamamakĩ:

—Hanua ekiri haska hãtxama kaĩkãwẽ— hatu wapakekĩ Jesusũ yushĩ txakabu hatu nitxiaĩwẽ taea ana haki itxai teshke ikaibu uĩkĩ hatu dapashkabainũ, iwanã, hawẽ tsumabu yunukĩ:

—Ẽ shashũ inai ea shutukãshũ shashu pewai bukãwẽ— hatu wanikiaki.

12 hunibu kuxipa wakĩ Jesusũ hatu katunikiaki, na hãtxarã

(Mt 10.1-4; Lc 6.12-16)

13-15Shaba betsatiã mananã mati anu mapekeshũ Jesusũ haki txiti ikabu betsabu kenakĩ:

—Ea anu bekãwẽ— hatu wa bei haki itxaibu 12 huni besti katukĩ yuikĩ:

—Matu yusĩnũ tapĩ ebe bukubaĩkãwẽ. Kakape ekiri mã hatu yuikubaĩshanũbũ hãtxa kuxipawẽ yunutixara wakĩ ẽ matu yunuaii, mã ẽ kuxipayabu wakĩ matu kenakinã. Haska bitã isĩ teneaibu mã hatu shushawakubaĩshanũbũ inũ, yushĩ txakabu hayabu mã hatu kaĩmariakubaĩshanũbũ ẽ matu yunuaii— akĩ 16ha 12 hunibu katukĩ Simão, kena betsa wakĩ Pedro watã 17Zebedeũ bake dabe Tiago inũ hawẽ betsa Joãobe ana hatu kena betsa wakĩ Boanerges, huni kuĩ hãtxarã, Kana Tĩ Ikaĩkaĩmis Keskatũ Bakeburã, hatu watã 18André inũ, Filipe inũ, Bartolomeu inũ, Mateu, hawẽ kena betsa Levi, inũ Tomé inũ, Alfeũ bake Tiago inũ, Tadeu inũ Simão, ha Roma anua shanẽ ibubu hatu danãkĩ hatu nitxĩkatsis imis 19inũ, Judas Iscariotes, hatũ Jesus txipu hatu atximashanairã, hati katunikiaki, Jesusũ tsumaburã.

Jesus Belzebũ kuxipa hayaki, iwanã, ha akĩ txitenibukiaki, na hãtxarã

(Mt 12.22-32; Lc 11.14-23; 12.10)

20Hanua hatu haska wabirani hawẽ tsumabube hiwe betsanu Jesus hikikẽ ana yurã kaiã haki itxabu hanishũ Jesus inũ hawẽ tsumabũ pitirubumakẽ 21Jesus haskai hawẽ ewa inũ hawẽ betsabũ nĩkatã yuinamei:

—Unaĩsmapai tirumai ikikiki. Inũ bukãwẽ— ibiranaibũ

22hanua Jerusalém anua Deusũ hãtxa kenenibu yusĩnanãmisbũ uĩkĩ Jesuskiri yuikĩ:

—Na hunirã, yushĩ txakabu shanẽ ibu Belzebũ kuxipa hayaki. Haska bestiwẽ taeshũ yushĩ txakabu hatu kaĩmaikiki— ikaibu 23nĩkatã Jesusũ hatu itxawashũ eska miyuiwẽ hatu yuikĩ:

—Satanásã ibubis hawẽ yura Satanás kaĩmatirumaki. 24Miyuiwẽ matu yusĩnũ nĩkakãwẽ. Mae betsa anua nawabu hatũmebi pashkatã detenamei hatũ yura debui keyumisbuki. 25Haska inũ, yurabu hawenabuyas pashkatã hatũmebi duanameama sinatai hiwea petirubumariki. 26Haskakẽ Satanásã hawenabu kaĩma hawẽ yura punu nukai babui keyukeanaii.

27Habiaskari wakĩ tsuãra huni kuxipatũ hiwe anu hikitã yumetsunũ, iwanã, hawẽ tae inũ hawẽ mekẽ dukũ neatã hawẽ mabu yumetsutirubuki. Hamẽ eãnã, haska keskari wakĩ Satanás maemakĩ hawẽ kuxipa mebĩtã ẽ binutiruki— hatu waya

28-30Deusũ hãtxa kenenibu yusĩnanãmisbũ yuikĩ: “Mĩ yushĩ txakabu haya iki ikaii”, akaibuwẽ taeshũ Jesusũ habu yuikĩ:

—Ikũkĩ ẽ matu yuiai ea nĩkakãwẽ. Yurabũ habũ txakabu betsa betsapa inũ habu Deuski shetxakamisbu Deusũ hatu hakimawakĩ hatũ txakabu hatu buashũtiruki, pewakinã. Hakia matu keskakĩ tsuãra hawẽ Yushĩ Pepa danaĩ haki shetxakamisbu hatũ txakabu hatu buashũtaskama ishanikiki— iwanã,

Habu hawẽ ewa kayabi inũ hawẽ betsabu kayabikiri Jesusũ hatu yusĩnikiaki, na hãtxarã

(Mt 12.46-50; Lc 8.19-21)

31Jesusũ hatu yusĩkĩ keyuriamakẽ hemaĩtĩ anu hawẽ ewa inũ hawẽ betsabu habe hãtxanũ, iwanã:

—Jesus ea yuishũkãwẽ— hatu wa 32ha dapi tsaubaũshũ Jesus yuikĩ:

—Mĩ ewa inũ mĩ betsabũ unu hemaĩtĩshũ mibe hãtxanũ ishũ mia kenakanikiaki— akabu 33Jesusũ hatu yukakĩ:

—Tsuabumẽ, ẽ ewa inũ ẽ betsaburã?— iwanã, 34ha dapi tsauwabu uĩbaũkĩ hatu yuikĩ:

—Na habia ea dapi manishũ ea nĩkaiburã, habiabu ẽ ewa kayabibu inũ ẽ betsa kayabibu inũ ẽ pui kayabibuki, na habiaburã. 35Ha inũ, Deusũ hãtxa tsuabũra nĩkatã ikũwãkĩ habũ txibãbaĩkĩ ashuaĩburã, habiabu ẽ betsabu inũ, ẽ puibu inũ, ẽ ewaburiki— hatu anikiaki.

Currently Selected:

Marcos 3: cbsBR

Highlight

Copy