Marcos 2

Huni yura babuni Jesusũ kaya wanikiaki, na hãtxarã

(Mt 9.1-8; Lc 5.17-26)

1Hanua usha eskarabes hawẽ mae Cafarnaum anu Jesus katani hikiaya banabitã yuinamei: “Ma ana nenu hushukiaki”, ikaibũ 2yura itxapabu hanu bei haki shukui ana hani maputima hemaĩtĩ anu ika kai bestuabu ana harakiri tukuama mapuabũ Deusũ hãtxa hiwe uke merãshũ Jesusũ hatu yusĩayã 3huni yura babuni hawẽ baketiki daka huni dabe inũ dabetũ Jesus anu hawẽ dakatiki bakebirã 4hanu yurã kaiã shukuabuwẽ taea haska watã bitxibaĩ Jesus uĩmatima mai bawa hiwe sapa sheni mamaki inabaĩ hawẽ dakatiki hanu butenũ, iwanã, hanu beshpa wakĩ purekĩ shui watã hanu ha huni yura babuni Jesus anu buteaibũ 5haska hatũ xinã ikũhairawaibu unãkĩ huni yura babuni Jesusũ yuikĩ:

—Dateyamawe. Mĩ txakabuwẽ Deusũ mia kupikatsis ibiakĩ mã ea ikũwaĩwẽ taeshũ hau ana xinãyamanũ ẽ mia buashunaii— akaya

6hanushũ Deusũ hãtxa kenenibu yusĩnanãmisbu bestibu tsaushũ xinãkĩ: 7“Ha huni txakabuki. Nuku paraĩ Deus keskakatsi ikikiki. Deusũ besti hawẽ txakabu buatiruki”, ikaibũ 8-10hanushũ tsuã Jesus yuiamabia hatũ xinã unãkĩ Jesusũ hatu yuikĩ:

—Matunã, haskakĩ mã xinã txakai ikai? Haratu bikamamẽ, hawẽ txakabu buashunaraka? Hawẽ yura beniaraka? Ha dabe bikakẽ Deusũ besti atiruwẽ taeshũ haskakĩ mã xinãtxakai? Ẽ matũ Hutxi Kayabi Iuwa na mai anua ea ẽ hawẽ kuxipa hayatũ hawẽ txakabu ẽ buashũtiru mã unãnũ ẽ akai uĩkãwẽ— iwanã, huni yura babuni kaya wakĩ yuikĩ:

11—Benitã mĩ dakati bui mĩ hiwe anu inũ kariwe— akaya 12hawẽ yura damestẽtã benikãwã hawẽ dakati bitã iabainaya mapubaunabũ uĩkĩ yuikĩ:

—Habaa! Tsuã haska waismaki. Hakia Deus pepahairatũ na huni ma kayawashuki— iwanã, Deus kẽwãnibukiaki.

Jesusũ Levi katukĩ kenanikiaki, na hãtxarã

(Mt 9.9-13; Lc 5.27-32)

13Hanua ana iãnẽwã kesha anu Jesus ka haki yurã kaiã itxabu hatu yusĩbai 14hanua kakĩ Cafarnaum anushũ Romanobũ governo pei bishũmisbu hiwe anu Alfeũ bake Levi hawẽ kena betsa Mateu tsauwa Jesusũ betxituxitã yuikĩ:

—Ea txibãkubaĩwẽ— aka Levi benitã txibãkĩ taewabainaya

15-16hanua txipu Jesus inũ hawẽ tsumabũ Levĩ hiwe anushũ piaibũ habianuri Roma shanẽ ibu pei bishũmisbu itxapa inũ habũ fariseubũ yusĩa nĩkaisbuma itxapabũ Jesusũ tsumabu habubetã piriaibũ Deusũ hãtxa kenenibu yusĩnanãmis fariseubũ Jesusũ habubetã piai uĩkĩ hawẽ tsumabu yukakĩ:

—Haskakĩ matũ yusĩnã pei bishunikabu inũ ha huni txakabũ nuku nĩkaisbumabetã pimẽkaĩ? Txakabuki— ikaibu 17Jesusũ hatũ hãtxa nĩkatã hatu yuikĩ:

—“Ẽ peki”, iwanã, xinaĩbu anu huni dauya kaismaki. Hakia isĩ teneaibu anu besti huni dauya kenabu kamiski. Haskakẽ: “Ẽ txakabuki”, iwanã, xinaĩbu hatũ huĩti pewakĩ merabewatanũ ika ẽ hushuki, huni dauya keskairã. Hakia: “Ẽ txakabumaki”, iwanã, xinaĩbu hatu merabewatanũ ika ẽ huamaki— hatu wanikiaki.

Samakemisbũ Jesus yukanibukiaki, na hãtxarã

(Mt 9.14-17; Lc 5.33-39)

18Hanua Naximanika Joãoki txiti ikabu inũ fariseubuki txiti ikaburi samakeaibũ huni betsabu Jesus anu kashũ yukakĩ yuikĩ:

—Joãoki txiti ikabu inũ fariseubuki txiti ikabu hatũ txakabuwẽ taea hatũmebi itxakanikai samakekĩ habũ hawa piyuisbumaki. Hamẽ haskai miki txiti ikabu samakeama pikubaĩmisbumẽ?— akabu 19Jesusũ hatu yuikĩ:

—Huni aĩyaĩ nawaibu anu hawẽ haibuaibu pashkariabuma piama hatũmebi itxakanikatirubumaki. Hakia hatu shunũbaini kakẽ manui hawẽ haibuaibu samakekĩ piama iyutirubuki. 20Habiaskari wakĩ ea atxishũ iyuaibũ ewẽ nui ẽ haibuaibũ piama iriashãkanikiki— iwanã,

21ana yusĩkubaĩkĩ yuikĩ:

—Ẽ yusĩanã, tari bena txukariama keskaki. Matu yusĩnũ nĩkakãwẽ. Tari sheni bashnekea tari bena tuash txukariamawẽ tari sheni tsamĩa patsa estei ana bashnekemiski. Hamẽ matũ yusĩanã, tari sheni bashnekea keskaki. Ẽ yusĩawẽ tsamĩa keska wakĩ matũ yusĩa ẽ pewatirumaki. 22Ana habiaskari keskawẽ matu yusĩnũ nĩkakãwẽ. Bitxi bixtu sheniki uva hene bena buspuriama manekĩ mata washũ denesh mestẽwã hamebi katsai buspui bitxi bixtu sheni peshemiski, vinho bena inũ bitxi sheni benuirã. Habiaskari wakĩ ẽ yusĩa bena matũ xinã sheni ẽ husitirumaki, benukinã— hatu wanikiaki.

Sábado huĩrukũtitiã Jesusũ tsumabũ shekiwã bimi tsekanibukiaki, na hãtxarã

(Mt 12.1-8; Lc 6.1-5)

23Hanushũ ana sábado huĩrukũti betsatiã shekiwã banaimabu anu manã baiwẽ kakĩ hawẽ tsumabu Jesusbe bukĩ shekiwã bimi tsekashũ pikubainaibũ 24fariseubũ hatu uĩkĩ Jesus yukakĩ:

—Hawai huĩrukũti sábadotiã dayakanimẽkaĩ? Dayakĩ Deusũ Moisés nuku nemamani mĩ tsumabũ kanekanikiki— akabu 25Jesusũri hatu yuikĩ:

—Bunikĩ hawara nukũ shenipabu pepa Davĩ hawẽ haibuaibubetã anirã, mã uĩsmamẽ? 26Matu yuinũ nĩkakãwẽ. Abiatar Deusbe nukunabu hãtxashunika shanẽ ibuaya Deus kẽwãti tari hiwe merã Davi hikishũ ha meribi misi Deus uĩmakĩ hanakubainaibu Deusbe nukunabu hãtxashunika habũ besti pitibiakẽ hawẽ Deus kẽwãti misi Davi bunikĩ bishũ pitã hawa dateama hawẽ haibuaiburi pimarianiki. Haska wabiaya Deus haki sinatama iniki— hatu watã

27habianushũri Jesusũ ana hatu yuikĩ:

—Huĩrukũtiwẽ yurabu bikawanũ, iwanã, Deusũ huĩrukũti wama iniki. Hakia hatu merabewanũ, iwanã, huĩrukũti wakĩ Deusũ yurabu ashuniwẽ taeshũ 28ẽ matũ Hutxi Kayabi Iuwatunã, huĩrukũtitiã hamapai betsa betsapa ẽ atiruki— hatu wanikiaki.

Currently Selected:

Marcos 2: cbsBR

Highlight

Copy