Mateus 27

Pilatos anu Jesus iyuaibũ Judas eiskaĩ tenesheketã mawanikiaki, na hãtxarã

(Mc 15.1; Lc 23.1-2; Jo 18.28-32)

1Hanua penaya Deusbe nukunabu hãtxashunika shanẽ ibubu inũ judeu shanẽ ibu betsabu itxa haska wakĩ Jesus tenãtikiri yubakashũ 2Jesus meneshshũ Romano shanẽ ibu Pôncio Pilatos anu iyuaibũ

3Judasĩ hatu atximabirana Jesus tenãkatsi ikaibu uĩkĩ unãkĩ xinaĩ hawẽ nuikĩ ha 30 pei heshe Deusbe nukunabu hãtxashunika shanẽ ibubu inũ shanẽ ibu betsabũ inãxinabu ana hatu inanũ, iwanã, 4hatu yuikĩ:

—Jesus huni pepabiakẽ hau mã tenãnũ txakabu xinãkĩ ẽ matu atximaxinaki. Na pei mã ea inãxinarã, ẽ ana haska hayakatsi ikamaki— hatu wa

hawẽ pei ana bikatsi ikama habũ Judas yuikĩ:

—Mĩ txakabuxina nũ hawẽ nuiamaki. Mĩ nuku haska wamaxinarã, minaki— akabu

5hanua huĩti nixmahairai keyutã hanu Templo hikiti shui sheshekaiã nitã ha pei heshe putakĩ sa atã kaĩkaini ka dispiwẽ tenesheketã dunua mawanikiaki.

6Ha pei heshe sa abaina Deusbe nukunabu hãtxashunika shanẽ ibubũ tupitã yuinamei:

—Na peiwẽ huni atxixĩshũ nũ hatu tenãmai kaiwẽ taeshũ Deus kẽwãkĩ hanu inãkuĩti bauki nũ haska haki nanetirumaki, ha pei himiwẽ iruma keskarã— itã

7hawẽ hawa haska wanãshãpa? ika yuinamei yubakakĩ xinãtã Jerusalém anu bai bea mawabu meribi hanu hatu maiwati wanũ, iwanã, mai kẽti wanikã bai ha 30 pei heshewẽ bikĩ ibu wanibukiaki. 8Haska wanibu na habiatiãri kenakĩ: “Himi Baiki”, nũ wamiski. 9-10Haska Deusũ hãtxa yuishunika Jeremiasĩ bebũkiri hatu yuikĩ: “Habũ 30 pei heshe bishũ mai kẽti wanikã bai bikĩ haska Israelbũ hawẽ karu yubaxina hawẽ pakakĩ ibu washãkanikiki, akĩ Deusũ ea yuia ẽ matu yuishuki”, hatu washũ keneniki. Habiaskari kaneama menekĩ Judasĩ peiwẽ bai bikĩ ibu wanibukiaki.

Pilatõs hau Jesus unãti wanũ hanu iyunibukiaki, na hãtxarã

(Mc 15.2-20; Lc 23.3-5, 13-25; Jo 18.33–19.16)

11Hanua Romano shanẽ ibu Pilatos anu Jesus iyuabu kaĩkirã tsaushũ yukakĩ:

—Miarã, mĩ judeu shanẽ ibubu binu keyuamẽ?— aka

Jesusũ yuikĩ:

—Hawaikika! Habiari mĩ ea yuiaii— akaya

12Deusbe nukunabu hãtxashunika shanẽ ibubu inũ shanẽ ibu betsabũ hakiri yuikĩ txani tibi txiteaibũ Jesusũ hawa yuiama nikẽ 13Pilatõs ana yukakĩ:

—Ha mikiri betsa betsapa txakabu yuiaiburã, mĩ hawa nĩkamamẽ?— aka

14Jesusũ hawa hãtxa betsa yuiama nikẽ:

—Habaa! Haskai hãtxamamẽ? —itã Pilatos harakiri xinãtimawa

Jesus hau tenãnũbũ Pilatõs yununikiaki, na hãtxarã

(Mc 15.6-20; Lc 23.13-25; Jo 18.38–19.16)

15Romano soldadobũ hatu atxishũ bitximabu bari tibi ha Páscoa nawaibutiã hau bestitxai tashninũ ha Romano shanẽ ibu Pilatõs beyawẽ taeshũ maẽ katuaya hatu kaĩmashũpakemiskẽ 16habiatiãri huni betsa detenameti unã keyuai Barrabás atxishũ bitximabũ 17-18hanua Deusbe nukunabu hãtxashunika shanẽ ibubu Jesuski txani txakai haki sinatakĩ haska washũ maematima maemanũ ishũ iyuabu Pilatõs unãkĩ mae anua dasibi itxabu hatu yukakĩ:

—Haratu mã abuai, ha ẽ matu tashnimashunairã? Barrabásmẽkaĩ? Jesus Deusũ Katua Messias kenamisburaka?— hatu wai 19hanu Pilatos governador tsauti anu tsauriakẽ hawẽ aĩnẽ hãtxa bumakĩ yuikĩ:

—Jesuswẽ taea ẽ nama txakaxinaii. Haskawẽ taeshũ ha huni pepa hawa hatubetãs hakiri txakabu yuikĩ hawa yunuyamawe— aka hushũ hawẽ tsumapã yuishũbiaya

20Pilatos nĩkamama hune Deusbe nukunabu hãtxashunika shanẽ ibubu inũ shanẽ ibu betsabũ yurã kaiã Jesuski hatu sinatahairamakĩ yunukĩ:

—Barrabás hau nuku tashnimashũtã Jesus hau hatu tenãmanũ yunukãwẽ— hatu waibu mae anuabũ nĩkaibũ 21Pilatõs ana hatu yukakĩ:

—Ha huni daberã, haratu mã abuai? hawa meama ha ẽ matu tashnimashunairã— hatu wa

habũri Pilatos yuikĩ:

—Barrabás nuku ashũwẽ— iake iakeaibũ

22Pilatõs ana hatu yukakĩ:

—Jesus Messias Cristo kenamisburã, harã, haska wapa?— hatu wa

dasibibũ yuikĩ:

—Cruzki nuku mastashũwẽ— iake iakeaibũ

23ana Pilatõs hatu yukakĩ:

—Natunã, hawa txakabuwaxinamẽ?— hatu wa

ana unãshubima hãtxa kuxipawẽ yuikĩ:

—Cruzki nuku mastashũwẽ— hawẽtxaĩs ikaibũ

24Pilatõs hãtxa hawa nĩkama ana keketikubainaibũ habũ xinã hatu mae wamatiruma Pilatõs unãkĩ hatu unãti wanũ, iwanã, hawẽ soldado yunua ũpash beshuã yurã kaiãnẽ berubi mepanukĩ hatu yuikĩ:

—Na huni pepa ẽ hatu tenãmakatsi ikama matu unãmanũ ika ẽ mepanuaii. Matũ mã haska yunuai bestiwẽ taea mawatiruki— hatu wa

25ha yura dasibibũ yuikĩ:

—Peki. Nuku inũ nukũ bakebũ nũ yunuaiwẽ besti hau mawanũwẽ— akabu

26hanushũ Pilatõs hatu daewakĩ Barrabás hatu tashnimashũtã Jesus hatu kuxa kuxa amatã hau hiki mastatanũbũ hawẽ soldadobu yunua

27hanushũ shanẽ ibu Pilatõs hiwe ewapa hemaĩtĩ anu soldadobũ Jesus iyushũ soldado habus haki shukui keshebaũtã 28hanushũ Jesusũ tari pekatã kashe wakĩ shanẽ ibũ bemakia tari taxihaira Jesus sawematã 29hanua musha maiti washũ maimatã hawẽ mekẽ yusiuri hi siri hawẽ shanẽ ibũ mestẽti keska tsumamatã hanua haki kashei ha bebũ dãti itã yuikĩ:

—Judeu shanẽ ibu kayabirã, mĩ miaki— atã atãkĩ

30haki kemu mitxukĩ habias hi siri tsumamabuwẽ makux makux atã 31kashe wai haki beyusi keyutã bemakia tari taxihaira pekatã hawẽ tari kayabis sawemabaĩkĩ cruzki mastanũ, iwanã, haki mastai kanũ, iwanã, cruz iamatã sharamabaĩkĩ iyuaibũ

Cruzki Jesus mastanibukiaki, na hãtxarã

(Mc 15.21-32; Lc 23.26-43; Jo 19.17-27)

32hanua huni betsa Simão hawẽ mae Cirene anua huaiki nukushũ Jesusũ cruz hau iashũyubainũ soldadobũ yunua iashũbainaya

33Gólgota anu Jesus hari iyukĩ mapematã, haska yuirã, Bushka Shau Mati anurã, 34vinho isĩ nemati dau muka husia amabu metã danãkĩ akamakẽ

35hanushũ cruz beshuki Jesus mastashũ nitxĩtã hanushũ soldadobũ hawẽ beyustiwẽ maemanãkĩ hawẽ tari pashkanũ iwanã: “Tsuã dukũ hawẽ tari bimẽkaĩ? Akãwẽ”, ikĩ Jesusũ tari pashkakĩ menetã 36hanua hau mawanũ Jesus keshea tsaushũ uĩaĩbũ 37habiatiãri hawẽ unãti hi besha tuashki kenekĩ: “Narã, judeubũ Shanẽ Ibu Jesuski”, Pilatõs aka bushũ Jesus mamaki mastariabũ

38habianuri habe huni yumetsu daberi cruz dabeki mastashũ betsa hawẽ yusiuri nitxĩshũ betsa hawẽ yusmauri akabũ 39hanua huni betsabũ itxakĩ daĩbaini buri buri ikĩ 40yuikĩ:

—Uĩwẽ. “Deus kẽwãti mixki Templo tekekĩ purekĩ keyutã shaba dabe inũ besti kaya ẽ ana benishanaii”, mĩ ixiãki. Mĩ ha kuxipa hayarã, haska mĩ Deusũ bakemẽkaĩ ha cruz anua mimebi pashai buturiwe, mawamarã— akaibũ

41Deusbe nukunabu hãtxashunika shanẽ ibubu inũ, Deusũ hãtxa kenenibu yusĩnanãmisbu inũ, judeu shanẽ ibu betsaburi Jesuski kashekĩ yuikĩ:

42-43—Huni betsabu merabewabiamis hamebi pashatirumaki. Haskakenã, haska Israelbũ Shanẽ Ibu Cristo kayamẽkaĩ cruz anua butuai uĩkĩ na habiatiã nũ ikũwãtiruki. Deus ikũwaĩ hakiri hãtxakũkaĩxinaki. Natiãri Deus benimakĩ hau merabewanũwẽ, pashawakinã, haska waya nukũri nũ ikũwaĩnã— ikaibũ

44huni yumetsu dabe habe mastabũri Jesus itxarianibukiaki.

Jesus mawanikiaki, na hãtxarã

(Mc 15.33-41; Lc 23.44-49; Jo 19.28-30)

45Hanua bari mananãbibiakẽ bari nuka mexua itsa daka manaibũ ma bari nai putxinĩ dakakẽ bepenakainaya 46habiatiãri Jesusũ hui kuxipawẽ yuikĩ:

—Elí, Elí, lemá sabactâni?— ikirã huni kuĩ hãtxarã, “Ẽ Deusuũ, ẽ Deusuũ, haskakĩ mĩ ea heneamẽ?” ikaya

47ha namã hatiri mapushũ betsabũ nĩkatã yuikĩ:

—Nĩkakãwẽ, Deusũ hãtxa yuishunika Elias kenaikikirã— ikaibũ

48hanua ha namã mapuabu betsa kuxikirã hanu hawẽ tsiniti vinho muka pu atã tawaki ustãshũ beshũ amanũ, iwanã, sanãshunaya 49betsabũ nemakĩ yuikĩ:

—Haska wama heneyuwe, Eliasĩ butekĩ pashawayuimẽkainã— akaibũ

50hanua Jesus ana unãshubima bis itã mawaya 51habiatiãri Templo merã tari dĩtu wakĩ kebẽnibu hamebi manaũria dis iki keyuaya mai patxa sakuaya mixkipãwã bepunibu maei dabekeaya 52hanua hanu maiwati tãpe shabakabiaya habũ Deus ikũwaĩ mawanibu Deusũ hatu bestẽwã 53Jesus bestẽriamawẽ taea habu dukũ kaĩbaini Jerusalém ha mae meribi anu hikiabu hanushũ yura itxapabũ hatu uĩnibuki.

54Hanua Romano capitão inũ habũ Jesus mekekĩ mai patxa sakui betsa betsai uĩ datehairakĩ yuikĩ:

—Ikũ kayaki. Na hunirã, Deusũ bakeki— ikaibũ

55-56hanua aĩbuaibũ Galiléia anushũ duawakĩ Jesus txibãmisbu Maria Madalena inũ Tiago inũ Josẽ ewa Maria betsa inũ Zebedeũ huni bake dabetã ewari Jesus mawai habu benãta nishũ uĩrianibuki.

Jesus mawa maiwanibukiaki, na hãtxarã

(Mc 15.42-47; Lc 23.50-56; Jo 19.38-42)

57Hanua ma bari kaya judeu betsa mabu pai paimaya hawẽ kena José Arimatéia anua kaĩnitũ Jesus ikũwãkĩ txibãkubaĩxinatũ 58ana hawaki dateama Pilatos anu kashũ Jesus maiwakatsi hawẽ yura yuka hau Josẽ butetã butanũ Pilatõs haska yunua 59kashũ Josẽ hawenabubetã butetã tari hushupawẽ dayabutã buaibũ 60aĩbu dabetã hatu txibaĩbũ hawẽ yura bakebaĩkĩ bukĩ hawẽ bai neki mixki kini bena hatu amaima anu Jesus datãtã mixki beputi ewapawẽ beputã buaibũ 61habianuri Maria Madalena inũ Maria betsa maiwati tãpe anu ha bebũ niti ika tsaushũ dasibi uĩnibukiaki.

Jesusũ yura hau yumetsuyamanũbũ soldadobu keshemanibukiaki, na hãtxarã

62maiwaxinabu judeubũ huĩrukũtitiã Deusbe nukunabu hãtxashunika shanẽ ibubu inũ fariseubu Pilatos anu habe hãtxanũ ika bua itxashũ 63yuikĩ:

—Shanẽ ibuũ, ha huni txani txakakĩ mawariama hãtxai nũ nĩkamisrã: “Mawa shaba dabe inũ besti kaya ẽ ana bestẽshanaii”, ixiã nuku yuixinabu nũ xinaiĩ. 64Haskawẽ taeshũ shaba dabe inũ besti binuriama maiwaxinabu hau kesheshũ meke pewanũbũ mĩ soldadobu yunuwe. Mĩ hatu haska wamamakẽ mexu merã hawẽ tsumabu beshũ hawẽ yura hune tsekabaĩ butã txipu yurã kaiã yuikĩ: “Nukũ Shanẽ Ibu ma nuku bestẽshũ kaĩxinaki”, iwanã, dasibibu hatu parãtirubuki. Haska wakĩ hawẽ txani hãtxa hatu pikumatirubuki— akabu

65Pilatõs hatu yuikĩ:

—Na soldadobu mã hayaki. Maturi maiwaxinabu anu hatube bushũ hatu pewamatãkãwẽ, hau haska yumetsuyamanũbunã— hatu wa

66bushũ hawẽ beputi mixkiki huni betsã bepeã unãti xarawakĩ hawẽ unãti dispiki tsamĩtã pũtekĩ beweshetã hau mekekĩ uĩnũbũ soldadobu yunukĩ keshematã benibukiaki.

Currently Selected:

Mateus 27: cbsBR

Highlight

Copy