Mateus 26

Jesus atxishanũ ika yubakanibukiaki, na hãtxarã

(Mc 14.1-2; Lc 22.1-2; Jo 11.45-53)

1Hanushũ nũ hawẽ tsumabu haska dasibi Jesusũ nuku yusĩ menetã nuku ana betsa yuikĩ:

2—Ha Páscoatianã, Egito anushũ Deusũ yunua debuwanika nai tsumã nawã bakebu tenãkĩ nukũ shenipabu dũkebaini xinãmatitianã, usha dabe ma kemai misi shashama nũ pimis mã unaiĩ. Haska inũ, ẽ matũ Hutxi Kayabi Iuwa ea tenãnũ ishũ cruzki ea mastakatsi ikĩ samama ea atxitã ea hatu inãkatsis ikanikiki— nuku waya

3habiatiãri Deusbe nukunabu hãtxashunika shanẽ ibubu inũ judeu mae shanẽ ibu betsabu bui Deusbe nukunabu hãtxashunika shanẽ ibuhaira Caifásĩ hiwe anu dasitã itxa 4haska washũ Jesus beparãtã tenãtima yubakaibu 5betsã hatu nemakĩ yuikĩ:

—Páscoa nawaibutiã meyamayushãkãwẽ, nukunabu nukuki sinatai berukubaũtirubukirã, betsatiã nũ atirumẽkainã— hatu wa haska xinaĩbũ

Aĩbũ Jesuski sheni maukanikiaki, na hãtxarã

(Mc 14.3-9; Jo 12.1-8)

6Jerusalém txaima Betânia anushũ Simão yuraki txamini Jesusũ kaya waimatũ hawẽ hiwetãshũ 7Jesus pimaya aĩbu betsã nẽkati bixtu hushupaki sheni inĩ has karuhaira beshũ tesketã Jesusũ bushkaki mauka haki hababainaya 8nũ hawẽ tsumabu hatiritũ inĩ mayai shetekĩ uĩ haki sinatai yuinamei:

—Haska wakĩ ha sheni karuhaira hamẽ txakawakĩ maukashumẽ? 9Hatu inãshũ hawẽ pei mirima bitã nuitapaibu merabewatibĩ!— iki aĩbuki nũ ha ikaya

10nũ haskaibu Jesusũ nĩkatã nuku yuikĩ:

—Na aĩbũ ea duawaya haskai mã hari hãtxai? 11Nuitapaibu matube hiweabu mã hatu duawapaketiruki. Hakia earã, hawẽtxaĩs mã ea duawapaketirumaki. 12Haskakẽ eki sheni ininipa maukakĩ na aĩbũ ẽ mawariama bebũkiri ẽ yura ea pewashuki, hau hawama ea maiwaxarashanũbunã— itã 13—Shabakabi ikũ ẽ matu yuiaii. Mai hirabi anushũ kakape ekiri txanibaũkĩ na aĩbũ ea ashu xinãkĩ yuiriabaũshãkanikiki, tsua hau hakimayamashanũbunã— nuku waya

Judasĩ Jesus hatu atximashanũ ika hatube yubakanikiaki, na hãtxarã

(Mc 14.10-11; Lc 22.3-6)

14hanua Jesusũ 12 tsumabu betsa pashkakaĩ Judas Iscariotes Deusbe nukunabu hãtxashunika shanẽ ibubube yubakanũ ika kashũ 15hatu yukakĩ:

—Jesus ẽ matu atximayarã, hati pei mã ea inãtirumẽ?— hatu wa habu benimakaũ habũ 30 pei heshe prata karuhaira inãbu 16hatube haskatani hui nukuki ana nukutã: “Hatiã hanishũ Jesus ẽ hatu atximatirumẽ?” ikĩ xinãkubainaya

Bari kaya Jesusũ hawẽ tsumabubetã hawẽ xinãmati hatu pimanikiaki, na hãtxarã

(Mc 14.12-25; Lc 22.7-23; Jo 13.21-30; 1 Co 11.23-26)

17ha bari Páscoa besi taemisbutiã habianuri misi shashama pikubaĩmisbutiã ikaya, hanushũ nũ hawẽ tsuma betsabũ Jesus yukakĩ:

—Hani kashũ nawakĩ bari kaya piti bawakĩ mia pewashũtãpa?— akabu

18Jesusũ hawẽ tsuma dabe nitxĩkĩ yuikĩ:

—Bui Jerusalém anu hikitã ha huni betsa nũ unaĩ anu hawẽ hiwe anu kashũ yuikĩ eska watãkãwẽ: “Nukũ yusĩnã nuku yuishurã, mia yuipa? Ma ẽ mawa kemashũ mĩ hiwe anushũ Páscoatiã nawakĩ xinãmati piti ẽ tsumabubetã pinũ ika huikiaki. Hanishũ bawakĩ pewashũpa?” akĩ ea yuishũtãkãwẽ— hatu wa

19hawẽ tsumabu kaĩbaini Jerusalém mae ewapa anu hikitã haska Jesusũ hatu yuishu hiwe ibu yukatã hanushũ nawakĩ Páscoa piti bawa menetã txĩtũbaina

20ibai ma bari kai mexuaya Jesus nũ hawẽ 12 tsumabube kai hikitã tapu anushũ nũ hatubetã piaibũ 21Jesusũ nuku yuikĩ:

—Ikũ ẽ matu yuiaii. Haratutũra mã ea hatu atximai kaii— nuku wa

22nuku haska wai nĩkatã nũ hawẽ tsumabu huĩti nixmai keyutã yukakĩ:

—Shanẽ Ibuũ, habia ẽ eamẽ?— nũ iaketãyã

23Jesusũ nuku yuikĩ:

—Na habias kẽtxaki ebetã misi pukushũ mã piaitunã, hatũ ea hatu atximai kaikiki. 24Haska ekiri kenenibu txibaĩ matũ Hutxi Kayabi Iuwa ẽ haskai mawai kaii. Hakia ha hunĩ ea hatu atximai kairã, pemahairaki! Haskakẽ ha huni kaĩyãma inirã, pepakeanaii— nuku waya

25Jesus hatu atximai kabiakatsi Judasĩ beparãkĩ yukakĩ:

—Yusĩnaã, habia ẽ eamẽkaĩtsa?— aka

Jesusũ yuikĩ:

—Hawaikika! Habiari mĩ yuiaii— akaya

26nũ piaibũ Jesusũ misi betsa tsumashũ Deus kuxipa yukatã tũketã inãkĩ nuku yuikĩ:

—Na misi betsarã, ẽ nami keskaki. Bibaũkĩ pikãwẽ— nuku wa ture betsa bitã metesh atãkĩ nũ pibaunaibũ

27-28hanushũ kẽtxa vinho mata tsumashũ Deus kẽwãriatã nuku inãkĩ yuikĩ:

—Yura itxapa merabewakĩ hatũ txakabu Deus hatu buamai ẽ mawaya ẽ himi ea ikũwaĩbu hatu dasibi habashũshanikiki. Na vinho ẽ himi keskaki, hawẽ ẽ yubakai bena xinãmatirã, akãwẽ— nuku wa bitã tusa nũ nushabaunaibũ

29—Ikũ ẽ matu yuiaii. Ẽ Epa Deusbe shanẽ ibui ẽ ana huriama na uva vinho ẽ ana matubetã ayuama ishanaii. Abaũkãwẽ— nuku waya

Pedro haki dakei kaikiri Jesusũ yuinikiaki, na hãtxarã

(Mc 14.26-31; Lc 22.31-34; Jo 13.36-38)

30habianuari Salmos Davĩ keneni betsa betsapa nukũ huiwẽ nawai menetã hanua ma Judasĩ nuku pashkabaĩkẽ Oliveiras Mati anu nuku iyushũ 31Jesusũ nuku ana yuikĩ:

—Hawẽ hãtxa yuishunika ekiri Deusũ yuikĩ: “Txashuwã hatũ mekenika ẽ tenãyã hawẽ txashuwã datei pashai keyushãkanikiki”, aka nĩkatã kenenikẽ na habia mexutiã habiaskariai matu dasibibũ ea xinãma mã ea henebaini pashariaii, txashuwã keskairã. 32Hakia ea tenãbiabu ana bestẽtã hanu matuki nukunũ ika bebũkiri Galiléia anu ẽ matu kashũshanaii— nuku waya

33Pedrõ yuikĩ:

—Miwẽ datei dasibi pashai keyuaibũ eãnã, ẽ mia hawa henekĩ putamaki— ikaya

34Jesusũ Pedro yuikĩ:

—Haskamaki. Txanima ẽ mia yuiaii. Na habia mexu merã takara keuriamakẽ: “Ẽ ha unãmaki”, iki dabe inũ bestiki eki dakekĩ mĩ yui kaii— aka

35nĩkamas hãtxa kuxipawẽ Pedrõ ana yuikĩ:

—Haskamaki. Ẽ mibe mawabiai kai haskai ẽ miki dakeamaki— ikaya

nũ hawẽ tsuma dasibibũ xinãma habiaskasri nũ yuirianibuki.

Getsêmani anu ka Jesus Deusbe hãtxanikiaki, na hãtxarã

(Mc 14.32-42; Lc 22.39-46)

36Hanua Jesus nũ hawẽ tsumabube kai mibã shuku betsa hawẽ kena Getsêmani mixkiwẽ kenenibu anu hikitã nuku yuikĩ:

—Nenu habianu tsauyukãwẽ, ẽ Deusbe hãtxai kairã— ikaĩkĩ

37Pedro inũ Zebedeũ bake dabe Tiago inũ João besti iyui kai punu nuka hawẽtxaĩs huĩti meteshekei niti itã 38hatu yuikĩ:

—Ẽ yurawẽ mawakĩ ẽ matu shunũbaĩshanai xinaĩ ẽ punu nukahairaki. Na habianushũ ushama ea manakãwẽ— hatu wabaini

39hanua kai txaima ka beuwa maiki beti ishũ Deus yukakĩ:

—Ẽ Epa Deusuũ, hamapai dasibi mĩ atiru ẽ unaiĩ. Hau ea tenãyamanũbũ mĩ hatu nematirubia haska ẽ xinaĩwẽ akama mĩ xinã bestiwẽ ea ashãwẽ— atã

40hanua hawẽ tsuma dabe inũ besti anu txĩtũkirã ushabuki nukutã hatu datekĩ Pedro yuikĩ:

—Hawai mã ushamẽ? Ushama hora bestitxai beru mestẽwãtã mã ea manatirumamẽ? 41Txanima matũ xinã pebia matũ yura babuwẽ taea mã punu nukaya matuki txakabu hikia mã kaneyamanũbũ Deusũ hau matu merabewanũ ushama habe hãtxakãwẽ— hatu awani

42ana Deusbe hãtxai kashũ yuikĩ:

—Ẽ Epa Deusuũ, ẽ yumãyamanũ ea unãti wakĩ mĩ henekatsi ikamarã, peki. Mĩ xinãnẽ besti ea ashãwẽ— atã

43ana hua ma usha paẽ hatu atxia ushabuki nuku wani 44hawa hatu yuiama ana txĩtũkaĩ Deusbe hãtxai kashũ habias hãtxa yuitã 45hanua hawẽ tsumabu anu ana hushũ hatu yuikĩ:

—Haskaira mã usha nĩkama usha bestia mã huĩrukũsi ikanai? Uĩkãwẽ. Ẽ Deusũ bake matũ Hutxi Kayabi Iuwa huni txakabubũ ea atxi bei ma kemakanikiki. 46Benirikãwẽ, nũ kanunã. Ea hatu atximai hatube ma huikiki— hatu wai

Jesus unãmamabaĩ atxinibukiaki, na hãtxarã

(Mc 14.43-50; Lc 22.47-53; Jo 18.2-11)

47Jesus hãtxa meneriamakẽ Deusbe nukunabu hãtxashunika shanẽ ibubu inũ mae shanẽ ibubu betsabũ hatu yunua huni itxapa nupe txaipayabu inũ kuxati hiyabube Jesusũ 12 tsuma betsa Judas Iscariotẽ hatu iwekĩ 48Judasĩ bebũkiri hatu yubakĩ yuikĩ:

—Ha ẽ tãtsu akairã, haki. Atxishũ iyukãwẽ— hatu abirãshuwẽ taeshũ

49Judas Iscariotes Jesuski nukutuxikĩ yuikĩ:

—Yusĩnaã, ẽ miki ma nukuyuaii— iwanã, tãtsu akaya 50Jesusũ yuikĩ:

—Peki, ẽ haibuũ. Ea haska wanũ ika mĩ hatube yubakakiranairã, ea hatu amariwe— akaya —Hakiaki. Akãwẽ— ibaĩ atxiaibũ

51Jesusũ tsuma betsã hatu mepãmanũ ika naxui ikaĩ hawẽ nupe txaipa sitã Deusbe nukunabu hãtxashunika shanẽ ibuhairatũ tsuma mapeshpaikĩ maebaĩ pashteaya 52Jesusũ hawẽ tsuma nemakĩ:

—Ana hatu meama mĩ nupe ana hawẽri usũwẽ. Tsuabura nupe txaipawẽ detenameaibu habiawẽri mawashãkanikiki. 53Na ea eska waibu ẽ Epã hau ea merabewanũ ẽ yukaya samama hawẽ nai tsumabu 12.000 ea merabewamai hawaira niri ibirã ea ashũtirubu mĩ unãmamẽ? 54Hakia Deusũ haska waya hawẽ hãtxa yuishunikabũ ekiri keneama iniburã, ea haska wabuma ikeãkanaii— iwanã,

55mapuabu uĩkĩ hatu yuikĩ:

—Uatiã shaba tibi Templo hemaĩtĩ anushũ ẽ matu yusĩkubainai mã ea shabakabi atxiama ikubaĩxinabuki. Haskai natiã mexu merã yumetsu atximisbu xinaĩ hawẽ deteti nupe txaipaya inũ hawẽ kuxati hiya mã bekãshumẽ? 56Eskawẽ taea mã ikaii. Deusũ hãtxa bebũkiri ekiri kenenibu haska yuiniwẽ taeshũ mã ea atxiaii— hatu waya hanua dasibi nũ hawẽ tsumabu datekĩ Jesus besti henebaini pashai nũ hunei keyubainaibũ

Shanẽ ibubu Sinédrio anu Jesus iyunibukiaki, na hãtxarã

(Mc 14.53-65; Lc 22.54-55, 63-71; Jo 18.12-14, 19-24)

57hanua atxitã iyukĩ Deusbe nukunabu hãtxashunika shanẽ ibuhaira Caifásĩ hiwe anu hanu mae yununika shanẽ ibu betsabu inũ, Deusũ hãtxa kenenibu yusĩnanãmisbu habu dasibibu habu dukũ bua itxa maniabu anu Jesus iyukĩ hanu bitxiaibũ 58hanua Pedro datei benãta kakĩ txibãkubaina Caifásĩ hiwe hemaĩtĩ mixki kenebaunibu anu hikiriatã haska wakanimẽkaĩ? uĩnũ ika Templo mekenikabube tsaushũ uĩayã

59hanushũ Deusbe nukunabu hãtxashunika shanẽ ibubu inũ Sinédriobu dasibi itxashũ Jesus hau tenãnũbũ hakiri txakabuhaira yuiaibuwẽ txani hãtxa ikũ keska watã hawẽ unãti watã tenãkatsi benai maniabũ 60huni betsa betsapabũ hakiri txani txitebiakĩ hakia huni dabetũ habias txani yuiabumakẽ atimas huni daberi haki txani txakakĩ 61yuikĩ:

—Nukũ nĩkakinã, Jesusũ eska yuiai nũ nĩkaxinaki. Matu yuinũ: “Na mixki Templo hunibũ anirã, tekekĩ purekĩ keyutã usha dabe inũ besti kaya hunibũ akamakẽ ana ẽ benishanaii”, ikai nũ nĩkaxinaki— hatu wabu

62haska waibu nĩkabaikĩ Deusbe nukunabu hãtxashunika shanẽ ibuhaira Caifás namakis dasiabube tsauwa benitã nishũ Jesus yukakĩ:

—Na hunibũ mikiri txakabu yuiaiburã, miarã, haskai mĩ hatube kemanameamamẽ?— aka

63Jesus pes hawa yuiama nikẽ Deusbe nukunabu hãtxashunika shanẽ ibuhairatũ ana yuikĩ:

—Deus hiweatũ mia nĩkaya hau mĩ txanitxakayamanũ ẽ mia yunuai, ikũ nuku yuiwe. Habia mĩ miamẽ ikairã, mĩ Deusũ bake nukũ mekenã Messias Cristorã?— aka

64Jesusũ yuikĩ:

—Habiari mĩ yuiaii. Hamẽ eã ẽ mia yuiairã, ẽ Epa Deus kuxipahairatũ yusiuri ẽ tsauwa matũ Hutxi Kayabi Iuwa nai kuĩwẽ ẽ huai mã ea uĩshanaii— akaya

65Deusbe nukunabu hãtxashunika shanẽ ibuhaira haki sinatahairakĩ hawẽ tima tari uxnitã yuikĩ:

—Deus itxaikiki. Ana hatira hãtxai ẽ nĩkakatsi ikamaki. 66Na haska hãtxayarã, haskara hakiri mã xinaĩ?— hatu wa

habũ yuikĩ:

—Deus ma itxawẽ taeshũ hau tenãnũbũwẽ— iake iaketã

67itxakawakĩ taewakĩ betsabũ besuki kemu mitxukĩ kuxaibũ betsabũri tãpais akĩ 68kashe wakĩ yuikĩ:

—Mĩ Deusũ Messias Cristorã, tsuã mia kuxaimẽkaĩ? unãtã nuku yuiwe— akaibũ

Pedro Jesuski dakei kaikiri yuibirana haskanikiaki, na hãtxarã

(Mc 14.66-72; Lc 22.56-62; Jo 18.15-18, 25-27)

69hanua hemaĩtĩ anu Pedro tsauwa shanẽ ibu dayashũmis aĩbu betsã betxitã yuikĩ:

—Miarã, Jesus Galiléia anuabe mĩ nimiski. Ẽ mia unaiĩ— aka

70Pedrõ parãkĩ habube itxabu bebũshũ yuikĩ:

—Haskamaki. Ha mĩ hari yuiairã, ẽ ha unãmaki— abaini 71hanu hemaĩtĩ kenekawana hikiti shui anu ka nikẽ aĩbu betsãri hanu nia uĩkĩ hatu yuikĩ:

—Ha hunirã, Jesus Nazaré anuabe nimiski— hatu waya

72hanushũ Pedrõ ana hatu yuikĩ:

—Haskamaki. Deusũ ea kupitiruwẽ taea ẽ txani txakamaki. Ha hunirã, ẽ ha unãmaki— hatu wa

73hanua habianu manishũ betsabũri Pedro uĩriakĩ haki kemashũ yuikĩ:

—Ikũki. Galiléia anuabu mĩ hawẽ hãtxaki. Mĩ Jesusũ tsuma betsaki. Hari mã hãtxamisbĩ nũ mia nĩkai— akabu

74hanushũ Pedrõ hatu ana parãkĩ yuikĩ:

—Ha huni mã yuiairã, ẽ ha unãmahairaki. Ẽ txani txakayarã, hau Deusũ ea kupinũwẽ— hatu waya

hakimamari takara keuai 75nĩkatã haska Jesusũ Pedro yuikĩ: “Dabe inũ bestiki: ‘Ẽ ha unãmaki’, akĩ takara keuriama mĩ yuishanaii”, abirana Pedrõ xinaĩ tashnikaĩ kashatxakayamanikiaki.

Currently Selected:

Mateus 26: cbsBR

Highlight

Copy