Mateus 25

Miyuikĩ dez txipaxbukiri Jesusũ hatu unãmakĩ yusĩnikiaki, na hãtxarã

1hanushũ miyui betsawẽ nuku ana yusĩkĩ yuikĩ:

—Deus shanẽ ibui haskashanaikiri matu ana yusĩnũ nĩkakãwẽ. Txipaxbu mekẽ dabetibũ hatũ bĩ dekutã hatũ haibu beneyai anu haki habe nukui kakatsi hawẽ bene huai haki nukutã iyushunũ ika bai putxinĩ haki nukui ka maniabu keskanu Deus shanẽ ibushanikiki. 2-4Hanua ha txipax mekẽ besti bebũkiri unãnepakĩ hatũ bĩ dekua inũ netsuai ana maneti bixtu betsa hayabũ hanua ha txipax betsa mekẽ besti unãnepama hatũ bĩ dekua besti netsua hawa ana maneti hayabumakẽ 5hanu ha huni hatuki nukuti waxina binuaya manatxakayamaxinaibũ ha txipax mekẽ dabeti ushabũ 6atimas huni ha manaibu yamenapũ huai tsuãra nĩkatã hatu bestẽwãkĩ unãshubima yuikĩ: “Hawẽ bene mã manairã, ma huikiki. Iyushũritãkãwẽ”, hatu wa 7dasibi bestẽbaũ hatũ bĩ ma nuka kemai bĩ hene manenũ, iwanã, 8ha txipax mekẽ besti unaĩsmapabũ ha bebũkiri unãnepabu hatu ea akĩ yuikĩ: “Hau nukũ bĩ nukayamarianũ matũ bĩ hene nuku tusashũyukãwẽ”, hatu wabu 9hakia ha txipax unãnepabũ hatu yuikĩ: “Haskamaki. Matuna nũ matu maneshũkẽ nukunari netsui nukatiruki. Haskakenã, bushũ hanua bĩ hene bimisbu anua bitãkãwẽ, matuna ibubisrã”, hatu wabu 10ha unaismapabũ bĩ hene bi hamakiri buabũ hatumaki hatũ haibũ bene huai ha txipax unãnepabũ itani hua habe nawai hikiabũ hanushũ beputi ma bepuabũ 11hanua ha katxu ha txipax unãnepama beshũ hatu kenakĩ yuikĩ: “Shanẽ ibuũ, nũ mibe hikiai nuku bepẽshũwẽ”, akabu 12hatu yuikĩ: “Haskamaki. Mã ea manakakĩ pewama ishuki. Mã tsuabumẽkaĩ, ẽ matu unãmaki”, hatu washanikiki— nuku watã,

13—Na miyuirã, haska mã nĩkashumẽ? Ẽ matũ Hutxi Kayabi Iuwa hatiãra ẽ ana hushanai tsuã mã unãmawẽ taea tsuara ebe hiwekatsi iki unãnepai hawa txikixama pepakũkaini Deusbe hãtxakĩ ea manakĩ uĩrakubaĩshãkãwẽ— nuku watã

Hawẽ tsuma pepabu inũ txikixbukiri miyuiwẽ Jesusũ hatu yusĩnikiaki, na hãtxarã

14hanushũ miyui betsawẽ Jesusũ nuku ana yusĩkĩ:

—Deus shanẽ ibui haskashanaikiri betsa matu ana yuinũ nĩkakãwẽ. Deus shanẽ ibuirã, huni txai ka keska ishanikiki. Huni betsa mai pakea betsa anu katanũ, iwanã, hawẽ tsumabu kenashũ hau hawẽ taea dayanũbũ hawẽ pei tanashũ pashkatã hatu inãyukĩ 15hawẽ tsuma unãnepa betsa hawẽ pei ha dukũ inãkĩ pei heshe itxapa 5.000 inãtã ha katxu unãnepa beshmas pei heshe itxapari 2.000 inãriatã hanua hawẽ tsuma betsa unãnepa mirĩ 1.000 inãriatã txai kaxĩkẽ 16ha unãnepa 5.000 inãbaĩxina hawa txikixama dayai inãnanãkĩ ana 5.000 hawẽ shanẽ ibu bishũkubaĩkĩ itxawashunaya 17ha unãnepa beshmas 2.000 inãbaĩxinari habiaskari dayashũkĩ ana 2.000 hawẽ shanẽ ibu bishũkubaĩkĩ itxawashunaya 18hakia ha 1.000 besti inãbaĩxinari txikixi hawa dayashũkatsi ikama hune mai pukĩshũ hanu hawẽ shanẽ ibũ pei arukĩ bepukĩ pewashũxĩkẽ

19hanua hatũ shanẽ ibu bari itxapa hiwetani hushũ hawẽ tsumabu hawẽ pei inãbaini: “Ẽ pei ea haskawãyamabumẽkaĩ uĩnũ”, iwanã, hatubetã pewakatsi hatu kena 20ha 5.000 inãbaĩyama ha dukũ hushũ pei itxawashũkubaĩxina beshũ inãkĩ yuikĩ: “Shanẽ ibuũ, 5.000 mĩ ea inãbaĩyamarã, inãnanãkĩ ana 5.000 ẽ mia bishũkubaĩxinarã, naki”, akĩ 10.000 inãyã 21hawẽ shanẽ ibũ yuikĩ: “Mĩ ẽ tsuma pehaira kaneismaki. Eskarabes ẽ mia yunubiabaini inãnanãkĩ hawa benuama mĩ pe mekekĩ kaneama ixiãwẽ taeshũ ana daya itxapa ẽ mia yunushanaii. Haskawẽ taea natiã ebe benimatxakayamariwe”, akaya 22hanua ha 2.000 inãbaĩyamari ha katxu hikishũ pei itxawashũkubaĩxina beshũ hãtsiri inãriakĩ yuikĩ: “Shanẽ ibuũ, 2.000 mĩ ea inãbaĩyamarã, inãnanãkĩ ana 2.000 ẽ mia bishũkubaĩxinarã, naki”, akĩ 4.000 inãyã 23hawẽ shanẽ ibũ hari yuikĩ: “Mĩ ẽ tsuma pehaira kaneismariki. Eskarabes ẽ mia yunubiabaĩyama inãnanãkĩ hawa kaneama mĩ pe mekekubaĩxinawẽ taeshũ ana daya itxapa ẽ mia yunushanaii. Haskawẽ taea natiã ebe benimatxakayamariwe”, akaya 24-25hanua ha 1.000 inãbaĩyama hari hawẽ henei hikishũ hawẽ shanẽ ibu yuikĩ: “Shanẽ ibuũ, naki, mĩ peirã. Miwẽ datekĩ mĩ pei benukatsi ikama bibaini kashũ mai pukĩshũ ẽ mia arushũyamaki. Dayakĩ hawa mibã banamabia mĩ itxawamiski. Hanua heshe sa akamabia mĩ itxawariamiski. Mĩ huni mesekẽ miwẽ datekĩ mĩ pei ẽ mia arushũyamaki”, akaya 26hanushũ shanẽ ibũ yuikĩ: “Mĩ ẽ tsuma txakabu txikixtxakamaki. Txanima dayakĩ hawa mibã banaumabia ẽ itxawamiski. Ha inũ, heshe sa akamabia ẽ itxawariamiski. 27Ha unãtã haskakĩ banco anu conta watã inãnanãkĩ ẽ pei mĩ ea arushunama iyamamẽ, ibubis hushũ ẽ pei shekekũkainai ẽ biyui kanunã?” atã 28hawẽ tsuma betsabu mapuabu hatu yuikĩ: “Ha txikixĩ pei ha 1.000 mebĩtã ha 10.000 haya inãkãwẽ”, iwanã, 29ana hatu yuikĩ: “Tsuara na ẽ tsuma pepa keskatũ hawara haya pe mekea unãtã itxapa hayawẽ manakukĩ ana itxapa ẽ inãshanaii, binumakinã. Hakia tsuara na ẽ tsuma txikix keskatũ hawara haya pe mekeama ha eskarabes haya unãtã ẽ mebĩshanaii. 30Haskawẽ taeshũ mexuhaira anu hanua bika tenei kashai sheta yẽsh yẽsh ashanaibu anu na ẽ tsuma txakabu urẽtãkãwẽ”, hatu waniki— iwanã,

Mai hirabi anu hiweabu unãtiwatã Jesusũ hatu kupishanaikiri hatu yusĩnikiaki, na hãtxarã

31na miyuiwẽ nuku ana yusĩ pewakĩ:

—Ẽ matũ Hutxi Kayabi Iuwa Shanẽ Ibu txashahaira hui ẽ nai tsumabube hushũ yurabu hãtxa betsa betsapa tibi shukuabu unãti watanũ ika Shanẽ Ibũ tsauti pepaki ẽ tsaukẽ 32-33ẽ nai tsumabũ ea hatu itxawashũkĩ keyushũshãkanikiki. Hanushũ haska txashuwã mekenikã hawẽ txashuwã pashkamis keska wakĩ dasibi enabu txashuwã kayabi keskabu ẽ yusiuri hatu itxawatã ha enabuma txashuwã kayabi keskabuma ẽ yusmauri ẽ hatu itxawariashanaii. 34Hanua ẽ shanẽ ibuhairatũ enabu ẽ yusiuri ẽ hatu nitxiã mapuabu hatu yuikĩ: “Ẽ Epã mai damiwakĩ taewakĩ matu habe hiwemakatsi matu katunishũ natiã matu ma kenaikiki. Habe hiweri bekãwẽ, matu duawai benimaikikirã. 35Matunã, ẽ buniaya mã ea pimaniki. Ẽ ũpash manuaya mã ea ũpash amaniki. Ẽ txaikea hua hani ẽ ushatima yumãyã ea hawa unãmabia hanu ushati ea inãkĩ mã ea duawaniki. 36Ẽ tariumakẽ mã ea tari betsa inãniki. Ẽ isĩ teneaya mã eki bakĩ mã ea xinã txãkãwaniki. Ẽ bitxiti hiwe merã nikẽ ka mã eki bakĩ mã ea xinã txãkãwaniki”, ẽ hatu waya 37hanushũ habũri ea kemakĩ: “Shanẽ Ibuũ, haskamaki. Mĩ buniairã, hanishũ mia uĩkĩ nũ mia pimanimẽ? Mĩ ũpash manuairã, hatiã nũ mia amanimẽ? 38Mia unãmabia duawakinã, hatiã hanu ushati nũ mia yununimẽ? Mĩ tariumakẽ hatiã nũ mia tari betsa inãnimẽ? 39Mĩ isĩ teneairã, hatiã nũ mia uĩkĩ nũ mia xinã txãkãwanimẽ? Mĩ bitxiti hiwe merã nikenã, hatiã nũ miki bai kashũ nũ mia xinã txãkãwanimẽ?” ea wabu 40eãri hatu yuikĩ: “Txanima ẽ matu yuiaii. Na dasibi ẽ betsabu inũ ẽ puiburã, hawaumabubiakẽ nuikĩ mã hatu merabewakubaĩmiski. Hatu haska wakĩ ikũ eari mã ea duawakubaĩmiski”, iwanã, hawẽ yusiuriabu yui keyutã

41hanushũ hawẽ yusmauriabu mapuaburi yuikĩ: “Matu mã txakabuburã, mã enabumaki. Turi burikãwẽ. Haskawẽ taea matunamabia hanu txi nukaisma anu diabo Satanás inũ hawẽ nai tsuma txakabubube yumãkĩ tenekubaĩshanaibu anu maturi burikãwẽ. 42Matubunã, ẽ buniaya mã ea pimama iniki. Ẽ ũpash manuaya mã ea amama iniki. 43Ẽ txaikea hua hani ushatima ẽ yumãyã hanu ushati ea yunukĩ mã ea duawama iniki. Ẽ tariuma yumãyã mã ea tari betsa inãma iniki. Ẽ isĩ tenei yumãyã ea uĩ mã eki bama iniki. Ẽ bitxiti hiwe merã nia yumãyã mã eki bamari iniki”, ẽ hatu wa 44habũri ea yuikĩ: “Shanẽ Ibuũ, hania mĩ haskaya hatiã mia merabewakĩ nũ mia duawama inimẽ?” ea wabu 45eãri hatu yuikĩ: “Txanima ẽ matu yuiaii. Na dasibi ẽ betsabu inũ ẽ puibu hawa hayamabiabuwẽ nuiama ewẽri mã nuiama ikubaĩyamabuki”, ẽ hatu washanaii. 46Hanushũ ha yura txakabubu hatu kupikĩ txi merã hatu yumãwãkĩ enabu pepabu besti hatũ pepawẽ manakukĩ ebe ẽ hatu hiwekuĩmashanaii, ikibi imakinã— nuku waniki.

Currently Selected:

Mateus 25: cbsBR

Highlight

Copy