Gênesis 47
47
1hanua shanẽ ibuhaira Faraó anu José kashũ ma hawẽ epa inũ hawẽ betsabu ma Canaãkiria bei Gósen anu hikikĩ hatũ txashuwã inũ hatũ ina awa inũ hatũ mabu dasibiya bekãshu Faraóki txanitãshũ 2hanushũ hawẽ betsabu 5 katubaĩkĩ iyushũ shanẽ ibuhaira Faraónẽ hau hatu unãti wanũ hatu uĩmaya 3hanushũ Faraónẽ José betsabu hatu yukakĩ:
—Matũ mae anua dayairã, hawa mã imismẽ?— hatu wa hanushũ habũ Faraó kemakĩ:
—Shanẽ ibuũ, mĩ tsumabu nuku dayairã, nũ inabu mekenikabuki, nukũ shenipabu ini keska dayairã— atã
4—Eskawẽ taea mĩ mae anu mibe hiweyui nũ hushuki, nukũ mai pakea Canaã anua buni tenehairai nuku inũ nukũ inabubetã hania hawa pitimarã— iwanã, hanubi hawaira yukakĩ: —Shanẽ ibu pepatuũ, nukuwẽ dabanã ikĩ ha mae Gósen anu nũ hiweyunũ mĩ nuku yunuyutirumẽ?— akabu
5haska wabu Faraónẽ José beiskĩ yuikĩ:
—Uĩwẽ. Mĩ epa inũ mĩ betsaburã, mibe hiwei bekãshuki. 6Egito hirabi mĩ yunumiski. Haskawẽ taeshũ Gósen mae pepa hatu yunuwe, hau hari hiweyunũbunã. Minabu huni ina awa mekea unaĩ mĩ ea hatu yunushũtiruki, habũ hau ẽ ina awa ea mekeshunũbunã— ikaya hanua buaibũ
7hanushũ José hawẽ epari shanẽ ibuhaira Faraó anu iyuriashũ hau unãti wanũ hari uĩmaya Jacó Faraóki mesekĩ kẽwãyã 8hanushũ Faraónẽ yukakĩ:
—Anibuũ, mĩ ma hati bari hayamẽ?— aka 9hatũ yuikĩ:
—Ẽ bari itxapa tekikaĩriamaki, natiã 130 ano na mai anu maea akeakekĩ bika betsa betsapa tenei ẽ hiweyuaii, ẽ shenipabu hiweniti ẽ bari kemariamarã— akĩ
10haska yuitã ha bebunua kaĩkaĩkatsi Jacó yuikĩ:
—Mĩ shanẽ ibu pehairaki. Kayupa, ẽ mabubu ẽ pewayui kairã?— aka
—Haa, mĩ katiruki— aka kaĩkainaya 11hanushũ José hawẽ epa inũ hawẽ betsabu hau hanu hiweyunũbũ haska Faraónẽ yunushu keska wakĩ Egito mai pepa hatu pashkashũkĩ hatu yununikiaki, Ramessés pakeanuarã. 12Hanushũ hawenabu hiweaibu José piti sharabu hatu pimakĩ dasibi hatu pashkashũkubainikiaki.
Piti pashkakĩ hau haska wapakenũbũ José hatu yununikiaki, na hãtxarã
13Hanua mai pakea Egito inũ Canaã hirabi anua hatũ shekiwã keyui buni pikuhairai ana hawawẽ hiwetima yurabu buni paewẽ mawaibũ 14hanushũ José shekiwã hatu inãkĩ Egito anua inũ Canaã anua hatũ daya pei ma hatu keyu biãtã Faraónẽ hiwe ewapa merã arushĩkẽ 15hanua Egito anua inũ Canaã anua habũ pei ma yamakẽ Egito nawabu José anu bushũ haki txanikĩ:
—Ma nukũ pei mĩ nuku keyu biãshinaki. Nũ buniwẽ mawairã, pemaki. Miã nuku pimawe, nũ ana pei hayamakirã— akabu
16José hatu yuikĩ:
—Aa, haskamẽ, mã peiumarã? Ẽ hawẽ taeshũ shekiwã matube bianananunã, matũ inaburi beshũ biriakubaĩkãwẽ— hatu wa
17haska nĩkabaĩ Egito nawabũ hatũ cavalo inũ, hatũ txashuwã inũ, hatũ ina awa inũ, hatũ jumento beshũpakeaibuwẽ taeshũ José shekiwãwẽ taeshũ ina hatu biãkubaĩkĩ bari bestitxai nitxĩtã 18hanushũ bari betsa binukainaya ana bari betsa tashniaya ana haki txani beshũ José yuikĩ:
—Ana nũ mia daketapa wayuaki, nũ ana hawawẽ haskatimahairarã. Nũ mia parãmaki. Nukũ pei inũ nukũ inabu mina wakĩ mĩ ma keyushinaki, ana hawa betsawẽ nukũ piti nũ bitimakirã. Eska besti nũ hayaki, nukũ yura inũ nukũ bai nũ ha mia inãtirumamẽ? 19Nuku hanubi biwe, nukũ yura inũ nukũ bairã, hawẽ taeshũ shekiwã nũ pikubainũbunã. Faraónẽ tsumabu nuku wawe, nukũ bai anushũ nũ ha dayashũkubaĩshanũbunã. Shekiwã mĩ nuku inaĩwẽ hiwekĩ nukũ bai anu banariai nũ hiwekũkaĩyutiruki. Mĩ nuku haska waya nukũ bai anu hamẽ txaka besti beneama iriatiruki. Mĩ nuku haska wamakẽ nũ mawaya nukũ bairi benushanikiki— akabu
20-21haska yukaibuwẽ taeshũ Egito mai pakea hirabi José Faraó bishuãyã buniwẽ taeshũ hatũ yura inũ hatũ bai Faraó bishũtã hatu ibu wamanikiaki, Faraónẽ hawẽ dayaru escravo wamakinã. 22Habũ hawẽ yushĩ tibi Faraó kẽwãshũmisbu mukayabu besti Faraónẽ hatu piti inãkubaina pikubainaibuwẽ taeshũ habũ bai besti José hatu mebiãma inikiaki.
23Hanushũ José yurabu hatu yuikĩ:
—Eskatianã, matu inũ matũ bairã, mã Faraónena bestiki. Ha bishũkĩ ẽ hawena matu wamashinaki. Haskawẽ taeshũ na shekiwã bimi hanu ui ikaitiã banashãkãwẽ. Ha benawati nũ hayaki. 24Hanushũ mã ma pa wa tsekakĩ itxawakĩ 5 mãtxĩ habiatiubus watã mãtxĩ bestitxai Faraónẽ tsumabu mã hatu inã habũ mekeshũkubaĩshãkanikiki. Hanushũ 4 mãtxĩ ha benawati inũ matu inũ matũ bakebu mekeshũtã pimakĩ dasibibũ pi hiweyukubaĩshãkãwẽ— hatu wa
25habu haki shinã txãkãkĩ yuikĩ:
—Shanẽ ibuũ, nuku haska wai haska mĩ huni pepa merabenãmẽ, mĩ nuku hiwemairã? Nũ ikaii, Faraónẽ tsumabuirã— akabu
26José haska wakĩ yunuti kushipa niti ikama Egito hirabi anu wakĩ 5 mãtxĩ tibi anua bestitxai hau Faraó inãkubainũ barinũbũ hatu haska yununikiaki. Hakia hatũ yushĩ tibi Faraónẽ kẽwãshũmisbu mukayabũ hatũ bai tibi hawa Faraónẽ hatu meãmawẽ taeshũ habũ hawa pakama inibukiaki. Na haska yununirã, na eskatiã habias keyuama txibãriakubaĩkanikiki.
Jacó hawẽ bake José yubamanikiaki, na hãtxarã
27Israel hawenabuya Egito anu hiwei buimabu hanu Gósen mae ibu waima hanu hiweyushũ hatũ bakebu pa wai mirimaibũ 28Jacó kaima hari hiwea 17 ano nitxiĩ haria 147 ano haya
29-30shaba betsatiã Israel hawẽ yura mei ma anibuhairai babui mawakatsis ikĩ hanushũ hawẽ bake José txanima yuishũtanabu hua yuikĩ:
—Epaã, ẽ ma mia shunũkatsis ikaii, ẽ ibubuki nukui kairã. Txanima mĩ ea merabewakatsis ikairã, mĩ mekẽwẽ ea kishwakekĩ ea bakewe, nũ yubakanunã— atã yuikĩ: —Ẽ matu mawashuna ewẽ nuikĩ ẽ yura na Egito anu ea mai wama hari mĩ hutxi ẽ mai wani anu hariri ea maiwakĩ buriashãwẽ— aka
—Dateyamawe, haska mĩ ea yuiai keskarã, ẽ mia ashanairã— abia 31hawẽ epã nĩkamas yuikĩ:
—Deusũ nuku uiãyã ea yubawe— akawã José yuikĩ:
—Mĩ ea haska yukayarã, ẽ mia yubaii, Deusũ nuku uĩkĩ nĩkayarã— aka hanua Israelĩ Deus kẽwaĩ na tsaua ibai babutã hawẽ dakatiki dakashĩkẽ
Currently Selected:
Gênesis 47: cbsBR
Highlight
Share
Copy
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
