Gênesis 46

José Egito anu hiweshũ hawẽ ibu Jacó kenashina kanikiaki, na hãtxarã

1Israelĩ dasibi hawẽ mabu pewakĩ keyutã hawenabube tsekekaini kai Berseba mae anu hikitã hanushũ txashuwã bake kuakĩ hawẽ epa Isaque Deus kẽwãkẽ 2habianushũri meshu merã nama keskawẽ Deus Israelbe hãtxakatsi kenakĩ:

—Jacó— aka

—Hawamẽ? ẽ nenukirã, earã— aka 3hanushũ Deusũ yuikĩ:

—Earã, ẽ Deuski, mĩ epa Isaque mekenika Deusrã. Mĩ Egitokiri kairã, dateama katãwẽ. Harishũ minabu ẽ mia hatu pa washũshanaii, mirimahaira hatu wakinã. 4Earã, ẽ mibe kaii, Egito anurã. Habia ea kayabistũri minabu ẽ hatu tashnimabirãshanaii. Mĩ haria mawayarã, mĩ bake José mia putama mĩ haũbia mawashanaii— aka nĩka ishĩ

5hanua Berseba anua Jacó bestẽtã kakatsi ikaya hawẽ bakebũ pewakĩ hatũ epa, inũ hatũ bakebu, inũ hatũ aĩbuaibu ha haki beshanũbũ jumento tarãtiya Faraónẽ hatu yunushinaki hatu nanea 6Jacó dasibi hawenaya hawenabu inũ hawẽ txashuwã inũ dasibi Canaã anu hiweshũ mabu bimis haya dasibiya Egitokiri kakĩ 7hawẽ huni bakebu inũ, hawẽ aĩbu bakebu inũ, hawẽ baba hunibu inũ aĩbu hatu iyui haska kainikiaki.

8Israelbu, Jacó enaburã, hati kena bunibukiaki, Egitokirirã:

9Jacó bake iyua Rúben inũ hawẽ huni bakeburã, hati bunibukiaki, Enoque inũ, Palu inũ, Esrom inũ, Carmirã.

10Hanua ha katxu Simeão inũ hawẽ huni bakeburã, hati bunibukiaki, Jemuel inũ, Jamim inũ, Oade inũ, Jaquim inũ, Zoar inũ, Saulrã. Hanua Saulũ ewarã, Canaã nawa aĩbu inikiaki.

11Hanua Levi inũ hawẽ huni bakeburã, hati bunibukiaki, Gérson inũ, Coate inũ, Merarirã.

12Hanua Judá inũ hawẽ huni bakeburã, hati bunibukiaki, Er inũ, Onã inũ, Selá inũ, Perez inũ, Zerárã. Hanua na daberã, Er inũ Onã Canaã anua mawanikiaki. Hawẽ baba Perezĩ bakeburã, Esrom inũ Hamul burianibukiaki.

13Hanua Issacar inũ, hawẽ huni bakeburã, hati bunibukiaki, Tola inũ, Puva inũ, Jó inũ, Sinromnã.

14Hanua Zebulom inũ hawẽ huni bakeburã, hati bunibukiaki, Serede inũ, Elom inũ, Jaleelrã.

15Hati huni bakebu inũ hawẽ aĩbu bake Diná Padã-Arã anua Jacó Léiaki bawa hawenaburã, 33 bunibukiaki, hunibu inũ aĩbuaiburã.

16Hanua Gade inũ hawẽ huni bakeburã, hati bunibukiaki, Zifiom inũ, Hagi inũ, Esbom inũ, Suni inũ, Eri inũ, Arodi inũ Arelirã.

17Hanua Aser inũ hawẽ huni bakeburã, hati bunibukiaki, Imna inũ, Isvá inũ, Isvi inũ, Berias inũ hatũ pui Sérarã. Hawẽ baba Beriasĩ bakeburã, Héber inũ Malquiel burianibukiaki. 18Hanua Labão hawẽ tsuma Zilpa hawẽ aĩbu bake Léia hau dayashunũ inãni hanubi Léiã hawẽ dayaru Zilpa Jacó yunua haki bake washuni Zilpã enaburã, 16 bunibukiaki.

19Hanua Jacó aĩ Raquelĩ bakeburã, José inũ Benjamim inibukiaki. 20José bakewakĩ hawẽ aĩ Asenateki bakewarã, Manassés inũ Efraim Egito anua kainibukiaki. Asenatẽ eparã, maewã Om anua hatũ mekenika yushĩ kẽwanika Potífera inikiaki.

21Hanua Benjamim inũ hawẽ huni bakeburã, hati bunibukiaki, Bela inũ, Bequer inũ, Asbel inũ, Gera inũ, Naamã inũ, Eí inũ, Rôs inũ, Mupim inũ, Hupim inũ, Arderã. 22Jacó inũ Raquelĩ bakebu inũ hatũ bababurã, 14 bunibukiaki.

23Hanua Dã inũ hawẽ huni bake Husim bunibukiaki.

24Hanua Naftali inũ hawẽ huni bakeburã, hati bunibukiaki, Jazeel inũ, Guni inũ, Jezer inũ, Silémnã. 25Hanua Labão hawẽ tsuma Bila hawẽ aĩbu bake Raquel hau dayashunũ inãni hanubi Raquelĩ hawẽ dayaru Bila Jacó yunua haki bake washuni Bilã enaburã, 7 bunibukiaki.

26Jacó enabu huni betsama hati hawẽ yurabuyas Egito anu hikirã, 66 habe bunibukiaki, hawẽ bakebũ aĩbuaibu hatu tanamarã. 27Hanua Egito anushũ José aĩyãtã bakewarã, dabe inikiaki. Hanua ha Jacóbe Egito anu bea Joséki dasitushiabu tanabu 70 hawenabu habus inibukiaki.

28Gósen anu kakĩ José anu bebũkiri Jacó txanimakĩ Judá yunukĩ yuikĩ:

—“Ẽ ma huai hani haskapa?” ea washũtãwẽ— aka kakẽ Gósen anu hikiaibũ 29José hawẽ betsã yuia unushuri nĩkatã hawẽ tsumabu hatu yunua hawẽ jumento tarãtiya pewashunabu haki inatã Gósen anu hawẽ epaki haki nukui kai haki kemashũ betximatushitã hawẽ epabe ikukunã habe teikukurabetã nui kasha txakayamai nesetã 30hanushũ hawẽ epa Israelĩ José yuikĩ:

—Epaã, txanima mĩ ea hiweshũyuaki, ea kayabis ma ẽ miki nukutushiairã. Hanũkaĩ mĩ berubi ẽ mia mawashũshanaii— aka

31nĩkatã José hawẽ betsabu inũ hawẽ epã enabu hatu yuikĩ:

—Habianu iyukãwẽ. Ẽ matukiri Faraó txanishũyui kairã. “Ma ẽ epa inũ ẽ betsabu Canaã anua ma ebe hiweyui bekãshuki”, akĩ ẽ matu yuishuni kairã. 32“Hatũ txashuwãyã inũ hatũ ina awaya inũ hatũ mabuya ma beabuki. Hatũ dayarã, txashuwã inũ ina awa mekenika imisbuki”, ẽ matu washuĩ kaii. 33Hanushũ Faraónẽ matu kenatã yukakĩ: “Hawa mã dayamismẽ?” matu wa 34unanumas yuiyamashãkãwẽ: “Nukurã, nũ txashuwã mekenikabuki, nukũ shenipabu keskarã”, mã wa matu nĩkatã ha mae Gósen anu matu hiwemashanikiki, Egito nawabu txashuwã mekenikabube mã husitã hiwetirubumawẽ taearã— hatu watã

Currently Selected:

Gênesis 46: cbsBR

Highlight

Copy