Gênesis 45

José hawẽ betsabu unãmanikiaki, na hãtxarã

1José nui paewẽ kashakatsis itxakayamai tenetiruma ha bebũ mapuabu hawẽ tsumabu Egito hãtxa kushipawẽ hatu yunukĩ:

—Nenuarã, kaĩyubaĩtãkãwẽ!— hatu wa dasibi tashniyubainabũ hawẽ tsumabu hayamakẽ José hawẽ betsabu unãmanũ itã 2hatuya kasha berukukaũ kasha txakayamaya hawẽ tsumabũ nĩkakĩ hatu yuibaunabu dasibi Egito nawabũ nĩka keyuaibũ ha kaka Faraónẽ hiwe anushũ nĩkariaibũ 3José hawẽ betsabu shabakabi hatu unãmakĩ habũ hãtxawẽ hatu hãtxa wakĩ:

—Earã, ẽ Joséki. Ẽ epa hiweyuamẽ?— hatu waya habũ itxakawanibuwẽ taea haki datetxakayamai huĩti metesheketxakayamatã hawa yuiama hashpa ha dapi mapuabũ 4hanushũ hatu daewakĩ yuikĩ:

—Dateama neri bekãwẽ— hatu wa beabu José ana hatu yuikĩ:

—Earã, ẽ matũ betsa Joséki, ha mã ea itxakawakĩ Egito anu hau ea iyunũbũ peiwẽ mã ea hatu inãnirã. 5Eskaki, matu yuinũ nĩkakãwẽ. Mã ea haska waniwẽ taeshũ bebũkiri Deusũ matu ea mekemakatsi hatũ ea yunuai itsawakĩ matu ea amaniki, ẽ matu hiwemashanunã. Haskawẽ taea bika tenebauni ibubis sinatanameyamakãwẽ, mã ma ea hatũ escravo dayaru wamabianiwẽ taearã. 6Na buni pakeimarã, ma 2 ano keyuaki. Haskabia 5 ano dayakĩ mã piti banabia hawa beneamakẽ hania mã tsekatiruma iyukũkaĩshanikiki, buni pikuirã. 7Na mai pakea anu hiweyushũ hati teshenishũ nukũ bababu nũ pa washanũ bebũkiri haska Deusũ unãkĩ ea matu yunumakĩ itsawaniki, ẽ matũ hiwea merabewashanunã, haska nũ shinãtirumahairabiakenã. 8Ea haska wakinã, matũ mã ea akamaki, na mae anu nitxĩkinã. Haska wakinã, nukũ mekenika Deusũ ea aniki. Hanushũ habiatũri Faraónẽ yusinika inũ hawẽ hiwe anu dayanika tsuma inũ hawẽ shanẽ ibu Egito hirabi yunuti mekenika Deusũ besti ea haska waniki. 9Ea haska waniwẽ taeshũ ana nenu ebe mapuama hawairabaĩ nukũ ibu yuitãkãwẽ: “Mĩ bake José hiweaki. Eska hawẽ hãtxa mia yunushinaki. Deusũ nenu Egito shanẽ ibuhaira ea wani hawairakirã ea uĩyuwe, mia washiãki, akĩ ea haska yuishũritãkãwẽ. 10Eskakirirã, na nenu urama hiwei bekãwẽ, mae betsa Gósen anu ea dapi hiweirã, mia inũ, mĩ bakebu inũ, mĩ bababu inũ, mĩ inabu inũ, minabube dasibi tesheamarã. 11Nenu mã huama mã nuitapatirubuki. Haskakẽ matunabuya bekãwẽ. Nenushũ piti sharabu matunabuya matu pimakĩ ẽ hawa matu nuitapawama ishanaii. Na bunirã, 5 ano kayuikiaki, ẽ epa akĩ yuikinã.” 12Na haska ẽ matu yuiairã ẽ betsa Benjamim inũ ibubis mã ea uĩkĩ nĩkaii, haska ẽ matu hãtxa wairã. 13Na dasibi Egito anu haska ẽ shanẽ ibui kushipai ẽ matu yuiai mã uĩshu nukũ epa yuiritãkãwẽ. Menã bushũ ẽ ibu ea iweshũritãkãwẽ— hatu watã

14haska hatu hãtxa wakĩ menetã hawẽ betsa kayabi Benjamim ikua kashaya habebis Benjamimbe teikukua kashabukũtã 15hanushũ hawẽ betsa Benjamim henebaĩ betsaburi tãtsu akubauni hatube ikukunã kashai keyui nesetã ana dateama hawẽ betsabuya hãtxaibũ

16José betsabu beabu Faraónẽ hiwe hawẽrua anua haki txaniaibu nĩkatã Faraónẽ hawẽ tsumabubetã nĩkai benimaibũ 17-20Faraónẽ José kenashũ yunukĩ:

—Mĩ betsabu yuiwe, hau pitiya besti hatũ mai pakea Canaã anu txĩtũbaĩshĩshũ matũ epa inũ matunabu hau hatu itanũbunã. Hatũ jumentoki piti butirubuki. Hanua nukũ jumento tarãtiyari bushũ haki hatũ aĩbuaibu inũ hatũ bakebu inũ mĩ iburi haki iwetirubuki. Haskabiranaibu na Egito mai pakea anu hanu yunu hamẽ ikai mai pepa ẽ hatu yunushanaii. Hawa hatũ mabuwẽ nuiama hau benũbunã, nenushũ hamapai sharabu ẽ hatu yunuairã, habu ibu wamakĩ habuna wamakinã— aka

21hanushũ Israelĩ bakebu hatu haska wamakĩ José hawẽ betsabu haska Faraónẽ yunushu hawẽ jumento tarãtiya inũ bai tanabaĩkĩ pikubaĩti hatu pewamashũtã 22hanushũ hawẽ betsabu tibi tari txaipa bena bestibu tibi inãkĩ hanushũ Benjamim besti 300 prata pei heshe inũ 5 tari txaipa inãtã 23hanushũ hawẽ ibu bumakĩ 10 jumento mabu pepa haki beshea inũ 10 jumento yushã piti haki beshea inũ, misi inũ piti betsa ha hukĩ pikubirãshanai hawẽ epa pewamashũtã 24hanushũ José hatu nitxĩkĩ nemakĩ:

—Buirã, bai tanabaini matũmebi ha iki detenameama butãkãwẽ— hatu wa

habu buaibũ 25Egito anua kaĩbaini bui Canaã anu hanu hatũ epa hiweanu hikitushitã 26haska hatu washiãbu hatũ epa yuikĩ:

—José mawani dabanẽ nũ imisrã, hiwea ẽ betxitanaii. Ha mĩ bakerã, dasibi Egito mai pakea hirabi hatũ shanẽ ibuki— akabu haska shinãtirumahaira e itã pes hawa yuiama tsaua hatũ hãtxa besti hatu ikũwãtirumakẽ 27haska hakiri hãtxashina hawẽ bakebũ haska José hatu yuishina inũ yunushina banabimabu hawẽ jumento tarãtiya José yunua bushũshinabu uĩ txanima hatũ hãtxa ikũwaĩ benimai tse iki 28hatũ epã yuikĩ:

—Menã hanũ ẽ mawanũ ẽ bake hiwea mã ea yuiairã, menã ea haki nukumakĩ uĩmari bukãwẽ, hanũ ẽ mawanunã— itã

Currently Selected:

Gênesis 45: cbsBR

Highlight

Copy