Gênesis 44

José hawẽ hatu unãmakatsi hawẽ kẽtxa hatu nanemanikiaki, na hãtxarã

1-2hanushũ José hawẽ hiwe mekenika shanẽ ibu yunukĩ:

—Hatũ saku tibi shekiwã matawashũ habiabu tibikiri pei nuku inaĩbu hatu ana naneshũkĩ keyutã ha mashkũ sakuki hawẽ peiyabi ẽ prata mane kẽtxa txashakapa naneshũtãwẽ— aka haska José yunua hatu naneshũshina 3penamahaira hatũ jumentoya hatu nitxiã 4-5mae anua kaĩbaini txaima buaibũ José hawẽ hiwe mekenika shanẽ ibu ana yunukĩ:

—Buaibu txibãbaĩ hatuki nukutã hatu yuikĩ: “Matu pewabia haskakĩ ẽ shanẽ ibũ prata mane kẽtxa mã yumetsukiranai? Haki nushumis inũ hawẽ mukayakĩ hatu unãmis yumetsũkĩ mã txakabuhairakirãshuki”, akĩ haska hatu yuitãwẽ— aka 6txibãbaĩ hatuki nukushũ haska José yuia habiaskari hawẽ hiwe mekenika shanẽ ibũ hatu yuia 7-9habũri yuikĩ:

—Shanẽ ibuũ, haskakĩ hari mĩ nuku hãtxa wai? Nũ mia haska watirumahairaki, na mĩ yuiai keskarã. Nukũ mae Canaã anua nukũ saku meranua pei nũ betxima nũ ana mia beshũbiashinawẽ taeshũ mĩ shanẽ ibũ hiwe anua hawẽ kẽtxa txashakapa nũ yumetsutirumahairaki. Nũ huni pepabuki— iwanã —Nuku haratutũra hawẽ kẽtxa nũ yumetsukirãshurã, hatũ nũ beshu hawẽ sakukia mã betxiarã, harã, hau mawanũwẽ. Hanushũ nuku dasibi nuku dayaru escravo wabaĩwẽ— akabu

10—Haska mã txaniairã, ẽ matu akaii. Haratura mã kẽtxa hayarã, ha besti ẽ escravo waii. Hamẽ matu hatirirã, txakabuma mã unanuma inũ butirubuki— hatu wa 11hawaira huni tibitũ habũ saku jumento kamakia butetã tsaũshũ depeshunabu 12hanushũ José tsumapã hatu uinãbaũkĩ iyuatũ saku anua dukũ benabirãkĩ hatũ bari kaini pakea tibiwẽ tanakĩ hatu benãbirãkĩ iyuabũ saku anua dukũ hatu uinãkĩ keyutã hanushũ atimas mashkuhaira Benjamimnẽ saku anu mane kẽtxa txashakapa betxitã sanãbaunai 13hawẽ betsabũ uĩ huĩti metesheketxakayamatã huni tibitũ hatũ tari ushnitã jumento kamaki hatũ saku ana dũtãshũ neabaini ana mae ewapa anu ana txĩtũkaini bui hikitã 14José hiwe anu Judá inũ hawẽ betsabu ana hikikaĩ José kaĩriamakẽ ha namã sapakaĩ beti ika maniabũ 15José hatu yukakĩ:

—Mã haska kainamẽ? Ẽ huni mukaya unanepama dabanẽ mã ea haska wabainamẽ? Tsua ea keska hayamaki— hatu wa 16Judá kemakĩ:

—Shanẽ ibuhairatuũ, harakiri nũ mia yuitima kaya mĩ nuku waii. Haska wakĩ nũ hawa yumetsuama ishu haskatã nukumebi nũ petirumaki. Haskakẽ nũ txakabuwaniwẽ taeshũ Deusũ nuku unãti washuki, nuku kupinũ ishunã. Mĩ kẽtxa txashakapa tsuãra saku anua mĩ tsumapã betxishuwẽ taeshũ ha bestima nuku dasibiri mĩ dayaru escravo nuku wariwe— aka

17José kemakĩ:

—Ẽ matu haska wamahairaki. Ha hatũ sakukia kẽtxa ẽ tsumapã betxishu ha besti ẽ dayaru escravo ẽ waii. Hamẽ maturã, unanuma matũ epã hiwe anu burikãwẽ, tsuã matu hawawamakirã— hatu wabia

Judá hawẽ betsa mashkuwẽ nui hãtxashunikiaki, na hãtxarã

18Judá nashukukĩ Joséki kemashũ hãtxa mae wanikawẽ ana yuikĩ:

—Shanẽ ibuũ, eska nũ mibe hãtxaima hune ẽ mia yuiai mĩ ea nĩkatirumẽ, eki sinatamarã? Faraó keska mĩ shanẽ ibu kushipahairakirã. 19Nukube hãtxai taekĩ miã nuku yukakĩ: “Mã epa hayamẽ? Mã ana betsa hayamẽ?” akĩ mĩ nuku yukaimaki. 20Txanima mia yuikĩ: “Nukũ epa inũ nukũ betsa mashku nũ hayaki. Nukũ betsa mashku habias shãkĩki nanea mawanikẽ ha mesti hiweaki. Anibubiatũ nukũ epã nukũ betsa mashku bawaniki. Haskawẽ taeshũ nukũ epã nukũ betsa mashku betxipaihairaikiki”, akĩ nũ mia yuiwanimaki. 21Nũ mia haska waiwẽ taeshũ: “Matũ betsa mashku ea uĩmakĩ eanu iweshãkãwẽ”, akĩ mĩ nuku yunuimaki. 22Hakia nukũ mia yuikĩ: “Ha nukũ betsa mashkũ hawẽ epa henetirumaki. Hawẽ epa henebaina hawẽ nui manui mawatiruki”, nũ mia aka 23“Matũ betsa mashku nenu mã iweamarã, mã ana ea uĩ nenu hutirumaki”, mĩ nuku waimaki. 24Ka nukũ epaki nukushũ mĩ hãtxa nũ yuia 25nĩkaimashũ nuku yuikĩ: “Ana piti eskarabes nuku bishũtãkãwẽ”, nuku wa 26“Nũ katirumaki. Nukũ betsa mashku nũ iyuama ha shanẽ ibube hãtxakĩ piti nũ mia bishũtirumaki. Mĩ haska shinainã, nukũ betsa mashkube nuku nitxĩwẽ”, nũ wa 27ẽ epã ana nuku yuikĩ: “Ẽ aĩ huni bake dabe besti ea kaĩshuni mã unaiĩ. 28Hawẽ iyua ea kashunikẽ ẽ ana uiãma eã shinaĩ: ‘Yuinaka pianãbũ ma ea pianimẽkaĩ’, ikĩ ẽ shinãpakeaii. 29Hanua hawẽ mashkuri mã iyua itxakawatirubuki. Hari ea itxakãwãbũ mã ana ea iweshunamawẽ taea manuhairai ha dabewẽ nuikũkaini ẽ mawashanaii, matuwẽ taearã”, nuku akimaki. 30-32Haska bebũkiri haska wakĩ ẽ epa eã yuikĩ: “Mĩ bake Benjamim ẽ ana iweama ẽ ea txakabu ishanaii, niti ikamarã”, akĩ ẽ yubashinaki. Hawẽ bake nũ ana iyushunama nukũ epa anu nũ kakẽ unaĩ nukũ epa txanima mawashanikiki, hawẽ bake ha betxipaihairakĩ putaisma manuirã. Haska wakĩ ẽ epa ẽ tenãtiruki, huĩti nishmahairawenã. 33Haskawẽ taeshũ ẽ betsa mashkuwẽ taearã, ea awe, hawẽ shãtukũ bashikĩ dayaru escravo wakinã. Hanua ẽ betsa mashku hawẽ betsabube ea yunushũwẽ, hau hatube katanunã. 34Ẽ betsa mashku hawẽ epa anu kamakẽ ha besti ẽ bashitirumaki, ẽ epa nuitapahairai ẽ uĩkatsi ikamaki— anikiaki, hãtxa mae wanikawẽ hãtxa wakinã.

Currently Selected:

Gênesis 44: cbsBR

Highlight

Copy