Gênesis 48

Efraim inũ Manassés Jacó pepawakĩ duawanikiaki, na hãtxarã

1hawẽ ibube José haska habe hãtxa wawãshĩshũ shinãyã hawẽ ibu ma isĩ teneaya Joséki txaniabu José uĩtanũ ika kakĩ hawẽ huni bake dabe iyua Manassés inũ ha katxukea Efraim iyui habe kaya 2hanushũ hawẽ bake José uĩ kai hikitushiai Jacó yuiabu nĩkatã yura babubia hawẽ bake nĩkatã benimai shinã txãkaĩ natsaukauã 3-4José uĩkĩ yuikĩ:

—Epaã, ẽ mia hãtxa waii. Unu Canaã mai pakea anu mae Luz anushũ Deus kushipahaira dasibi binua eki nukutã ea duawakĩ eska ea hãtxa wakĩ yuikĩ: “Uĩwẽ. Eanã, ẽ mia bake itxapa inãshanaii. Mĩ bababu paibu habiabus ẽ hatu shukua tibi washanaii. Na Canaã mai pakea ẽ habus yununũbariaii, niti akamarã”, ea waniki. 5Eskaki, mia yuinũ. Na mĩ bakebu Efraim inũ Manassés na Egito anu ẽ huriama mĩ ea hatu bake bawashuna kaĩyamaburã, eã ẽ ibu waii. Ẽ bake Rúben inũ Simeão keskai haburi shukua tibi ishãkanikiki. 6Hakia ẽ miki nukuaitiã unuri mĩ ea hatu bawashũbainimarã, minaski. Haskabia dasibi Deusũ ea yubani habũ biama hakia hatũ betsa Efraim inũ Manassésĩ besti shukuabu anua habũ hatuna bishãkanikiki— itã 7hawẽ aĩ Raquelkiri shinãkĩ yuikĩ: —Uiã. Padãkiria ẽ txĩtũkiranaya bai putxinĩ mae Efrata kemayui ma Canaã anua mĩ ewa Raquel mawaniki. Habianuri ẽ mai waniki, Efrata kemai anurã— anikiaki. Natianã, Efrata kena betsa wakĩ Belém wanishũ kenamisbuki.

8Hanushũ Israelĩ José bakebu hatu uĩkĩ José yukakĩ:

—Narã, tsuabu ikimẽkaĩ?— aka

9—Narã, ẽ bakebuki, Egito anushũ Deusũ bebũkiri ha huni bake dabe ea hatu inãyamarã— aka hawẽ epã ana yuikĩ:

—Ha dabe nenu ea dapi hatu nitxĩwẽ, ẽ duapa hãtxa ẽ hatukiri hãtxakĩ yunuairã— iki

10Israel ma anibuhairai beshushkĩ ana uĩ peamakẽ José hawẽ bakebu hawẽ epa dapi nitxiã hatu ikutã tãtsu atã 11hawẽ epã José yuikĩ:

—Mĩ ma ea benushuni dabanẽ ẽ ikũkaĩmis ẽ mia uiaiĩ. Hanushũ mĩ bakeburi Deusũ ea hatube mia uĩmaikiki— ikaya

12hanushũ hawẽ ibuã hawẽ bakebu shãshui ika José hatu shekakĩ benãta hatu nitxĩtã hãtsiri hawẽ ibu kẽwaĩ hawẽ beya keskawẽ maĩ beti ika ibai benitã 13benikauã hawẽ bake dabe metsũtã shinãkĩ:

—Nukũ beya txibãkĩ ẽ bake iyua ẽ epã mekẽ yusiuri bebũ ẽ nitxiaiĩ, hau iyua dukũ pewakĩ duahairawanunã. Hanushũ ẽ bake mashku hawẽ mekẽ yusmauri bebũ ẽ nitxĩriaii, hau ea dua mirĩ washununã— iwanã hawẽ bake mashku Efraim yusiuri metsuã inũ hawẽ bake iyua ha katxukea Manassés yusmauri metsũshũ hawẽ epaki kema watã hanushũ Efraim Jacó mekẽ yusmauri bebũ nitxĩkĩ Manassés hawẽ mekẽ yusiuri bebũ hatu nitxĩtushia 14hanua Israel hawẽ mekẽ pekishkubaĩ Efraim mashkuki hawẽ mekẽ yusiuri mamepiaya hanua Manassés iyuabiakẽ hawẽ mekẽ yusmauri mamepitã 15-16Israelĩ José dukũ pepawẽ duawakĩ eska wanikiaki.

—Ẽ shenipabu Abraão inũ Isaque txibãkubainitũ

ha Deusũri ẽ tashnini anua ea mekemis

habiatũri txakabu betsa betsapa ea binumamistũ na berunã dabe

hau hatu duawakĩ pe hatu hiwemakubaĩshanũwẽ,

hau habuwẽ ẽ kena inũ ẽ shenipabu Abraão inũ Isaque kena

hau hakimama shinãpakeshanũbunã.

Hau Deusũ hatu pa wapashanũwẽ,

bake mirima hatu wamakinã.

Hau mai hirabi anu hiwei yura mirima habus

hau ipashanũbũwẽ— akaya

17Efraim hawẽ bake mashku Jacó hawẽ mekẽ yusiuri mamepia uĩkĩ betxipaiama hawẽ ibuã mekẽ yusiuri metsutã Manassés mamepĩpaya 18mesteã dakakẽ José hawẽ epa yuikĩ:

—Haskamaki, epaã. Mĩ kaneaki. Na nekeriaki iyuarã, Manassésrã, ha mĩ mekẽ yusiuriawẽ haki mamepiwe— aka

19hawẽ epã haska wakatsi ikama nemakĩ yuikĩ:

—Ẽ unaiĩ, epaã. Ẽ unaiĩ. Ha iyua Manassésrã, habiari yurabu kushipabu mirimari ishãkanikiki. Hakia na mashkunã, hawẽ betsa iyua binuhairashanikiki. Hawenabu itxai pai yurabu shuku tibi mae mirima ishãkanikiki— atã

20habiatiãri Jacó José ana hãtxa wakĩ yuikĩ:

—Deusũ matu haska duawashanaiwẽ taeshũ matuwẽ taea enabu Israelbu pe yuinameaibu yuikĩ: “Deusũ Efraim inũ Manassés ashuni keska wakĩ hau miwẽ taeshũri ariashanũwẽ, Deusũnã”— akĩ Israelĩ José bake Efraim hawẽ bake iyua Manassés maemashanai hatu yuinikiaki. 21Hanushũ hawẽ bake José yuikĩ:

—Uiã. Ẽ ma matu mawashũkatsis ikaii. Hakia ewẽ dateyamashãkãwẽ. Txanima Deusũ matu merabewapakekĩ ana nukũ shenipabu hiwekubaunibu anu matu txĩtũwãshanikiki. 22Miarã, mĩ betsabu ẽ mia hatu binumaii. Mae Siquém Amorreu nawabube yaushi detenamekĩ ẽ bini ẽ mia ha yunuaii— hatu atã

Currently Selected:

Gênesis 48: cbsBR

Highlight

Copy