Gênesis 43

Benjamim hawẽ betsabũ Egito anu iyunibukiaki, na hãtxarã

1Canaã mai pakea anua piti keyuima hawa hayamai pikukũkainaya 2Egito anua shekiwã bitanimabu ma pikĩ keyuaibu ana hayamakẽ hatũ epa Jacó ana hatu yunukĩ:

—Ana bushũ shekiwã eskarabes nukũ peiwẽ bitãkãwẽ, nukunarã— hatu waya 3-5Judá yuikĩ:

—Hawẽ kushipawẽ ha hunĩ nuku nemakĩ yuikĩ: “Matũ betsa mashku mã iweamarã, ea anu ana beyamashãkãwẽ. Hakia matũ betsa mashku iwekĩ piti mã ana biyutiruki”, akĩ nuku yuimaki. Mĩ nukũ betsa mashku nukube yunuama piti bi nũ katirumaki. Hakia mĩ nukube nitxiãyã nũ katiruki— aka 6Jacó ana hatu yuikĩ:

—Ea txakabuwakĩ haskakĩ mã hari yuimamẽ, ha huni: “Nũ betsa mashkuyaki”, akinã?— hatu wa

7—Ha hunĩ nuku unãti wakĩ nukunabukiri nuku yuka txakayamakĩ yuikĩ: “Matũ eparã, hiweamẽ? Matũ betsa ana hayamẽ?” nuku wa haska nuku yuka nũ banabima bestimaki. Nũ daka haskatã bebũkiri unaĩ nuku hari yunuairã: “Matũ betsa iweshãkãwẽ”, ikairã, hamẽ haska bebũkiri unãtã nuku yukai nukũ betsakiri nũ hawa yuiama ikeanimaki— akabu

8-9haska watã Judá hawẽ epa Israel ana yuikĩ:

—Haska shinãkĩ mĩ nuku nitxiainã, nũ hiweyunũ ha nukũ betsa mashku ebe nitxĩwẽ. Eã mekebaini nũ habe hawaira kaĩtiruki, hau mia inũ, nukunabu inũ, nukũ bakebu mã mawayamanũbunã. Benjamim nĩkamas mia mebĩbaĩ ẽ iyushina ẽ mia txĩtũwãshuãmakenã, ea ashãwẽ, hawẽ taeshũ kupikinã. 10Mĩ bake nukuki yaushiama hawaira mĩ nuku yunushinarã, nũ ma dabeki katani hushiã ikeanaii— aka 11-14hatũ epã ana hatu yuikĩ:

—Haska ẽ matu yunutirumabia ẽ hawawẽ haskatimaki. Ẽ matu heneshunai ea iyũritãkãwẽ. Matũ saku merã matũ mabu pepa hamẽ inãti bushũtãkãwẽ, isĩ pushati dau inũ, buna bata inũ, hawẽ nis wati inũ, sheni hene hawẽ iti inũ, tamawã dabe terebinto inũ amêndoarã. Ana pei betsa butãkãwẽ. Saku merã matu inaĩma pei hesherã, habiari ana bushũtãkãwẽ. “Mĩ kaneimamẽkaĩ. Nukũ pei biama mĩ hakimaimamẽkaĩ”, atãkãwẽ. Hanushũ matũ betsa mashku iyukĩ ha shanẽ ibu uĩmatãkãwẽ. Hanua Deus kushipa dasibi binua matuwẽ nuiaya ha Egito shanẽ ibũ Simeão inũ Benjamim eanu ana txĩtũwãshanimẽkaĩ. Mã ẽ bake ea mebĩ keyubaina ẽ bakeuma ishanimẽkaĩ. Haska ẽ shinainã, ẽ haskayuairã— hatu wa

15hanua Jacó bakebũ mabu pepa inũ pei hatu ana inaĩma inũ ana pei betsa bukĩ hatũ betsa mashku Benjamim iyui Egito anu bui hikitã José besuuri mapuabu 16José Benjamim hatube nia uĩkĩ hawẽ hiwe anu dayamisbu mekenika Egito hãtxawẽ yuikĩ:

—Ẽ hiwe anu ha hunibu iyushũ ina awa betsa detetã ea bawashũtãwẽ, bari mananãbi ẽ hatu pimai kairã— aka 17José yunua txibãkĩ hawẽ hiwe anu hatu iyuaya 18hatu haska wabaina José betsabu datekĩ shinaĩ:

—Tsuãra nukũ pei nukũ saku merã ana nuku mistushunimawẽ taeshũ nuku iyushũ yuikĩ: “Mã yumetsukainimaki”, nuku akĩ hawẽ tsumabu nuku atximashũ nukũ jumento mebĩkĩ nuku hawẽ dayaru escravo watiruki— ikaĩkĩ 19José hiwe anu ma kene beputiki kemashũ José hiwe mekenika 20-22yuikĩ:

—Shanẽ ibuũ, mia yuinũ nuku nĩkawe. Ha dukũ piti nũ biwanimatianã, txanima shekiwã nukũ peiwẽ nũ bimaki. Hanua ana kai bai putxinĩ ushakĩ nukũ saku depeshũ ha meranu nuku tibitũ pei nũ betximaki. Tsuãra nukũ saku merã pei nuku naneshuna nũ unãma ikimaki. Hakia saku meranua pei dasibi betximashũ nũ mia ana beshũshuki— akabu 23haska wabu José hiwe mekenikã hatu yuikĩ:

—Ea haska yui hawẽ dateyamakãwẽ. Eanã, matũ peirã, ẽ matu bishuĩmaki. Haskakenã, matũ mekenika yushinẽ matũ epa mekemistũ matũ saku merã pei matu mistushunimamẽkaĩ— akĩ hatu haska watã hawẽ hiwe mekeshũmistũ meketi hiwe anua hatũ betsa Simeão hatu kaĩmashũtã 24José hiwe ewapa anu hatu iyushũ ũpash hatu inã hutxukiaibũ hanushũ hatũ jumento hatu pimashunaya

25—Shanẽ ibuã hawẽ hiwetãshũ nuku pimaikiki— ikĩ bebũkiri unãtã bari mananãbi habetã pikĩ ha mabu inãkuĩ inãkatsi beshĩshũ pewabũ 26José hikiaya inãkuĩti mabu bushuãbu ha namã beti ikabu 27José hatu yukakĩ

—Mã haska pe hushumẽ? Hamẽ matũ ibu anibu mã ea yuimarã, harã haskaramẽ? Hiweriamẽ?— hatu wa 28ha namã beti ishũ yuikĩ:

—Mĩ tsuma nukũ eparã, pe nuku hiweshũyuaki— akabu 29José hatu uĩbaũkĩ hawẽ betsa mashku Benjamim habe nanea uĩkĩ hatu yukakĩ:

—Mã ea yuimarã, matũ betsa mashkurã, hamẽ?— itã Benjamim besti yuikĩ: —Mĩ miamẽ? Atimas ẽ mia uiainã. Hau Deusũ mia pepawakubaĩshanũwẽ— atã 30hawẽ betsa kayabiwẽ nuihairai kashakatsis iki hawaira hawẽ dĩtu merã hikikaĩ kasha txakayamai 31nesetã betxuki betekere ikirã hawẽ besu pekirã hawẽ tsumabu yunukĩ:

—Piti nesherikãwẽ, nũ pinunã— hatu wa 32José hatubetã pinũ ika hamesti hawẽ tapu meribi ma pewashuna inũ, hawẽ betsabuna tapu betsa haki tsauaibu ma hatu pewashũria hanua Egito nawabu Josébetã pimisbu tapu betsari haya habũ beyawẽ taeshũ habias tapukishũs Egito nawabu Hebreu nawabubetã pisbuma tapu meribi tibi serekĩ pashkakẽ 33José besuuri hawẽ tsumabu hatu yunua hawẽ betsabu tsaũkĩ iyua dukũ ha dapi tsaũshũ ha katxu hatũ bariwẽ betsabu tibi tsaũriabaĩkĩ hawẽ henekĩ mashku tsaũkĩ keyuaya e iki keyutã unãshubira habu besti yuinamei:

—Haskatã iyua inũ namakiabu inũ mashku unãkĩ nuku haska waimẽkaĩ?— ikaibũ 34José hatu yunukĩ hau tapuki piti hatu inãbaunũbũ hawẽ tsumabu piti pashkamakĩ hawẽ betsabu tibi hatu inãmabaũkĩ hanushũ Benjamim besti neshe neshe amakĩ 5 kẽtxati piti matahaira wamashũ inã hatubetã pi mabesh aki habu Josébe benimaibũ

Currently Selected:

Gênesis 43: cbsBR

Highlight

Copy