Gênesis 39

Josékiri Potifar aĩ txanitxakanikiaki, na hãtxarã

1Ismael nawabũ José bibaĩkĩ Egito anu iyuabu Egito nawa Potifar peiwẽ taeshũ hawẽ dayaru escravo wakĩ José binikiaki. Egito nawa shanẽ ibuhaira Faraónẽ hiwe ewapa hawẽrua anu mekenikabu yunumis hatũ shanẽ ibu Potifar hatũ capitão inikiaki. 2José hawẽ tsuma Potifar hiwe anu dayashunaya Senhor Deusũ merabewaya José hawama pe dayakũkainikiaki. 3José dayai Senhor Deusũ merabewakĩ pepawamaya hawẽ tsumapã txanima kaneama uĩ 4hawẽ shinã txãkãkĩ hawẽ tsumapã José betxipaihairakĩ duawakĩ haki txiti ikatsi dasibi hawẽ tsumabu inũ hawẽ hiwe anuari mekeshunika wakĩ hawẽ bai inũ hawẽ inabu uinika wakĩ katunikiaki. 5Hanushũ José haska yunuimawẽ taeshũ Senhor Deusũ Potifar duawakĩ dasibi hawẽ hiwe anua inũ hawẽ bai anua pepawakĩ merabewakubainaya 6hawẽ shanẽ ibu Potifar hawẽ tsumabu betsa ana yunuama José bestitũ hau hatu uinũ yunuima hawara hayawẽ ana nuikĩ shinãma hawẽ pitiwẽ besti nuikũkainikiaki, ana hawa meama hiwearã.

José hawẽruawẽ taeshũ dasibibũ uĩkĩ betxipaiaibũ 7betsatiã hawẽ tsumapã ainẽ José hawẽrua uĩkĩ hawẽ kemui betxipaikĩ txutamakatsi ikĩ yuikĩ:

—Ẽ mia betxipaiaii. Mibe hãtxapa?— aka

8-9José nemakĩ:

—Miwẽ kemukĩ ẽ mia meamaki. Uiã, ea uinika washũ ẽ tsumapã hawẽ hiwe inũ hawẽ bai ea yunuimaki, hawena dasibi ẽ meke pewashununã. Nenu ea inũ ẽ tsuma nũ habias keskaki. Hawena dasibi yaushiama ea mekemakĩ ea yunuyuimaki. Hakia mia besti ea yunuamaki, mĩ hawẽ ainã. Haskai eiskauã emebi txakabui ẽ daketapatirumaki, Deuskiri txakabuirã— aka 10hakia José aĩbu haska wabia hawẽ hãtxa nĩkama haki patapakĩ txutamanũ ishũ hawẽtsaĩs shaba tibi bikawakubaĩbia hawa meama ikũkainaya 11shaba betsatiã hiwe merã hanu tsua hayamakẽ José dayanũ ika hikiaya 12hawẽ tsumapã ainẽ José hawẽ tari txaipa saweawẽ tsumashũ yuikĩ:

—Natiã ẽ mia txutamakatsis ikaii. Ea txutawe— abia mekatsi ikama hawẽ tsuma datei kaĩkaĩkĩ hawẽ mekẽ anu hawẽ tari heneshũbaini tashnikainaya

13hawẽ tari tsuma heneshũbaina aĩbu nashuku paepakĩ 14-15hawẽ tsuma betsabu hemaĩtĩ anu dayarubu kenashũ hatu yuikĩ:

—Uĩkãwẽ. Ẽ benẽ Hebreu nawa bikĩ dayaru escravo waimatũ ea dakewakĩ nukuki hatu kashemaikiki. Ea txutanũ ika hikikaĩ hawẽ tari pekaya ẽ bis itxakayamaya datekĩ hawẽ tari beama kaĩkirãshuki— hatu watã 16-17hanua José tari arua ibaikĩ hawẽ bene Potifar huai yuikĩ:

—Ha Hebreu nawa mĩ peiwẽ bimatunã, ea txutanũ ika ẽ dĩtu merã hikiaya ebe hikikaĩ ea mepaia 18-19datei ẽ bis bis ikaya datekĩ hawẽ tari benubirani hawaira kushikirãshuki— aka hawẽ ainĩ hãtxa nĩkatã Joséki Potifar sinata txakayamakĩ 20atxishũ bitxiti hiwe anu hatu bitximakẽ Egito shanẽ ibuhaira Faraónẽ yunua ashuãma kaneaibu hatu bitximisbu anu José hatube bitxiti hiwe merã hiweyukẽ 21hanushũri Senhor Deusũ José ana merabewakĩ duawakĩ bitxiti hiwe shanẽ ibu José pe uĩmakĩ betxipaimaya 22bitxiti hiwe shanẽ ibũ José katukĩ hau merabewanũ yunutã haska washina ha habe bitxiabu dasibibu mekekĩ José hatu yunushũkubainikiaki. 23Senhor Deusũ José merabewakĩ hamapai José haska wakĩ pepawakubaĩwẽ taea bitxiti hiwe shanẽ ibu hawẽ dayawẽ ana hawẽ nuiama haki txiti ikũkainikiaki.

Currently Selected:

Gênesis 39: cbsBR

Highlight

Copy