Gênesis 38

Jacó huni bake Judá inũ hawẽ babawã Tamar eskanibukiaki, na hãtxarã

1Ha haskaitiã Judá hawẽ betsabu henebaini Adulão mae anu ka huni betsa Hira anu hiwetushimashũ 2harishũ Canaã nawa huni betsa Suã aĩbu bake betxipaikĩ bikĩ aĩwãtã 3bake bawa huni bake kaĩshũtã hawẽ ewã kenakĩ: “Erki”, akimakẽ 4ana bake bawa ana huni bake kaĩshũriatã hawẽ ewã ana kenakĩ: “Onãki”, ariaimakẽ 5Quezibe anushũ ana bake bawa ana huni bake kaĩshũtã kenakĩ: “Seláki”, anikiaki.

6Judá bake iyua Er ewakẽ hawẽ epã aĩbu betsa Tamar iweshũ aĩwãma 7Erĩ Deusũ yunua txibãma hamebi hawẽ shinanẽ hiwe txakaiwẽ taea Senhor Deusũ betxipaiama tenãkẽ 8hanushũ hawẽ huni bake betsa Onã Judá yuikĩ:

—Mĩ betsa mawaimawẽ taeshũ nukũ beya txibãkĩ miã huni bake mĩ betsa mĩ bawashũtiruki. Mĩ betsã aĩ bitã huni bake bawashũshãwẽ, mĩ ha dabia hawenabu keyuama hau ipakeshanũbunã— aka 9Onãnẽ shinãkĩ:

—Ẽ huni bakebu bawashuna ena itirumaki— ikĩ hawẽ hutxi bake bawashũkatsi ikama hawẽ betsã aĩ Tamar aĩwãbiashũ txutabiakĩ hura huaya tsekashũ txakawakubainaya 10haskai Onã hawẽ betsa debuima bake washũkatsi ikama haki dakekũkainaiwẽ taeshũ Senhor Deusũ betxipaiamahaira hari tenanikiaki. 11Ha haskaimabũ Judá shinãkĩ:

—Selá ẽ bake mashku Tamar hanubi ẽ ana aĩwãma hawẽ betsabu keskai ana mawariatiruki— ishũ parãkĩ Tamar yuikĩ:

—Mĩ epã hiweanu kashũ ẽ bake mashku Selá hau ewayunũ beneuma hiweshũ manayutãwẽ. Ẽ bake mashku Selá ewaya ẽ mia inã mĩ benewashanairã— aka hawẽ hãtxa nĩkatã Tamar ka hawẽ epã hiwe anushũ manai hiweyukẽ 12haska wa kayamakẽ Suã aĩbu bake Judá aĩ bini ma mawakẽ Judá kashai nesetã hawẽ txashuwã dani meshtei kanũ ika Timna anu hawẽ haibu Adulão nawa Hirabe yubakakẽ 13bebũkiri nĩkatã tsuãra Tamar yuikĩ:

—Uiã, mĩ kuka Judá Timna anu hawẽ txashuwã dani meshtei kaikiaki— ishũ yuia 14hanushũ nĩkatã Tamarĩ shinãkĩ:

—Selá ma ewabiakẽ ẽ kuka Judá ẽ benewanũ ea ha bimama itiruki— itã hawẽ bene mawaima unãti hawẽ batxi pekatã batxi betsa sawekĩ batxi tuash betsawẽ mayabukutã betsawẽri debepukutã hawaira hawẽ kuka kaikiri binukaĩ Enaim mae hikiti shui anu Timnakiri bai ka keshanu tsaushũ manaya 15Judá hawẽ haibu Hirabe kakĩ ha aĩbu hininipa txutamisbu keska debepukua tsaua uĩ:

—Ha aĩburã, mawa txutati perukaĩ— ikaĩ shinãbaĩ 16haki nukushũ hawẽ babawãma dabanẽ unãma habe yubakakĩ yuikĩ:

—Mĩ ea txutamatirumẽ?— aka

—Ea txutakatsirã, hawa mĩ ea inãtirumẽ?— aka

17—Ẽ inabu anua txashuwã bake ẽ mia bematiruki— aka

—Mĩ ea yunuriamarã, hawa unãti mĩ ea bashishunai?— aka

18—Hawa unãti mia bashishũpa?— aka

—Mĩ hawẽ unãtiwamis selo teutiya inũ mĩ mestẽti keneya mĩ tsumamis ea bashishũyuwe— aka ha ea akĩ yuiai inãtã txutatã unãma bake bawatã kakẽ 19haska wabainaya benikaini kashũ hawẽ batxi tuash debepukukaina pekatã ana hawẽ bene mawaima unãti batxi ana sawetã hawẽ epã hiwe anu kakẽ

20—Ha aĩbũ ẽ mabu ea biã ẽ hushiãki. Hau ea inãnũ ea mebĩshũkĩ txashuwã bake bushũtãwẽ— iwanã, Judá hawẽ haibu yunua ha mae anu ka aĩbuki nukuama 21Enaim mae anua hunibu hatu yukakĩ:

—Na mae Enaim anua aĩbu bai kesha tsaua txutamisburã, hani kamẽ?— hatu wa kemakĩ:

—Nenu aĩbu txutanamemisburã, hayamaki— akabu 22hanua ana txĩtũkaĩ Judá hawẽ haibũ yuikĩ:

—Aĩburã, ẽ haki nukuama itanaii. Habianushũri hunibũ ea yuikĩ: “Nenu aĩbu txutanamemisburã, hayamaki”, akĩ ea yuikãshuki— aka 23Judá yuikĩ:

—Txashuwã bake ẽ yunubia mĩ haki nukuama ishuki. Hau habiaskanũwẽ, ẽ mabu bishiãyanã, ana kashũ nũ hatu yukabauna nuku kashe watirubukirã. Mebinũ ishũ ha aĩbu benayamanãwẽ— akima 24hanua 3 ushe kakẽ hanushũ betsabu beshũ haki txanikĩ Judá yuikĩ:

—Mĩ babawã Tamar atiai txutanameima ma tuyaimakẽ txanikanikiki— akabu nĩkatã sinatakĩ Judá yuikĩ:

—Hawakĩ ea haska washinamẽ? Atxishũ kuakĩ tenãtãkãwẽ— hatu wa 25bushũ hawẽ babawã atxiabu hatu nemakĩ yuikĩ:

—Ha dukũ hatũ ea akima hawẽ unãti ẽ hayaki. Ẽ kuka Judá uĩmatãkãwẽ. Ea yuishũkĩ: “Eska ẽ hayaki, mĩ hawẽ ea unãti watirurã, hawẽ maburã. Na hawẽ unãtiwamis selo teutiya inũ hawẽ mestẽti keneya tsumamis ea bashishunima tsuanara ibuã unãtiruki, hatũ ea akimarã”, ea ashũtãkãwẽ— hatu wa 26hanua hawẽ mabu bushũ hawẽ hãtxa yuishũkĩ hawẽ unãti mabu bushuãbu uĩtã dakekĩ Judá yuikĩ:

—Ẽ bake Selá ẽ Tamar bimamawẽ taeshũ eã ẽ txakabuwaimaki. Haskawẽ taeshũ ẽ babawã Tamarĩ ea paraĩmashũ hatũ pekaĩmaikiki— hatu wa menupanãbũ hatu nemaimashũ ana habe hiwekĩ meama inikiaki.

27-28Haska waima hawẽ bake hanu kaiaĩtiã huni bake tsupibu dabe kaĩkatsi iki isĩ kaiĩ bake betsa ha dukũ hawẽ mekẽ dukũ tashnima bake hatũ kaĩmaitũ ha dukũ unãtiwakatsi yumẽ tashipa meneshkĩ yuikĩ:

—Na dukũ kaĩwãshuki— atã 29haska wabia hanua ana meshekikẽ ha dukũ ikama hawẽ betsa dukũ tashniaya bakeishta hãtxa wakĩ:

—Habaa! Haskai miã mĩ betsa maemai daĩbirã mĩ tashniai?— aka haskashuwẽ taeshũ hawẽ ewã kenakĩ: “Perezki”, atã 30hanua hawẽ betsa ha katxu tashnia yumẽ tashipaya meneshekeya kaiã kenakĩ: “Zeráki”, anikiaki.

Currently Selected:

Gênesis 38: cbsBR

Highlight

Copy