Gênesis 40

Huni dabetũ nama José hatu unãshunikiaki, na hãtxarã

1Ana betsatiã hatũ shanẽ ibu uva vinho dau hayamẽkaĩ ishũ hushkeshũ metã pekẽ amamis shanẽ ibu inũ, betsari misi wamis shanẽ iburi ha dabetũ hatũ shanẽ ibuhaira Faraó dayai peshunama 2-3haskaibũ ha dabeki shanẽ ibu Faraó hatuki sinatakĩ bitxiti hiwe capitãonẽ hiwe hanu hatu bitximis anu hatu yunua hatu bitximabu anuri José bitxiriaimabu anu 4bitxiti hiwe shanẽ ibũ hau José hatu mekekubainũ yunuima hatu merabewakubainaya shaba itxapa kaya

5hanua vinho hushkeshũ meshũmis shanẽ ibu inũ misi wamis shanẽ ibu meshu merã ha dabe usha namakĩ ha dabetũ nama betsa dabe uĩshinaya 6penaya José hikishũ ha dabe shinã txãkãma punu nukabu hatu uĩkĩ 7yukakĩ:

—Haskai mã pes punu nukamẽ?— hatu wa

8ha dabetũ yuikĩ:

—Nũ usha namatxakashinai shinaĩ tsuã nuku unãshũkĩ shabakabi nuku yuitima nũ tsaua ikaii— akabu

—Mã namashinairã, Deusũ matu unãmatiruki. Hani mã namashinai ea yuikãwẽ, nĩkanunã— hatu wa 9-11ha dukũ uva vinho hushkeshũ meshũmis shanẽ ibũ José yuikĩ:

—Ea ẽ namashinairã, mia yuinũ ea nĩkawe. Ea bebũ uva tashu nishi ewashinaki. 3 mebi teshpa tibiki hawẽ hua tuei uva tashu nishi peketã ha hua anua hawẽ bimi ewai hushiaĩ shanẽ ibuhaira Faraónẽ kẽtxa tsumashũ bimi tsekatã kẽtxaki tsinishũ ẽ tsuma ẽ inã akai usha haska namakĩ ẽ uĩshini ikaii— aka 12-15José ha dukũ yuikĩ:

—Ha 3 mebi teshparã, 3 shabaki. Ha 3 shaba kaya mĩ shanẽ ibu Faraónẽ na bitxiti hiwe meranua mia kaĩmatã ana hawẽri txĩtũwãkĩ mĩ ana shanẽ ibunũ mia yunushanikiki. Hawẽ uva vinho ana hushkeshũtã mĩ ana meshũshanaii, uatiã mĩ ashũkubaĩmis keska wakinã— atã —Faraó mia ana betxipaiaya ekiri shinãkĩ ewẽ nuikĩ shanẽ ibuhaira Faraó ekiri ea yuishuĩrashãwẽ, nenua hau eari kaĩmariashanunã. Earã, ẽ nawa betsaki, Hebreurã. Enabũ mai pakea anua ea hune iwenishũ ẽ hawa txakabuwamabiakẽ ea hamẽ bitxiyamabuki— akaya

16-17misi wamis shanẽ ibũ José haska wai nĩkatã pewai hawẽ hãtxa betxipaikĩ José yuikĩ:

—Enari ẽ usha namakĩ uĩshinai mia yuirianũ— atã —3 txitxã ewapaki misi betsa betsapa mata matsaumekirã ẽ Faraó beshuãyã habiatiãri ha misi peiyabu beshũ piaibũ haska usha namakĩ ẽ uĩshinaii— aka 18-19José hari yuikĩ:

—Ha 3 txitxã ewaparã, 3 shabaki. Ha 3 shaba kaya Faraónẽ mĩ dayakiri ana shinãtã mia danãkĩ betxipaiama hatu yunua mĩ yura hiki teneshtã mia dũtãbu mĩ mawa peiyabu beshũ mĩ nami mia pikĩ keyushãkanikiki— hatu wakĩ yuishĩkẽ

20-22ma 3 shaba kaya Faraónẽ baritiã hawẽ tsumabu dasibi itxawatã nawamakĩ ha vinho hushkeshũtã meshũmis shanẽ ibu inũ misi wamis shanẽ ibu bitxiti hiwe anua kaĩmashũ José yuishina keska vinho meshũmis shanẽ ibu Faraónẽ ana shanẽ ibu wa ana Faraónẽ vinho hushkeshũtã meshuni ana shanẽ ibuaya hanua Faraó ha hunĩ misi wamis shanẽ ibu hatu tenãmakĩ teneshmatã hatu dũtãmanikiaki. 23Hakia haskaitiã vinho hushkeshũtã meshũmis shanẽ ibũ haska José yuishina ana shinãma hakiri hakimanikiaki.

Currently Selected:

Gênesis 40: cbsBR

Highlight

Copy