Gênesis 32

Jacó inũ hawẽ betsa Esaú nukukunanũ ika inibukiaki, na hãtxarã

1Hanua hawẽ ibuã hiwe anu ana kai txĩtũkaini bai tanabainaya Deusũ nai tsumabu Jacóki nukuaibu 2hatu uĩkĩ yuikĩ: “Narã Deus dayashunikabu kushipabuki”, atã “Haskawẽ taea na mae kena ‘Maanaimki’ ”, anikiaki.

3Hanushũ mae Seir anu Edom mai pakea anu hawẽ betsa Esaúki ma huaikiri hau kaka bushũtanũbũ Jacó hawẽ tsumabu eskarabe yunukĩ 4-5hau eska yuishũtanũbũ Jacó hatu yunukĩ:

—Ẽ betsa Esaú eska yuitãkãwẽ: “Mĩ tsuma Jacó mia yuikĩ: ‘Nukũ kukabe ẽ hiwetani atimas ẽ ana miki nukuyuaii. Earã, ẽ eska haya ẽ huaii. Nĩkawe. Ina awa inũ, jumento inũ, txashuwã inũ, huni inũ aĩbu dayaru escravo mirima ẽ hayaki. Mĩ ekiri pe shinanũ’, iwanã, ‘Mĩ ẽ shanẽ ibuki, akĩ mia yuikĩ bebũkiri mianu ẽ hãtxa ẽ mia bumaii’ ”, akĩ ẽ yunuai habiaskari ẽ hãtxa ẽ betsa Esaú ea yuishũtãkãwẽ— hatu wa 6bushũ Esaú yuitã ana txĩtũbirã Jacó yuikĩ:

—Mĩ betsa Esaúki nukushũ nũ yuia nuku nĩkatã 400 hunibuya miki nukui ha kayabi huikiaki— akabu 7nĩkatã hawẽ betsa paraniwẽ taea shinaĩ datehairakĩ Jacó hawenabu inũ hawẽ inabu pashkakĩ hawenabu betsa inũ hawẽ txashuwã inũ, hawẽ ina awa inũ, hawẽ camelo hati pashkakĩ shuku dabe watã 8shinãkĩ: “Ha dukũ mani betsaki dukũ Esaú nukutushitã hatu deteaya uĩtã mani betsa pashatisharaki”, ika 9-12hanua bika tenei Deusbe hãtxakĩ: “Senhor Deusuũ, mĩ ẽ hutxi Abraão Deus mekenika mĩ ikũkainiki. Mĩ ẽ epa Isaque Deus mekenika mĩ iriakũkainaii. Haskawẽ taeshũ ea yuikĩ: ‘Mĩ mae anu ana kawe. Minabu anu ana kawe. Mĩ hari ka harishũ ẽ mia duawashanaii’, akĩ mĩ ea yubaimaki. Txanima mĩ ea duawaii. Nenua kairã, ẽ mestẽti bestiya ẽ kaniki, na Hene Jordão pukeirã. Hakia na eskatiã yura mani dabeya Hene Jordão ẽ ana pukei kaii. Ẽ haska kainaya ẽ betsa Esaú eki sinatai ea mekewe. Hushũ aĩbu bakeya dasibi tenaĩkiki, ika ẽ haki dateaii. Mĩ ea yuikĩ: ‘Ẽ mia duawakĩ mĩ bababu ẽ pa washanaii, mashiti tsuã tanatiruma wakinã’, akĩ mĩ ea yubayamaki. Haskawẽ taeshũ ẽ betsa Esaú anushũ mekekĩ ea itxakawamayamawe”, atã 13hanu ushashini bestẽkauã Esaú hawẽ daewakĩ ha inãkuĩkatsi hawẽ inabu katukĩ 14200 txashuwã yushã inũ, 20 txashuwã bene inũ, 200 cabra yushã inũ, 20 cabra bene inũ, 1530 camelo yushã bakeya inũ, 40 ina awa yushã inũ, 10 ina awa bene inũ, 20 jumento yushã inũ, 10 jumento bene katushũ 16ina sharabuya hawẽ tsumabu tibi mekemakĩ hatu pashka akeaketã hatu yuikĩ:

—Matunã, bebũkiri pashku pukekãwẽ, ina shukuabu tibiya benãta bukubainirã— iwanã, 17bebũkiri inabuya hawẽ tsumabu yunukĩ:

—Ẽ betsa Esaú matuki nukushũ matu yukakĩ: “Matũ shanẽ ibu tsuamẽ? Mã hani kai? Na inaburã, tsuanamẽ?” ikayarã, 18Esaú yuikinã: “Eska washãkãwẽ. Mĩ tsuma Jacónaki. Mĩ hawẽ shanẽ ibu Esaúrã, ha beshuĩkiaki. Uiã. Nuku itxũ Jacóri txipu ma huriaikiki”, akĩ yuishãkãwẽ— hatu wa 19hawẽ tsumabu inabu tibiya ana ha katxu habias hãtxa hatu yuitã hanushũ hawẽ henekĩ hatu yuikĩ:

—Esaú matuki nukuaya habu dukũ ẽ hatu hãtxa washu keska habiariri yuishãkãwẽ. 20Hãtxa menekĩ yuikĩ: “Uiã. Nuku itxũ mĩ tsuma Jacó txipu ma huikiki”, akĩ haska yuiriashãkãwẽ— iwanã, shinãkĩ —Inãkuĩti ea bebũkiri yunukĩ ẽ betsa ẽ daewaii. Txipu hawẽ besu ẽ uiã ea danãmamẽkaĩ— ikĩ 21hawẽ tsumabu inãkuĩti habu dukũ bebũkiri yunua pashku pukei buaibũ hanua ha kayuama meshu merã bai putxinĩ niti ika usha ishĩ

Jacó inũ Deusũ nai tsuma atxinamenibukiaki, na hãtxarã

22-23yamenapũ bestẽshũ hawẽ aĩ dabe inũ, hawẽ escravo aĩ daberi inũ, hawẽ 11 bakebu hatu bestẽwãshũ pashku hawẽ kena Jaboque hatu pukemashũ ha inũ, hatũ mabuya hawẽ tsumabu inabu dasibiriya pukematã 24-25Jacó besti niti ikẽ huni betsa hushũ maemakatsi ikĩ meshu merã habe tsumanametã tĩ anũ ishũ ashĩkĩ penaya huni betsã Jacó maematiruma huni betsã kishtĩkĩ Jacó kishtush atã 26yuikĩ:

—Ma penaikiki. Ea henewe— aka Jacó yuikĩ

—Mĩ ea pepawama ẽ mia heneamaki. Mĩ kushipawẽ ea pepawawe— aka

27—Harakiri mĩ kenamẽ?— aka

—Ẽ Jacóki— aka

28—Deus inũ hunibu binũkatsi ikũkaĩkĩ mĩ ma hatu maemaki. Haskawẽ taeshũ habũ mia ana Jacówẽ kenabuma ishãkanikiki. Hakia mia kenakĩ: “Israelki”, akĩ mia kenashãkanikiki— aka Israel nukũ hãtxarã, “Deusbe mĩ ma binunameaki” aka 29hanushũ Jacó yukakĩ:

—Miarã, harakiri mĩ kenamẽ? Ea yuiwe— aka

—Haskai ẽ kena mĩ yuka ikaii?— iwanã, hawẽ kena yuiama hanushũ Jacó hawẽ kushipawẽ pepawa bestitã kaya 30Jacó shinãkĩ:

—Ha hunirã, Deusraka. Deusbe ẽ beisinãbiashu ẽ mawama ishuki. Haskawẽ taeshũ na nenua ẽ habe atxinameshinai: “Penielki”, akĩ ẽ kena bena waii, nukũ hãtxawẽ yuiarã, “Deusbe ẽ beisinashuki”— ikarã. 31Hanua penaya bari huaya ha kishtush akawẽ taea tiri ikaini Jacóri pashku hawẽ kena bena Peniel pukebaini kai 32hanua Jacó Deusũ kishtush aniwẽ taeshũ natiã Israelĩ enabũ yuinaka betsa betsapa hawẽ kishi punu txitxia pisbumakiaki.

Currently Selected:

Gênesis 32: cbsBR

Highlight

Copy