Gênesis 33

Jacó inũ Esaú daenamenibukiaki, na hãtxarã

1Hanua Jacó kai sharakũkaini kakĩ hawẽ betsa 400 hunibube txai huai Jacó betxitã hanushũ dabe inũ besti hawenabus shuku wakĩ hawẽ aĩ Léia hawẽ bakebuya inũ, hawẽ aĩ betsa Raquel hawẽ bakeya inũ, hawẽ escrava aĩ dabe hatũ bakebuya hatu pashkatã 2hawẽ escrava aĩ dabe hatũ bakebuya tari shuku watã bebũ hatu mapũtã hanushũ Léiari hawẽ bakebuya ha katxu tari mapũriatã Raquel hawẽ henekĩ hawẽ bake Josébe txipu tari nitxĩtã 3hatu haska watã hawaira Jacó hatu binubaini bebũkiri kai hawẽ betsaki nukui kakĩ daewai hawa buama kai uĩmai hawẽ beyawẽ taea maĩ beti iki 7ki beukũkaini hawẽ betsa anu kaya 4haskakũkainaya unuriari ana haki sinatamari uĩmariai kushiriakirã Esaú Jacóki nukutã ikukunaĩ teikukutã tãtsu aka benimai habia dabe kashanibukiaki. 5Haskai menetã Esaú bewenikitã hatu uĩbaũkĩ aĩbu hawẽ bakebuya betxikĩ Jacó yukakĩ:

—Na mibe beaiburã, mĩ tsuabumẽ?— aka

—Enabuki. Deusũ ea hatu inãkubaĩshinaki, mĩ tsuma ẽ earã— akaya 6hanua hawẽ escrava aĩ dabe hatũ bakebube bua maĩ dãti itã beti ikaibũ 7hanua Léia hawẽ bakebube kariai maĩ dãti itã beti iriaibũ hanua txipu hawẽ henei José hawẽ ewa Raquelbe ka maĩ dãti itã beti iria haska maniabũ 8Esaú ana Jacó yukakĩ:

—Na mĩ inabu inũ mĩ tsumabu dasibibu mia bebũ ẽ uĩkubirani ẽ miki nukuairã, mĩ hawẽ hawayuai?— aka

—Nũ ana sinatarabeyamanũ mia daewakĩ ẽ inabu dabukũ ẽ mia beshuaiĩ, nũ ana txakabui hiweyamashanunã— aka

9—Ẽ betsa kayabituũ, haskamaki. Itxapa ẽ ma hayariki. Hawara mĩ haya mĩ beairã, minaki. Ea pashkashũ inãyamawe— aka

10-11—Haskamaki. Mĩ ea betxipaiaiwẽ taeshũ na inãkuĩ ẽ mia beshũshu biwe. Mĩ ewẽ benimai ẽ mia uĩshuki, haska Deus ẽ uiaĩ keskarã. Deusũ ea duawamiswẽ taea itxapa ẽ hayaki. Haskawẽ taeshũ ea danãma ẽ inãkuĩ biwe— akĩ hawẽtsaĩs yunu yunu aka atimas shinã betsa watã bitã 12hanushũ Esaú yuikĩ:

—Nenua karinuwe. Ẽ bebuai txipu ea itxũ kawe— aka

13-14—Ẽ betsaã, mĩ unaiĩ. Ẽ bake mishtĩ kushisma inũ ẽ inabu yushanẽri hawẽ bake txutxu amaibuwẽ ẽ nuiaii. Shaba bestitxai hikinũ ika nũ hawaira kushikainaya ẽ inabu ea mawashũtirubuki. Mia dukũ beburiwe, earã, ẽ inabu kai uĩkubaini inũ ẽ bake mishtĩ buaibu unãshubira ẽ hatu iyuairã. Seir anu ẽ miki ana nukui kairã, beburiwe— aka

15—Peki. Ẽ hunibu dabukũ mia bashishũpa, hau mia merabewakubainũbunã?— aka

—Mĩ ea merabewatirubia ewẽ nuiyamawe, emebi ẽ kairã— aka 16haska wa hawẽ 400 hunibube Seirkiri Esaú ana txĩtũkirãshĩkẽ

17hanua hawẽ shinã betsa watã ana hari hiweakiri kama teshkikaini Hene Jordão pukebaini Sucote anu Jacó hawenabube kashũ hiwe watã bari kaya hanu inabu bitxiti hiwe itxapa hatu wama hi mebi meshketãtãkĩ dakẽshũbaunibukiaki. Haskawẽ taeshũ ha mae kenakĩ: “Sucoteki”, nukũ hãtxawẽ kenarã: “Hi mebi keneki”, amisbukiaki.

18Hanua Jacó Padã-Arã anua hui hawa txakabuma pe Canaã mai pakea anu Siquém mae dapi hawenabube hiwetushinikiaki. 19Hanua mae ibu wanũ ikĩ Siquémnẽ epa Hamorĩ enabu anua 100 pei heshe karuhairawẽ taeshũ ha mae ibu wakĩ pakatã hanu hatũ tari hiwe hatu pũtemabauna hanu maniabũ 20hanushũ mishki txi tapu wakĩ mishki itxawakĩ maspu watã hanushũ Deus kẽwãti txi tapu washũ kenakĩ: ‘Deusrã, Israelĩ mekenika Deuski”, anikiaki.

Currently Selected:

Gênesis 33: cbsBR

Highlight

Copy