Gênesis 31

Jacó hunekaĩkatsi hawẽ aĩbuaibube yubakanikiaki, na hãtxarã

1Labãonẽ huni bakebu Jacókiri yuinamei: “Nukũ epã ina anua txashuwã tibi Jacó biãkĩ maewakĩ nuku ma binuĩkiki, hawenawakinã”, ikubainaibu huni betsã hatũ hãtxa Jacó yuiabu nĩkatã 2Labão uĩkĩ Jacó shinãkĩ: “Ea ana uĩ pewamaki, eki sinatai ẽ uiaiĩ, ha dukũ benimai taeni keskamarã”, ikĩ 3haskai nishũ shinãyã Senhor Deusũ Jacó yuikĩ: “Mĩ epã mae anu minabu anu ana kai txĩtũwẽ, mibe kakĩ ẽ mia merabewabukainairã”, aka

4Jacó hawẽ aĩ dabe hau benũbũ hawẽ tsuma yunua hatu yuishũtana hanua hatũ hiwe anua Raquel inũ Léia hanu txashuwã mekei dayai anu bui Jacóki nukuabu 5-13hatu yuikĩ:

—Matũ epã ea pewama ẽ uĩkubainaii. Ha dukũ eki benimaniki. Natiã ikis eki sinatai ẽ uiaiĩ. Hakia ẽ epã mekenika Deusũ ea merabewakubainikiki. Matu berubi dayashũtxakayamakĩ matũ epa ẽ duawakubaĩmiski. Hakia matũ epã ea itxakawakĩ ea pakakĩ bestikima maewa akeakekĩ ea parãkatsi ikaya Deusũ nemamiski. Labãonẽ ea yuikĩ: “Txashuwã bake keneya minaki”, ea wabianikẽ yushã dasibi keneya tashnikunainaibu hanua shinã betsa watã Labãonẽ ana ea yuikĩ: “Txashuwã bake shiwaya minaki”, ea wariaya yushã dasibi shiwaya tashniriakubainikiki. Haska wakĩ Deusũ matũ epã inabu ea mebĩmakĩ ea inãkubainikiki. Daka ẽ usha namaya txashuwã txutanameaibu ẽ uiãyã txashuwã bene shiwaya inũ keneya inũ meshupa bestibũ yushã txutaibũ Deusũ nai tsumã ea yuikĩ: “Jacóõ”, ea aka: “Ẽ nenuki”, ẽ wa: “Uiã, dasibi Labãonẽ mia itxakawai ẽ uĩmiski. Haskawẽ taeshũ bene shiwaya inũ keneya inũ meshupa bestibu ẽ bake bimakubainaii. Betel anushũ haska Deusũ ẽ mia yuini ẽ eaki. Habianushũri mishki unãti wakĩ benitã sheniwẽ dashu atã hanua mĩ ebe yubakaniki. Haskawẽ taea benitã na mae anua pashariwe. Haria mĩ kaini anu inũ kariwe”, ea wakĩ haska Deusũ ea yuishinaki— hatu wa 14-16nĩkatã hawẽ aĩ Raquel inũ Léiã shinãkĩ yuikĩ:

—Nukũ epã hiwe anu nũ ana hawawẽ nuitirumaki. Txashuwã inã keska wakĩ nuku nawa keska wakĩ nukũ epã nuku mia inãni inũ hanua hawẽ txashuwã mia yununi mĩ biãkubaina hawena ma keyuriaikiki. Haskawẽ taeshũ ina tibi inũ mabu dasibi Deusũ nukũ epa mebĩshũ mia inãkubainai nukuna inũ nukũ bakebunaki. Txanimaki. Haskawẽ taeshũ hamapai sharabu Deusũ mia yuishina ishũwẽ— akabu

Jacó Padã-Arã anua txaniama hunekainikiaki, na hãtxarã

17-19haskashĩshũ Jacó ana Canaã anu txĩtũkatsi hawẽ hamapai pewanũ ikaya Labãonẽ hawẽ txashuwã dani meshtei kakẽ Raquelĩ hawẽ epã kẽwãti mãkã dami yumetsukaini hanua Padã-Arã anua Jacó hawẽ inabu dasibi bini inũ, hawẽ tsumabu inũ, hawẽ mabu itxawatã hawẽ aĩ dabe inũ hawẽ bakebuya camelo kamaki hatu katsaũbaĩkĩ Canaãkiri hawẽ epa Isaque hiwea anu hatu dasibi iyui 20-21kakĩ hawa hatu banabimama pashai Arameu nawa Labão Jacó haki txaniama parãbaĩkĩ hawenabu dasibi hatũ mabuya iyui hene Eufrates ma pukebaina Gileade Matikiri Jacó besusi pashai hunekainikiaki.

Jacó kashiã Labãonẽ txibanikiaki, na hãtxarã

22Hanua Jacó pashai haska kaĩshina ma 3 shaba ma kaya Labão yuiabu nĩkatã 23-24hawenabubetã Labãonẽ Jacó txibãkĩ 6 shaba txibãkubaini Gileade Mati anua haki nukuriama usha namaya Deusũ Labão yuikĩ:

—Uĩrawe. Mimebi Jacó kũyã akĩ hawa txakabu yuiyamashãwẽ— aka 25hanua bestẽkaini kai Gileade Matikiri kaya ha matikĩ Jacó hatũ tari hiwe nitxĩkĩ pũteshina dakakẽ Labão hawenabuya kai haki nukutã hatũ tari hiweri mati anu habũri nitxĩkĩ pũteriatã 26-30Jacó anu kashũ Labão haki sinatakĩ yuikĩ:

—Haskai mĩ haskakirãshinamẽ? Ea parãkĩ ẽ aĩbu bake dabe mĩ ea iwẽshinaki, detenametã hatu atxibiranai keska wakinã. Ea hawa yuiama ea parãtã hune mĩ pashashinaki. Haskara shinaĩ mĩ hushiãmẽ? Bebũkiri hukĩ mĩ ea yuia mimawati harpa inũ tũ tũ atiwẽ nawakĩ benimakĩ ẽ mia nitxĩpanã mĩ hune pashai hushiãki. Mia nitxĩkĩ ẽ bake dabe inũ ẽ bababu benimakĩ hatu tãtsu apanã mĩ ea hatu hunẽbirãshinaki. Haskara mĩ unaĩsmapahairamẽ? Ẽ kushipawẽ ẽ mia txakabuwapanã mĩ epã mekenika Deusũ ea yuikĩ: “Uĩrawe. Mimebi Jacó kũyã akĩ ha akĩ hawa yuiyamashãwẽ”, ea wa ẽ nĩkabirãshinaki. Mĩ epã mae anu kabiai hui peama haskakĩ ẽ mãkã dami shũska mĩ ea yumetsukirãshinamẽ?— aka 31Jacó kemakĩ yuikĩ:

—Datei hawa shinãma mĩ kushipawẽ mĩ aĩbu bakebu mĩ ea mebĩtiru shinaĩ miki txaniama ẽ hushiãki. Haska mĩ ea watirukẽ hune ẽ pashakirãshinaki— iwanã, 32Raquelĩ hawẽ epã kẽwãti mãkã dami yumetsubiakirãshĩkẽ Jacó hawa unãma ana yuikĩ:

—Haratutũra mĩ mãkã dami beshiã mĩ betxiaya ha enabu hau mawanũwẽ. Enabu anua ẽ mabu dasibi uĩ keyuwe. Haniara mĩ mabu betxitã butãwẽ— aka 33ha dukũ Jacó dani tari hiwe anu hikitã bena keyutã hanua Léiã dani tari hiwe anuri hikitã bena keyuriatã hanua hawẽ dayaru escravo aĩ dabetũ dani tari hiwe anuri hikitã benakĩ keyuriatã hawẽ mãkã dami hania betxiama hamẽ bena keyutã atimas Raquelĩ dani tari hiwe anuri hikiriatã 34mãkã dami beãshina camelo kabekãti merã arua Raquelĩ arui haki tsauaya hawẽ epa Labãonẽ hawẽ mabu dasibiri uĩkĩ mebaũkĩ ana hanuari betxiamakẽ 35Raquelĩ hawẽ epa beparãkĩ yuikĩ:

—Epaã, earã, eki sinatayamawe, himi iki tsaua ẽ haska benitimakirã— aka haska wa benabaũkĩ Labãonẽ hawẽ kẽwãti dami habu tibi anua betxiamakẽ 36-37hanua Jacó sinatakĩ Labão txitekĩ yuikĩ:

—Hawai e iskirã ea txibãshĩshũ ẽ mabu dasibi itimaska wakĩ mebaũkĩ hawa mabu mina mĩ ma betxiamẽ? Minabu inũ enabũ bebũ mãtxĩwẽ. Haratutũ nũ pewaimẽkaĩ? Mĩ miamẽkaĩ? Ẽ eamẽkainã? Nukunabũ hau nuku yuinũbunã. 38Ma 20 ano ẽ mia dayashunaya mĩ inabu yushã tuyatã kaũmama ikũkainimaki. Ha inũ, mĩ txashuwã bene enawakĩ ẽ piama ikũkainimaki. 39Hawa inawã mina mia biã ẽ mia beshuãma ipauniki, ẽ mia meke pewashunarã. Hakia ena ẽ mia nitxĩshũpauniki. 40Shabatiã inũ meshu merã yumetsubainabũ ea pakamakĩ mĩ ea yunui dakaimaki. Bariri barĩ ea kuamiski. Meshu merã matsĩ ea aka ikinĩ iki ẽ ushaismaki, matsi teneirã. 41Haska tenekubaini mia dayashuni 20 ano mĩ mae anu ẽ hiweshinaki. Hanua 14 ano mĩ aĩbu bake dabe binũ ika hamẽ ea ẽ dayama ikũkainiki. Hanua ana 6 ano mĩ inabu bi ẽ mia dayashũkũkaĩshinaki. Ẽ mia dayashunaya betsa tibi mĩ ea maewashũkubaĩmiski, ea hawẽ pakakinã. 42Ẽ epa Isaque inũ ẽ hutxi Abraão hatũ mekenika Deus ẽ hayamakẽ mais hawauma mĩ ea nitxĩkeãshinaki. Hakia mĩ ea txakabuwai Deusũ uĩshũ ẽ mia pe dayashunai uĩriakubaĩshĩshũ haskawẽ taeshũ ekiri hãtxakĩ Deus ewẽ nuikĩ mia nemashinaki— aka

Jacó inũ Labãonẽ pewai yubakanãrabenibukiaki, na hãtxarã

43haska wa nĩkatã Labãonẽ yuikĩ:

—Haskamaki. Ea nĩkawe. Ha mĩ aĩ dabe mĩ iweshinarã, ẽ bakebuki. Hawẽ bakeburã, ẽ bababuriki. Ha mĩ inabu dasibirã, enaki. Dasibi mĩ beshianã, enaski. Hakia ẽ aĩbu bake dabe inũ hawẽ bakeburã, ẽ ana hawa hatu washũtirumaki, merabewakinã. 44Haskawẽ taearã, mia inũ earã, yubakanamenãwẽ. Nuku dabe uĩkĩ hawẽ hau Deusũ nuku unãpakeshanunã— aka 45Jacó nĩkatã hawẽ unãtiwanũ ishũ mishki bishũ dabekĩ nitxĩtã 46hawenabu yuikĩ:

—Mishki itxawakĩ maspu keyatapa wakãwẽ— hatu wa itxawakĩ mãtxĩshunabu hawẽ parananãtimawakĩ mishki mãtxiãbu dapishũ piaibũ 47Labãonẽ ha mishki mãtxĩshu kenakĩ: “Jegar-Saadutaki”, anikiaki. Hakia Jacó habias mishki mãtxĩ hatũri kena betsa wakĩ: “Galeedeki”, arianikiaki. 48Hanushũ Labãonẽ ana yuikĩ:

—Na mishki nũ itxawakĩ maspuashurã, unanuma nũ pashkakaina mia inũ ea nukũ unãtiki— iwanã, haskawẽ taeshũ Jacó enabũ kenakĩ: “Galeedeki”, anibukiaki.

49Labãonẽ ana yuikĩ:

—Nũ pashkakaina nũ ana uinanãmakẽ hau Senhor Deusũ nuku dabe uĩpakeshanũwẽ. 50Ẽ aĩbu bakebu mĩ ea hatu itxakawã kasmakĩ mĩ hatu danãkĩ aĩbu betsa biayarã, huni betsã mia nematirumabiakẽ: “Nũ yubakaiwẽ taeshũ mĩ haskaya Deusũ unaĩkiki”, hakimayamashãwẽ— aka haskawẽ taeshũ ha mishki maspu kenakĩ: “Mispaki”, nukũ hãtxawẽ yuiarã, “Hakishũ Deusũ Uĩbaũtiki.” 51-53Hanushũ Labãonẽ ana hãtxa wakubaĩkĩ:

—Uiã. Na mishki maspuabu inũ mishki keyatapa ẽ nitxĩshurã, habuwẽ nũ yubakai nukũ shinãmatiki. Ea inũ mia namakis nia keska nũ ashuki. Ea miki sinatakĩ mia txakabuwakatsi ikĩ ha dabe ẽ binuama ishanaii. Miari eki sinatakĩ ea txakabuwakatsi ikĩ ha dabe mĩ binuamari iriashanaii. Nũ ma yubaka haska haya haratutũra nũ txakabuwakĩ kaneaya ea kasmai miã nũ kaneayarã, mĩ hutxi Abraão mekenika Deus inũ ẽ hutxi Naorĩ mekenika Deus habiastũ nuku betsa kupishanikiki— aka haska wa Jacó nĩkatã hawẽ epa Isaque mekenika Deuski datekĩ yuikĩ:

—Peki. Haska nũ yubakai keska ipakenãshãwẽ— iwanã, 54Deus benimawakĩ mati anushũ hawẽ kẽwãti piti pewakĩ txashuwã bake tesẽshũ shui keyutã misiyabi hatu pimanũ ishũ hawenabus kena itxabu hatubetã pitã matikĩ habiari ushashini 55penaya Labão bestẽtã hatu henebaĩkatsi hawẽ beyawẽ hawẽ bababu inũ hawẽ aĩbu bake dabe tãtsu ashũ hãtxa pepawẽ yuikĩ hatu duawatã hawẽ mae anu txĩtũbiranibukiaki.

Currently Selected:

Gênesis 31: cbsBR

Highlight

Copy