Gênesis 27

Isaque hawẽ bake dabe kushipa pepakiri hatu yuikĩ yubanikiaki, na hãtxarã

1Hanua Isaque anibui mestebuhairai ma beshushhairakĩ hawẽ bake iyua Esaú kena huaya Isaque yuikĩ:

—Epaã, mĩ miamẽkaĩ? Mia yuinũ nĩkawe— aka Esaú yuikĩ:

—Epaã, mĩ ea kena ẽ hushuki. Hawamẽkaĩ? Ea yuiwe— aka 2-4ana hawẽ epã yuikĩ:

—Uĩwẽ. Ma ẽ mestebuhairai anibuhairaki. Hatiãra ẽ matu mawashũshanai ẽ unãmawẽ taeshũ ẽ hãtxa nĩkawe. Mĩ piaya kashũ txashu tsakashũ beshũ yutxiyabi ea bawashũwẽ, haska ẽ betxipaimis keska piti nuweparã. Pitã ẽ huĩti benimakĩ mĩ ẽ bake iyua hau Senhor Deusũ mia duawakubaĩshanũ ẽ mia pepakiri hãtxa wairã, ẽ mawariamarã— iki 5Isaque Esaúbe hãtxai hawẽ ibu Rebecã nĩkakẽ hanushũ Esaú txashu hawẽ ibu tsakashuni kaya 6-10hanua Rebeca hawẽ bake mashku Jacó anu kashũ yuikĩ:

—Uiã, mĩ epa Esaúbe hãtxai ẽ nĩkashuki. Mĩ epã yuikĩ: “Txashu tsakatãshũ yutxiyabi ea bawashũwẽ, haska ẽ betxipaimis keska piti nuwepa wakinã, haska pitã ẽ huĩti benimakĩ Senhor Deusũ nuku uiãyã mia duawakĩ ẽ kushipa pepa ẽ mia yunushanaii, ẽ mawariamarã”, akai ẽ nĩkashuki. Haskashũwẽ taeshũ ẽ hãtxa nĩkawe. Ẽ mia yunuai mia dukũ kashũ mĩ ina cabra bake haratura dabe hawẽ nami babupa katutã atxishũ ea beshũwẽ, hawẽ nami yutxiyabi mĩ epa ẽ bawashunairã, haska manuai keskarã, haska mĩ epanu mĩ bushuã pitã benimakĩ mia besti hawẽ kushipa pepa mia yunui hau hãtxanunã, Senhor Deusũ hau mia duawashanunã, mĩ epa mawariamarã— aka 11-12hanushũ Jacó datekĩ hawẽ ewa yuikĩ:

—Uiã, ẽ betsa Esaú dani itxapa hayaki. Earã, ẽ dani hayamaki. Haskawẽ taeshũ ẽ epã ea metiruki. Meshũ: “Ea paraĩkiki”, ishũ pepa ea inãma kupikĩ ea yuputiruki, pepawamarã— aka 13Rebecã ana yuikĩ:

—Mia txakabuwakatsi ikaya miwẽ taeshũ: “Ea kupiwe”, akĩ ẽ mia yuishũshanaii. Haska ẽ mia yunuai bitãwẽ. Nukũ ina cabra bake babupa dabe ea bishũtãwẽ— aka 14kashũ dabe atxishũ beshuã haska hawẽ epã betxipaimis keska hawẽ ewã cabra nami txashu nami nuwe keska wakĩ yutxiyabi bawashũtã 15hanushũ hawẽ tari hiwe meranu hikikaĩ haya txai katãshina hawẽ bake iyua Esaú tari bishũ hawẽ bake mashku Jacó sawemashũ 16cabra bake bitxi Jacó pũyãki meyabutã teshuanuri bitxi betsari teyabua 17nami yutxiyabi inũ misi bawashuna inã 18Jacó hawẽ epanu kashũ yuikĩ:

—Epaã, ẽ ma huaii— aka hawẽ epã yuikĩ:

—Ẽ nenu dakaki. Huriwe. Mĩ haratu ẽ bakemẽ?— aka 19Jacó parãkĩ yuikĩ:

—Ẽ Esaúki, mĩ bake iyuarã. Mĩ ea yunua kashũ ma ẽ tsakatãshuki. Benitã tsaushũ txashu nami ẽ mia bawashũshu piwe. Haskawẽ taeshũ mĩ kushipa pepa ea yunui ekiri hãtxariwe— aka

20—Haskatã mĩ hawaira txashu tsakashumẽ?— aka ana parãkĩ yuikĩ:

—Mĩ haibu merabenã Senhor Deusũ txashuki ea nukuma ẽ tsakashuki— aka 21hanushũ hawẽ ibuã yuikĩ:

—Haska mĩ ẽ bake Esaúmẽkaĩ? Mia menũ neri huwe— aka 22Jacó ha dapi ka mekĩ yuikĩ:

—Mĩ hui Jacóki. Hakia mĩ mekẽ mĩ Esaúki— aka 23hawẽ mekẽ dani itxapa Esaú keskawẽ taeshũ Isaque Jacó unãma hawẽ pepa yaushiama yunukatsi 24Isaque ana yukakĩ:

—Txanima mĩ ẽ bake Esaúmẽ?— aka

—Habia mĩ bake ẽ eaki— aka 25atimas hawẽ epã yuikĩ:

—Peki. Txashu nami mĩ ea bawashũ beshuã ea inãwẽ, ha dukũ pitã ẽ kushipa pepa ẽ mia yunuairã— aka Jacó nami bawashuna inã pitã uva vinhori inã 26pikĩ akĩ keyutã ana yuikĩ:

—Epaã, ana ea dapi hushũ ea tãtsu awe— aka 27-29Jacó hawẽ epa dapi kashũ tãtsu akai Isaque Esaú tari itsa shetetã:

“Esaúki”, ishũ hawẽ kushipa pepa yunui hakiri hãtxai:

“Aa, txanimaki. Ẽ bake iyuatũ itsaki,

Senhor Deusũ ni nuku pepawashũmis ni itsarã.

Ui imakĩ mai pepa inãkĩ

yunu betsa betsapa itxapa inũ uva vinho itxapa inãkĩ

Deusũ hau mia duawapakeshanũwẽ.

Shukua betsa betsapatũ mia duawaibũ

hatũ shanẽ ibukĩ mĩ hatu tsuma wa miki mesepakeshãkanikiki.

Mĩ betsa kayabibu mĩ hatu shanẽ ibushunaya

hau miki mesekĩ mia duawapakeshanũbũwẽ.

Tsuabũra mia yupuaya Deusũ hatu yupuriashanikiki.

Tsuara yura betsã mia pepawaya Deusũ hatu pepawariashanikiki”,

iwanã,

30-31Isaque Jacó hawẽ kushipawẽ pepawakĩ meneaya Jacó hawẽ epa anua dama tashnikainaya txipu unãma ni anua hui hawẽ betsa Esaú hikitã nami hawẽ epa tsakatãshũ yutxiyabi bawariabirã beshũshũ yuikĩ:

—Epaã, ẽ ma huaii. Benitã tsaushũ txashu nami ẽ mia yutxiyabi bawashũshu piwe, haskawẽ taeshũ mĩ kushipa pepa ea inainã— aka 32hawa unãma yukakĩ:

—Mĩ tsuamẽ?— aka

—Ẽ Esaúki, mĩ bake iyuarã— aka 33shinaĩ datei bene bene ikĩ yuikĩ:

—Haska mĩ huriama huni betsã nami yutxiyabi bawashũ ea beshuã pitã ẽ kushipa pepa inãkĩ ẽ yunushuki. Tsua ẽ ashumẽ? Tsuara ẽ kushipawẽ ẽ pepawashu Deusũ pepawariashanikiki, meribi wakinã. Haska ẽ hakiri ẽ hãtxashu mebĩkĩ ẽ betsa watirumaki— aka 34hawẽ epã hãtxa haska yuia nĩkatã Esaú nuihairai kasha txakayamakĩ yuikĩ:

—Epaã, eari mĩ kushipa pepa ea yunuriawe— aka 35hanushũ hawẽ epã ana yuikĩ:

—Mĩ betsa daki hushũ ea parãtã mĩ kushipa pepawati hune hatũ mia biãshuki— aka

36—Ẽ betsa haskawẽ taea pekiri kenanibuki, Jacórã, Mebinanã. Ẽ mĩ bake iyuabiakẽ ea dukũ ẽ shanẽ ibushanai ea mebiniki. Na habiatiã mĩ ea kushipa pepawatiru ana ea mebĩshuki, dabeki ea beshtekinã. Ea kushipa pepawati betsa mĩ ana hayamamẽ?— aka 37Isaque Esaú ana kemakĩ:

—Uiã, mĩ betsa Jacó mĩ shanẽ ibu ẽ washuki. Mikiri inũ minabu hawẽ tsumabu ishanũbũ ẽ haska yunuriashuki. Yunu itxapa inũ uva vinho itxapa hayai hau pe hiweshanũ ẽ kushipa pepa ẽ ma yunukĩ keyushuki. Haratu betsawẽ ẽ mia ana pepawatiru hayamaki— aka 38haska wa nĩkamas bika wakĩ ana yuikĩ:

—Epaã, kushipa pepawati bestitxai mĩ ana hayamẽkaĩ? Eari pepawawe— atã ana kasha txakayamatã neseaya 39ana yuikĩ:

“Mai pepa ui imis anu hiweama

txai nãta mĩ hiwekũkaĩshanaii.

40Betsabu nemai hawẽ detenameti nupe kenu txaipawẽ

hatube detenamei mĩ hiwebiakũkainaya

mĩ betsa mia shanẽ ibushũkũkaĩshanikiki.

Hakia miari kushipatã ana yunumama

ibubis hanu mĩ tari yunubaĩshanaii”,

akĩ haska wakĩ Isaque Esaú kushipa wakĩ pepawarianikiaki.

Jacó hawẽ betsa Esaúki datei pashanikiaki, na hãtxarã

41Hawẽ ibuã Jacó pepawakĩ hawẽ kushipa pepa yunushinawẽ taeshũ Esaú hawẽ betsa Jacó danãkĩ yuikĩ: “Ẽ epa ma mawa kemaikiki. Samama mawaya hawẽ nui kashai nesetã ẽ betsa ẽ tenãti shinaiĩ”, ikai 42hune hãtxai tsuãra nĩkashũ Esaú hãtxa hawẽ ibu Rebeca yuiabu nĩkashũ hawẽ bake mashku Jacó kenashũ yuikĩ:

—Mikiri Esaũ shinãkĩ miki sinatai hamebi daenũ ika miki yubakaikiaki, hawẽ kushipa inũ hawẽ pepa mĩ biãshina manakukinã. 43-45Haskawẽ taeshũ mia yuinũ ẽ hãtxa nĩkawe. Harã anu ẽ pui Labão hiwe anu pashatãwẽ. Mĩ betsa miki sinatai maĩriamakẽ harishũ manayutãwẽ. Miki sinatai maiĩ mĩ haska waima hakimaya huni betsa ẽ yunua ea mia iweshũshanikiki. Na habianua mia inũ mĩ betsabe detenamei mã mawaya hanu ẽ bake dabe ẽ matu benukatsi ikamaki— atã 46hanua Rebeca hawẽ bene Isaque anu kashũ yuikĩ:

—Heteu nawa aĩbu ẽ betxipaiamaki, Esaú aĩ dabe keskarã. Habiasriai Jacó Heteu nawa aĩbu nenu Canaã anu hiweshũ aĩyaĩ ẽ betxipaiamawẽ taea ẽ huĩti nishmai sinai haska ẽ hiwetirumaki— aka

Currently Selected:

Gênesis 27: cbsBR

Highlight

Copy