Gênesis 28

1-4hanushũ hawẽ epa Isaque Jacó kenashũ nitxĩ pewakĩ yunukĩ:

—Na Canaã mai pakea anua aĩbu biyamashãwẽ. Hakia Padã-Arã anu mĩ epa betsa Betuelĩ enabu anu kashũ ha mae anua mĩ ewã pui Labão aĩbu bake betsa aĩwãtãshãwẽ, harishũ Deus kushipa dasibi binuatũ mia duawakĩ mia pa wa minabu shukua itxapahaira inũbarishãkanikikirã. Ẽ epa Abraão yuini keska wakĩ mia inũ minabu pepawakĩ na mai pakea hanu nũ hiwea anu Abraão yubani anu nenu nukunabuma anu hiwei nũ mae akeakemis anu Deusũ hatu ibu wamashanikiki— ashũ 5hau haskakaĩtanũ hawẽ bake Jacó mae betsa anu nitxiã Padã-Arã anu Rebecã pui Labão Arameu nawa Betuelĩ huni bake anu kashanaikiri Isaque yununikiaki.

Esaú ana aĩyanikiaki, na hãtxarã

6Hanushũ pepawakĩ Isaque hau Jacó Canaã nawa aĩbu biyamanũ Padã-Arã anu kashũ hau aĩbu betsa bitanũ nitxiã kai Esaú Jacó haska waibu nĩkashina 7hawẽ epa inũ hawẽ ewã hãtxa Jacó nĩkabaini Padã-Arã anu kashĩkẽ 8Canaã nawa aĩbu dabe Esaú aĩwanikẽ hawẽ ibu Isaque betxipaiamakẽ Esaú unaĩwẽ taea 9Abraão huni bake betsa Ismael, hawẽ epa betsarã, hanu kashũ Ismaelĩ aĩbu bake Maalate Esaú aĩwanikiaki, Nebaiote puirã. Hanua bitãkĩ hawẽ Canaã nawa aĩbu dabeki dasiwaima hanus hatu hiwemapaunikiaki.

Betel anu Senhor Deus Jacóki nukua habe hãtxanikiaki, na hãtxarã

10-11Berseba anua kai mae Harã baiwẽ Jacó kai bai putxinĩ kaya ma bari kakẽ hanu ushakatsi niti itã haki teratamekatsi mishki tũku mania betsa bitã haki isratamea daka 12-14usha namakĩ uiãyã tapaiti txaipa mai anua naiki kepia Deusũ nai tsumabu ha tapaitiwẽ inabaĩbaini inũ butubirãbiranaibu anu Senhor Deus ha dapi nishũ uĩmakĩ yuikĩ:

—Earã, ẽ Senhor Deuski. Ẽ mĩ hutxi Abraão mekenika Deus inũ ẽ mĩ epa Isaque mekenika Senhor Deuski. Mia yuinũ ẽ hãtxa nĩkawe— iwanã —Na mĩ hanu dakanua mai pakea mia inũ minabu ẽ mia yunukĩ ibu wama minabu na mae anua papakei mai itxapa hawẽ mishpu kuruti tsuã tanatiruma keskai nortekiri inũ, sulkiri inũ, bari huaikiri, inũ bari kaikiri mebinanãtã ibu wai hiwea akeakeshãkanikiki. Mia inũ minabuwẽ taeshũ shukua dasibi mai hirabi anu manibaunabu ẽ hatu pepawapakeshanaii. 15Mibe putanameama hanira mĩ kaya merabewakĩ ẽ mia mekekubaĩshanaii. Na mai pakea anu mĩ ana hiweshanũ ẽ mia ana nenu iweshanaii, txĩtũwãkinã. Ẽ mia yuishu ẽ mia ashũriama hakimama ẽ mia heneama ipakeshanaii— aka

16-17hanua Jacó usha bestẽtã shinaĩ datekĩ yuikĩ:

—Txanima na mae anu nenu Senhor Deuski. Ẽ haska unãma ikaki. Nenu na mae anu Deus hiwekẽ ẽ haki mesei dateaii.

—Habaa! Nenuri nai anu Deusũ hiwe hanu hawẽ hikiti shuiki— ika

18ana ushashini bestẽtã penamahaira benikauã mishki tũku haki teratameshinai bishũ ha unãti wanũ ishũ ha mishki dabekĩ benitã Deus kẽwãkĩ sheniwẽ hawẽ beya txibãkĩ mishki dashu anikiaki. 19Haskakẽ uatiã ha mae ha dukũ nawabũ kenakĩ: “Luzki”, anibu hanushũ Jacó kena bena maewakĩ: “Betelki, Hanu Deus Hiwea Maerã”, anikiaki.

20-22Hanushũ Jacó Deus yubai hãtxakĩ eska wanikiaki:

—Hanira ẽ kaya Deus ebe kakĩ ea merabewakĩ piti inũ tari ea inãkĩ unanuma ẽ epa anu ea ana iwekẽ txanima wakĩ Senhor Deus ẽ mekenika Deus shabakabi ẽ washanaii. Na mishki ẽ benishurã, Deusũ hiwe ishanikiki— iwanã, Deus yuikĩ:

—Deusuũ, hawara ea inãkĩ 10 mĩ ea inã bitã bestitxai mia inãkuĩkĩ hawẽ ẽ mia kẽwãpakeshanaii— akĩ haskai Jacó Deusbe hãtxanikiaki, yubakairã.

Currently Selected:

Gênesis 28: cbsBR

Highlight

Copy