Gênesis 29

Mae Harã anu Jacó kanikiaki, na hãtxarã

1Hanua Jacó Betel anua kaĩkaini ana bari huaikiri kakũkaini atimas Labão maewã Harã dapi hikishũ 2-3hanu bai anu hatũ ũpash bana kini dapi txashuwã shuku dabe inũ bestiti txashuwã habũ mekekĩ uinikabu ũpash hatu amanũ ika huĩrukuĩ maniabũ Jacó hatu betxitushitã hatu uĩkĩ ũpash bana mishki ewapawẽ bepua txashuwã dasibi itxawashũ txashuwã uinikabũ ũpash bana kini bepẽshũ ũpash bitã bitãkĩ hatu ama keyutã ana mishki ewapawẽ bepuaibũ shaba tibi haska hatũ beya amisbu akaibũ 4txashuwã uinikabu Jacó hatu yukakĩ:

—Maturã, mã haniamẽ?— hatu wa

—Harã anu nũ hiweaki— akabu 5ana hatu yukakĩ:

—Naor bake Labãonã, mã unaĩ?— hatu wa

—Nũ unaiĩ— akabu

6—Haskaramẽ? Hawa isĩ teneamamẽ?— hatu wa kemakĩ:

—Peki. Uĩwẽ. Hanu hawẽ aĩbu bake Raquel hawẽ txashuwãbube ma nenu huikiki— akabu 7hanushũ Jacó hatu yuikĩ:

—Uiã, bari kariamaki. Eskatiã txashuwã bitxitimaki. Ana ũpash hatu amashũ ana hatu pimakĩ basi anu hatu bukãwẽ— hatu wa 8habũri kemakĩ:

—Haska txashuwã dasibi itxai keyuriamakẽ nũ haska watirumaki. Hakia dasibi habũ nũ hatu mekemisbũ itxatã ha mishki ewapa hawẽ bepua bepẽtã nũ hatu amamiski— akabu 9hatube hãtxai meneriamakẽ ha txashuwã uinika Raquel hawẽ epã txashuwã iwei huaya 10Jacó uĩkĩ hawẽ kuka Labão aĩbu bake Raquel inũ hawẽ txashuwã betxitã kashũ ũpash bana kini bepẽshũ hawẽ kukã txashuwã besti amashũtã 11Raquel dapi kashũ hawẽ beya txibãkĩ yukakĩ tãtsu atã benimahairai kashakĩ 12yuikĩ:

—Ẽ mĩ epã daiski. Ẽ Rebecã bakeki— aka Raquelĩ nĩkatã kushikaini kashũ hawẽ epa yuia 13Jacókiri nĩkatã: “Ẽ puĩ bakeki”, ika kushikirã haki nukushũ ikushũ tãtsu ashũ hawẽ hiwe anu iyua Jacó hawenabukiri txanikĩ haska hatube hiwemis hatu yui keyuaya 14Labão Jacó yuikĩ:

—Mĩ enabu kayabiki, mĩ nami inũ mĩ shaurã, ẽ himi keskarã— akima hatube dayai Jacó hiwekĩ hatu merabewakĩ txashuwã mekei ushe bestitxai nitxiãyã

Jacó Raquel inũ Léiawẽ taea dayanikiaki, na hãtxarã

15hanushũ Labão Jacó yuikĩ:

—Txanima mĩ enabuki. Ea anua hawauma mĩ ebe dayashinaki. Hamẽ mĩ ana dayatirumaki. Ana ẽ mia dayamakubaina, hati ẽ mia pakatirumẽkaĩ? Ea yuiwe— akaya 16Labão aĩbu bake daberã, ha dukũ iyuatũ kena Léia inũ mashkũ kena Raquel inikiaki. 17Ha iyua hawẽ beru besti atimapa duakabiwẽ taea hawẽruamakẽ hakia hawẽ bake mashku besti hawẽ yura hirabi hawẽruahairakẽ 18Jacó Raquel betxipaihairakĩ hakiri yuikĩ:

—Mĩ bake mashku Raquel mĩ ea bimashanũ 7 ano nitxĩ ẽ mia dayashunaii— aka

19kemakĩ:

—Peki. Mia besti mĩ enabi kayabiki. Huni betsa ẽ inãkatsi ikamaki. Ẽ mia bimashanaii. Ebe hiwekĩ ea dayashũyuwe— aka

20Jacó Raquel betxipaihairaiwẽ taeshũ aĩwãkatsi ikĩ Labão dayashũkĩ: “7 ano hawẽ ibu ẽ dayashunairã, Raquel ẽ bishanairã, hatishuĩra barimaki”, ishũ Jacó shinãkubainikiaki. 21Hanua 7 ano dayashũtã Jacó Labão yuikĩ:

—Mia yubatã aĩbu binũ ika ẽ dayakũkaĩshina ma ẽ keyushuki. Ẽ ainã, ea bimariwe— aka

22hanushũ hawẽ bake beneyawakatsi ikĩ Labão habe hiweabu dasibi kenashũ piti itxapawashũ hatu pimakĩ nawamakĩ 23meshu merã Jacó parãkĩ hawẽ bake iyua Léia iweshuna Jacó unãma habe iki taenikiaki, aĩwãkinã. 24Hanushũ hawẽ bake Léia beneyawatã hawẽ epã hawẽ dayaru escrava betsa hawẽ kena Zilpa Léia inãnikiaki, hau merabewanũ hawẽ dayaru wamakinã. 25Hanua penaya Jacó bestẽtã Léia betxitã Jacó Labãoki sinatakĩ yuikĩ:

—Mĩ ea haska wa ẽ ishiaĩ? Raquel bikatsi ẽ mia dayashũshinaki. Haskakĩ Raquel ea inãma Léia ea inãkĩ mĩ ea haska wakĩ parãmẽ?— aka 26Labão kemakĩ:

—Iyua beneyawariama mashku dukũ beneyawarã, haska nukũ beyamaki. 27Haskakẽ iyua dukũ aĩwãyuwe, 7 dia beyawai mĩ ma ha bestibe hiwekẽ Raquel dikabi nũ mia inãriashanairã. Haska mĩ ea yubanirã, ana 7 ano mĩ ea dayashũshanaii, ẽ mia inainã— aka 28haska wa nĩkatã Jacó Léia besti aĩwã 7 dia habe hiwekẽ hawẽ bake mashkuri Labão Jacó bimaria aĩwãrianikiaki. 29Hanushũ hawẽ bake Raquel beneyawatã hawẽ dayaru escravo aĩbu betsa hawẽ kena Bila Labão Raquel inãnikiaki, hau merabewanũ hawẽ dayaru wamakinã. 30Jacó Raquel biriatã betxipaihairakĩ hakia Léia mawaira betxipaiama danãbiai ana hawa yuiama Raquel bima ana 7 ano nitxĩriai dayashũrianikiaki.

Jacó hawẽ bakebu hati hatu bawanikiaki, na hãtxarã

31Jacó hawẽ aĩ Léia danãbiakĩ mekubainaya Senhor Deusũ uĩkĩ Léia merabewakĩ bake bimakĩ hakia Raquel hau bake biamayunũ Jacó txutabiakubainaya bakeuma wakĩ nemayukubainikiaki. 32Hanushũ Léiã bake bia tuya huni bake kaĩshũ yuikĩ: “Ẽ benẽ ea danã duakabia ẽ punu nuka Senhor Deusũ ea uĩkiki. Haskakẽ ẽ bakewẽ taeshũ ẽ benẽ ea betxipaishanikiki. Haskawẽ taea ẽ bakẽ kenarã, Rúbenki”, akima 33hanua ana ha katxu bake bia huni bake kaĩshũ yuikĩ: “Ẽ benẽ ea danãbiaya Senhor Deusũ nĩkakĩ huni bake betsa ana ea bimaimaki. Haskawẽ taea ẽ bakẽ kenarã, Simeãoki”, akima 34ana ha katxu bake bitã huni bake ana kaĩshũ yuikĩ: “Huni bake dabe inũ besti ma ẽ bia ẽ ma kaĩshunaki. Ikis ẽ benẽ hawẽ taeshũ ea betxipaitiruki. Haskawẽ taea ẽ bake betsã kenarã, Leviki”, ana akima 35haskatã ha katxu ana bia huni bake ana kaĩshĩshũ yuikĩ: “Ea haska waya Senhor Deus ẽ ma kẽwaiĩ. Haskawẽ taea ẽ bakẽ kenarã, Judáki”, ikima Léiã bake ana biyuama inikiaki.

Currently Selected:

Gênesis 29: cbsBR

Highlight

Copy