Gênesis 26

Gerar maewã anu Isaque hatube hiweyui kanikiaki, na hãtxarã

1Ha baritiã Abraão hiwekẽ ui ikamahairakẽ dasibi yurabu inũ hatũ inabu buninibu ana habias keskai ana ui ikamahairarikẽ nuitapai dasibi buni keyuaibũ piti benai Isaque hawenabube Gerar maewã anu ka Filisteu nawa shanẽ ibu Abimeleque Abraão uinitũ hawẽ bake Abimeleque betsa shanẽ iburiai anu buniwẽ taea kaima habube Isaque hiweyukẽ 2-5haria Senhor Deus haki nukushũ Isaque yuikĩ:

—Egito mai pakea anu kayamashãwẽ. Hanira ẽ mia yunuai anu besti mĩ katiruki. Natiã na habia mae anu besti hiweyuwe. Haskai hanu Filisteu nawabu dapi mĩ hiwekẽ mia mekekĩ ẽ mia duawayuaii. Mia inũ minabu paibu na mai pakea hirabi ẽ matu ibu wamashanaii. Mĩ epa Abraão ẽ yubani keska wakĩ habiaskari ẽ mia yubaii. Ẽ yunua Abraão ẽ hãtxa dasibi txibãkĩ akubainiwẽ taeshũ minabu ẽ pahairawashanaii, bishiti tsuã tanatiruma keska wakinã. Haska bestima minabuwẽri na mai hirabi anu yurabu shukua tibi dasibibu ẽ hatu duawapakeshanaii— aka

6Gerar maewã anu Isaque hatube hiweyui hikishĩkẽ 7hunibũ hawẽ aĩkiri yukakĩ:

—Tsuamẽ, ha aĩburã?— akubainabu Isaque shinãkĩ: “Rebeca hawẽruahairaki.” Eã hatu yuikĩ: “Harã, ẽ aĩki. Ẽ hatu warã, hawẽ taeshũ ea tenãshũ Rebeca bitirubuki”, iki datekĩ hatu paranũ ishũ hatu yuikĩ: “Ẽ puiki”, hatu waimakẽ 8hatu haska waima usha itxapa kaya hawẽ aĩ hune txutakubaini ana menu ishũ ikuaya hanua Filisteu nawa shanẽ ibu Abimeleque dĩtu merã huneshũ uĩti shui bestitxai merã uiãyã Isaque inũ Rebeca menameai betxishũ 9hau iweshunũbũ hawenabu yunua Isaque hua haki sinatakĩ yuikĩ:

—Haskakenã, Rebecarã, mĩ aĩki. Mĩ habe menameai dama ẽ matu uĩshuki. Hawai: “Ẽ puiki”, mĩ ikimamẽ, nuku yuirã?— aka Isaque kemakĩ:

—“Ẽ aĩki”, akĩ ẽ matu yuia: “Tsuãra Rebeca bikatsi mã ea tenãtiruki”, ishũ shinãkĩ: “Ẽ puiki”, akĩ ẽ matu yuimaki, hawẽ taeshũ mã ea tenãtiru matu parainã— aka 10ana Abimeleque yuikĩ:

—Haskakĩ mĩ nuku haska waimamẽ? Nukũ huni betsã Rebeca aĩwãtã txutaya Deusũ nuku uiãyã mĩ nuku txakabuwakeãshinaki— atã 11Abimeleque hawenabu dasibi hatu unãmakĩ yuikĩ: —Tsuãra na huni Isaque inũ hawẽ aĩ bikawakĩ txakabuwaya ẽ hatu tenãmashanaii, kupishũkinã— hatu anikiaki.

12-14Hanua Isaque habianuri hiweyua hatube dayakĩ hawẽ tsumabu yunua bai ewapa washũ shekiwã banaima itxapahaira tsekaibũ Senhor Deusũ duawakubaina Isaque shanẽ ibukĩ hawẽ hawara ana bikubaini hawẽ txashuwã itxapahaira hayai inũ, hawẽ ina awa itxapahairari hayai inũ, hawẽ dayaru escravo itxapahairari hayariai hatube hiwekĩ Isaque hati itxawai shanẽ ibuhairakũkainaya hanua Filisteu nawabũ uĩ kemui yuinamei haki sinatai:

—Yuu, ha hunirã, haskai nuku anu huima shanẽ ibuhairakĩ nuku binuimẽkaĩ, mabu itxapa hayairã?— ikaibũ 15habianuri Abraão hiweatiã hawẽ txashuwã amanũ, iwanã, hawẽ tsumabũ ũpash wamakĩ banakĩ kini itxapa pukĩshunibu Abraão mawayamakẽ Filisteu nawabũ hawẽ ũpash kini dasibi maiwẽ bepukĩ buanibukẽ 16hanua ana haska watima Abimeleque Isaque yuikĩ:

—Nenu huima kushipakũkaĩkĩ mĩ nuku binuaiĩ. Haskakẽ nukũ mai pakeanua kariwe, nuku henebainirã— aka

17hanua Isaque hawenabu inũ hawẽ tsumabube kaĩkaini ka Gerar anu manãkiri txaima napãpa anu maetã hanushũ hatũ tari hiwe nitxĩtã hanu hiweyuaibũ 18habianuri hawẽ epã tsumabũ ũpash hatu pukĩmani bepunibu anu Isaque epã tsumabu anishũ unãkĩ ana pesakĩ taewashunibukiaki. Ha Abraão kenaniwẽ taeshũ habiariri Isaque ana kenanikiaki, ũpash kini tibirã. 19Isaque tsumabũ napaku anu ũpash kini bena wakĩ nawasanabu hamebi hene habai matamiskẽ 20ha napãpanã ũpash kini benawaimabu uĩkĩ Gerar nawa hatũ inabu mekenikabũ Isaque inabu mekenikabu kũyã akĩ hatu yuikĩ:

—Nukunaki. Matunamaki— hatu wabu haskaibuwẽ taeshũ Isaque ha ũpash bana henebaĩkĩ kenakĩ yuikĩ: “Esequeki”, anikiaki, nukũ hãtxarã, “Yaushinamei ha ikaibu ũpashki”, akinã. 21Hanua ana napãpa manãkiri maeshũ ũpash kini ana benawakĩ ana hatu pukĩmakĩ ana hatu ũpash betximaimakẽ hawẽ taeshũri ana hatu kũyã ariakĩ yuikĩ:

—Nukunaki. Matunamaki— hatu ana akubainaibũ haska hatu waibuwẽ taeshũ Isaque ana hatu henemabaĩkĩ kenakĩ: “Sitnaki, Sinatarabeaibu Ũpash Kinirã”, anikiaki. 22Hanua ha katxu txai benãta maeimashũ ũpash kini ana hatu benawamakẽ pukĩkĩ ũpashki pesabu ana tsuã hatu kũyã aki sinatamawẽ taea hiwekĩ kenakĩ: “Reobote, Mae Hawama Ibuumaki”, iwanã, “Natiã Senhor Deusũ na mae nuku inã nenua nũ pashanaii”, hatu wa

23hanua txai basi benai Isaque dasibibu iyui Isaque Berseba ũpash bana kini anu kakẽ 24meshu merã Senhor Deus haki nukushũ Isaque yuikĩ:

—Dateyamawe. Ẽ mĩ epa Abraão mekenika Deuski. Hawara ẽ yunua Abraão txibãkĩ akubainiki. Haskawẽ taeshũ haibuwakĩ ẽ mia duawariashanaii, minabu itxapa mia pa washũkinã— atã kakẽ 25hanushũ Isaque mishki txi tapu wakĩ mishki itxawakĩ maspu watã ha mamakishũ daewakĩ hau benimanũ, iwanã, txashuwã bake tesẽshũ menu keyukĩ Senhor Deus kẽwãtã hanu hawẽ tsumabu hatũ tari hiwe dasibi pũtematã hanushũ hawẽ tsumabu ũpash kini benawamakĩ hatu yunua pukĩkubaĩkĩ ũpash betxinibukiaki.

Abimeleque Isaquebe yubakanamenikiaki, na hãtxarã

26Hanua betsatiã Abimeleque Isaquebe hãtxanũ ika Gerar anua huai hawẽ haibu Ausate inũ, hawẽ detenamenikabu shanẽ ibu Ficol hatu iyua 27Isaque hatu yukakĩ:

—Ea betxipaiama eki sinatakĩ mã ea mae mebĩkubirana nenuri ẽ huimaki. Ea ana haska wanũ ishũ mã ea uĩ bekãshumẽ?— hatu wa 28-29habũri Isaque kemakĩ:

—Miarã, Senhor Deusũ duawakĩ mia merabewakubainai nũ uĩmiski. Mia shinaĩ yuinamei yubakai: “Isaquebe yubakai kanãwẽ, nũ habe haibunameshanunã”, ishiã nũ hushuki, eskakiri yubakairã. Nukuki sinatakĩ mã nuku txakabuwama inũ nukũri matu ana bikawamarã, nũ haskakiri yukatiruki. Mĩ nuku anu hiwea mia duawakĩ nũ mia hawa wama unanuma nitxĩmaki. Natiã Senhor Deusũ mia duawakĩ heneama nũ uĩriaii— akabu 30-31nĩkatã Isaque benimakĩ piti itxapa aĩbu bawamashũ hatu inã pikĩ mabesh akĩ keyutã ushashini penaya bestẽtã Isaquebe ana yuinamei:

—Senhor Deusũ nuku uiãyã yubakai nũ hãtxashinawẽ taea ana itxakanikapakeyamanãshãwẽ— aka Isaque hatube hãtxai menetã hatu nitxiã ana habe sinatanameama habe haibunametã unanuma bui penibukiaki.

32Hanua habias shabatiã hawẽ tsumabu beshũ Isaque yuikĩ:

—Ũpash bana kini wakĩ nũ pukĩshu ma heneki nũ pesashuki— akabu 33hanushũ Isaque ha ũpash kini kenakĩ “Sebaki”, anikiaki. Haskawẽ taeshũ ha mae kenakĩ “Bersebaki”, ani habiaskiri heneama kenamisbuki.

34Esaú 40 ano hayatũ Heteu nawa aĩbu dabe binikiaki, aĩwãkinã, Beerĩ aĩbu bake Judite inũ Elom aĩbu bake Basematerã. 35Ha aĩbu dabe hawenabumatũ hatũ beyawẽ taeshũ Isaque inũ Rebeca hatu bika tenemakubainibukiaki.

Currently Selected:

Gênesis 26: cbsBR

Highlight

Copy