Atos 25

Hawa txakabuwama iyamakiri Paulõ Festo yuinikiaki, na hãtxarã

1Hanua shanẽ ibui Cesaréia anu Festo hikixĩshũ shaba dabe inũ besti ma binuaya Jerusalémkiri bai kayuxĩkẽ 2harishũ Deusbe hawenabu hãtxashunika shanẽ ibubu inũ judeu shanẽ ibu betsabu yubakabaĩ Festo anu bushũ Paulo txakabuwakatsi parãkĩ:

3—Haskai mĩ ma nenuki. Nuku pewashũkĩ Paulo miãri mĩ nuku unãti washũkatsi nenu Jerusalém anu hau itanũbũ mĩ hatu yunutirumẽ?— akabu, haskarã, eska Paulokiri yubakabaĩ bai tanabiranai nũ tenãnũbũ ika inibukiaki. 4Hakia Festõ hatu nemakĩ yuikĩ:

—Cesaréia anushũ Paulo ma pe mekeshũ uĩkanikiki. Haskakẽ usha eskarabestã ẽ ana txĩtũkainaya 5mã haska ea yuiairã, matũ shanẽ ibubu Cesaréia anu ebe bushũ ha hunĩ hawara txakabuwayama txitekĩ unãtirubuki— hatu waxina

6Jerusalém anushũ oito dia kasmai dez dia daki nitxĩtã Cesaréia anu ana txĩtũkaini hikixina hanua mexukiri hanushũ shanẽ ibui tsaushũ unãti wamisbu anu hari Festo tsautã hau Paulo itanũbũ hatu yunua 7iweabu Jerusalém anua bexiã judeu shanẽ ibubũ kebaũshũ hawẽ yusĩa betsa betsapakiri Paulo txitebiakĩ hawẽ haska watima kayakiri Festo yuiaibũ 8hanushũ hãtseri Paulõ hawa txakabuwama ikimakiri unãmakĩ Festo yuikĩ:

—Ẽ hawa txakabu hayamakiri ena mia yuinũ nĩkawe. Deusũ nukũ shenipabu yusĩni txibãkĩ ẽ kaneama inũ, Jerusalém anushũ Templo ẽ hawa txakabuwama inũ, Romano shanẽ ibuhaira Césarki ẽ hawa hakiri txakabu yuismariki— ikaya

9hanua judeu shanẽ ibubũ hau Festokiri pe xinãnũbũ, iwanã, Paulo yukakĩ:

—Jerusalém anurã, mĩ kakatsis ikai, harishũ mĩ haskayama hau ẽ mia unãti washanunã?— aka

10Paulõ kemakĩ:

—Haskamaki. Huni betsa tibi miã mĩ unãti wanũ Romano shanẽ ibuhaira Césarn mĩ habiaska watanũ mia yunuimaki. Haskakẽ na habiatiã mĩ ea unãti watiruki. Haskakẽ enabu judeubu ẽ hawa txakabuwama iyama ẽ mia tapĩmashuki. 11Ẽ hawara txakabuwayamawẽ taeshũ hau ea tenãnũbũ ẽ hatu hawa nemama ikeanaii. Hakia mia paraĩbũ hau ea tenãnũbũ mĩ shanẽ ibũ hãtxa kanekĩ mĩ ea hatu yunutirumaki. Haskawẽ taeshũ maiwã kesua shanẽ ibuhaira Césarn hau ea unãti washanũ Roma anu ea yunushãwẽ— aka

12hanushũ unãnepa merabenãbube Festo hãtxatã Paulo yuikĩ:

—Peki. Césarn hau mia unãti washanũ mĩ ea yukashuki. Hari ẽ mia yunushanaii— axiã hiweyukẽ

Paulokiri Festõ Agripa yuinikiaki, na hãtxarã

13txipu shaba eskarabes kakẽ Romanobube shanẽ ibumis judeubũ shanẽ ibu Agripa hawẽ pui Berenicebe Cesaréia anu shanẽ ibu bena Festo uĩkĩ hãtxa wakĩ benimawanũ ika haki bai buxiã 14habe hiweyuabũ Festõ Paulokiri Agripa hari banabimakĩ:

—Nenu huni betsa mekeshũ Félixsĩ eki henebaĩxinaki. Mia yuinũ nĩkawe. 15Nenua Jerusalém anu ẽ ka Deusbe hawenabu hãtxashunika shanẽ ibubu inũ habũ mekenikabũ txakabu hakiri yuitã ha ẽ kupinũ haki sinatakĩ ea yunuabu 16hakia eã hatu kemakĩ: “Nũ Romanobunã, nukũ yunua kuxipawenã, e iskaũ detenũbũ nũ haska beyamaki. Hakia hau detenũbũ yunukinã, ha haki kayai haratura txakabu ha dabe unãti warabetã nũ hatu nematiruki, ha ikaiburã”, akĩ ẽ hatu waxina 17ẽ hatu haska wabirana ea txibãbirãxinabu manakatsi ikama mexukiri hanushũ nũ hatu unãti wamis anu tsaushũ ha huni ẽ hatu yunua iweabu 18habu bexiãbu benishũ haska hakiri kayakĩ hawa hatũ txakabu tibi waima haskakiri txiteaibu dabanẽ haska ẽ xinaĩkiri hawa yuiabuma 19hakia haska judeubũ hiwea beya kẽwãmisbu hatu maewamai inũ huni betsa Jesus mawabiani ana hiweaki, akĩ Paulõ hatu yuimis besti hakiri txiteaibu ẽ nĩkashinaki. 20Haska hakiri yuiaibũ hawawẽ ẽ haska watima ea unãtimaska kaya wabu xinãtã Paulo yukakĩ: “Jerusalém anushũ ana harishũ hatubetã ẽ mia unãti wai kashanũ hari mĩ kakatsis ikai?” ẽ wa 21hanushũ hatũ ea akĩ: “Hamaki. Shanẽ ibuhaira Césarn hau ea unãti washanũ Roma anu ea yunushãwẽ”, ixĩkẽ hari ea yukaxinanu yunukatsi hau bitxishũ meke bestiyunũbũ ẽ hatu yunuxinaki— aka

22hanushũ Agripã Festo yuikĩ:

—Ha hunirã, eãri ẽ nĩkakatsis ikaii— aka

Festõ kemakĩ:

—Peki. Mexukiri mĩtsiri mĩ nĩkatiruki— aka

23hanua ushaxini mexukiri hatũ tari pepa sawea hawẽruabiranaibu hatu kẽwãbirãkĩ teperewe mawabainaibũ shanẽ ibu Agripa hawẽ pui Berenicebe inũ Romano soldado shanẽ ibubu inũ Cesaréia anua shanẽ ibu beshmasbu hanushũ unãti wamis dĩtu anu hikibaina maniabũ Festõ hatu yunua Paulo iweabũ 24hanushũ Festõ hatu yuikĩ:

—Shanẽ ibu Agripa inũ nukube itxabuũ, na hunikiri matu yuinũ nĩkakãwẽ. Jerusalém anushũ inũ nenushũri judeu itxapabũ hakiri txakabu kayakĩ ea tenãmanũ ika biski ikubaĩxinabuki. 25Hakia haska hakiri yuibiaibũ eã ẽ nĩkaxinarã, haskawẽ dabanã ẽ tenãtiruma xinãtã ẽ haskara wayupanã hamebi ea yukakĩ: “Hau matũ shanẽ ibu kaya Césarn Roma anushũ hau ea unãti washanũ ea hari yunuwe”, ea waxina hari yunukatsi ẽ xinãxina ẽ yunushanaii. 26Hakia hawara txakabuwayamakiri tapĩ pewamabia shanẽ ibuhaira César anu ha hunikiri ẽ hawa keneshũ bumatima ẽ xinaiĩ. Haskawẽ taeshũ hawa txakabuwayamamẽkaĩ, Agripaã, natiã mĩ besuuri ẽ nitxiãki, hau miãri mĩ ea unãti washununã, haskakiri kenetã ẽ bumakatsis ikairã. 27Hamẽ hawa hawẽ txakabukiri unãma ẽ yunua: “Habitiruma benibĩ!” ishũ ekiri xinãtiruki— akaya

Currently Selected:

Atos 25: cbsBR

Highlight

Copy