Atos 26
26
Paulõ ikũwaĩbu itxakawabiaya Jesusũ katunikiri Agripa yui txaninikiaki, na hãtxarã
1hanushũ Agripã Paulo yuikĩ:
—Hani mĩ hawa txakabuismakiri nuku yuiwe— aka
—Peki— iwanã, hatu mekẽ sanãshũtã Paulõ hatu yuikĩ:
2—Shanẽ ibuhaira Agripaã, haska ekiri kayaibukiri mia bebũ nishũ ẽ haskakũkaĩmis ẽ mia hãtxa waĩwẽ taea ẽ benimaii, na haska judeu shanẽ ibubu ekiri txakabu txanitxakakĩ eki kayaiburã. Ẽ haska hayamaki. 3Mianã, dasibi judeubũ beya unãkĩ haska betsa betsapa xinaĩ nũ ha irabemis mĩ unãhairaiwẽ taeshũ txanima ẽ hãtxa mĩ nĩkatiruki. Ẽ hãtxa teneshũ ea nĩkayuwe.
4Dasibi judeubũ ea unã keyukanikiki, ẽ hatube hiwekũkaunirã, ẽ mae anuabu inũ hanua ẽ yumeni Jerusalém anuabunã. 5Ha dikabi ẽ berunãtũ Moisés nukũ shenipabu yusĩni habũs xinã pashkama txibãhairakĩ nũ mekehairamis ẽ fariseu ikũkaini ea uĩkubainishũ mia yuitirubumẽkaĩ. Hakia ekiri xinaĩ hãtxatirubumamẽkaĩ. 6Haskawẽ taeshũ ẽ haskarakẽ daki ea unãti watã kupikatsi haska nukũ shenipabu Deusũ yubani ikũwãkĩ ẽ manai ea aki ikanikiki. Hanushũ mawabu ana hatu bestẽwaĩ kai Deusũ nukũ shenipabu yubani ẽ ikũwaĩwẽ taeshũ ea kupikatsis ikanikiki. 7Israelĩ bakebu 12 shukuabu tibitũ haska uĩkatsi manakĩ bariri inũ mexu merã Deus kẽwãkĩ duawakubaĩmisbu keska wakĩ haska manakabu keskari eãri ẽ ikũwaĩwẽ taeshũ haska bestiwẽ taeshũ habũ ea txitei kayanamei ikanikiki— iwanã, itxaburi uĩbaũkĩ ana hatu yuikĩ:
8—Haskakĩ mã ikũwãbumamẽ, matubunã, mawabu Deusũ ana hatu bestẽwãshanairã?— iwanã 9—Eãnã, txanima haskakiri xinã pewariamarã, ẽ hatu ayuniki, hatu yamawakatsis ikinã, Jesus Nazaré anua ikũwaĩbuki sinatairã. 10Na haska akinã, Jerusalém anushũ ẽ aniki, Deusbe nukunabu hãtxashunika shanẽ ibubũ hatũ kuxipawẽ ea yunuaburã. Jesus ikũwaĩbu itxapa atxishũ bitxiti hiwe merã ẽ hatu mistukubainiki. Hanushũ hatu tenaĩbũ eã hatu nemama habiaskari xinãkĩ pesshũ ẽ hatu uĩs bestikubainiki. 11Hatu haska wakinã, hawa betsa tukama hanu itxamisbu hiwe tibi anushũ Jesus ikũwaĩbu hau henenũbũ hatu itxakawatxakayamakĩ beshtehairakatsis iki ẽ hatuki bene bene ikĩ hawa hatu henekatsi ikama judeubumã mae anuri pashaibu habiaria hatuki sinatahairakĩ hatu atxinũ, iwanã, ẽ hatu katxibãkubainiki.
12Deusbe nukunabu hãtxashunika shanẽ ibubũ haska nũ akai keska nũ anũ ea hatũ kuxipaya wakĩ yunuabu Damasco bai tanabaini ma ẽ kemaya 13bai putxinĩ ma bari mananãbibiakẽ kakĩ ẽ uĩayã naiuria bĩ kuxipahaira bari binuatũ ea inũ ẽ haibuaibu nuku datxashaya 14hanua dasibi maĩ nũ di ikaya nukunabũ hãtxa Hebreowẽ tsuãra ea yuikĩ: “Sauloõ, Sauloõ, haskakĩ mĩ ea itxakawakubainai? Mimebi mĩ txakabuaii, tsuki ikama ibubis mushaki iki ikasirã”, ea wa 15eãri yukakĩ: “Shanẽ ibuũ, mĩ tsua iki ikai?” ẽ wa hanushũ ea yuikĩ: “Habia ea ikũwaĩbu mĩ hatu itxakawakubainairã, ẽ Jesuski. 16Beniriwe, ẽ mia anu hushukirã. Mia katutã haska mĩ ekiri dayakũkaini txanikũkaĩshanũ ẽ mia uĩmashu inũ txipu betsa ẽ mia uĩmashanairã. 17Ena mia watã judeubu anu inũ judeubuma anu hanu ẽ mia yunuai anu mĩ ka ẽ mia mekepakeshanaii, mia txakabuwatirubumarã. 18Habu anu ẽ mia yunua kashũ hatu xinã betsa wamakĩ hau unaĩsmapakĩ Satanás ana txibãyamanũbũ ẽ Epa Deusũ hãtxa mĩ hatu yusĩkubaunũ judeubuma betsa betsapabu anu ẽ mia yunuaii. Harishũ hatu beru bepesha keska watã ana mexu merã kama keska hakia bĩwẽ kai keskaibu mĩ hatu waya hatiritũ ea ikũwaĩbũ hatũ txakabu ẽ hatu buashunaya Deusũ hatu hiwekuĩmashanikiki, hawa hatu kupiamarã, hawenabu meribi wakinã”, ea waniki.
19Shanẽ ibuhaira Agripaã, haska nũ uĩsma nai anua namai keska ẽ uĩxina txibãnishũ ẽ txibãkubaĩmiski, xinã betsa wamarã. 20Harishũ Damasco anushũ dukũ kakape hatu yusĩ taewatã txipu Jerusalém anushũ yusĩriatã Judéia mai pakea hirabi anuabu judeubu inũ judeubuma ẽ hatu yusĩkĩ: “Xinã betsa wakãwẽ”, ẽ hatu wa tsuãra xinã betsa watã Deusũ bake ikũwãkĩ hatũmebi hatũ hiwea bena hayakĩ uĩkubainimabuki, ẽ hatu unãmakubainarã. 21Ẽ hatu haska wamiswẽ taeshũ Templo anushũ judeubũ ea atxishũ ea tenãnũ ika iyamabuki. 22Haskakẽ Deusũ ea merabewaya hawa xinã betsa wama shanẽ ibubu inũ shanẽ ibuma hatuki txani Moisés inũ Deusũ hãtxa yuishunika betsabũ haska bebũkiri kenenibu ishanai 23yuikĩ: “Messiasrã, nuitapatã mawai kaikiki. Hanua ha dukũ mawa bestẽkaina ha dukũ nuku bebushuni kaikiki. Haskaxĩshũ nũ judeubu inũ judeubuma hawẽ pashati bai shaba kayabi ibubis Messias txani kaikiki”, inibu habiaskari haskakiri ẽ hatu yusĩkubaĩmiski— akaya
Shanẽ ibuhaira Agripa Paulõ Jesus ikũwãmakeanikiaki, na hãtxarã
24Paulõ haska hawẽ hiweakiri yuiai nĩkai Romano shanẽ ibu Festo e itã unãshubima yuikĩ:
—Pauloõ, mĩ patapaki. Kene itxapa unaĩ mĩ unaĩsmapakũkainaii— aka
25Paulõ kemakĩ:
—Shanẽ ibu pepahaira Festoõ, ẽ unaĩsmapakiri hãtxamaki. Txanima shabakabi hãtxa kayabi besti ẽ matu yuiaii. 26Haskarã, ha shanẽ ibu Agripã Deusũ hãtxa unaĩwẽ taeshũ dateama haskakiri hãtxakĩ ẽ yui ikaii. Haska eã ẽ hakiri xinãnã, unã keyuriaikiki. Txanima Jesus hawa huneama habiaskariai hiwekũkainiki— iwanã, 27Agripakiri besushũ yuikĩ: —Shanẽ ibu Agripaã, Deusũ hãtxa yuishunikabũ keneni haskakiri ẽ mia yuiairã, mĩ ikũwaĩ? Ẽ xinãnã, mĩ ikũwaiĩ— aka
28Agripã kemakĩ:
—Mĩ xinãnẽ, mĩ hawaira ea Cristo txibãmakatsis ikai?— aka
29Paulõ ana yuikĩ:
—Hawaira kasmai txipu kasmai mia inũ dasibibũ natiã habũ ea nĩkaibu ẽ ikũwaĩ keskakĩ mã Jesus haibu warianũ Deusũ hau matu kenarianũwẽ, hakia na ẽ ika keskai mane dispiwẽ matu tsuã meneshamarã— hatu wa
30hanushũ hatu haska wai nĩkatã judeu shanẽ ibu Agripa inũ Romano shanẽ ibu Festo inũ Berenice inũ shanẽ ibu betsabu hatube tsauwa 31tari meribi benibaĩ hamauria Paulokiri habu hãtxanamekĩ yuikĩ:
—Ha hunĩnã, hawa txakabuwaismawẽ taeshũ tenãtima inũ bitxiti merã bitxitimaki— ikaibũ
32hanushũ Agripã Festo yuikĩ:
—Ha huni hawawama mĩ nitxĩtirubia hamebi: “Hau Césarn ea unãti washanũ”, ikĩ mia yukaxinarã, hari nitxĩyushãwẽ— akabu
Currently Selected:
Atos 26: cbsBR
Highlight
Share
Copy
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
