Matie 28

Zhezü wúemɛ̀n-dú-frɔ́

(Nyɛ́n nyan Markɛ̀n 16:1-10; Lükɛ̀n 24:1-12; mán Zhan 20:1-10 wrú lɔ mɛ̀n)

1Ɛnyanmán-bì vacì, ɛnbì-zri-bì lɔ ɛnbri kɛ́n mùan, Mari, Magdala nyɔnwrɔn mán nɛ́n cà Mari, hɔ́n nyan Zhezü nànmàn lɔ. 2Kpatakpata lɔ, ɛnhi jɔ́kɔ́ ecüìemɛ̀n; Ɛẅɛnwrɔn-kùyüre-wrɔn tɔ̀n dú anhobɩ́ kakɛ, vá vlá obù vri léyi sɛ́n ɛnnànmàn mùan nɔn kɩ ci ɛwú yɛ́. 3Nɛ́n dù nɛ̀n hán ɛwú-yà hɔ́ kɩ n'ɛceci hɔ̀n lɔ dú ɛwosu hán ecüe dà-fù hɔ́. 4Gɔliɛ-bɔ̀ lɔ ɛnjansù bru, kɩ ke cüì, yɔ hán le anwrɔn wù hɔ́. 5Ɔwɔ-kùyüre-wrɔn lɔ mrɛ́n ɔmùan kɩ kɛ dɔ́ wúyɔ̀ hɔ̀n lɔ le: “Ɛnjansù ke bɩ́ ẅɛn nyɛ̀n. Mɛ́n nyrì le nye ji Zhezü, nɛ́n léyi yɛ gɔ́n nɛ̀n brɛ́ ɛgbàn-hán-tɛ̀ domɛ̀n nɔn; 6nɛ̀n sɩ̀ dù ɛnu, nɛ̀n dú owú-bɔ̀ mɛ̀n nɛ̀n vá ɔkɔrɛ-bɔ̀ mɛ̀n hán ɔmu le nɛ́n dɔ̀ nɔn hɔ́. Nyɛ́n và, nyɛ́n nyan ɛyri léyi nɛ̀n dɛ́ nɔn. 7Nyɛ́n kprànmàn nyɛ́n hɔ̀n dɔ́ n'ɛsɛ̀nkɛn-bɔ̀ le: ‘Nɛ̀n dú owú-bɔ̀ mɛ̀n nɛ̀n vá ɔkɔrɛ-bɔ̀ mɛ̀n kɩ nɛ lɛ hɔ́n zɛtɛ̀ lɔ nɛ̀n vrá nyɛ̀n Galile kpɔsɔ wú; nanvrɛn lɔ, de nyɛ lɛ kán nɛ̀n nɔn.’ Nyàn ankà léyi mɛ́n ẅɛ̀n mɛ lɛ dɔ́ nyɛ̀n nɔn.” 8Yɔ cɔhɔ́ ɛnnànmàn tɛ̀sɛ̀n kpràkprà, ɛnjansù mán pɔ̀püɛ̀ dú yɔ ɛnbɔrɛ mɛ̀n, kɩ yɔ srɛ́ yɔ bɩ́ ɛmɛẅi ankà yɔ hɔ́n sɩ́ Zhezü sɛ̀nkɛn-bɔ̀ lɔ. 9Ɛnvra zri lɔ mɛ̀n, Zhezü và srɔ́n yɔ ɛsù kɩ kɛ dɔ̀ le: “Me bi nyɛ̀n nyan!” Wúyɔ̀ hɔ̀n lɔ sɔnba nɛ̀n ɛtɛ̀sɛ̀n, ẅɛn nɛ̀n annan kɩ ke cüe nɛ̀n ankɔ̀rɛ̀ ezìwú. 10Zɛtɛn Zhezü kɛ dɔ́ yɔ le: “Ɛnjansù ke bɩ́ ẅɛn nyɛ̀n. Nyɛ́n hɔ̀n nyɛ́n dɔ́ nmàn ẅì hɔ̀n kɛ hɔ́n Galile kpɔsɔ wú: nanvrɛn de yɔ lɛ kán mɛ̀n nɔn.”

Gɔliɛ-bɔ̀ ankà léyi dɔ̀ nɔn

11Ɛnvra léyi wúyɔ̀ hɔ̀n lɔ dú ɛnlevri kɛ hɔ̀n nɔn, gɔliɛ-bɔ̀ janbɔ̀ léyi yɛ hán kɛ̀ nán Zhezü zhe-nànmàn lɔ nɔn, vru hɔ́n anmàn kɩ kɛ dɔ́ Ɔwɔ-cice-bɔ̀ cüìcüì hɔ̀n lɔ, eci léyi wɔɛ̀n nɔn. 12Ɔwɔ-cice-bɔ̀ cüìcüì hɔ̀n mán ɛcüìcüì-bɔ̀ borɛkru: yɔ ẅɛn ɔmùan-krɔn, yɔ tán gɔliɛ-bɔ̀ lɔ ɔkùa bobrebe, 13kɩ yɔ dɔ́ yɔ le: “Nyɛ́n dɔ̀ le n'ɛsɛ̀nkɛn-bɔ̀ vá bɩ́ n'edùwrú lɔ ɛnnyran mɛ̀n, ɛnvra léyi ndà wri nyɛ̀n nɔn. 14Kɩ ke dú kɛ govràn kɛ cɔ̀ kɛ yá hô, bɔ́ lɛ wɔ́ nɛ̀n ɛnbɔrɛ kɩ nyɛ́n sɩ̀ cɔ́ ankà n'antamɛ̀n.” 15Gɔliɛ-bɔ̀ bɩ́ ɔkùa lɔ kɩ hán eci léyi yɛ wá tán yɔ yɛ hán nɔn. Ɔmu lɔ de ankà ndɔ lɔ bonyí Zhüifɛ̀n hɔ̀n anmàn-hi wú lɔ fɛn hàn kɩ cɔ́ zɛtɛ̀ lɔ nɔn.

Zhezü bɩ́ n'edomɛ̀n yé n'ɛsɛ̀nkɛn-bɔ̀

(Nyɛ́n nyan Markɛ̀n 16:14-18; Lükɛ̀n 24:36-49; Zhan 20:19-23; mán Ɔkɔ̀hɔ̀n-wá-bɔ̀ kɔ̀hɔ̀n hán 1:6-8 wrú lɔ mɛ̀n)

16Ɛsɛ̀nkɛn-bɔ̀ ɛvà-ɔtɔ̀n lɔ, hɔ́n Galile kpɔsɔ wú, ɛnkpò léyi Zhezü yé yɔ nɔn yi wú. 17Ɛnvra léyi yɔ kán nɛ̀n nɔn, yɔ cüe nɛ̀n ankɔ̀rɛ̀ ezìwúɛ; y'ɛmɛ̀n lɔ ndɔ hɔ̀n kɛ ẅɛn ɛnbɔrɛ anhyrɛ̀. 18Zhezü sɔnba yɔ ɛtɛ̀sɛ̀n kɩ kɛ dɔ́ yɔ le: “Yɛ tán mɛ̀n ɛkɔrɛ̀srɔn lɔ fɛn anhobɩ́ mán ɛnhi wú. 19Nyɛ́n hɔ́n ɛnhibù mumù lɔ fɛn wú, nyɛ́n hɔ́n anwrɔn ɛtɛ̀sɛ̀n, ô nyɛ́n srɔ yɔ m'ɛsɛ̀nkɛn-bɔ̀; nyɛ́n wá yɔ ɛnshi ɛnkru: Ezi, Ɛnẅì mán Ɛnhɛ́n Prɔnprɔn bɩ́mɛ̀n, 20ô nyɛ́n hán yɔ, yɛ ẅɛn ankà hɔ̀n lɔ fɛn léyi mɛ̀n yé nyɛ̀n nɔn, n'ɛkɔrɛ̀zì yɔ hɛ́n. Kɩ ke ji le nyɛ́n nyrì le: me le dú nyɛ̀n ɛmɛ̀n ɛnvra lɔ fɛn, hàn kɩ kɛ lɛ cɔ́ ɛnhibù trɔ vra.”

Currently Selected:

Matie 28: ƐAA03

Highlight

Copy