Matie 27

Ye sɩ́ Zhezü Pilatɛ̀n zìwú

(Nyɛ́n nyan Markɛ̀n 15:1; Lükɛ̀n 23:1-2; mán Zhan 18:28-32 wrú lɔ mɛ̀n)

1Ɔsɔ̀wrɔ̀ fùtàn, Ɔwɔ-cice-bɔ̀ cüìcüì hɔ̀n lɔ fɛn mán Zhüifɛ̀n fɛcüè cüìcüì-bɔ̀ ɔmùan krɔn ô yɔ hán Zhezü kè wù. 2Yɔ hán yɛ kora nɛ̀n, yɔ bɩ́ nɛ̀n yɔ hɔ́n sɩ́ Pilatɛ̀n léyi dú Rɔmɛ̀n govràn nɔn.

Zhüda wú vra

(Nyɛ́n nyan Ɔkɔ̀hɔ̀n-wá-bɔ̀ kɔ̀hɔ̀n hán 1:18-19 wrú lɔ mɛ̀n)

3Ɛnvra léyi Zhüda kán ɔmu le ye le di Zhezü owúemɛ̀n nɔn, gbɔ̀gbɔ̀ bru nɛ̀n edù, kɩ nɛ̀n wɔrɔ ɔkùa kɔ̀prɛ̀ ɛẅia-ɛvà léyi Ɔwɔ-cice-bɔ̀ cüìcüì mán ɛcüìcüì-bɔ̀ tán nɛ̀n nɔn, nɛ́n hɔ̀n sɩ́ yɔ. 4Nɛ dɔ́ yɔ le: “Mɛ̀n hán ɛgbàn, mɛ̀n bɩ́ ɛnyrɔnnan-wrɔn mɛ̀n tán ye di owúemɛ̀n!” Tɛ́n yɔ mrɛ́n nɛ̀n ɔmùan le: “Ecitan kɛ lɛ hán bɔ̀a? V'ankà dú hɩ lɔ!” 5Zhüda kɔ́n ɔkùa lɔ cüe Ɔwɔ-cice-wɔn lɔ mɛ̀n kɩ hɔ̀n; Zɛtɛn nɛ́n hɔ̀n wá ɛhɛ́ ɔbɔ̀n. 6Ɔwɔ-cice-bɔ̀ cüìcüì hɔ̀n bɩ́ ɔkùa lɔ kɩ kɛ dɔ̀ le: “Bɔ́ ɛnyànmàn lɔ ke sɩ́ wá tán le, ye bɩ́ ɔkùa ndɔ lɔ ye ku Ɔwɔ-cice-wɔn kùa mɛ̀n, ɔmuhi nɛ̀n dú ɛnkrɛ̀ wɔɛ̀n-di-kùa nɔn.” 7Yɔ ẅɛn ɔmùan-krɔn, kɩ yɔ bɩ́ ɔkùa lɔ yɔ wɔ́ ɛnsi kɔ̀hɔ̀n-hán-wrɔn tɔ̀n kɛ̀tɛ̀, ô yɔ bɩ yɛ srɔ nɛ̀nnyàn-bɔ̀ zhe-bɩ́-yri. 8Hɩ le kruhú de ɛkɛ̀tɛ̀ ndɔ lɔ, ye bi nɛ̀n “Ɛnkrɛ̀ kɛ̀tɛ̀” hàn kɩ cɔ́ zɛtɛ̀ lɔ. 9Zɛtɛn Ɔwɔ-mùanwú-ankà-dɔ́-wrɔn Zheremi ankà ndɔ lɔ sá nmù: “Yɔ bɩ́ ɔkùa kɔ̀prɛ̀ ɛẅia-ɛvà (léyi Izraɛlɛ̀n-bɔ̀ ɔmùan krɔ́n fɔ́n tán Zhüda) 10kɩ yɔ bɩ́ ɔkùa lɔ yɔ wɔ́ ɛnsi kɔ̀hɔ̀n-hán-wrɔn kɛ̀tɛ̀, hán ɔmu le Ɛẅɛnwrɔn wá tán mɛ̀n nɔn.”

Pilatɛ̀n ke yrɛ Zhezü ankà

(Nyɛ́n nyan Markɛ̀n 15:2-5; Lükɛ̀n 23:3-5; mán Zhan 18:33-38 wrú lɔ mɛ̀n)

11Zhezü srɔ govràn zìwú kɩ govràn ke yrɛ nɛ̀n ankà: “È dú Zhüifɛ̀n-bɔ̀ nɛ̀ncüì hɛ̀?” Zhezü mrɛ́n nɛ̀n ɔmùan le: “Hɩ de ɛ dɔ̀ nɔn.” 12Zɛtɛn, ɛnvra léyi Ɔwɔ-cice-bɔ̀ mán ɛcüìcüì-bɔ̀ ke ku nɛ̀n ankà ɛwú nɔn, nɛ́n sɩ́ mrɛ́n yɔ ɔmùan. 13Zɛtɛn Pilatɛ̀n kɛ dɔ́ nɛ̀n le: “E sɩ́ yá ɛyɔ̀n ankà léyi yɛ dɔ́ ku mɛ́n ɛwú nɛ́n?” 14Tɛ́n Zhezü ke sɩ̀ mrɛ́n nɛ̀n ɔmùan ankà zriɛmɛ́n wú, hán tán kɩ kɛ frɛ́n Pilatɛ̀n anvɛmɛ̀n.

Ye di Zhezü owúemɛ̀n

(Nyɛ́n nyan Markɛ̀n 15:6-15; Lükɛ̀n 23:13-25; mán Zhan 18:39—19:16 wrú lɔ mɛ̀n)

15Ɛnnànwàn lɔ fɛn, abùtùkumɛ́n-kɔ́ nyànmán-bì lɔ, govràn ke teze anwɔn-mɛ̀n-wá-wrɔn tɔ̀n, nɛ́n léyi fɛcüè kɛ cüɛ̀n le ye teze nɔn. 16Tɛn, hɩ vra lɔ, anwɔn-mɛ̀n-wá-wrɔn tɔ̀n ke di ebɩ́, ye bi nɛ̀n Zhezü Barabasɛ̀n. 17Pilatɛ̀n ke yrɛ fɛcüè léyi borɛkru nɔn le: “Antɔn de nye ji le mɛ̀n teze nɛ́n? Zhezü Barabasɛ̀n kàle Zhezü léyi ye bi Krisì nɛ́n?” 18Pilatɛ̀n nyri ɔmu le egbrì kruhú de yɔ ẅɛn Zhezü yɛ vá sɩ́ nɛ̀n nɔn. 19Ɛnvra léyi Pilatɛ̀n dú ɛmrɛ̀nci-wɔn mɛ̀n nɔn, nɛ́n hi wá yɔ ɔkɔ̀hɔ̀n yɛ và dɔ́ nɛ̀n ankà le: “E bɩ́ hán ɛnyrɔnnan-wrɔn ndɔ lɔ eci zriɛmɛ́n ɔmuhi, ɛnnyran ndɔ lɔ mɛ̀n, mɛ̀n kán ɛgbàn bobrebe ndà mɛ̀n n'ɛkruhú.”

20Ɔwɔ-cice-bɔ̀ cüìcüì mán ɛcüìcüì-bɔ̀ kɛ wá fɛcüè ankà kɛ̀ sán Barabasɛ̀n srú-ze, ô ye di Zhezü owúemɛ̀n. 21Govràn vru bɩ́ ankà-dɔ̀ ke yrɛ yɔ le: “Anwrɔn anhyrɛ̀ lɔ tɛtán de nye ji le mɛ̀n teze nɛ́n?” Yɔ dɔ̀ le: “Barabasɛ̀n!” 22Pilatɛ̀n ke yrɛ yɔ le: “Ecitan de mɛ lɛ hán Zhezü léyi ye bi Krisì nɛ́n?” Yɔ lɔ fɛn yɔ mrɛ́n ɔmùan le: “Gɔ́n nɛ̀n brɛ́ ɛgbàn-hán-tɛ̀ tɔ̀n domɛ̀n!” 23Pilatɛ̀n ke yrɛ yɔ le: “Eci gbàngbàn tán de nɛ̀n hán nɛ́n?” Tɛ́n yɔ bukru yɔ di bobo ecüìemɛ̀n, yɔ dɔ̀ le: “Gɔ́n nɛ̀n brɛ́ ɛgbàn-hán-tɛ̀ tɔ̀n domɛ̀n!” 24Ɛnvra léyi Pilatɛ̀n kán ɔmu le nɛ́n sɩ̀ hán eci zriɛmɛ́n rɔ́ nɔn, tɛ́n bobo-dì lɔ kɛ sán kɛ́n ɛwú, nɛ̀n bɩ́ ɛnshi nɛ̀n juru ankɔ̀rɛ̀ fɛcüè zìwú kɩ nɛ dɔ̀ le: “Ɔwrɔn ndɔ lɔ mɛ̀n sɩ̀ dù n'owú-ankà lɔ mɛ̀n! Ny'ankà dú hɩ lɔ!” 25Fɛcüè lɔ fɛn mrɛ́n ɔmùan le: “Ke ji le n'owú-gbàn lɔ fɛn, ke ku bɔ́ mán bɔ́ ɛẅì hɔ̀n mɛhi ɛwú!” 26Zɛtɛn Pilatɛ̀n srú Barabasɛ̀n ze; nɛ̀n hán ye gorɛ Zhezü ɛngbele mɛ̀n kɩ nɛ̀n bɩ́ yi nɛ̀n tán yɔ, ô yɛ gɔ́n nɛ̀n brɛ́ ɛgbàn-hán-tɛ̀ tɔ̀n domɛ̀n.

Gɔliɛ-bɔ̀ kɛ hán Zhezü ɛnhyürɛ̀

(Nyɛ́n nyan Markɛ̀n 15:16-20; mán Zhan 19:2-3 wrú lɔ mɛ̀n)

27Pilatɛ̀n gɔliɛ-bɔ̀ lɔ bɩ́ Zhezü hɔ́n govràn nanvrɛn ɛbemɛ̀n kɩ gɔliɛ-bɔ̀ kà lɔ fɛn gbrɛnkɛn Zhezü ɔmùan. 28Yɔ mrɛ́n nɛ̀n ɛci edomɛ̀n kɩ yɔ bɩ́ ɛceci she wɔnsɛ́n yɔ cɔ́ nɛ̀n. 29Zɛtɛn yɔ dú ɛwí-kru-sɔ́n-ci yɔ wá nɛ̀n ɛnkru kɩ yɔ bɩ́ ɛfi-sè yɔ wá nɛ̀n ezì-kɔrɛ̀ màn mɛ̀n. Yɔ shɛ́n nɛ̀n annankru ezìwú kɩ yɔ hán nɛ̀n ɛnhyürɛ̀ yɔ dɔ̀ le: “Zhüifɛ̀n-bɔ̀ nɛ̀ncüì bɔ́ bi mɛ́n nyan!” 30Yɔ fɛ́ nɛ̀n andà kɩ yɔ bɩ́ ɛfi-sè lɔ yɔ cüran nɛ̀n ɛnkru. 31Ɛnvra léyi yɔ hán nɛ̀n ɛnhyürɛ̀ fɔ́n yɔ nɔn, yɔ mrɛ́n nɛ̀n ɛceci she lɔ yɔ sɔhɔ́, yɔ vru yɔ cɔ́ nɛ̀n n'ɛceci hɔ̀n lɔ kɩ yɔ bɩ́ nɛ̀n yɔ hɔ́n gɔ́n brɛ́ ɛgbàn-hán-tɛ̀ tɔ̀n domɛ̀n.

Yɛ gɔ́n Zhezü yɛ brɛ́ ɛgbàn-hán-tɛ̀ domɛ̀n

(Nyɛ́n nyan Markɛ̀n 15:21-32; Lükɛ̀n 22:26-43; mán Zhan 19:17-27 wrú lɔ mɛ̀n)

32Ɛnvra léyi yɔ dú anmàn yɔ srɔ nɔn, yɔ srɔ́n ɔwrɔn tɔ̀n ɛsù ye bi nɛ̀n Simɔn, Sirɛnɛ̀n anmàn wrɔn; Gɔliɛ-bɔ̀ ẅɛn nɛ̀n ecüìemɛ̀n nɛ̀n wɔrɔ Zhezü gbàn-hán-tɛ̀ lɔ. 33Yɔ cɔ́ ɛyri tɔ̀n léyi ye bi “Lokrozì” nɔn. 34Kɩ nanvrɛn lɔ yɔ tán Zhezü ɛntàn wɔnsɛ́n léyi ye ku ɛci-drɔ́ ɛmɛ̀n nɔn kè mì; ɛnvra léyi nɛ̀n sɔ́n ɛntàn lɔ ɔmùan nɔn, nɛ̀n sɩ̀ shrì nɛ̀n mìɛn. 35Yɔ gɔ́n nɛ̀n brɛ́ ɛgbàn-hán-tɛ̀ domɛ̀n kɩ yɔ wá ɛnsànsè yɔ dɛ́ n'ɛceci hɔ̀n lɔ yɔ bɩ. 36Zɛtɛn yɔ yɛ́ nanvrɛn lɔ yɔ nán nɛ̀n. 37Ɛgbàn-hán-tɛ̀ wú lɔ, yɔ merɛ́n eci léyi di nɛ̀n owúemɛ̀n nɔn: “Ɔwrɔn ndɔ lɔ dú Zhezü, Zhüifɛ̀n-bɔ̀ nɛ̀ncüì.” 38Eci-gbàngbàn-hán-bɔ̀ anhyrɛ̀ mán yɛ gɔ́n brɛ́ ɛgbàn-hán-tɛ̀ domɛ̀n Zhezü tɛ̀sɛ̀n, ɔtɔ̀n dú nɛ̀n ezì-kɔrɛ̀ kɩ ndɔ lɔ dú nɛ̀n ebrì-kɔrɛ̀.

39Anwrɔn hɔ̀n léyi ke ci nanvrɛn lɔ nɔn kɛ cáka ɛnkru kɩ kɛ wɔra nɛ̀n; 40yɔ dɔ́ nɛ̀n le: “Vɛ́n léyi e ji è gbe Ɔwɔ-cice-wɔn lɔ, ô è ku ɛnyàntɛn tɔ̀n ɛbi anhɔ̀n granmɛ̀n nɔn, è bɩ́ v'edomɛ̀n è die, ke dú kɛ è dú Ɔwɔ Ẅì, ô è dú ɛgbàn-hán-tɛ̀ wú ɛ̀ kàkɛ!” 41Ɔmu zri lɔ de, Ɔwɔ-cice-bɔ̀ cüìcüì hɔ̀n, ɛnyànmàn-gbànvri-ankà-yé-bɔ̀ mán ɛcüìcüì-bɔ̀ kɛ hán nɛ̀n ɛnhyürɛ̀ kɩ kɛ dɔ̀ le: 42“Nɛ̀n bɩ́ anwrɔn nɛ̀n die, tɛ́n nɛ́n sɩ́ bɩ́ n'edomɛ̀n nɛ́n die rɔ́a! Nɛ̀n dú Izraɛlɛ̀n nɛ̀ncüìɛ? Ke ji le zɛtɛ̀ lɔ nɛ̀n dú ɛgbàn-hán-tɛ̀ wú nɛ̀n kàkɛ kɩ bɔ́ le bú n'ankà bɔ̀ tán ankàẅì. 43Nɛ̀n bɩ́ n'esɛ́ nɛ̀n wá Ɔwɔ ɛwú kɩ nɛ́n dɔ̀ le: ‘Mɛ̀n dú Ɔwɔ Ẅì.’ Zɛtɛn, ke dú kɛ Ɔwɔ kɛ cüɛn nɛ̀n hô, ke bɩ́ nɛ̀n kè die zɛtɛ̀ lɔ!” 44Kɩ eci gbàngbàn-hán-bɔ̀ léyi yɛ gɔ́n brɛ́ ɛgbàn-hán-tɛ̀ domɛ̀n n'ɛtɛ̀sɛ̀n nɔn, kɛ hán nɛ̀n ɛnhyürɛ̀ ɔmu zri lɔ.

Zhezü wú vra

(Nyɛ́n nyan Markɛ̀n 15:33-41; Lükɛ̀n 23:44-49; mán Zhan 19:28-30 wrú lɔ mɛ̀n)

45Ɛnvra léyi ɛnbri shɛ́n nɔn, ɛyri wá sɛ́n anmàn ɛnhi wú lɔ fɛn hàn kɩ cɔ́ ɔwɔɛmɛ̀n wacɛ̀n anhɔ̀n. 46Wacɛ̀n anhɔ̀n vra lɔ, Zhezü di nkù ecüìemɛ̀n: “M'Ɔwɔ, m'Ɔwɔ, cɛci kruhú kɛ e teze mɛ̀n hán nɛ́n?” 47Anwrɔn hɔ̀n léyi nyɔn nanvrɛn lɔ nɔn, ɛnjanbɔ̀ yá nɛ̀n ɔmùan kɩ sɩ́ ɔmùan ɛwú kɛ dɔ̀ le: “Ne bi Eli!” 48Y'ɛmɛ̀n lɔ, ɔtɔ̀n, srɛ́ ɛnvra zri lɔ hɔ́n bɩ́ ɛnbrà tɔ̀n, wá ɛntàn-drɔ mɛ̀n kɩ mú ɛfi-sè mùan, zɛtɛn bɩ́ tán Zhezü kè mì. 49Tɛ́n anwrɔn ndɔ hɔ̀n kɛ dɔ̀ le: “Ɛ̀ vrá, bɔ̀ nyan ke dú kɛ Eli kɛ lɛ và bɩ́ nɛ̀n kè die!”

50Zhezü vru di nkù vri tɔ̀n kɩ wù. 51Ɛnvra lɔ mɛ̀n, ɛcàsa vri léyi yɛ drɛ́n Ɔwɔ-cice-wɔn lɔ mɛ̀n nɔn, nshà, bukru ɛwú hàn kɩ cɔ́ anhɛ̀. Ɛnhibù jɔ́kɔ̀ kɩ ɛbù kɛ grɔ, 52ɛzhe-nànmàn hɔ̀n kɛ gbɛ́ ɔmùan kɩ ankàẅì-bùtan ẅɛn-bɔ̀ léyi wù nɔn, vru vá ɔkɔrɛ-bɔ̀ mɛ̀n. 53Yɔ dú ezhe-nànmàn mɛ̀n yɔ srɔ ɛntrɛ, kɩ Zhezü wúemɛ̀n-dú-frɔ́ vra lɔ, yɔ bru Zherüzalɛmɛ̀n, Anmàn Prɔnprɔn lɔ, nanvrɛn lɔ anwrɔn bobrebe kán yɔ. 54Rɔmɛ̀n gɔliɛ-wrɔn cüìcüì lɔ mán gɔliɛ-bɔ̀ léyi kɛ nán Zhezü nɔn kán ɛnhi léyi jɔ́kɔ̀ mán ɛci hɔ̀n léyi wɔɛ̀n nɔn; ɛnjansù vri ẅɛn yɔ kɩ yɔ dɔ̀ le: “Annànwɔrɛ mɛ̀n lɔ nɛ̀n dú Ɔwɔ ẅì!” 55Wúyɔ̀ bobrebe nyɔn kɩ kɛ nyan esù she mɛ̀n: yɔ kɛ́n Zhezü ɛsɛ̀n Galile kpɔsɔ wú ô yɔ dú n'eci-bɩtan-wúyɔ̀. 56Y'ɛmɛ̀n lɔ, Mari, Magdala anmàn nyɔnwrɔn lɔ dú ɛmɛ̀n, Mari, Zhakɛ̀n mán Zhozɛfɛ̀n nɛ́n muan mán Zebede ẅì hɔ̀n lɔ yɔ muan.

Yɛ wá Zhezü ezhe-nànmàn mɛ̀n

(Nyɛ́n nyan Markɛ̀n 15:42-47; Lükɛ̀n 23:50-56; mán Zhan 19:38-42 wrú lɔ mɛ̀n)

57Ɛnvra léyi ɔwɔɛmɛ̀n ncɔ̀ nɔn, ɔwrɔn tɔ̀n léyi di ɛnnɛ̀ncüì nɔn dú Arimate anmàn nɔn nvà. Ye bi nɛ̀n Zhozɛfɛ̀n kɩ nɛ́n mán nɛ̀n dú Zhezü sɛ̀nkɛn-wrɔn. 58Nɛ́n hɔ̀n nɛ̀n cɔ́ Pilatɛ̀n kɩ nɛ dɔ́ yi kɛ tán nɛ̀n Zhezü dùwrú lɔ. Zɛtɛn Pilatɛ̀n wá tán ye bɩ́ Zhezü dùwrú yɛ tán Zhozɛfɛ̀n. 59Ɔwrɔn ndɔ lɔ bɩ́ Zhezü dùwrú lɔ, bɔsɔ nɛ̀n eci wosu wrùemɛ̀n, 60kɩ bɩ́ nɛ̀n wá nɛ́n dùku n'ezhe-nànmàn léyi nɛ̀n hán yɛ bɔ́ ɛbù rokò mɛ̀n nɔn mɛ̀n. Zɛtɛn nɛ̀n vra obù vri tɔ̀n nɛ̀n sɛ́n ezhe-nànmàn lɔ mùan kɩ nɛ́n hɔ̀n. 61Mari, Magdala nyɔnwrɔn lɔ mán Mari nyàntɛn dú nanvrɛn, yɔ yɛ́, yɔ kɛ́n ezhe-nànmàn ezì.

Ezhe-nànmàn nán

62Ɛcɛ̀n cüe, ɛnbì léyi dú ɛnyànmán-bì vra bì nɔn, Ɔwɔ-cice-bɔ̀ cüìcüì hɔ̀n mán Ɔwɔ-nyànmàn-sùva-wá-bɔ̀, borɛkru hɔ́n Pilatɛ̀n nanvrɛn 63kɩ kɛ dɔ́ nɛ̀n le: “Bràsu, ke bru bɔ̀ le, ɛyɔ̀n-wrɔn ndɔ lɔ, ɛnvra léyi nɛ̀n dú ɔkɔrɛ-bɔ̀ mɛ̀n nɔn, nɛ́n dɔ̀ le: ‘Ɛbi-anhɔ̀n, me le dú owú-bɔ̀ mɛ̀n, mɛ̀n vru mɛ̀n vá ɔkɔrɛ-bɔ̀ mɛ̀n.’ 64Ɛ̀ wá tán yɛ nán ezhe-nànmàn lɔ hàn kɩ kɛ cɔ́ ɛbi-anhɔ̀n, kè sɩ̀ dù ɔmu lɔ hô, n'ɛsɛ̀nkɛn-bɔ̀ kɛ lɛ và ke bɩ́ n'edùwrú lɔ, kɩ kɛ lɛ dɔ́ fɛcüè le: ‘Zhezü dú owúemɛ̀n frɔ́.’ Ɛmɛẅitrɔ yɔ̀n-ankà ndɔ lɔ ke le sevri vrán kpàkpà tɛn lɔ.” 65Pilatɛ̀n ke dɔ́ yɔ le: “Nyàn gɔliɛ-bɔ̀ léyi kɛ lɛ nán ɛyri nɔn. Nyɛ́n hɔ̀n, ô nyɛ́n hán yɔ yɛ nán ɛyri kɛ hán ɔmu le nyɛ cüɛn nɔn.” 66Yɔ hɔ̀n, yɔ bɔsɔ y'edomɛ̀n ô, yɔ nán ezhe-nànmàn lɔ: yɔ sɛ́n ezhe-nànmàn mùan lɔ anvrɛnvrɛn kɩ yɔ hɛ́n gɔliɛ-bɔ̀ kɛ nán ezhe-nànmàn lɔ.

Currently Selected:

Matie 27: ƐAA03

Highlight

Copy