Ɔkɔ̀hɔ̀n-wá-bɔ̀ kɔ̀hɔ̀n hán 4

Ye sɩ́ Piɛrɛ̀n mán Zhan Ankà-dɔ̀-trɔ-bɔ̀ mrɛ̀nci zìwú

1Piɛrɛ̀n mán Zhan ndù kɛ dɔ́ fɛcüè ankà kɩ Ɔwɔ-cice-bɔ̀, Ɔwɔ-cice-wɔn-nán-bɔ̀ wrɔn cüìcüì mán anwrɔn hɔ̀n léyi ke sɩ́ bú owúemɛ̀n-dùfrɔ ankà kɛ tán ankaẅì nɔn nvà. 2Yɔ sɩ́ cüɛ́n ankà léyi ɔkɔ̀hɔ̀n-wá-bɔ̀ anhyrɛ̀ lɔ kɛ tán fɛcüè y'ankà-yé lɔ mɛ̀n, kɩ yɔ dɔ̀ le, Zhezü dú owúemɛ̀n frɔ́, ɔmu lɔ ke yé tán le owú-bɔ̀ ke le vru kɛ vá ɔkɔrɛ-bɔ̀ mɛ̀n nɔn. 3Yɔ ẅɛn yɔ kɩ yɔ wá yɔ anwɔnmɛ̀n-wá-wɔn mɛ̀n ɛnyran lɔ, ɔmuhi ɛnvra bru ɛmɛ̀n nɔn. 4Tɛ́n, y'ɛmɛ̀n lɔ, anwrɔn hɔ̀n léyi yá ɔkɔ̀hɔ̀n-wá-bɔ̀ mɛẅi ankà-dɔ̀ lɔ nɔn, bú tán ankaẅì, kɩ ankaẅì-bùtan-ẅɛn-bɔ̀ lɔ, yɔ dú anwrɔn tɛ̀bru-kru-ɛnrì.

5Ɛcɛ̀n cüe, Zhüifɛ̀n-bɔ̀ cüìcüì, ɛcüìcüì-bɔ̀ mán ɛnyànmàn-gbànvri-ankà-yé-bɔ̀ borɛkru Zherüzalɛmɛ̀n anmàn. 6Nanvrɛn lɔ, anwrɔn hɔ̀n léyi yɛ cɔ̀ nɔn dú Hannɛ̀n, Ɔwɔ-cice-wrɔn cüìcüì, Kahifɛ̀n, Zhan, Alɛksandrɛ̀n mán Ɔwɔ-cice-wrɔn cüìcüì mɛ̀n mɛ̀n-bɔ̀ lɔ fɛn. 7Yɔ hán ye bɩ́ ɔkɔ̀hɔ̀n-wá-bɔ̀ lɔ yɔ sɩ́ y'ezìwú kɩ yɔ yrɛ yɔ le: “Ɛkɔrɛ̀srɔn tán mɛ̀n mán antɔnwrɔn bɩ́mɛ̀n de nyɛ́n hán ɔkɔrɛ-kɔ̀hɔ̀n ndɔ lɔ nɛ́n?” 8Zɛtɛn Piɛrɛ̀n, Ɛnhɛ́n Prɔnprɔn bru edù, kɩ kɛ dɔ́ yɔ le: “Fɛcüè cüìcüì-bɔ̀ mán ɛcüìcüì-bɔ̀: 9ye yrɛ bɔ̀ ankà ɛnyɔncì lɔ, anvrɛn léyi ɔkpɔ̀cɔ-wrɔn tɔ̀n ncɔ̀ nɔn hɩ wú, ye yrɛ bɔ̀ ɔmu le ɔwrɔn ndɔ lɔ hán cɔ́ ɔkɔrɛ̀ nɔn. 10Hi tɛ̀, ke ji le nyɛ́n nyrì le, nyɛ́n lɔ fɛn mán Izraɛlɛ̀n fɛcüè lɔ fɛn: ke dú kɛ ɔwrɔn ndɔ lɔ nyɔn nyɛ̀n ezìwú edùsɔmɛ̀n hô, Nazàrɛtɛ̀n-wrɔn Zhezü Krisì bɩ́ kɔrɛ̀srɔn mɛ̀n, nɛ́n léyi nyɛ́n gɔ́n nɛ̀n brɛ́ ɛgbàn-hán-tɛ̀ domɛ̀n kɩ Ɔwɔ hán nɛ̀n nɛ́n vru nɛ̀n vá ɔkɔrɛ-bɔ̀ mɛ̀n nɔn. 11Zhezü dú ɔwrɔn léyi Owrú Prɔnprɔn kɛ dɔ̀ le:

‘Obù léyi nyɛ́n, ɔwɔn-ku-bɔ̀, nyɛ́n kɔ̀n ze nɔn,

de srɔ ɔwɔn-kavàmɛ̀n-bù nɔn.’

12Ɛnkru-kɔrɛ̀ dú ne yri, ɔmuhi ɛyri zriɛmɛ́n ɛnhibù mumù lɔ fɛn wú, Ɔwɔ kè sɩ̀ tàn anwrɔnẅì ɔwrɔn nyantɛn zriɛmɛ́n léyi ke le bɩ́ bɔ̀ ke die nɔn.”

13Ankà-dɔ̀-trɔ-bɔ̀ dú anvɛmɛ̀n-frɛ́n mɛ̀n, ɔmuhi yɔ kán Piɛrɛ̀n mán Zhan, ankà-dɔ̀ ke wole anmùan mɛ̀n, kɩ yɔ nyri ɔmu le, yɔ dú anwrɔn kora hɔ̀n, kɩ owrú mán yɔ sɩ̀ kàn. Yɔ nyri ɔmu le Zhezü sɛnkɛ̀n-bɔ̀ dú yɔ. 14Tɛ́n yɔ vru yɔ kán ɔkɔrɛ-wrɔn léyi nyɔn yɔ ɛtɛ̀sɛ̀n, kɩ yɔ sɩ́ cɔ́ ankà-dɔ́ yri. 15Yɔ wá tán yɔ zɛtɛn, yɔ dú ɛmrɛ̀nci-wɔn lɔ mɛ̀n yɔ srɔ ɛntrɛ, kɩ yɔ bukru yɔ wrɔn-ecüì y'ɛmɛ̀n lɔ. 16Yɔ dɔ́ y'edomɛ̀n le: “Ecitan de bɔ́ lɛ hán anwrɔn ndɔ hɔ̀n lɔ nɛ́n? Ɔmuhi Zherüzalɛmɛ̀n anmàn-bɔ̀ nyri kpete le anvɛmɛ̀n-frɛ́n-ci annanwɔrɛ ndɔ lɔ, dú yɔ eci-hán-ci kɩ bɔ́ sɩ̀ wrɔ́n anmanta rɔ́. 17Tɛ́n ke sɩ́ ji le, ɛmɛẅi ankà ndɔ lɔ, kɛ̀ sàn bonyi fɛcüè mɛ̀n. Bɔ lɛ wá tán yɔ, eji-kɔ̀n mán ke le dú ɛmɛ̀n, le: bɔ́ sɩ́ yɔ, yɔ bɩ́ vru dɔ́ ɔwrɔn totɔtɔ̀n zriɛmɛ́n ankà Zhezü bɩmɛ̀n.” 18Zɛtɛn yɔ vru yɔ bi yɔ, kɩ ye sɩ́ tán yɔ kpankpan le, yɔ bɩ́ dɔ́ ankà, yɔ yé ankà Zhezü bɩ́mɛ̀n. 19Tɛ́n Piɛrɛ̀n mán Zhan mrɛ́n y'ɔmùan le: “Nyɛ́n dùku nyɛ́n nyan, ke dú kɛ Ɔwɔ zìwú lɔ zrɔ tán le yɛ hán ny'ɛkɔrɛ̀-zì-ci, kale Ɔwɔ de ke ji le yɛ wá nɔn. 20Bɔ́ tɛn, bɔ́ sɩ̀ kɛ́n ɔmùan bɔ̀ hɛ́n rɔ́, eci léyi bɔ́ kàn hɩ bɔ̀ yá nɔn n'ɛwú.” 21Ankà-dɔ̀-trɔ-bɔ̀ vru wá ejì-kɔ́n ankà hɛ́n yɔ ɛwú, zɛtɛn teze yɔ. Yɔ sɩ̀ cɔ̀ ɛkɔrɛ̀-levri zriɛmɛ́n, ô yɔ hàn yɔ ɛgbàn, ɔmuhi fɛcüè lɔ fɛn kɛ mrɛ́n Ɔwɔ eci léyi wɔɛ̀n nɔn kruhú. 22Ɔwrɔn léyi yɔ kɔrɛ́ Ɔwɔ bɩ́mɛ̀n nɔn, ẅɛn ɛnnànwàn kru ɛkoẅì-anhyrɛ̀, ɛnwì.

Ankàẅì-bùtan-ẅɛn-bɔ̀ wɔ-sɛ̀n

23Ɛnvra zri léyi ye teze yɔ nɔn, Piɛrɛ̀n mán Zhan hɔ́n cɔ́ yɔ nyran hɔ̀n fɛcüè lɔ, kɩ dɔ́ yɔ ankà hɔ̀n lɔ fɛn léyi Ɔwɔ-cice-bɔ̀ cüìcüì mán ɛcüìcüì-bɔ̀ dɔ́ yɔ nɔn. 24Ɛnvra léyi yɔ yá ankà ndɔ lɔ trɔ nɔn, ankaẅì-bùtan-ẅɛn-bɔ̀ lɔ, ɔmùan zriemɛ̀n hán ɔwɔsɛ̀n ndɔ lɔ: “Ankà-yé-wrɔn, vɛ́n de ɛ̀ hán anhobɩ́ mán ɛnhibù nɔn, ecüe mán ɛci hɔ̀n lɔ fɛn léyi dú yɔ ɛmɛ̀n nɔn. 25Vɛ́n de, Ɛnhɛ́n Prɔnprɔn bɩmɛ̀n, ɛ̀ hán yɛ dɔ́ Davidɛ̀n bɔ́ nancüì mán v'eci-bɩ̀tan-wrɔn le:

‘Ɛnhibù wú anmàn hɔ̀n jɔ̀kɔ y'edomɛ̀n, tɛ́n ceci kruhúɛ?

Fɛcüè hɔ̀n ẅɛn ɔmùan-krɔn eci-gbangbàn-hán mɛ̀n, tɛ́n dú eci kora!

26Ɛnhibù wú nɛ̀ncüì hɔ̀n wá anhà-kɔ̀n ankà esùva

kɩ ɛyri-ẅɛn-bɔ̀ bɔsɔ y'edomɛ̀n

ô kɛ̀ kɛ́n Ɛẅɛnwrɔn mán ɛnnɛ̀ncüì léyi nɛ́n wá ɛnzhì ɛnkru nɔn ezì.’

27Ɔmuhi annanwɔrɛ mɛ̀n lɔ Herɔdɛ̀n mán Pɔnse-Pilatɛ̀n bɔsɔ y'edomɛ̀n, anmàn ndɔ lɔ mɛ̀n, yɔ mán ɛnhibù-nɛ̀nnyàn-bɔ̀-zìwú-bɔ̀ mán Izraɛlɛ̀n fɛcüè mɛhi, ô yɔ kɛ́n v'eci-bɩ̀tan-wrɔn prɔnprɔn Zhezü ezì, nɛ́n léyi ɛ wá nɛ̀n ɛnzhì ɛnkru nɔn. 28Ɔmu lɔ de yɔ hán eci lɔ fɛn léyi, v'ɛkɔrɛ̀-srɔn mɛ̀n, è ji, kɩ ɛ gɔ̀ wá ɔmùan ɛ̀ hɛ́n nɔn. 29Kɩ zɛtɛn, Ɛẅɛnwrɔn, ɛ̀ nán y'ɛgbàn-dì-mùan-wá lɔ, ô ɛ hán tán, v'eci-bɩ̀tan-bɔ̀ kɛ ẅɛn esɛ́ mán edùyì, v'ɛmɛẅi ankà lɔ n'ɛdɔ́ mɛ̀n. 30È yé v'ɛkɔrɛ̀-srɔn, ô ɛnlɔẅiɛ-bɔ̀ kɛ̀ kɔrɛ̀, anvɛmɛ̀n-frɛ́n-ci mán eci-woroan-ci kɛ sá nmù v'eci-bɩ̀tan-wrɔn prɔnprɔn Zhezü bɩmɛ̀n.” 31Ɛnvra léyi yɔ sɛ́n Ɔwɔ trɔ nɔn, ɛyri léyi yɔ bɔrɛkru yɔ nyɔn nɔn jɔkɔ̀. Yɔ lɛ fɛn, yɔ cɔ́ Ɛnhɛ́n Prɔnprɔn kɩ yɔ bukru yɔ dɔ́ Ɔwɔ ankà esɛ́ mɛ̀n.

Ankàẅì-bùtan-ẅɛn-bɔ̀ kɛ dɛ́ y'edomɛ̀n y'ɛci-ẅɛn-ci

32Ankaẅì-bùtan-ẅɛn-bɔ̀ kpɔsɔ lɔ dú ɔbɔ̀sɔ mɛ̀n anvrɛnvrɛn, y'ɛnbɔrɛ mɛ̀n mán yɔ wàwúyɛ mɛ̀n. Ɔwrɔn zriɛmɛ́n ke sɩ́ dɔ́ le, n'ɛci hɔ̀n lɔ dú nɛ́n zri n'ɛci, tɛ́n, y'ɛmɛ̀n lɔ, ɛci hɔ̀n lɔ fɛn léyi yɔ ẅɛ̀n nɔn, dú fɛcüè ci. 33Ɛkɔrɛ̀-srɔn vriemɛ̀n de ɔkɔ̀hɔ̀n-wá-bɔ̀ lɔ ke di Ɛẅɛnwrɔn Zhezü wúemɛ̀n-dùfrɔ́ lɔ, nɛ́n dalɛfuɛ, kɩ Ɔwɔ kɛ tán yɔ lɛ fɛn ɛnshifù brobebe. 34Ɔwrɔn zriɛmɛ́n y'ɛmɛ̀n lɔ eci kɛ sɩ́ ẅɛn ɛmìan. Tɛ́n, anwrɔn hɔ̀n léyi ẅɛn ankɛ̀tɛ̀ mán anwɔn nɔn, kɛ hɛ́ y'ɛci hɔ̀n lɔ, 35kɩ ke bɩ́ ɔkùa lɔ kɛ tán ɔkɔ̀hɔ̀n-wá-bɔ̀; zɛtɛn yɛ dɛ́ ɔkùa yɛ tán ɔwrɔnwrɔn hɩ le kɛ lɛ krɔn nɛ̀n nɔn. 36Nyàn sɛnpò tɔ̀n; ɔwrɔn tɔ̀n léyi ye bi Zhozɛfɛ̀n, nɛ̀n dú Ɔwɔ-cɔ̀-krɛ́-wrɔn, ye bî nɛ̀n Shiprɛ̀n anmàn, nɛ́n de ɔkɔ̀hɔ̀n-wá-bɔ̀ ke bi nɛ̀n Barnabasɛ̀n (hɩ mɛ̀n kɛ dɔ̀ le “ɔwrɔn léyi ke yɩ́ anwrɔn edù nɔn”), 37nɛ̀n hɛ́ n'ɛkɛ̀tɛ̀ lɔ, kɩ nɛ̀n bɩ́ ɔkùa lɔ nɛ̀n tán ɔkɔ̀hɔ̀n-wá-bɔ̀.

Currently Selected:

Ɔkɔ̀hɔ̀n-wá-bɔ̀ kɔ̀hɔ̀n hán 4: ƐAA03

Highlight

Copy