Ɔkɔ̀hɔ̀n-wá-bɔ̀ kɔ̀hɔ̀n hán 5

Ananiasɛ̀n mán Safira

1Tɛ́n ɔwrɔn tɔ̀n léyi ye bi Ananiasɛ̀n, hɩ nɛ́n hi dú Safira, yɔ anwrɔn anyhrɛ̀ lɔ, ɔmùan krɔn yɔ, yɔ hɛ́ yɔ ɛnhi tɔ̀n. 2Ananiasɛ̀n bɩ́ ɔkùa cá hɛ́n kɩ bɩ́ ɛcá ndɔ lɔ hɔ́n sɩ́ ɔkɔ̀hɔ̀n-wá-bɔ̀ lɔ, nɛ́n hi mɛhi ɔmùan krɔn yɔ.

3Zɛtɛn Piɛrɛ̀n kɛ dɔ́ nɛ̀n le: “Ananiasɛ̀n, cɛci kruhú kɛ anwa-wrɔn cɔ́ ɛyri di v'ɛnbɔrɛ lɔ ɛkɔrɛ̀ ɛwúɛ? Ɛ̀ ẅɛn ɔyɔ̀n ɛ̀ tán Ɛhɛ́n Prɔnprɔn kɩ ɛkɛ̀tɛ̀ kùa lɔ è bɩ́ ɛcá ɛ̀ hɛ́n. 4Ɛnvra léyi ɛ vá hɛ́ ɛkɛ̀tɛ̀ lɔ nɔn, ɛkɛ̀tɛ̀ lɔ dú vɛ tɛn; kɩ ɛnvra léyi ɛ̀ hɛ́ nɛ̀n nɔn, ɔkùa lɔ dú vɛ tɛn, kè sɩ̀ dù ɔmu hɛ́n? Kɛ̂ anwɔntan hán cì, ɛ hán eci vɛ́n ndɔ lɔa? Kè sɩ̀ dù anwrɔnẅì de ɛ̀ ẅɛ̀n ɛyɔ̀n ɛ̀ tán nɔn, tɛ́n Ɔwɔ de ɛ̀ ẅɛn ɛyɔ̀n ɛ̀ tán nɔn.” 5Ɛnvra léyi Ananiasɛ̀n yá ankà ndɔ lɔ nɔn, nɛ̀n bore, kɩ nɛ́n wù. Kɩ anwrɔn hɔ̀n léyi yá ankà lɔ nɔn, ɛnjansù vri tɔ̀n bru yɔ edù. 6Sùgban-bɔ̀ nvà, vá n'edùru lɔ eci, zɛtɛn bɩ́ nɛ̀n hɔ́n wá ɛnhibɩ́.

7Wacɛ̀n anhɔ̀n vacì, Ananiasɛ̀n hi lɔ bru ɛbemɛ̀n, kɩ kè sɩ̀ nyrì eci léyi wɔɛ̀n nɔn. 8Piɛrɛ̀n ke yrɛ Ananiasɛ̀n hi lɔ le: “Ɛ dɔ́ mɛ̀n, nyɛ́n hɛ́ ny'ɛnhi lɔ ɔkùa ɔmu lɔa?” Ɛnnyɔnwrɔn lɔ mrɛ́n ɔmùan le: “Hɛ̀ɛ̀, ɔkùa ɔmu lɔ.” 9Zɛtɛn Piɛrɛ̀n kɛ dɔ́ nɛ̀n le: “Anwɔntan hán cì kɛ̂, ɔmùan kɛ krɔn nyɛ̀n, nyɛ́n anwrɔn anyhrɛ̀ lɔ, nyɛ frɛ́n Ɛẅɛnwrɔn Hɛ́n hán? E die nukùɛ, anwrɔn hɔ̀n léyi bɩ́ ecüì nɔn, nyɔn angbàtà-mùan, kɩ vɛ́n mán yɔ le bɩ́ mɛ́n yɔ hɔ̀n bɩ.” 10Ɛnvra zri lɔ ɛnnyɔnwrɔn lɔ bore Piɛrɛ̀n nan tɛsɛ̀n kɩ nwù. Sùgban-bɔ̀ lɔ bru ɛbemɛ̀n kɩ cɔ́ nɛ̀n, nɛ́n wù; yɔ bɩ́ nɛ̀n yɔ hɔ́n bɩ́ nɛ́n cüì tɛsɛ̀n. 11Ɔwɔ fɛcüè-bɔ̀ mán anwrɔn hɔ̀n léyi yá ankà ndɔ lɔ nɔn dú ɛnjansù vri tɔ̀n mɛ̀n.

Anvɛmɛ̀n-frɛ́n-ci bobrebe

12Anvɛmɛ̀n-frɛ́n-ci bobrebe mán eci-woroan-ci hɔ̀n dú eci léyi ɔkɔ̀hɔ̀n-wá-bɔ̀ lɔ kɛ hán fɛcüè wanzi nɔn. Ankaẅì-bùtan-ẅɛn-bɔ̀ lɔ kɛ nyɔn ɛyri zri, ɔwɔn-bù-nan tɛ̀sɛ̀n, ɛyri léyi ye bi Salomɔn levri nɔn. 13Ɔwrɔnẅì zriɛmɛ́n ke sɩ́ ji kè bru yɔ ɛmɛ̀n, kɩ ɔmu tɛ̀kɩ, fɛcüè ẅɛn y'ɛcüɛ̀n bobrebe. 14Anwrɔn fɛcüè brobebe, wúcɔ̀ mán wúyɔ̀ ẅɛn ankaẅì-bùtan Ɛẅɛnwrɔn mɛ̀n, kɩ kɛ vá cɔ́ y'ɔkpɔsɔ lɔ. 15Kɩ ye bukru ye sɩ́ ɛnlɔẅiɛ-bɔ̀ ɛnlevri: yɛ hɛ́n yɔ sofà mán ɛnkpà wú, ô ɛnvra léyi Piɛrɛ̀n ke le cì nɔn, n'ɔwɔ̀n kè murɛn yɔ ɛwú. 16Anwrɔn fɛcüè mán ke dú anmàn hɔ̀n léyi dú Zherüzalɛmɛ̀n tɛsɛ̀n nɔn kɛ và; yɔ sɩ́ ɛnlɔẅiɛ-bɔ̀ mán anwrɔn hɔ̀n léyi anhɛ́n gbàngbàn ke di ejüe nɔn, kɩ yɔ lɛ fɛn lɔ yɔ kɔrɛ̀.

Ɔkɔ̀hɔ̀n-wá-bɔ̀ dú ɛgbànkan mɛ̀n

17Zɛtɛn Ɔwɔ-cice-wrɔn cüìcüì mán anwrɔn hɔ̀n léyi dú nɛ̀n ɛtɛ̀sɛ̀n, hɩ dú y'ɛmɛ̀n bɔ̀ ke sɩ́ bú owúemɛ̀n-dùfrɔ́ ankà kɛ tán ankaẅì nɔn, ẅɛn ecüì-hi-kɔ̀n ɔkɔ̀hɔ̀n-wá-bɔ̀ tɛ̀sɛ̀n; yɔ wá le yɔ hán eci. 18Yɔ hán yɔ ẅɛn yɔ ye ku anmàn wɔn-mɛ̀n-wá-wɔn mɛ̀n. 19Tɛ́n ɛnnyran mɛ̀n, Ɛẅɛnwrɔn kùyüre-wrɔn tɔ̀n srú anwɔn-mɛ̀n-wá-wɔn mɛ̀n sù hɔ̀n lɔ, hán ɔkɔ̀hɔ̀n-wá-bɔ̀ lɔ srɔ ɛntrɛ, kɩ kɛ dɔ́ yɔ le: 20“Nyɛ́n hɔ́n Ɔwɔ-cice-wɔn lɔ mɛ̀n, ô nyɛ́n dɔ́ fɛcüè ankà lɔ fɛn léyi dú ɛwúvà wrú lɔ mɛ̀n nɔn.” 21Ɔkɔ̀hɔ̀n-wá-bɔ̀ die ankà lɔ nukùɛ: ɔsɔ̀wrɔ̀ fùtàn, yɔ hɔ́n Ɔwɔ-cice-wɔn lɔ mɛ̀n kɩ yɔ bukru yɔ yé ankà.

Ɔwɔ-cice-wrɔn cüìcüì mán anwrɔn hɔ̀n léyi dú nɛ̀n ɛtɛ̀sɛ̀n nɔn, borɛ Zhüifɛ̀n fɛcüè cüìcüì-bɔ̀ ɛkru, ô yɔ cì ɛmrɛ̀n ankà-dɔ̀-trɔ-bɔ̀ zìwú. Zɛtɛn yɔ hán yɛ hɔ́n bɩ́ ɔkɔ̀hɔ̀n-wá-bɔ̀ anwɔn-mɛ̀n-wá-wɔn mɛ̀n. 22Tɛ́n ɛnvra léyi gɔliɛ-bɔ̀ lɔ nvà nɔn, yɔ sɩ̀ cɔ̀ yɔ anwɔn-mɛ̀n-wá-wɔn mɛ̀n. Yɔ vru ɛmɛẅi yɔ hɔ́n ankà-dɔ̀-trɔ-bɔ̀ mrɛ̀ncì zìwú kɩ yɔ dɔ́ ɛmɛẅi ankà 23ndɔ lɔ: “Bɔ̀ cɔ́ anwɔn-mɛ̀n-wá-wɔn lɔ, yɛ sɛ́n ɛsù hɔ̀n lɔ anvrɛnvrɛn kɩ ɛyri-nan-bɔ̀ lɔ mán nyɔn angbàta-mùan. Tɛ́n ɛnvra léyi bɔ̀ srú ɛsù hɔ̀n lɔ nɔn, bɔ́ sɩ̀ cɔ̀ ɔwrɔn zriɛmɛ́n anwɔn mɛ̀n.” 24Ɛnvra léyi Ɔwɔ-cice-wɔn yri-nan-bɔ̀-wrɔn cüìcüì mán Ɔwɔ-cice-bɔ̀ cüìcüì hɔ̀n yá ankà ndɔ lɔ nɔn, yɔ sɩ́ nyri ankà léyi yɔ le tro nɔn, kɩ yɔ yrɛ y'edomɛ̀n eci léyi wɔ́ɛn ɔkɔ̀hɔ̀n-wà-bɔ̀ lɔ nɔn. 25Zɛtɛn ɔwrɔn tɔ̀n srɔ kɩ kɛ dɔ́ yɔ le: “Nyɛ́n die nukùɛ! Anwrɔn hɔ̀n léyi nyɛ́n wá anwɔn mɛ̀n nɔn dú Ɔwɔ-cice-wɔn lɔ mɛ̀n ke yé fɛcüè ankà.”

26Zɛtɛn ɛyri-nan-bɔ̀-wrɔn cüìcüì bɩ́ anwrɔn kɛ̀ hɔ̀n kɛ̀ ẅɛn ɔkɔ̀hɔ̀n-wá-bɔ̀ lɔ kɛ và. Tɛ́n yɔ sɩ̀ ẅɛ̀n yɔ ecüìemɛ̀n, ɔmuhi ɛnjansù mán dú yɔ ɛnbɔrɛ mɛ̀n, kɩ yɔ tro le fɛcüè kɛ lɛ sroan yɔ ɛbù. 27Ɛnvra léyi ye bɩ́ yɔ yɛ và nɔn, yɔ sɩ́ yɔ ankà-dɔ̀ trɔ-bɔ̀ mrɛ̀ncì zìwú kɩ Ɔwɔ-cice-wrɔn cüìcüì lɔ bukru ke ku yɔ ankà ɛwú. 28Nɛ dɔ́ yɔ le: “Bɔ̀ sî ɛshishiemɛ̀n bɔ̀ tán nyɛ̀n le, nyɛ́n bɩ́ bɩ́ ɔwrɔn ndɔ lɔ bɩ́ nyɛ́n yé anwrɔn ankà. Zɛtɛn cɛci de nyɛ́n hán nɛ́n? Nyɛ́n bonyi ny'ankà-yé lɔ Zherüzalɛmɛ̀n anmàn mumù lɔ wú, kɩ nye ji nyɛ́n bɩ́ n'owù gbàn lɔ nyɛ́n kú bɔ̀ ɛwúɛ!” 29Piɛrɛ̀n mán ɔkɔ̀hɔ̀n-wá-bɔ̀ ndɔ hɔ̀n lɔ mrɛ́n ɔmùan le: “Ke ji le ye die Ɔwɔ nukù kɛ̀ vrán anwrɔnẅì. 30Bɔ́ nancüì hɔ̀n Wɔ, frɔ́ Zhezü ndɔ lɔ, hɩ nyɛ́n hán wú ɛgbàn-hán-tɛ̀ domɛ̀n nɔn. 31Ɔwɔ bɩ́ nɛ̀n hɛ́n n'ezì-kɔrɛ̀ kɔrɛ̀a kɩ wá nɛ̀n ecüìcüì mán Ebɩ̀die-wrɔn, ô kɛ̀ tán Izraɛlɛ̀n fɛcüè kɛ̀ crɔn y'eci-hán-ci, ô kɛ̀ cɔ́ ɛgbàn-bɩce. 32Bɔ̀ dú eci-woroan-ci ndɔ hɔ̀n lɔ, yɔ dalɛfuɛ-di-bɔ̀, bɔ̀ mán Ɛnhɛ́n Prɔnprɔn léyi Ɔwɔ tán anwrɔn hɔ̀n léyi kɛ wá nɛ̀n nɔn.”

33Ankà-dɔ̀-trɔ-bɔ̀ lɔ bɩ́ ɛmɛ̀nhyì ɛnvra léyi yɔ yá ankà ndɔ lɔ nɔn, kɩ yɔ ji yɔ di ɔkɔ̀hɔ̀n-wá-bɔ̀ lɔ owúemɛ̀n. 34Tɛ́n y'ɛmɛ̀n lɔ, Ɔwɔ-nyànmàn-sùva-wá-wrɔn tɔ̀n ndù ye bi Gamaliɛlɛ̀n, fɛcüè lɔ fɛn ẅɛn n'ɔwa. Nɛ̀n tɔhú ankà-dɔ̀-trɔ-bɔ̀ mrɛ̀ncì wanzi kɩ nɛ̀n sán le, ɔkɔ̀hɔ̀n-wá-bɔ̀ lɔ kɛ srɔ ɛntrɛ ɛnvra cá. 35Zɛtɛn nɛ dɔ́ fɛcüè le: “Izraɛlɛ̀n-bɔ̀, nyɛ́n wá ny'edomɛ̀n esùva, eci léyi nye ji nyɛ́n hán anwrɔn ndɔ hɔ̀n lɔ nɔn hɩ wú. 36Kɛ vá moɛ̀n, Tedasɛ̀n nvà, nɛ́n léyi nɛ krɛ́ n'edomɛ̀n ɔwrɔn ankrankran; ɔwrɔn ɛkoẅì-ɛẅia kɛ́n nɛ̀n ɛsɛ̀n. Tɛ́n ye wri nɛ̀n, anwrɔn hɔ̀n léyi dú nɛ̀n ɛmɛẅi nɔn bonyì kɩ nɛ́n fɛcüè lɔ zrɛ́n mrìmrì. 37N'ɛmɛẅi lɔ, ɛnvra léyi yɛ wá anwrɔn ebɩ́ owrúemɛ̀n nɔn, Galile-wrɔn Zhüda mán srɔ; nɛ̀n bɩ́ anwrɔn fɛcüè kɛ́n nɛ̀n ɛsɛ̀n. Tɛ́n nɛ́n mán ye wri nɛ̀n kɩ anwrɔn léyi dú n'ɛsɛ̀nkɛn-bɔ̀ nɔn bonyì. 38Zɛtɛ̀ lɔ, mɛ dɔ́ nyɛ̀n le: anwrɔn ndɔ hɔ̀n lɔ, nyɛ́n bɩ́ vru wá y'ankà zriɛmɛ́n ɛnkru ɛwúɛ, nyɛ́n teze yɔ. Ɔmuhi ke dú kɛ, y'ankà-tro mán y'eci-hán-ci dú anwrɔnẅiemɛ̀n nvà hô, yɔ mán yɔ lɛ zrɛ́n. 39Tɛ́n, ke dú kɛ, annanwɔrɛ mɛ̀n, y'eci-hán-ci dú Ɔwɔ yri và hô, nyɛ́n sɩ̀ jrɛ́ yɔ rɔ́. Nyɛ́n bɩ́ ji muzhie nyɛ́n tán ny'edomɛ̀n Ɔwɔ anhà-kɔ́n mɛ̀n!” Ankà-dɔ̀-trɔ-bɔ̀ shri Gamaliɛlɛ̀n ankà lɔ nbɩ̀. 40Ye vru ye bi ɔkɔ̀hɔ̀n-wá-bɔ̀ lɔ, yɔ hán ye gorɛ yɔ kɩ yɔ wá tán yɔ le, yɔ bɩ́ vru dɔ́ ankà Zhezü bɩmɛ̀n, zɛtɛn yɔ tecüe yɔ. 41Ɔkɔ̀hɔ̀n-wá-bɔ̀ lɔ cɔhɔ́ ankà-dɔ̀-trɔ-bɔ̀ mrɛ̀ncì zìwú, yɔ dú pɔpüɛ̀-brá mɛ̀n, ɔmuhi Ɔwɔ ci yɔ ɛmrɛ̀n le, yɔ kán ɛgbàn Zhezü bɩmɛ̀n nɔn. 42Kɩ ɛnbɩ lɔ fɛn yɔ dú Ɔwɔ-cice-wɔn lɔ mɛ̀n mán anwrɔn bemɛ̀n, yɔ dú anwrɔn ankà-yé mɛ̀n ɛnvra lɔ fɛn, kɩ yɔ dɔ́ Zhezü, Ebɩ̀die-wrɔn, mɛẅì ankà ankrankran lɔ.

Currently Selected:

Ɔkɔ̀hɔ̀n-wá-bɔ̀ kɔ̀hɔ̀n hán 5: ƐAA03

Highlight

Copy