Ɔkɔ̀hɔ̀n-wá-bɔ̀ kɔ̀hɔ̀n hán 3

Yɛ kɔrɛ ɔkpɔ̀cɔ-wrɔn tɔ̀n

1Piɛrɛ̀n mán Zhan kɛ hɔ́n Ɔwɔ sɛ́n yri, ecice-wɔn lɔ mɛ̀n, ɔwɔɛmɛ̀n wacɛ̀n anhɔ̀n vra. 2Ecice-wɔn gbàtà, angbàtà léyi ye bi “Angbàta Fifi” nɔn, n'ɛtɛsɛ̀n lɔ ɔwrɔn tɔ̀n ndù, kɩ ɛcɛmɛ̀n hàn hɛ́n, nɛ̀n ẅɛn ɔkpɔ̀cɔ lɔẅiɛ. Ɛnbì lɔ fɛn ye sɩ́ nɛ̀n, kɩ yɛ hɛ́n nɛ̀n nanvrɛn, ô anwrɔn hɔ̀n léyi ke bru Ɔwɔ-sɛ́n-wɔn lɔ mɛ̀n nɔn, nɛ̀n sán yɔ ɛci. 3Ɔkpɔ̀cɔ-wrɔn lɔ kán Piɛrɛ̀n mán Zhan kɛ vá ecice-wɔn lɔ mɛ̀n bru-yri kɩ nɛ sán yɔ ɔkùa. 4Piɛrɛ̀n mán Zhan crɛ anvɛ̀ kɛ́n nɛ̀n kɩ Piɛrɛ̀n kɛ dɔ́ nɛ̀n le: “Ɛ̀ nyan bɔ̀.” 5Ɔwrɔn lɔ kɛ nyan yɔ esùva-wá mɛ̀n, ɔmuhi ne tro le yɔ lɛ tán nɛ̀n eci nɔn. 6Zɛtɛn Piɛrɛ̀n kɛ dɔ́ nɛ̀n le: “Mɛ̀n sɩ̀ ẅɛ̀n ɔkùa, mɛ̀n sɩ̀ ẅɛ̀n ansikɛ, tɛ́n eci léyi mɛ́n ẅɛ̀n nɔn, mɛ tán mɛ́n: Nazàrɛtɛ̀n-wrɔn Zhezü Krisì bɩmɛ̀n, tɔhú nán esù!” 7Zɛtɛn Piɛrɛ̀n ẅɛn nɛ̀n ezì-kɔrɛ̀, ô kɛ̀ wá nɛ̀n ɛkɔrɛ̀ nɛ̀n tɔhú. Ɛnvra zri lɔ, ɔkpɔ̀cɔ-wrɔn lɔ annan mán annan-bɔ̀nmɛ̀n gbrɔ́; 8nɛ́n trɛ̀nshɛn, kɩ nɛ̀n bukru nɛ nán esù. Nɛ́n mán ɔkɔ̀hɔ̀n-wá-bɔ̀ lɔ mɛhi yɔ bru Ɔwɔ-cice-wɔn lɔ mɛ̀n, nɛ nán esù, nɛ trɛ̀n kɩ nɛ mrɛ́n Ɔwɔ. 9Fɛcüè lɔ fɛn kán nɛ̀n nɛ nán esù kɩ nɛ mrɛ́n Ɔwɔ. 10Ɛnvra léyi yɔ nyri ɔmu le nɛ́n de nɛ yɛ́ Ɔwɔ-cice-wɔn, gbàtà fifi lɔ tɛsɛ̀n nɛ sán ɛci nɔn, yɔ lɛ fɛn ɛnjansù yɩ́ yɔ ɛnbɔrɛ mɛ̀n, kɩ yɔ dú anvɛmɛ̀n-frɛ́n mɛ̀n, eci léyi wɔɛ́n ɔkpɔ̀cɔ-wrɔn lɔ edomɛ̀n nɔn, kruhú.

Piɛrɛ̀n kɛ dɔ́ ankà Ɔwɔ-cice-wɔn lɔ mɛ̀n

11Ɔmuhi ɔwrɔn léyi kɔrɛ̀ nɔn, ke sɩ́ cɔhɔ́ Piɛrɛ̀n mán Zhan ɛtɛ̀sɛ̀n nɔn, yɔ lɔ fɛn léyi yɔ dú anvɛmɛ̀n-frɛ́n mɛ̀n nɔn, yɔ srɛ́ hɔ́n Piɛrɛ̀n mán Zhan ɛtɛ̀sɛ̀n, ɛyri léyi ye bi “Salomɔn Levri” Ɔwɔ-cice-wɔn lɔ mɛ̀n. 12Ɛnvra léyi Piɛrɛ̀n kán ndɔ lɔ, nɛ dɔ́ fɛcüè le: “Izraɛlɛ̀n-bɔ̀, cɛci kruhú kɛ anvɛmɛ̀n kɛ frɛ́n nyɛ̀n ɔwrɔn ndɔ lɔ n'ɔkɔrɛ̀ lɔ kruhúɛ? Cɛci kruhú kɛ nyɛ nyan bɔ̀, kɛ hán le, bɔ́ ɛkɔrɛ̀srɔn mɛ̀n mán b'Ɔwɔ tɛ̀sɛ̀n dù de hán ɔwrɔn ndɔ lɔ nán esù nɛ́n? 13Abrahamɛ̀n, Izaakɛ̀n, Zhakɔbɛ̀n mán bɔ́ nancüì hɔ̀n Wɔ, yé n'eci-bɩtan-wrɔn Zhezü ci-zrɔ lɔ. Nyɛ́n dùku, nyɛ́n bɩ́ nɛ̀n nyɛ́n tán ɛyri-ẅɛn-bɔ̀, kɩ nyɛ́n kɔ́n nɛ̀n nyɛ́n ze Pilatɛ̀n zìwú, tɛ́n Pilatɛ̀n wá kè teze nɛ̀n. 14Nyɛ́n kɔ́n nɛ́n, léyi nɛ̀n dú prɔnprɔn mán ɛnyrɔnnan mɛ̀n nɔn nyɛ́n ze, kɩ nyɛ́n cüɛ̀n le ye teze nɛ́n léyi nɛ̀n dú ɔwrɔn-wri-wrɔn nɔn. 15Ɔmu lɔ de nyɛ́n hán ɛwúvà nɛ́n zi nwù nɔn. Tɛ́n Ɔwɔ bɩ́ nɛ̀n sɩ́ ɔkɔrɛ-bɔ̀ mɛ̀n, kɩ bɔ́ dú nɛ́n dalɛfuɛ-di-bɔ̀. 16Zhezü bi lɔ, n'ɛkɔrɛ̀-srɔn mán n'ankaẅì-bùtan ẅɛ̀n, de tán ɔwrɔn ndɔ léyi nyɛ kàn, hɩ nyɛ́n nyrì nɔn, ecüì. Ankaẅì-bùtan léyi nɛ̀n ẅɛn Zhezü wú nɔn, de tán nɛ̀n ɔkɔrɛ̀ léyi nyɛ lɛ fɛn nyɛ kàn nɔn.

17Tɛ́n, anwrɔn-nɛ́n-muan-ẅì hɔ̀n, mɛ̀n nyrí ɔmu le, nyɛ́n mán ny'ɛcüìcüì-bɔ̀ mɛhi nyɛ́n di ɔbrɔ̀sà Zhezü tɛ̀sɛ̀n. 18Tɛ́n Ɔwɔ hán eci lɔ sá nmù, hán hɩ le nɛ̀n tán Ɔwɔ-mùanwú-ankà-dɔ́-bɔ̀, dɔ́ ɛnbìɛhɛ́n; nɛ́n dɔ̀ le n'Ebɩ̀die-wrɔn lɔ kɛ lɛ kán ɛgbàn. 19Nyɛ́n crɔn ny'ɛci-hán-ci, ô nyɛ́n crɛ ezì nyɛ́n kɛ́n Ɔwɔ, ô nɛ̀n jru ny'ɛgbàn hɔ̀n lɔ. 20Zɛtɛn Ɛẅɛnwrɔn kɛ lɛ hán ɔwrɔncüe vra kɛ lɛ và kɩ ne le yüre nyɛ̀n Zhezü, Ebɩ̀die-wrɔn léyi nɛ́n gɔ̀ mrɛ́n nɛ́n bɩ nɛ̀n hɛ́n nyɛ̀n hán nɔn. 21Zɛtɛ̀ vra lɔ, ke ji le Zhezü kɛ yɛ́ anhobɩ́ hàn kɩ kɛ cɔ́ ɛnvra léyi eci lɔ fɛn kɛ lɛ crɔn owrù, hán ɔmu le Ɔwɔ gɔ́ dɔ́ Ɔwɔ-mùanwú-ankà-dɔ́-bɔ̀ prɔnprɔn hɔ̀n mùan mɛ̀n ɛnvra sheshemɛ̀n hàn hɛ́n nɔn. 22Annànwɔrɛ mɛ̀n lɔ Mohizɛ̀n dɔ̀ le: ‘Ɛẅɛnwrɔn ny'Ɔwɔ ke le yüre nyɛ̀n n'Ɔwɔ-mùanwú-ankà-dɔ́-wrɔn tɔ̀n kɛ lɛ hán mɛ̀n hɔ́, kɩ ne le dú nyɛ́n fɛcüè mɛ̀n wrɔn tɔ̀n. Ankà hɔ̀n lɔ fɛn léyi nɛ lɛ dɔ́ nyɛ̀n nɔn, nyɛ́n die nukùɛ. 23Ɔwrɔn totɔtɔ̀n léyi ke sɩ̀ die Ɔwɔ-mùanwú-ankà-dɔ́-wrɔn ndɔ lɔ nukùɛ nɔn, yɛ lɛ mrɛ́n nɛ̀n Ɔwɔ fɛcüè mɛ̀n yɛ sɔhɔ́ kɩ ye le wrí nɛ̀n.’ 24Kɩ Ɔwɔ-mùanwú-ankà-dɔ́-bɔ̀ léyi dɔ́ ankà, bukru Samüɛlɛ̀n vra, yɔ lɛ fɛn, ɔwrɔn zrizri dɔ́ ɛnbì hɔ̀n lɔ y'ankà. 25Ɔmùan-wá léyi Ɔwɔ tán Ɔwɔ-mùanwú-ankà-dɔ́-bɔ̀ nɔn, dú nyɛ tɛn, kɩ nyɛ́n mán nyɛ́n dú mìrɛ̀n wrù léyi Ɔwɔ mán nyɛ́n nancüì hɔ̀n wá ɔmùan nɔn n'ɛmɛ̀n, ɛnvra léyi nɛ̀n dɔ́ Abrahamɛ̀n le: ‘Ɛmɛ̀n hɔ̀n lɔ fɛn léyi dú ɛnhibù wú nɔn, kɛ lɛ cɔ́ m'ɛnshifù ke le dú v'ɛmɛẅi-bɔ̀ yri kɛ̀ và.’ 26Zɛtɛn, ɔmu lɔ de, Ɔwɔ hán n'eci-bɩ̀tan-wrɔn gɔ́ srɔ nyɛ̀n ɛmɛ̀n, nɛ̀n hán yi và, ô kè fú nyɛ̀n ɛnshi, kɛ̀ mrɛ́n Ɔwrɔn wrɔn n'eci-gbàngbàn-hán tɛ̀sɛ̀n kɛ̀ sɔhɔ́.”

Currently Selected:

Ɔkɔ̀hɔ̀n-wá-bɔ̀ kɔ̀hɔ̀n hán 3: ƐAA03

Highlight

Copy