San Marcos 9

1Pa yit'esh shita ja Jesús:

—Yijô ti jayeetshelh'a, ti caaj japi yi'nee jôjjeclay ch'apaey'in pa ca lhavafia ti p'alha ti yi'van jayu ja t'unaj ja lhanvacleyash ja Dios ti namjooy.

Tanu'jam pa t'aisiyash pa Jesús

(Mt 17.1-13; Lc 9.28-36)

2Nôjeshch'e cava ve'lhayama nalhus, pa yaôychi ja Jesús ja Pedro, ja Jacobo shi' ja Juan tsi'sha ti tanaôychielhey lhja ujquishaam utiyuc. Pa lhech'e ti tanu'jamc'oya pa t'aisiyash.*xm* 3Java t'uyjatshiyis ja Jesús yalhatajesh ti nôcshisha'ne jum, jô'tajesh ti climsha'ne, nilhjunashajulh papu ti yiclimiyantaj pava vat'uyjatshiyis yiey na cotsjaat. 4Pa nameyshicham pa Elías shi' pa Moisés, pa tasinôyelhsha'ne ja Jesús. 5Pa yit'esha ja Pedro ja Jesús: #9.2-7 2 P 1.17-18.

—Vanqu'eyjatsjan, ¡istajeshnee jum! Anu'jelhyiyaam ca yisnatshelh pava pu'jana jpôyjey, ve'lhataja pa ca ajpôyich'aesh, paelh lhajpôyichtaja na Moisés, pa ve'lhataja pa lhajpôyich'a yitsha na Elías.

6Teya ti yistan'in pa ca niteesh ja Pedro, pa yalha t'ônash'in tamp'oyem'apee pa nich'eesh ti yi'van. 7Pa yalhatajesh ti nameyshicham ts'ivee lhpa vôse' vanajulhjat'apee jum japi lhech, pa lhechesh pa tavaysham pa vat'ôjôj ti yit'esh: “Nôque Yaôs yenach; lhech nôque ach'anelha.”#9.7 Mt 3.17; Mr 11.11; Lc 3.22.

8Pa meelh ti tpôytajchishamch'e japi t'eyjatsjanjas pa yalhatajesh ti vômji' japi nachtajey, pa vooy ja Jesús ve'lha ti yi'van ts'ivee.

9Meelh ti tay'apee ts'ivee lhja utiyuc, pa yit'esha ja Jesús ti yiyôjaa japi t'eyjatsjanjas ca ya aj ca nanfacleem cum papu pavan tavanch'ayesh, ca voya ca ne'tajchisham shta ca nivaftaj na Nivacle Lhô'sesh. 10Yuesha jum japi t'eyjatsjanjas ti ninanfac ts'ivee pavan tavanchayesh, jô'lhaa ti yit'eshvatsham'in, ¿she t'e papi lhech nitshamc'oya jayu papi vafsha'ne? 11Pa jaalhpa niyôsesh ts'ivee ja Jesús pa yit'esh:

—¿Ta t'e lhayaash ti yit'esh japi vanqu'eyjatsjanesh pava lhfanishlhavach ca nivatjutsa pa Elías ca ninatshicham shta?*xñ* #9.11 Mal 4.5; Mt 11.14.

12Pa yicuulh ja Jesús japi t'eyjatsjanjas pa yit'esh:

—Yijô' ti vatjutsa' jayu ja Elías ca ninatshicham shta ca nasclanvatich'e lhacôm'a nava matas. ¿Pa ta t'e lhjunash ti chiyi'sesh'e cavôque ti yit'esh? Chiyclôyit jayu jum na Nivacle Lhô'sesh, jô'tajesh ti tancôntay jayu jum. 13Taj ti jayeetshelhaam jayu nôqueesh:

—Ja Elías apis ti tapec pa yisnatshelh lhacôm'a jan t'ônash nava Vani'sesh'e ti vaclan jayu.

Pa Jesús yivatsjanchat pa nich'ayech yi'shi' pa tsich'e'

(Mt 17.14-21; Lc 9.37-43)

14Meelh ti vapecley ts'ivee jap'elh t'eyjatsjanjas, pa yivaneylhavc'oya japi acloj nivacle shi' japi vanqu'eyjatsjanesh pava lhfanishlhavach, ti tavayeshvanôcji ts'ivee. 15Meelh ti yivanjulh japi nivacle ja Jesús pa nishamesh pa yichjuulh pa yicju'vatam. 16Pa niyôsesh ja Jesús pa yit'esh:

—¿She pa lhasinôquielh napi yeyjatsjanjas?

17Ve'lha ja nivacle yiculhch'e ja Jesús pa yit'esh:

—Vanqu'eyjatsjan, janchajtaj'ay na yaôs yi'shi' pa tsich'e' ti yiclishaclaycheyan. 18Meelh ti nachesh'in pa lhjunashesh pan yicôvfachi pa yôôtjateshaan cotsjaat, pa tôlhch'een lhashi cava lhsatuc, jô'tajesh nava lhtsevte ti c'oosc'ossham, pa jaalhpa yivômjat'een. Pa jayôjitajesha napi eyjatsjanjas ca nisa'semfach'ee, taj ti nintô'yish ts'ivee.

19Pa yit'esh ja Jesús:

—Jay, napi nivacle, acacujanjaselh na t'ôyiy, ¿ta t'e ca yaplhuach'e ca yamônlheelh'ajop? ¿Ta t'e ca yaplhuaeshch'e shta ca nasclôyelh'ash? Anchajeelhyiy na nôctech.

20Pa nichajey ts'ivee ja nôctech. Meelh ti yi'van pa tsich'e' ja Jesús pa t'acum'e ja nôctech ti yôôtjatesha cotsjaat, pa vanc'ocjoqu'een cotsjaat pa tôlhch'e lhashi java lhsatuc. 21Pa niyôsesh ja Jesús ja lhtata:

—¿Ta t'elhesh ti vaclanesh na lhjunash? Pa yicuulh ja lhtata:

—Tôlhesh'e ti taôvclaj; 22aclôjesh shita ti yu'tajsham pa itôj shi' pa yinôôt nicôvômjayutajesh. Ca natôôytajesh pa ats'efenesh, istaa ca acavts'aclashelh'yi.

23Pa yit'esha ja Jesús jô lhech:

—Ca istajajop'am ca na acacujantaja, lhayaash ti ampa ca saseemjop papu ti ninatcacujan.

24Pa yisitsenesh ja lhtata ja nôctech:

—¡Niycacujan; taj ti ats'efenesh ca ashjatyam pa niycacujayasha!

25Meelh ti yivanjulh ja Jesús ti acloj jayu jum japi nivacle, pa yiyôjaa pa tsich'e' pa yit'esh:

—Tsich'e' clishaclayech, jô'tajesh ti peeychelhôj, c'ayôjaeyshi ca ayshi nôque, pa ya aj ca atpecley pa cat'e'lheesh.

26Pa tsich'e' nayu'jiin ja nôctech pa jaspa yichfach'ee. Lhan'e ja nôctech tsôyits'ee lhayyasha papu ti vaf, lhe'naa ti yit'esha japi acloj nivacle ca nivaf. 27Lhan'e ja Jesús t'acum'e lhpôcôt ja nôctech pa yinenjatchisham, pa issha'ne shita.

28Meelh ti yamey ts'ivee ja lhajpôyich pa vi'sesh ts'ivee ja Jesús pa niyôs japi t'eyjatsjanjas pa yit'esh:

—¿Ta t'e lhayaash ti ninôstôyeshelh ca yisaselhfach'ee pa lhech tsich'e'?

29Pa yit'esh ja Jesús:

—Pa lhech lhjunash tsich'e' ampa caelhchaa ca chinsaseshfach'ee, ve'lha pa vat'alhjayash shi' pa vat'ayipcuyash.

Pa Jesús yachajeyc'oya shta ti nifac pa lhavafi

(Mt 17.22-23; Lc 9.43-45)

30Pa lhech tôlh'e ti yichvatich'e shta, t'ôtaych'e ja cotsjaat Galilea; jô'lhaa ti ninteesh ca nitôôysha papu. 31Eem ti yeyjatsjan japi t'eyjatsjanjas pa yit'esh:

—Na Nivacle Lhô'sesh chiyjutey papi nivacle ca niclôn; taj ti pu'jana jayu pava nalhus ca nivaf pa nineetsham shta. 32Japi lhech nintôyc'oya pan yich'e' pava lhclishay, taj ti yifunsha ca niyôsesh.

¿She t'e papi ya'shesh pa lhjunash?

(Mt 18.1-5; Lc 9.46-48)

33Pa yamey ts'ivee ja yitsaat Capernaum. Meelh ti yie' ts'ivee ja lhajpôyich pa niyôsesh ja Jesús:

—¿She t'e pa lhasinôquielh nalhche ti shtanach'e na nôyish?

34Lhan'e pa nincuulh ts'ivee, lhayaash ti taniyôstajesh ts'ivee papu ca nôv'e' ca na'shesh pa ca lhjunasha.*xo* 35Pa yi'sha'ne ja Jesús pa tôney japi doce t'eyjatsjanjas pa yiyôjaa:

—Papu ca niteetajesh ca naashtajesh pa ca lhjunasha, istaa ca lhancavoaesh.#9.34 Lc 22.24.,#9.35 Mt 20.26-27; 23.11; Mr 10.43-44; Lc 22.26.

36Pa t'acum'e ja taôvclaj pa yieshi lhcachi'vat pa yechepjalh pa yit'esha:

37—Papi ti yaychavalhey ca yey ti t'acuumjulh pa taôvclaj, pa lhech lhavaatsha ti t'acuumyijulh; papu ti t'acuumyijulh, niyave'lhaa ca natcuumyijulh, t'acuumjulh shta jan tsichenshicham.#9.37 Mt 10.40; Lc 10.16; Jn 13.20.

Papu ca nishincônitshitaja, pa shtantsôt'ajesh jayu

(Mt 10.42; Lc 9.49-50)

38Pa yicuulh ja Juan pa yit'esh:

—Vanqu'eyjatsjan, javanelh ja ve'lha nivacle ja nishtatanôycheelhsha'ne ti netônjop ti yisasfach'ee pava tsich'es; pa teya ti nishtatanôycheelhsha'ne pa niyvashanelhem.

39Lhan'e ja Jesús pa yit'esh:

—Ya aj ca acônitsheeshelh; lhayaash ti papu ti tsetônjop pa lhfanishesh pa ninvôôtôyesh, pa lhech sasemjop jayu ca nitsasinôquiesh pa niysa'. 40Papu ca nishincônitshitaja pa shtantsôt'ajesh jayu.*xr* 41Papu ca nijutajeshelh'ay pa tacfeey pa yinôôt, lhayaash ti natsôt'ajelhshi na Cristo, yijô' ti jayeetshelh'a: pa lhech ameemc'oya jayu pa lhasha'.#9.40 Mt 12.30; Lc 11.23.,#9.41 Mt 10.42.

Suyey ca chivancafaycutesh pa sasch'e

(Mt 18.6-9; Lc 17.1-20)

42“Papu ti yifaycuta pa sasch'e pa taôvclaj pa ninascacutaj, pa lhech tajulhtajey ca chinôcfeesh lha'vo' lhpa uj utej, ca chinuesham pa lhjôvcha. 43Ca iyaaa lhôn na apôcôt pa sasch'e, pa at'ovôsey. Tajulhtajey'am jôcl'esh ca at'ucashic'oya ca amey pa vatmônlhajayash ôyjôlhôyech, ojeytaj ca ampunat nava apôcôtôy ca amey pa itôj tan ca nimac pa cat'e'lheesh.*xt* 44Pan yie' pa ninvaf'e pava tinvos, pa ninmaqu'e shta pa itôj. 45Ca iyaaa lhôn na afo' pa sasch'e, pa at'ovôsey. Tajulhtajey'am jôcl'esh ca ancoc'aeshjop ca amey pa vatmônlhajayash ôyjôlhôyech, ojey ca napuaam nava afoc ca chinu'jam pa itôj tan ca nimac pa cat'e'lheesh. 46Pan yie' pa ninvaf'e pava tinvos, pa ninmaqu'e shta pa itôj. 47Ca nafaycutaja pa sasch'e lha atôsej, pa anclanshi. Tajulhtajey'am jôcl'esh ca ve'lhaa lha atôsej ca amey ja Dios lhanvacleyash, ojeytaj ca napuaam nava atôsjey ca chinu'jam pa itôj.*xu* 48Pan yie' pa ninvaf'e pava tinvos, pa ninmaqu'e shta pa itôj.#9.43 Mt 5.30.,#9.47 Mt 5.29.,#9.48 Is 66.24.

49“Lhayaash ti nucat'esha'ne jayu lhacôm'a pa itôj, lhacôm'a pava vatcufayjatesesh nucat'esha'ne jayu pa tsifoni. 50Is pa tsifoni; lhan'e vitsha ca nivôômtajshi pa t'acô', ¿ta t'e ca lhanfanashtaja ca jaspa nucatshi shta? Anelh'atshi pa tsifoni, pa atan'ateelhsha'ne a'lhacôm'aelh.#9.50 Mt 5.13; Lc 14.34-35.

Pa Jesús vanqu'eyjatsjanesh pa lhjunash papu ti nivôncavômjatsutaj

(Mt 19.1-12; Lc 16.18)

Currently Selected:

San Marcos 9: NIVA

Highlight

Copy