San Marcos 4
4
1Pa yachajeyc'oya shta ti vanqu'eyjatsjan'e lhavôôj ja lhjôvcha ja Jesús. Pa lhech tc'aesh'eva'ne japi acloj nivacle, pa lhe'naa ca nôvjijop lhja lhôvjatshi. Pa lhech yie'jop ti yeyjatsjan japi nivacle, pa lhacôm'a japi nivacle ti yie' lhavôôj ja lhjôvcha. 2Pa lhechesh pa vanqu'eyjatsjanesh ja Jesús java acloj yovalheyjop atesha vatjunash, pa yit'esha:
3—“Ach'anshelhyi navôque: Ve'lha pa nivacle tcôvjiyanjan. 4Meelh ti yuqu'e pa nivacle pava lhcôvjiyanchey pa caaj pava natshisha'ne pa nôyish; pa namey pava ajôclôs pa tujqu'e'.*xñ* 5Vooy pav'elh lhtôsjey natshisha'ne pa yie' pa utechat; pava lhech tôôlh tatsha, lhayaash ti clasim'eshch'e pa cotsjaat. 6Taj ti meelh ti cusey na jumcuclaay pa yiclôn tatsha, lhayaash ti nitoseeyshisha'ne pava lhfetatsiy. 7Vooy pav'elh lhtôsjey natshisha'ne lhcaavju lhpa c'utjaniyuc pa tôlheelhvatjulh, taj ti yaash lhpa c'utjaniyuc ti yivômjat pava chicôvjiyantaj, pa clet'e ca nitaay. 8Pav'elh lhtôsjey nat'esha'ne pa is'e cotsjaat. Pava lhech tôôlh tatsha, vacalh jum shta; tô'lha lhpa ve'lha lhtôsej pava treinta, ja't'ajesha pava sesenta, jech jô'tajesh ti yameyshi pava cien lhay ti tô'lha lhpa ve'lha lhtôsej.” #4.1 Lc 5.1-3.
9Pa lhechesh pa yit'esh:
—“Papi caajem pava lhacfey, pa nach'anch'e cavôque.”
Ca chinôfiis pa lhjunash pava chiyovalheyjop atesha
(Mt 13.10-17; Lc 8.9-10)
10Meelh ti ve'lha ja Jesús pa tac'uya japi doce t'eyjatsjanjas pa niyôsesh'in pan yich'e' pava yovalheyjop atesha pa nivacle tcôvjiyanjan. 11Pa yicuulh ja Jesús pa yit'esh:
—“Vooy avaatsheelh natôyjatelha ja Dios pava t'astayesha ja lhanvacleyash; vooy papi yi'fach'ee chiyit'eshe'ma yitsha java chiyovalhe'meyjop atesha. 12Lha'ma ca nivan ts'ivee taj ti lhjunashjulh ti ninantôfa'clesh. Lha'ma ca nach'ana taj ti tanca nitôyc'oya, pa jaspa tanca nitatvaych'aclaj, pa tanca chinvômjatemch'e pa lhsasch'e.”#4.12 Is 6.9-10.
Pa Jesús yashinitjat ti chiyovalheyjop papu tcôvjiyanjan
(Mt 13.18-23; Lc 8.11-15)
13Pa yit'esh shta ja Jesús:
—¿Ninatôyelhc'oya ca jovalheyjop atesha pa tcôvjiyanjan? ¿Pa ta lhjunash jayu ca natôyelhc'oya cav'elhcha ya'clishay ti chiyovalheyjop atesha? 14Papu ti yuqu'e pava vatcôvjiyanchey lhech papu ti nifac cava Dios lhasinôc. 15Pava ti natshisha'ne pa nôyish: lhech papu ti chinfactajemch'e cava Dios lhasinôc, pa nam tatsha pa tsich'e' pa yayjatshi pava lhcachic cava Dios lhasinôc. 16Pava lhtôsjey nat'esha'ne pa utechat: cavôque lhjunash papu ti yivanjop'inlhataj cava Dios lhasinôc, 17niiy'eesh jô ca nit'unesh'in, lhayaash ti naaclojach'e pava lhfetatsiy; meelh ti vaclan pa vatacshinjayash, ja't'ajesha ti vaclan pa lhancôntayashesh cava Dios lhasinôc, pa nicôt'esha'ne papu lhech. 18Pav'elh lhtôsjey natshisha'ne lhcaavju pa c'utjanichat: lhech lhjunash papi nivacle ti tach'anch'e atesha cava Dios lhasinôc, 19taj ti ujesh ti yaychavalhaan nava yie' na cotsjaat, nan lhjunash papu ti yen jum ca acôjeshiin nava matas yie' na cotsjaat ti chincu'tajesh, pa yamja shta pava sasch'esha'ne ti yen. Lhech cavôque ti yip'oemey cava Dios lhasinôc, pa nôque lhjunash ti nintaay. 20Vooy pava nat'esha'ne pa is'e cotsjaat, lhech lhjunash papi nivacle ti tach'anch'e jum, jô'tajesh ti t'ujanesh cava Dios lhasinôc, papi lhech taay jum. Papi lhech lhjunashjulh ti tô'lha lhpa ve'lha lhtôsej pava treinta, ja't'ajesha sesenta, ja't'ajesha pava cien'esh ti ya'shesh.
Pa chiyovalheyjop lhpa itôtaj
(Lc 8.16-18)
21Pa lhechesh pa yit'esh:
—“¿Istajjop ajalh ca chinesh'ôcji lhpa itôtaj pa tô'lhôs, ja't'ajesha shta ca chinan'ôcji pa vatmôjôvat? Am, vooy lhja t'ajuya ti chiyan'apee ti chiytujatey.*xp* 22Lhayaash ti ca nôv'e t'e pa ca chinfiich jum ca nichinôclita, yamsha ca nichits'isaaeshey ca nichintô'yaa.*xq* 23Papi caajem pava lhacfey, pa nach'anch'e cavôque.” #4.21 Mt 5.15; Lc 11.23.,#4.22 Mt 10.26; Lc 12.2.
24Pa lhechesh pa yit'esh:
—“Lhayaash cava lhech afanesheshelh pap'elh, lhech lhfaneshelh'ash jayu shta ja Dios. Pa chiyashjatelh'ape'aam jayu pava lhpe'yatajelh.*xr* 25Lhayaash papu ti caajem pa chijutey jayu shta paelh, lhan'e vitsha papi yi'tajjop pa tiqu'in, pa chinjôclesh jayu.”#4.24 Mt 7.2; Lc 6.38.,#4.25 Mt 13.12; 25.29; Lc 19.26.
Pa chiyovalheyjop atesha lhpa lhtôsej ti tôlhshi'
26Pa yit'esha shta ja Jesús:
—“Ja Dios lhanvacleyash lhjunashjulh pa nivacle ti yuqu'e pava lhcôvjiyanchey; 27Pa vapec pa yimô' pa nalhu pa netshaam, pa lhech lhjunashesh pava nalhus shi' pava tulhis, lhan'e pava yicôvjiyan pa viislhavach ti tôlhch'e' lhavaatsha jaalhpa uschishamch'e, lhan'e pa nivacle pa ninanchavaych'e ti tôlhshi'nishi. 28Lhech lhavaatsha na cotsjaat tô'lha ti yivaclhit pavan chiycôvjiyan; vatjutsa' ti vaclan pa lhanu', nijooylha pa lhavô, pa taay pa trigo. 29Meelh ti yôquen'e pava yicôvjiyan pa nivacle, pa yicheney tatsha papi yit'ovôsch'een, lhayaash ti lhapa yameyjop ti chiyt'ovôseshch'e.”#4.29 Jl 3.13.
Chiyovalheyjop atesha lhpa lhtôsej lhpa mostazayuc
(Mt 13.31-32; Lc 13.18-19)
30Yit'esh shta ja Jesús:
—¿She t'e pa ca shtajôney ca lhjunashajulh ja Dios lhanvacleyash, naô t'e shta pa ca shtovalheyjop? 31Lhjunashjulh lhpa lhtôsej lhôse lhpa mostazayuc; ti chiyu'e na cotsjaat lhpa lhech ya'sheshc'oya ti tiqu'in pav'elh lhtôsjey yiey na cotsjaat. 32C'oya ti chiyuqu'e pa tôlhshi' pa ya'sheshc'oya ti uj pav'elh chiycôvjiyan. Pa ya'shesh ti pitesch'e pava lht'oy pa jaalhpa namey pava ajôclôs pa tajpecleyshi pa lhajpec.”
Yiyô'yesh pa Jesús ti yichenesh pava yovalheyjop
(Mt 13.34-35)
33Pa nôque lhjunash java acloj yovalhe'meyjop'in japi nivacle ti yeyjatsjanesh cava Dios lhasinôc, pa jaalhpa yamjey ti yitôyc'oya japi lhech. 34Taj ti niama pa ti yovalhe'meyjop japi lhech nivacle ti yeyjatsjan, pa vooy ti vi'sesh japi t'eyjatsjanjas pa yinôôclhanitemch'e.
Pa Jesús yivômjatesh pa uj lhaviim shi' pava usch'e
(Mt 8.23-27; Lc 8.22-25)
35Jô lhech nalhu, meelh ti tulh'in, pa yit'esha japi t'eyjatsjanjas:
—Shnôquelheypacham na lhjôvcha.
36Pa lhechesh pa tayjop japi acloj nivacle, pa yichaajsham ja Jesús lhja lhôvjatshi lhjan yi'shi', shi' shta jav'elh vatôvjatshiyis tanaôycheeshelh. 37Pa yalhalhatajesh ti tanu' pa uj lhaviim, lhapa yam'apee lhja lhôvjatshi java usch'e. 38Lhan'e ja Jesús pa yiey lhacôôs lhja lhôvjatshi pa lhech yimô'e, t'ôsiyesh ja t'ôsivat. Pa nijovayshi japi lhech yieelhshi pa nijat'ôtsjan ts'ivee ti yit'esh:
—¡Vanqu'eyjatsjan! ¿Tajulhey'am t'e ca shtanyalhp'ojane?
39Pa lhechesh pa nijat'o ja Jesús pa netshaam pa yivômjatesh pa lhaviim; pa yiyôjaa shta ja yinôôt pa yit'esh:
—¡Ya aj ca avi'sheey! ¡Pa acano'a!
Pa vô'mesh tatsha pa lhaviim, pa is'in.
40Pa lhechesh pa yiyôjisham'in japi t'eyajtsjanjas pa yit'esh:
—¿Ta t'e lhayaash ti ujesh ti lhanjovayelhshi? ¿Ajunashelhjulh papi amem pa nilhcacujayasha?
41Lhan'e japi t'eyjatsjanjas pa uj ti nitôyiyjatesh pa yit'eshvatsham'in:
—¿She t'e na nôque ti niqu'eshamem na lhaviim shi' na yinôôt?
Pa nivacle Gadara lhavo' yi'shi' pa tsich'e'
(Mt 8.28-34; Lc 8.26-39)
Currently Selected:
San Marcos 4: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.
