San Mateo 9

1Pa lhechesh pa yitshaam ja Jesús lhja vatôvjatshi pa vapecleypacham ja lhjôvcha, pa yamey ja lhavtsaat. 2Pa lhech'e ti chinchajey ja ve'lha nivacle ancoqu'esh, chiyijon'apee ja lhmojôvat. Meelh ti yi'van ja Jesús pa nilhcacujayasha japu lhech, pa yit'esha ja ancooc:

—Anshamyish, yaôs; chiyvômjach'eam nava asasch'e.

3Pa lhechesh pa lhcachi'shi ti yaychavalhey japi napu' vanqu'eyjatsjanesh pava lhfanishlhavach ti yit'esh: “Nôque nivacle tasinôy'in lhjuyjafaesh pa Dios.” 4Taj ti yitô'yish ja Jesús pava lhaychavalhjanôc, pa yit'esha:

—¿Ta lhayaash ti lhaychavalhelhey pa niysa'? 5¿She t'e pa ninatvijataych'e ca chinteetsha: “Chiyvômjach'eam pava asasch'e”, ja't'ajesha ca chinteetsha: “Aneetsham ca mo'”? 6Jaspa natô'yelha na Nivacle Lhaôs ti caajem pa t'unajjop napi yie' na cotsjaat ti yivômjach'e pava lhsasch'e.

Pa lhechesh pa yit'esha ja ancooc:

—Aneetsham, ca acum'ôcji na amojôvat ca mapecley pa ajpôyich.

7Pa lhechesh pa nitshaam ja ancooc pa vapecley pa lhajpôyich. 8Meelh ti yi'van japi nivacle cavôque pa nijovayvatsham'in, pa yôclôj pa Dios, lhayaash ti yijutey japi nivacle pa t'unaj.

Pa Jesús tôney pa Mateo

(Mr 2.13-17; Lc 5.33-39)

9Pa yich ja Jesús, pa yi'van ja nivacle lhey Mateo. Yie'sha'ne jan yie'in ja yivoyanesh pava lhpesoc pa lhcaanvacle, pa yit'esha ja Jesús:

—Atatvoyich'e.

Pa lhechesh pa nitshaam ja Mateo pa voqu'e ja Jesús.

10Ja Jesús yitsavalheyshi ja jpôyich pa yich'esha'nejop ti t'ajuy'apee ja vatsaccunjavat. Yielhch'esha'ne shta japi acloj yivoyanesh pava lhpesoc pa lhcaanvacle, japi sasch'e lhavos shi' japi t'eyjatsjanjas. 11Meelh ti yi'van cavôque japi fariseos, pa yit'esha japi t'eyjatsjanjas ti niyôsesh:

—¿Ta t'e lhayaash ti tsaccunelh na natsôtajeshelh vanqu'eyjatsjan napi yivoyanesh pava lhpesoc pa lhcaanvacle shi' napi sasch'e lhavos?#9.10-11 Lc 15.1-2

12Pa yipe'ya ja Jesús cavôque, pa yit'esha:

—Nisuyeeshemshi papi ampa can jumteey pa vatcafitatsi lhavo', vooy papi aôytes'in suyshemshi. 13Meelhey ca chineyjatsjaneshelh jan yit'esh ja Vanisesh'e: “Jayeetajesh ca acavts'aclayshelh jap'elh, taj ti niyit'esh ca astiseshelh pava acloyelh.” Ninamey papi yit'eshlhavne can vo'yeshch'e vooy papi sasch'e lhavos jayôney ca nitatvaych'aclajesh pa lhfanishlhavach.#9.13 Os 6.6; Mt 12.7.

Chiniyôsesh pa Jesús pa vat'ayipcuyash

(Mr 2.18-22; Lc 5.33-39)

14Pa lhechesh pa namey ja Jesús japi voqu'esha'neen ja Juan Vatnayjayash lhavo', pa niyôsesh ts'ivee:

—¿Ta t'e lhayaash yivaatsheelh shi' japi fariseos ti aclojesh ti jat'ayipcuyanelh, pa vooy napi eyjatsjanjas nint'ayipcuyan?

15Pa yit'esh ja Jesús ti yicuulh:

—Sasjop ca nitacshin'in papi chit'alheyjop pa vatajayayash, ti jôjjeclay mônlhajop pa nich'a tjayaay. Taj ti nam jayu pa nalhu ti tayjop pa nich'a tjayaay; pa lhecheesh pa isa'jop ca nit'ayipcuyansha'ne jayu.

16Ampapu can yô'yesh ca ney lhpa vat'uyjatshi lhac'utsja pa ve'lha t'iya pa sivôclôclhayeech nich'a jôjjeclay ni'napecsham; lhayaash ti yic'aseshch'e lhavôôj jayu ca chinantajey, pa yash'apey jayu pa lhc'asavash ca c'atsajeey. 17Pa ampapu ca nach'e pa nich'a ôtjayetas t'i' lhpa ftech lhac'utsja. Ca lhech lhôn lhfanisheesh ca nanch'e pa nich'a ôtjayetas t'i' nic'astajeshch'e lhpa ftech pa lhateshatajeesh, pa chiyapun lhpa ftech. Lhe'naa ca chinanch'e pa nich'a ôtjayetas t'i' lhpa nich'a ftech. Ti lhech lhanfanash cavôque napu' pa niisclanchematsej.

Lhpa lhôse pa Jairo, shi' lhpa ôcleclô ti t'ajaya lhpa t'uyjatshiy pa Jesús

(Mr 5.21-43; Lc 8.40-56)

18Meelh ti yit'esh ja Jesús cavôque, pa nam pa ve'lha judío lhanvacle pa t'acjatsuyshichamjop, pa yit'esha:

—Yujeey ca nivaf lhja yôse; taj ti ca amtajey pa an'apee nava apôcôtôy pa mônlhaa jayu.

19Pa nitshaam ja Jesús pa voelhch'e japi t'eyjatsjanjas jô lhech. 20Pa lhechesh lhja ve'lha ôcjeclô tayyashay, doce pava lhnincôpesesh ti yicôjôs'in ti tavoyey. Lhjô lhech tôlheyt'ôyiish ja Jesús pa t'ajaya pa yôj'esha'ne lhja t'uyjatshiy; 21lhayaash ti yaychavalhey ti yit'esh: “Ca jayajaytaja atesha lha t'uyjatshiy pa javatsjan jayu.” 22Pa yovalheylhtapee ja Jesús, pa yi'van lhja ôcleclô, pa yit'esha:

—Anshamesh, yôse; navatsjanchat na niacacujayasha.

Pa vatsjan tatsha lhô lhech.

23Meelh ti yamey ja Jesús ja lhajpôyich ja lhcaanvacle, pa yi'van japi yifuyuqu'e java vat'ônjanchey shi' japi tafshiyjop'in, 24pa yit'esha:

—Ayelh'ôcji nôque; ninvaf lha lhutsja, yimô' atesha.

Pa nicaaysiyuesh'in japu lhech. 25Meelh ti chiysaasfach'ee lhacôm'a japu lhech nivacle, pa yich'ôcji ja Jesús pa t'acum'e ja lhpôcôt lhja lhutsja, lhjô lhech pa nitshaam. 26Pa lhacôm'a jant'ajôôj japi yie' ja lhech'e cotsjaat ti tpeeycheyesh java vaclan'e.

Pa Jesús yilhjen papi napu' taclujuy

27Meelh ti yich ja Jesús pa voqu'eetsham japi napu' taclujuy, pa tônch'een ts'ivee pa yit'esh:

—¡Acavts'aclayelhyish, David Lhaôs!

28Meelh ti yich'ôcji ja Jesús ja jpôyich, pa yamey vitsha japi taclujuy. Pa lhechesh pa niyôsesh ja Jesús, pa yit'esh:

—¿Naascacueshelh ca lhech yifanisheelh'ash?

Pa yicuulh japi lhech:

—Jech, Lhcaanvacle.

29Pa lhechesh pa t'ajaya ja Jesús java lhtôsjey, pa yit'esh:

—Lhech yifanishelh'ash tôlh'ejop nava naacacujanshelh.

30Pa vatsjanesh java lhtôsjey. Pa yiyôjieshaan jum ja Jesús pa yit'esh:

—Ovalh naanfacle'lhem papu.

31Taj ti meelh ti yich'in, nifaclem tatsha ts'ivee japi yie' ja lhech'e cotsjaat java yisnatesh ja Jesús.

Pa Jesús yilhjen pa clishaclayech

32Meelh ti yich'in japu lhech, pa caaj jap'elh nivacle nicha'jey ja Jesús ja clishaclayech yi'shi' pa tsich'e'. 33Meelh ti yivaclhitesh ja Jesús pa tsich'e' ti yisaasfach'e, pa tasinôy jô lhech clishaclayechtaj. Pa yiqu'imjat japi nivacle pa yit'esh:

—Nive'lheeesh ca yivanelh cavôque ti yiey ja Israel.

34Taj ti yit'esh ts'ivee japi fariseos:

—Nôque nivacle yisaasfach'ee pava tsich'es tôlhesha pa t'unaj pa lhanvacle pava tsich'es.#9.34 Mt 10.25; 12.24; Mr 3.22; Lc 11.15.

Pa Jesús tcavts'aclayesh papi nivacle

35Yichey ts'ivee ja Jesús lhacôm'a java yitsates, pa vanqu'eyjatsjan'ôcji java lhavanqu'eyjatsjanjavtes. Pa vanqu'eyjatsjanesh pa lhanvacleyash pa Dios, pa yilhjensha'ne lhacôm'a japi aôytes'in.*xv* 36Meelh ti yi'van japi nivacle pa tcavts'aclayesh, lhayaash ti lhjunashjulh pava tashinshtas ti ampa ca lhavoeesh.*xw* 37Pa lhechesh pa yit'esha japi t'eyjatsjanjas: #9.35 Mt 4.23; Mr 1.39; Lc 4.44,#9.36 Nm 27.17; 1 R 22.17; 2 18.16; Jer 50.6-7; Ez 34.5; Zac 10.2; Mr 6.34.

—Yijô' ti jayeetshelhaam, ti uj na vatcavcalhech, taj ti napi vatcumjayash lhavos naacloja. 38Istaa ca aalhelha nan yitsôt'ajesh na vatcavcalhech jaspa nichensham pap'elh vatcumjat lhavos ca nayjatvane.#9.37-38 Luc 10.2

Pa Jesús vooy papi doce t'eyjatsjanjas

(Mr 3.13-19; Lc 6.12-16)

Currently Selected:

San Mateo 9: NIVA

Highlight

Copy