San Mateo 8

1Meelh ti tay'apee ja Jesús lhja utiyuc, pa tanaôycheelh japi aclôj nivacle. 2Pa lhechesh pa namey ja ve'lha nivacle tashtôtay, jô lhech t'acjatsuy'e t'ajuyish ja Jesús pa yit'esha ti t'a'lha:

—Lhcaanvacle, at'eshyiyaam ca atsilhjen.

3Pa lhechesh pa t'ajayesha ja Jesús ja lhpôcôt, pa yit'esha:

—Jech, jayeesh'am ti c'alhjen. Meelh ti yit'esh côque pa yivômjatesh tatsha pa lhashtôtaj. 4Pa yit'esha ja Jesús:

—Ovalh, naanfacleem papu; ve'lha ja vatcasinôesh meey ca atônôclitshem, pa acufayesh ca tayôjijanesh ca Moisés, jaspa nitôy'ash jayu pap'elh ti lhavatsjan.#8.4 Lv 14.1-32.

Pa Jesús yilhjen pa lhcavo pa lhcaanvacle Roma lhavo'

(Lc 7.1-10)

5Meelh ti yamey ja Jesús ja yitsaat Capernaum, pa lhechesh pa nam ja ve'lha lhcaanvacle, Roma lhavo'. Jô lhech yiyôjaa ja Jesús, 6pa yit'esha:

—Lhcaanvacle, caaj ja yicavo yijoôcji ja yijpôyich, ancoqu'esh pa uj ti yicloyit ja t'aôyteyash.

7Pa yit'esh ja Jesús:

—Jôquey jayu ca javatsjanchat.

8Pa yicuulh ja lhcaanvacle pa yit:esh:

—Lhcaanvacle, istaa ca ya aj na ca anach'ôcji ja yijpôyich, lhayaash ti ya am'ajulh; ayôjeey atesha pa nivatsjan jayu ja yicavo. 9Lhayaash yivaatsha ti yashichaam, yashyitapee jap'elh, vooy japi yicavos c'ash'apee. Ti jayôjia ja ve'lha, pa yich tatsha. Ti jayôney jeelh, pa nachyiy tatsha. Ti jayôjiesha ja yicavo pa ca nasnatesh pa yisnatesh tatsha.

10Meelh ti yipe'yeesh ja Jesús cavôque, pa yit'esha japi tanaôycheelh:

—Yijô', nôque uj nivatcacujayasha nich'aa ti ja'van, lhayaash niyvanesh pa cat'elheesh japi Israel lhcles. 11Jayeetshelhaam ti acloj jayu papi tôlhey na lhum'ôcjinuc shi' na nuutch'e, papi lhech yielhch'esha'ne ja Abraham, ja Isaac shi' ja Jacob ti tsaccunelh yiey ja lhanvacleyash ja Dios.*xp* 12Taj ti japi yitsôt'ajtajesh ja vatvacleyash chiysaseyfach'ee ja tulhitaj, pa lhech nôv'e' pa napvatsham'in pa niju'jeshvatjulh ca nit'ôyit pava lhtsevtey.#8.11 Lc 13.29.,#8.12 Mt 22.13; 25.30; Lc 13.28.

13Pa lhechesh pa yit'esha ja Jesús ja lhcaanvacle:

—Mapecley pa ajpôyich, pa lhavan jayu java naacacuesh.

Pa lhech t'aplhuqu'e ti vatsjan pa lhcavo.

Pa Jesús yilhjen lhpa lhcact'e pa Pedro

(Mr 1.29-31; Lc 4.38-39)

14Yichey ja Jesús ja lhajpôyich ja Pedro, pa yi'van lhja lhcact'e yijo'apee ja lhmôjôvat lhayaash ti tclôjtiy. 15Pa t'acum'e ja Jesús ja lhpôcôt pa shan tatsha pa lhclôjut. Lhjô lhech pa nitshaam pa t'acum'in.

Pa Jesús yilhjensha'ne papi acloj aôytes'in

(Mr 1.32-34; Lc 4.40-41)

16Meelh ti tulh'in, pa chinchajey'in ja Jesús japi acloj yi'shi' pava tsich'es. Pa tsi'sha ti yiyôjaa ja Jesús pa yichfach'eeen tatsha pava tsich'es. Pa yilhjenesha'ne shta lhacôm'a japi aôytes'in. 17Cavôque vaclan pa yôfisch'e jan t'ônash lhapesh pa chiytôyjata pava ti vaclan lhey Isaías, pa yit'esh: “Jô lhech t'acuumjelhyijulh java ninascont'aseshelh, pa tilhojelhyam java tsiaôytiyanelh'in yiyashaclelh.”#8.17 Is 51.4.

Papi yit'esh ti yôfiis pa Jesús

(Lc 9.57-62)

18Meelh ti yi'van ja Jesús ti tc'aeshva'ne japi acloj nivacle, pa yiyôjaa ca nôquelhey pacham ja lhjôvcha. 19Pa namey ja ve'lha vanqu'eyjatsjanesh pava lhfanishlhavach pa yit'esha ja Jesús:

—Lhcaanvacle, jayeesh ca javoach'esha'ne pa ca ajuytajshiin

20Pa yicuulh ja Jesús pa yit'esh:

—Java yo'nisic caaj pava lhavjoquey, java ajôclôs caaj pava lhupis, vooy na Nivacle Lhô'sesh tanca nicaajem pa ca nit'ô'siyesh pa ca nijo'taj'e.

21Vooy jeelh, tô'lha japi t'eyajtsjanjas, yit'esha:

—Lhcaanvacle, avashanyam cum ca jajutsjatey ca jôquey ca tata ca jatishc'oya.

22Pa yicuulh ja Jesús pa yit'esh:

—Atatvoyich'e, tajulhey ca nitishc'oya capi vafsha'ne capi lhavafjafas.

Pa Jesús yivômjatesh pa lhaviim shi' pava usch'e

(Mr 4.35-41; Lc 8.22-25)

23Pa lhechesh pa yitshaam ja Jesús lhja vatôvjatshi pa voqu'e' japi t'eyjatsjanjas. 24Pa yalhalhatajesh ti tanu' ja uj lhaviim, pa lhapa yamtaj'apeeen lhja lhôvjatshi java usch'e. Taj ti vooy ja Jesús yimô'ji. 25Pa lhechesh pa yichey japi t'eyjatsjanjas pa nijat'ôtsjan, pa yit'esha ts'ivee:

¡Lhcaanvacle, atsilhjenelh! ¡lhayaash ti shnôcjicham jayu!

26Pa yit'esha ja Jesús ti yicuulh:

—¿Ta lhayaash ti uj ti lhanjova'yelhshi? ¡Tiqu'in na niacacujayasheelh!

Pa lhechesh pa nitshaam ja Jesús pa yiyôjisham ja lhaviim shi' java usch'e; pa lhacôm'a ti vô'mesh pa cano. 27Pa tamp'oyeshem japi lhech nivacle, pa yit'esh ts'ivee:

—¿She t'e nôque nivacle, yiyôjisham na lhaviim shi' na yinôôt, pa nequ'ishamem?

Napu' papi Gadara lhavos yi'shi' pava tsich'es

(Mr 5.1-20; Lc 8.26-39)

28Meelh ti yamey ja Jesús ja cotsjaat pa lhey Galilea, yieypacham ja lhjôvcha, pa yalhalha ti tôlheyshi japi napu' nivacle java nivalhjey pa tacumajey ja Jesús. Japi lhech napu' yi'shi' pava tsich'es. Pa uj ti suyey, pa ampapu ca nuyey pa naashjop nôyish. 29Tônesh'in ts'ivee japi lhech pan yit'esh:

—¿Ta lhayaash ti lhnachelhyi Jesús, a Dios Lhaôs? ¿Lhnachnee t'e ca ascômclôquielh jôjjeclay jan t'aplhu?

30Tojey clee pa tac'ut'e pava acloj vojotas. 31Pa vatants'aclansha pava tsich'es ja Jesús ti niyôsesh ts'ivee, yit'esh:

—Ca assaastajelhfach'ee, pa avashanelhyam ca jayc'uyeelhsham nava vojotas.

32Pa lhechesh pa yit'esha ja Jesús:

—Alhunelh'in.

Pa lhechesh pa tayshi pava tsich'es japi napu' nivacle pa vat'iyshamsha'ne java vojotas. Lhan'e java vojotas pa t'ecletshamsha'ne ja tovôc pa yiyôlhp'ojisha'ne.

33Pa lhan'e japi yiclôvalhtaj java vojotas uj ti nijovayvatsham'in, pa vacumajey vatich'e. Meelh ti yamey ja yitsaat pa nifaclem pan lhjunash japi napu' nivacle yi'shi' pava tsich'es. 34Pa lhechesh pa yicheyvatich'e lhacôm'a japi yiey ja yitsaat jan yie' ja Jesús. Meelh ti yi'van ts'ivee cavôque, pa vatants'aclansha ja Jesús ca nitay'e ja lhcootsjat.

Pa Jesús yilhjen pa ancooc

(Mr 2.1-12; Lc 5.17-26)

Currently Selected:

San Mateo 8: NIVA

Highlight

Copy