San Mateo 7

1“Ya aj ca ivalhelha papu, jaspa tanca nivalhelh'a ja Dios. 2Lhayaash ti lhfanisheshelh'ajulh jayu ja Dios jan lhanfanash pap'elh, lhayaash cava lhech lhchenshelhjop ti t'atsjulheshelh pa'na chiycheneshelh'ajop jayu vitsha ca chinatsjuulhtaj'ashelh.*xg* 3¿Ta lhayaash ti lhovalhey pa shtôcle ti yi'shi' lhtôsej pa avelh, pa naavatvanesh vitsha lha jpôychiyte ti yi'shi' lha atôsej? 4¿Pa ta t'e lhayaash ti lhteetsha pa avelh: ‘Janclanshiam jayu na shtôcle yi'shi' lha atôsej', ca nicaajtaj'am lhpa jpôychiyte yi'shi' lha atôsej? 5¡Ajôtsôclônjanaj! ajutsjat ca anclanshi lha jpôychiyte yi'shi' lha atôsej, pa lhecheesh pa isa' ca ovalh'in ca anclantajemshi pa shtôcle yi'shi' lhtôsej pa avelh. #7.2 Mr 4.24.

6“Ya aj ca ajutelhey pava nuus pava lhasnôyjes, lhayaash ti tatvaych'aclajelh'ajulh pa naju'jelh jayu. Ya aj ca u'elheyshi pava vojotas pava vatinshey, lhayaash ti yoflitshisha'ne jayu ca nit'ôstajch'een.

Chit'a'lha, chivooy shi' ti chipôcô'jey pa lhashi

(Lc 11.9-13; 6.31)

7“A'lhelha, pa yijutelh'ay jayu ja Dios; avoolhey, pa lhavanelh jayu; apôcôjelhey pa lhashi, pa chincat'elhey'am jayu. 8Lhayaash papu ca nit'aalhtaja, pa chinjutey jayu; papu ca nivo'tajey, pa ni'van jayu; shi' papu ca nipôcôjtajey pa lhashi, pa chincat'emey jayu.#7.7-8 Dt 4.29; 2 Cr 15.2-15; Jer 29.13.

9“¿Caaj t'e avaatsheelh papi yijutem pa lhaôs lhpa utej ti t'aalhsha lhpa yucuve? 10¿Tam'ey ti yijutem t'e pa lhaôs pa tos ca nit'aalhtajesha pa sajech? 11Vooy avaatsheelh naaisiseelhsha'ne natôôyshelh ti lhjutelhey papi acleselh pa is, ¡yaashelh'atapee ja Atataelh yi'shi' ja vôôs ti yijutey jayu pava isis papi t'aalhshey!#7.7-11 Jn 14.13-14; 15.7,16; 16.23-24; 1 Jn 3.21-22; 5.14-15.

12“Lhech lhjunasha, yajatesh ca lhech afanisheeshelhem pap'elh pava lhteetshelh ca lhech lhfanisheeshelh'am jayu. Lhayaash ti lhech t'ônashelh'am java lhayôjijates ja Moisés shi' pava lhqu'isjayanjas capi chiytôyjata pava ti vaclan.#7.12 Lc 6.31.

Pa lhashi tsuysham

(Lc 13.24)

13“Uyelhey na lhashi tsuysham. Na lhashi c'atsajsham c'atsajch'e shta na nôyish t'ajuyey pa vatclôyitsjayash, acloj papi yuyey. 14Taj pa tsuysham lhashi tsuych'e shta pa nôyish t'ajuyey pa vatmônlhajayash, napu' papi yi'van.#7.13-14 Sal 1.6; Pr 4.18-19

Lhpa aacjiyuc tantôfacliyesha pava lhay

(Lc 6.43-44)

15“Anujumatsenelhjulh papi niyijôa ca chintôyjata pava ti vaclan. Papi lhech namelh'ay pa vanuyjach'e pava tashishtas, taj ti tasham pava jump'uvalhjetas. 16Avaatsheelh lhantôfaacshelha pava lhfanishlhavach. Tanca chintôlhesha pava higos lhpa clotach ti chinclanshi. 17Lhech lhjunash lhacôm'a pava isis aacjuy isis shta pava lhay. Vooy pava niysisa aacjuy niysisa shta pava lhay. 18Lhpa aacjiyuc is tanca lhayeesh pava niysisa. Vooy lhpa aacjiyuc niysa' tanca lhayeesh pava isis. 19Lhacôm'a pava aacjuy niysisa pava lhay chiyt'ôvôsch'e pa chiyu'jam jayu pa itôj.*xl* 20Pa lhech lhjunash lhantôfaacshelha jayu shta papu lhech pava lhfanishlhavach.#7.19 Mt 3.10; Lc 3.9.,#7.20 Mt 12.33.

Tanca lhacôm'aa ca namey jayu pa lhanvacleyash pa Dios

(Lc 13.25-27)

21“Tanca lhacôm'aa papi yit'eshyi: ‘Lhcaanvacle, Lhcaanvacle’, ca namey jayu ja lhanvacleyash ja Dios. Tsi'sha papi nequ'ishamesh pava yit'esh ja Tata yi'shi' ja vôôs. 22Ca namtaj jayu pa nijoolha nalhu, acloj jayu papi yit'esh'yi: ‘Lhcaanvacle, Lhcaanvacle, janfaclelhem jap'elh ca ey. Jetônelhjop ca ey ti jasaasshelhfach'ee pava tsich'es. Jetônelhjop shta ca ey ti jasnatshelh cava nimatasa papu ca nitô'yish.’ 23Pa lhechesh pa jayeesh jayu: ‘Ninôstôfa'clelh'ash; ayelhyijop, ti lhasnatshelh pa niysa'.’#7.23 Sal 6.8.

Pava napu' lhtascuy

24“Papi tach'anyi pa nequ'ishamesh java jayeetshem, pa lhech lhjunashjulh pa nivacle ti tcajôyshay ti yisnatesh pa lhajpôyich ti yan'e' lhpa utej. 25Nam pa tsha'nu, pa tanaychisham pava tovjôy; taj ti tanca naflit, lhayaash ti lhtatsuqu'esh lhpa utej. 26Taj ti vooy papi tach'anyi atesha pa ninanc'ashamesh java jayeetshem, pa lhech lhjunashjulh pa nivacle ti ninatcajôyshay ti yisnatesh pa lhajpôyich ti yan'esha'ne pa josôj. 27Nam pa tsha'nu, tanaychisham pava tovjôy pa tanu' pa lhaviim pa t'ajuyjulh pa jpôyich; pa lhechesh pa yafalh pa uj ti vôômja'ne.

28Meelh ti yivaclhitesh ja Jesús ti tasinôy, pa tamp'oyeshem japin yipe'ya cava vanqu'eyjatsjanesh; 29lhayaash ti yeyjatsjanesh jan lhjunash papu ti t'un'in, nilhjunashajulh japi vanqu'eyjatsjanesh java lhfanishlhavach.*xñ* #7.28-29 Mr 1.22; Lc 4.32.

Pa Jesús yivatsjanchat pa tashtôtay

(Mr 1.40-45; Lc 5.12-16)

Currently Selected:

San Mateo 7: NIVA

Highlight

Copy