San Mateo 28

1Meelh ti nôjeshch'e ca nalhu ti chit'ichayshi, pa nich'a nalhu lhja yameyc'oya, pa yichey lhja María Magdalena shi' lhôj'elh María ja nivalhech. 2Pa yalhalha ti ujesh ti nayuuynayuych'e na cotsjaat. Lhayaash ti nameyshicham ja ve'lha lh'ángel ja Lhcaanvacle, nachey ja nivalhech pa yayjat'e lhja utej, lhap'ot'esh ja nivalhech, pa yie'sha'ne. 3Pjumtsej lhavaatsha lhjunashjulh ja tachinshi, vooy lhja t'uyjatshiy uj ti clim. 4C'oya ti yi'van côque japi c'afoquelhay pa uj ti nijovayem pa ts'anananvatsham'in, pa nicôt'eshch'esha'ne pa vaf'e' ts'ivee. 5Pa lhechesh pa yit'esha ja ángel japi ôcjeclôy:

—Ya aj ca anjova'yelh'in. Tsitô'ya ti lhavoolhey ja Jesús jan chiyinesh lhja cruz. 6Ampa ca nôque nôv'e', apis ti nitshaam yiey jan yit'esh. Anachelhey ca avanelh yiey nan chiyantaj'e. 7Apôtsenelh ca mee'lhey, ca anfacle'lhem japi t'eyjatsjanjas ti apis ti nitshaamshi capi vafsha'ne, nôqueesh tatômjalhelhey'ac'oya jayu ja Galilea; pa lhech lhavanelh'e jayu. Navôque lhnasheesh ti janfaclelh'am nôqueesh.

8Pa lhechesh pa lhfanishlhavach'in ti tayjop japi ôcjeclôy ja nivalhech, pa nijovayshi taj ti uj ti nishamesh shta. Pa yifaclitey japi t'eyjatsjanjas ca nanfacleem cavôque. 9Meelh ti yichtaj'in pa tanôclitem ja Jesús pa yicju'. Pa tac'uya japu lhech ja Jesús ti t'acjatsuy'e t'ajuyish pa yechepjalh java lhcaclôy. 10Pa yit'esha ja Jesús:

—Ya aj ca anjova'yelh'in. Mee'lhey japi yivelhavot ca asfacle'lhem ca nôquey'in ja Galilea, pa lhech tsivan'e jayu.

Pava yit'esh'in papi c'afoquelhay

11Meelh ti yich'in japi ôcjeclôy, pa yichey japi napu' c'afoquelhay ja yitsaat pa nifaclem japi lhanvaclesesh japi vatcasinôc lhacôm'a java vaclan. 12Japi lhech lhanvaclesesh japi vatcasinôc yichey ti yasinôquielh japi nitaôvclaseesh lhanvaclesesh japi judíos pa yasinôquielh. Pa lhechesh pa yijutey java aclojqu'e pesoc japi c'afoquelhay, 13pa yit'esha ts'ivee:

—Istaa ca at'eshelh ti vooy ti tulhey pa t'acuteyshi japi t'eyjatsjanjas ca lhavu'vat ca Jesús, lhayaash ti lhamô'elhch'esha'ne. 14Ca nipe'yataj cavôque ja uj lhcaanvacle, pa jayasinôyshelh'am jayu jaspa tanca suyeelh'a.

15Pa lhechesh pa t'acuumjulh java pesoc japi c'afoquelhay pa yich'in pa yisnatesh jan lhjunash java chiyit'esha. Pa lhech lhjunash vitsha ti chaych'een japi judíos yamjey navoque nalhus.

Pa Jesús yiyôjaa papi t'eyjatsjanjas

(Mr 16.14-18; Lc 24.36-49; Jn 20.19-23)

16Pa lhechesh pa yichey japi once t'eyjatsjanjas lhja utiyuc yiey ja Galilea, lhja yetônemey ja Jesús.*xa* 17Meelh ti yi'van ja Jesús pa vanc'umaja cotsjaat. Vooy jap'elh yistan'in. 18Pa yamey ja Jesús japu lhech pa yit'esha: #28.16 Mt 26.32; Mr 14.28.

—Nijutyam ja Dios lhacôm'a na vat'unaj yiey ja vôôs yiey shta na cotsjaat. 19Istaa ca mee'lhey lhacôm'a java yie' japi nivacle pa asnatshelhyam papi yeyjatsjanjas; pa anajayanshelh ca etônelhjop ca lhey ja Vatata, na Vataôs shi' ja Espíritu Santo.*xb* 20Pa eyjatsjaneshelh ca nanc'ashamesh lhacôm'a java jayôjeeshelh'a avaatsheelh. Pa antôôyishelh ti yamônlhaelh'ajop jayu nava nalhus yamjey jayu jan yôj'e' pava nalhus. Amén. #29.19 Hch 1.8.

Currently Selected:

San Mateo 28: NIVA

Highlight

Copy