San Mateo 27

1Meelh ti claafnalhu, pa vatpeya'esha'ne lhacôm'a japi lhanvaclesesh japi vatcasinôc shi' japi nitaôvclaseesh lhanvacles japi judíos ca niclôn ja Jesús. 2Pa yôcfa' pa yicha'jey ja uj lhcaanvacle lhey Poncio Pilato.

Pa lhavafi pa Judas

3Meelh ti yi'van ja Judas, jan vanc'ôyanjaney ti chiyclôn jayu ja Jesús, pa uj ti tanôychat'in, pa yachajey pava treinta monedas japi vatcasinôc lhanvacles shi' japi nitaôvclaseesh lhanvaclesesh japi judíos,*xo* 4pa yit'esh: #27.3-8 Hch 1.18-19.

—Yivaatsha jasnatesh na yisasch'e, ti javanc'ôyanjaney na uj ti yivo'yeshch'e ti chiyiclôn jayu.

Pa yicuulh ts'ivee pa yit'esh:

—Taj ti istaa, tanca yalhecheelh, ¡vooy avaatsha natsôt'ajesh!

5Pa lhechesh pa yu'ôcji ja Judas pava pesoc ja uj vatishjanjavat, pa yich pa yôcfaôcji lhcôyish pa vaf.

6Japu lhech lhanvaclesesh japi vatcasinôc pa nit'ô'qu'e pava pesoc pa yit'esh ts'ivee:

—Sasjop ca shtaneyshi' navôque pesoc nava vatcufayjates, lhayaash ti lhasha' pava vatvoyey.

7Pa lhechesh pa vatpeya'esha'ne ca natcashaaysha pavôque pesoc pa lhcootsjat pa Tnôjque lhavo' jaspa nicaaj pa ca chintish'ec'oya jayu ca nivaftaj papi nijudiosa. 8Nôquen lhayaash yamey nôque nalhu ti chiyeytônesh nôque cotsjaat, Vatvoyey Lhcac'ovat. 9Pa nôque lhjunash pa yôfisch'e java yit'esh lhapesh pa nivacle chiytôyjata pava ti vaclan pa lhey Jeremías, yit'esh: “T'acum'e pava treinta monedas climsha'ne (pa yitsjuulhshijop pa tajôjqu'e japi Israel lhcles). 10Pavôque pesoc tcashayesha pa lhcootsjat pa Tnôjque lhavo', jan t'ônashesh ti niyôjieshyiy ja Lhcaanvacle.”#27.9-10 Zac 11.12-13.

Pa Jesús yie' t'ajuyish pa Pilato

(Mr 15.2-5; Lc 23.3-5; Jn 18.33-38)

11Chiychajey ja Jesús ja uj lhcaanvacle, jô lhech pa niyôsesh pa yit'esh:

—¿A lhech a lhcaanvacleesh napi judíos?

Pa yit'esh ja Jesús:

—Yijô', yiey can lhteesh.

12C'oya ti yinôôlhjanchatajesh ti tasinôyshem japi lhanvaclesesh japi vatcasinôc shi' japi nitaôvclaseesh lhanvaclesesh japi judíos ja Jesús, taj nits'iseey. 13Pa lhechesh pa yit'esh ja Pilato:

—¿Naape'ya lhacôm'a nava chiychayesh'a?

14Taj nits'iseey shta ja Jesús; pa tamp'oyem ja lhcaanvacle pa yistan'in.

Pa Jesús chitculhjanesh ca nivaf

(Mr 15.6-20; Lc 23.13-25; Jn 18.38—19.16)

15Ja lhcaanvacle yajatesh ti lhech lhfanshesh'in ti yamaan ja chivatc'usinatesh'in pa nuqueeshem'in pa ve'lha vanôôcfa, pan yen papi judíos ti chinuqueesh. 16Caaj ja ve'lha chiyôcfa' uj ti tanchayjay lhey Barrabás. 17C'oya ti tc'aeshva'ne japu lhech pa niyôsesham ja Pilato pa yit'esh:

—¿She papi lhenelh avaatsheelh ca chinuqueesh: ja Barrabás, ja't'ajesha na Jesús, lhanquey shta Cristo?

18Lhayaash ti yitô'ya lhavaatsha ti yijuctsenesh atesha, pa lhech tôlh'ejop ti vanôôcfa.

19Meelh ti yiesha'ne ja Pilato ja lhc'o'vat yiey jan tcaasclanchay'esha'neen, pa lhechesh pa yicheney ja ve'lha lhja lhch'acfa pa nifaclem pa yit'esh: “Istaa ca ya aj ca avujaeeshiin na nivacle yivo'yeshch'e, lhayaash ja tulh ti caaj ja yitsamat'esh na lhech, pa uj ti ts'ijovaych'e.”

20Lhan'e japi vatcasinôc lhanvacles shi' japi nitaôvclaseesh lhanvaclesesh japi judíos yimatsenshaan japi nivacle ca nit'a'lha ja Barrabás ca lhecha ca chinuqueesh, ca vo'ya ja Jesús ca chinclôn. 21Pa yachajeyc'oya ti niyôsesh ja lhcaanvacle, pa yit'esh:

—¿Ta yie' napuque napu' papi lhenelh avaatsheelh ca januqueesh yivaatsha?

Pa yit'esh ts'ivee:

—¡Vooy na Barrabás!

22Pa niyôsesham ja Pilato pa yit'esh:

—¿Ta ca yifanisheesh na Jesús, lhanquey shta Cristo?

Lhacôm'a ti yicuulh ts'ivee:

—¡Aclônesh'e lhpa cruz!

23Pa lhechesh pa yit'esh ja Pilato:

—¿She t'e pa yisnatesh nisa'?

Pa ve'lheshcum ti yisitsenesh ts'ivee pa yit'esh'in:

—¡Aclônesh'e lhpa cruz!

24Meelh ti yi'van ja Pilato ti sasemjop cavôque ti yisclantajch'e, lhayaash ti suy jum japi nivacle. Pa lhechesh pa tayôjijanesh pa yinôôt ca chinanchajeshey ca nôvesh'e t'ajuyish japi nivacle ca nivôômcôji, pa yit'esh:

—Vooy yivaatsha tanca nitôlh'yi na lhavafjayash nôque nivacle ninatmenlhavach vooy avaatsheelh tôlhelh'a.#27.24 Dt 21.6-9.

25Lhacôm'a japi tc'ava'ne ti yit'eshvatam:

—¡Istaa ca nitôlhelhyi yivaatsheelh shi' japi yicleselh na lhavafi!

26Pa lhechesh pa nuqueesh ja Pilato ja Barrabás; vooy ja Jesús chitayôjijanesh ca chinc'ôn'in, pa yiyôjeesha shta ca nesh lhpa cruz.

27Pa yivaclhitesh cavôque pa yichaajey japi lhc'afoquelhay ja lhcaanvacle ja Jesús ja jpôyich, pa tc'aesh'eva'ne shta jap'elh c'afoquelhay. 28Pa niclanshi lhja t'uyjatshiy pa yuyjach'e lhja ve'lha vat'uyjatshiy yuc. 29Pa yinesh ja lhshatech java cutjanis chiyiclôpjalhch'e, pa yicumjat'e ja lhfayishey lhpôcôt lhja sise. Pa lhechesh pa t'acjatsuy'e t'ajuyish pa yiclôqui, pa yit'esh ts'ivee:

—¡Mônlha na Lhanvacle napi judíos!

30Pa t'achiyaan shta, pa t'acu'mesh'e lhja sise pa yiclônesham lhshatech. 31Meelh ti yivaclhitesh ti yiclôqui ts'ivee, pa yayjach'e lhja vat'uyjatshiy yuc pa yuyjach'e shta lhjan t'uyjatshiy. Pa lhechesh pa yichaaj ca jaspa yiclônesh'e lhpa cruz.

Chiyclônesh'e lhpa cruz pa Jesús

(Mr 15.21-32; Lc 23.26-43; Jn 19.17-27)

32Meelh ti tayshi ja yitsaat, pa vacutesh ja ve'lha nivacle Cirene lhavo' lhey Simón; pa yiyôjeesha ts'ivee ca nitilhôjem ja Jesús lhja cruz.

33Pa lhechesh pa yamey ts'ivee pa yie' lhpa lhanquey Golgata, côque yich'e' Vatshatjes yie'. 34Lhech'e ti chiyijutajeshey ja Jesús ja ôtjayetas t'i' ca niyô'ji, chiyicshenjatesh pa t'apôôyshi. Pa yic'alhtantajshi ja Jesús pa ninteesh ca niyô'ji.

35Meelh ti yivaclhitesh ti yiclônesh'e lhja cruz, pa yicheneshjop pava vatqu'isjayanjas japi c'afoquelhay ti tanaatsjulhesh ts'ivee java t'uyjatshiyis ja Jesús. Pa nôque lhjunash pa yôfisch'e java yit'esh lhapesh pa chiytôyjata pava ti vaclan: ‘Tanaatsjulhesh ts'ivee java yuyjatshiyis, vooy ja yivuyet yiey japin yivo'yeyshi lhja yu'jop ts'ivee.’*xr* 36Pa yich'e'sha'ne pa vanujumatsenesh. 37Chiyney lhôtôj lhja cruz ja vatqu'isjayanach chiyisesh'e pan lhayaash ti chiyiclôn. Yit'esh jan chiyisesh'e: “Nôque Jesús, Lhanvacleesh napi judíos.” #27.35 Sal 22.18.

38Chiynesh shta java cruz japi napu' vôncaclônjanjas. Ve'lha ja yiey lhfayish, vooy jeelh yiey ja lhch'amiyish. 39Vooy japi naashjop'in pa yiclôqui ti yiclôyanjop'in lhshatjes,*xs* 40pa yit'esh ts'ivee: #27.39 Sal 22.7; 109.25.

—¡Avaatsha natôyish avenna lhôn ca avômjatsha'ne na vatishjanjavat ca pu'janaa lhôn pava nalhus ca avaclhitesh shta, istaa ca anilhjen avaatsha! ¡Ca yijô'taja ca a Dios Lhaôstaja, pa atatclanesh'e lha cruz ca ecletsha'ne!#27.40 Mt 26.6; Jn 2.19.

41Lhet lha lhjunashesh shta ti yiclôqui jô lhech japi lhanvaclesesh japi vatcasinôc, shi' japi vanqu'eyjatsjanesh java lhfanishlhavach, shi' japi nitaôvclaseesh lhanvaclesesh japi judíos, pa yit'eshvatsham'in:

42—Yilhjen jap'elh taj ti sasemjop lhavaatsha ca ninilhjen. Ca yijô'taja ca Lhcaanvacletajeesh napi Israel lhcles: ¡pa nitatclanesh'e lha cruz, ca jaspa tanca yicacueshelh na lhech! 43Yicafiyan lhôn pa Dios; ¡pa istaa ca nalhjen nôqueesh ca yijô'taja ca nentaj pa Dios! ¿ninteesh lhavne t'e ti Lhô'sesh pa Dios?#27.43 Sal 22.8.

44Yiclôqui shta japi vôncaclônjanjas, japin chiyneshelhvatjuulh java cruz.

Pa lhavafi ja Jesús

(Mr 15.33-41; Lc 23.44-49; Jn 19.28-30)

45Tôlhesh'e ti nalhcachi pa yamja ti tanjuyshicham na jumcuclaay ti vaclan ja tulhitaj nash'apee lhacôm'a ja lhech'e cotsjaat. 46Pa meelh ti tanjuyshicham na jumcuclaay pa tônesh'in ja Jesús pa yit'esh:

“Eli, Eli, ¿lema sabactani? — nôque yich'e': “Na yi Dios, na yi Dios, ¿ta lhayaash ti lhtayijop?#27.46 Sal 22.1.

47Meelh ti yipe'yach'e cavôque japi vatsevatch'e lhavôôj, pa yit'esh ts'ivee:

—Nôqueesh tôney'in pa chiytôyjata pava ti vaclan Elías.

48Pa tatsha ti vacumajey ja ve'lha, pa t'acum'e ja vôcjôcli yitc'anat jô ti yiccheesham'in ja nivayshi, pa lhechesh pa yijucjojam lhja lhac'ujop sise ti yiccheesheychisham pa yifinjayansham'in.*xw* 49Taj ti yit'esh ts'ivee jap'elh: #27.48 Sal 69.21.

—An'ate cum; shtovalhcaelhc'oya ajaalh pa Elías ca ninatajeyshicham yiinsha ca nefentajesh.

50Lhan'e ja Jesús pa ve'lheesh ti tafshi shta pa vaf ti'ma.

51Pa lhech t'aplhuqu'e ti yic'asch'e ja sivôclôclhayeech chiyp'oojulh jeelh lhtôvash ja uj vatishjanjavat. Tôlheshey lhôtôj ja lhc'asavash pa yamja cotsjaat. Pa nayuuynayuych'e na cotsjaat, yic'asshi'sha'ne java utes.*xx* 52Pa tatc'at'ey ts'ivee shta java nivalhjey; pa chinenjatchishamch'e japi acloj vafsha'ne japi nincacu pa Dios. 53Japi lhech taych'e java lhanvalhjey ti nitshaam ja Jesús pa yitshaam ts'ivee ja is yitsaat Jerusalén, pa yi'van japi lhech yie' acloj nivacle. #27.51 Ex 26.31-33; 2 Cr 3.14.

54Meelh ti yi'van ja c'afoquelhay lhanvacle shi' jap'elh vanujumatsentajesh ja Jesús ti nayuuynayuych'e na cotsjaat shi' jav'elh matas, pa uj ti nijovayshi, pa yit'esh:

—¡Yijô' jôque nivacle ti lhech ti Dios Lhaôs!

55Caaj shta japi acloj nivacchey tôseyjop ti novalhey'in. Japi lhech voqu'esha'ne lhapesh ja Jesús ti yiey ja Galilea, jô'tajesh ti yefen'in. 56Yi'shi japu lhech lhja María Magdalena, shi' lhôj'elh María lhamimi ja Jacobo shi' ja José, shi' shta lhja lhamimi japi lhcles ja Zebedeo.#27.55-56 Lc 8.2-3.

Chiyanch'e' pa nivalhech pa Jesús

(Mr 15.42-47; Lc 23.50-56; Jn 19.38-42)

57Meelh ti yujeey ja tulha'in, pa nam ja ve'lha nivacle acôjjin lhey José, Arematea lhavo'. Jô lhech voqu'esha'neen shta ja Jesús. 58Jô lhech yichey ja Pilato ti t'aalhsha ja lhavu'vat ca Jesús ca nijutey. Pa tayôjijanesh ja Pilato ca chinjutey. 59Pa t'acum'e ja José ja lhavu'vat ca Jesús, pa yiclôpjalheshch'e ja is sivôclôclhayeech. 60Pa lhechesh pa yanch'e' lhja yitsôt'ajesh nich'a lhanjôque', lhjan yisnatesh ti tishaam lhja utiyuc. Pa yip'ojey ja lhashi lhja uj utej, pa yich. 61Vooy lhja María Magdalena shi' lhôj'elh María, yiey t'ajuyish ja nivalhech.

Papi vanujumatsenesh pa lhanvalheech pa Jesús

62Vooy ti nalhu, ti yamjam ja nalhu ti chit'ichayshi, pa yichey japi lhanvaclesesh japi vatcasinôc shi' japi fariseos ja Pilato, 63pa yit'esha ts'ivee:

—Lhcaanvacle, yivoyelhch'e yicachielh cava yit'esh ca cuts'aaj ti jôjjeclay mônlha ti yit'esha ca ninôjtajeshch'e pava pu'jana nalhus pa nineetshamshi capi vafsha'ne.*xz* 64Nôquen lhayaash ayôjaa papu ca ninujumatsenesh ja lhanvalheech ca nitifeshch'e pava pu'jana nalhus, pa jaspa tanca natcutesh jayu japi t'eyjatsjanjas ca tulhtajaan ja lhavu'vat, pa yit'esha jayu japi t'eyjatsjanjas japi nivacle ti nitshaamshi vafsha'ne. Ca lhech lhjunashtaja pa ujesh jayu ti tavijata'yelhyam pa nijoolha vatcuts'aji. #27.63 Mt 16.21; 17.23; 20.19; Mr 8.31; 9.31; 10.33-34; Lc 9.22; 18.31-33.

65Pa yit'esh ja Pilato:

— Caaj nôqueesh japi c'afoquelhay vanujumatsenesh jayu. Istaa ca meelhey ca anujumatseneshelh jum ja lhanvalheech.

66Pa lhechesh pa yichey pa yijôtjat'e ja lhap'oot ja lhanvalheech, pa yinesh lhpa ve'lha t'ajuya ja lhap'oot. Pa lhech yimônlhanit'ejop japi yiclôvalh c'afoquelhay.

Pa lhneetshamjayash pa Jesús

(Mr 16.1-8; Lc 24.1-12; Jn 20.1-10)

Currently Selected:

San Mateo 27: NIVA

Highlight

Copy