San Mateo 26

1Meelh ti yivaclhitesh ja Jesús ti yasinôqui cavôque matas, pa yit'esha japi t'eyjatsjanjas:

2—Natôôyshelh ti napu' pava amc'oya nalhus ca chinvatc'usinatesh'in lhey pascua; pa lhecheesh pa chiyit'esh jayu ti tsitsenesh lhpa cruz ti ya Nivacle Lhô'sesh.#26.2 Ex 12.1-27; Dt 16.1-8.

3Pa lhechesh pa vooy japi lhanvaclesesh japi vatcasinôc shi' japi nitaôvclaseesh lhanvaclesesh japi judíos tc'aesh'evane yiey ja lhajpôyich ja uj lhanvacleesh japi vatcasinôc lhey Caifas. 4Lhech'e ti vatpeyaesha'ne ca jaspa nôcfa' jayu ja Jesús shi' ca niclôn. 5Taj ti yit'esh ts'ivee:

—Ya aj ca shtavoyjatesham ja chivatc'usinatesh'in, lhech ca nisuyiyan japi nivacle.

Pa Jesús chiyp'aclanshi pa vatshachivo yiey pa Betania

(Mr 14.3-9; Jn 12.1-8)

6Meelh ti yie' ja Jesús ja Betania, yie' ja lhajpôyich ja Simón, jan tashtôtaytaj lhapesh; 7lhechesh pa namey ja Jesús lhja ve'lha nivacche. Lhjô lhech nicha'jesh lhja tnôjque lhôse ja t'un'e jum vatshachivo. Meelh ti yi'sha'nejop ja vatsaccunjavat ja Jesús, lhjô lhech pa yôtsiysham lhshatech ja vatshachivo.*xd* 8Meelh ti yi'van cavôque japi t'eyjatsjanjas pa yisuyiyan'in, pa yit'eshvatsham'in: #26. 7 Lc 7.37-38.

—¿Ta t'e lhayaash ti chiyclôqui atesha ca vatshachivo? 9Lhan'e ti nichinatcasha'yesh jô pa aclojtajch'e pava ca nuy'ôcji pava ca pesocla, pa chinjutajey japi ts'aclaaysha'ne.

10Pa yipe'yach'e ja Jesús cavôque, pa yit'esha:

—¿Ta t'e lhayaash ti t'iyôytaneshelha lha nivacche? Yivo'yeshch'e na ape'e na lhfanishyish. 11Papi ts'aclaaysha'ne tanca nitayelh'ajop nava nalhus, lhan'e yivaatsha pa tanca yajateesh ca yielh'ajop'in jayu. #26.11 Dt 15.11. 12Nava yisnatesh lha nivacche ti yôtsiyyitapee na vatshachivo tajulhemey na yivu'vat, tatômjalheshyic'oya ca chinastiishtajc'oya. 13Yijô' nava jayeetshelhaam: Pa ca chinôvtajesh'e ca chinvanqu'eyjatsjantajesh nôque is ya'clishesh pa vatnilhjenjayash, yiey nan tuc'a'ey na cotsjaat. Pa chinfacleshch'e jayu shta na lhfanishyish anôque nivacche ca jaspa chinaychavalheshch'e lha lhech.

Pa Judas vanqu'eeyjatesh pa Jesús

(Mr 14.10-11; Lc 22.3-6)

14Lhechesh pa yich ja ve'lha tô'lha japi doce t'eyjatsjanjas ja Jesús, jan lhey Judas Iscariote. Yichey japi vatcasinôc lhanvacles pa tasinô'yem, 15pa yit'esha:

—¿Ta t'ajôjqu'e pava lhanjuteelhyiy jayu ca c'ôyanelh'ay ja Jesús?

Pa lhechesh papi lhech yishayanesh pava treinta monedas climsha'ne. 16Pa lhechesh pa yaychavalh'in ja Judas pa ca t'elheesh ca isaemjop ca nô'yaney ja Jesús.

Pa Lhtsaccunjayash pa Lhcaanvacle

(Mr 14.12-25; Lc 22.7-23; Jn 13.21-30; 1 Co 11.23-26)

17Meelh ti vaclan ja nalhu ti chivatc'usinatesh'in pa chituj lhpa yucuve ni'nô'veyshi pa t'ajuya, lhechesh pa nachey japi t'eyjatsjanjas ja Jesús pa niyôsesh ts'ivee:

—¿Ta t'e ca chinô'vesh'eac'oya ca jasnatshelh'am pa vatôc t'ajuya pa pascua?

18Pa yicuulh ja Jesús pa yit'esh:

— Meelhey ja yitsaat, ca amtajelhey ja lhajpôyich ja nivacle, pa at'eshelha: ‘Yit'esh'ay ja Vanqu'eyjatsjan: Nôqueesh shalhac'oya pa yinc'ôplhu, jayeetajesh ca yieshelh'ôcji na ajpôyich napi yeyjatsjanjas ca tujeelh nava t'ajuya pa pascua.’

19Pa lhechesh pa yisnatesh japi t'eyjatsjanjas jan t'ônashem ja Jesús, pa yisnatesh pa lhtsaccunjayash t'ajuya pa pascua.

20C'oya ti tulh'in pa yielhch'elhavôôj ja vatsaccunjavat ja Jesús japi doce t'eyjatsjanjas. 21Meelh ti tsaccunelh, pa yit'esha ja Jesús:

—Yijô' ti jayeetshelhaam, ve'lha na tôlhelh'atsham vanqu'eeyjatyish jayu.

22Pa lhechesh pa uj ti yitacshinjayan'in ts'ivee, pa ve'lha ts'ivee ti niyôsesh:

—Lhcaanvacle, ¿ya lhech t'ejum?

23Pa yicuulh ja Jesús pa yit'esh:

—Na lhech nan jayajayelhshamvatjuulh na titech, lhech na lhech vanqu'eeyjatyish jayu.*xf* 24Ya Nivacle Lhô'sesh c'uyey ja nôyish jan yit'esha nava Vani'sesh'e; taj ti ¡Ya'lhavach na lhech nan vanqu'eeyjatesh na Nivacle Lhô'sesh! Lhavaatsha tajulhtajey ca ya aj ca nanvat'aj lhapesh. #26.23 Sal 41.9.

25Pa lhechesh pa yit'esh vitsha ja Judas jan vanqu'eeyjatesh jayu, ti niyôsesh:

—Vanqu'eyjatsjan, ¿Ya lhech t'ejum?

Pa yicuulh ja Jesús pa yit'esh:

—Jech, a lhech.

26Meelh ti tujeelh, pa t'acum'e ja Jesús lhpa yucuve pa t'aalh, pa nôcôsshisha'ne, pa yijutem japi t'eyjatsjanjas, pa yit'esh:

—Atujelh; nôque yivu'vat.

27Pa yivaclhitesh pa t'acum'e shta ja t'iyôjatshiy, pa t'aalh shta pa yijutshey, pa yit'esh:

—Ayôelhshi lhacôm'a avaatsheelh, 28lhayaash ti cavôque yivoyey yinôôclhinita nava yit'esh ja Dios, ti nich'aa ti nôclit, pavan nitônemsha'ne papi acloj ca jaspa yivômjatemch'e pava lhsasch'e.*xg* *xh* 29Taj ti jayeetshelhaam, ti niyit'esh t'ôyisheey ca yiyô'ji nôque t'i' tô'lha pava lhay lhpa ôtjayetayuc. Vooy ca namtajeyjop jayu pa nalhu ca sht'iyôtajshivatjuulh yiey ja lhavtsateyish ja Tata. #26.28 Ex 24.8; Zac 9.11.,#26.28 Jer 31.31-34.

Pa Jesús nifac ti vantanesh jayu pa Pedro

(Mr 14.26-31; Lc 22.31-34; Jn 13.36-38)

30Meelh ti tifeshch'e pa t'aclaach pan yôclôjeshey pa Dios, pa yicheyvatich'e lhja utiyuc yiey ja Olivochat. 31Pa lhechesh pa yit'esha ja Jesús:

—Nôque tulh lhnuteelhyam jayu alhacôm'aelh; lhayaash ti lhech t'ônashch'e cava Vani'sesh'e ti yit'esh: ‘Jaclônc'oya jayu pa lhavoesh pava tashinshtas, secl'esh ca nicatsôn'in.’*xi* 32Vooy ca janeetajchisham shta pa jatôtômjalhelhey'ac'oya jayu ja Galilea.#26.31 Zac 13.7.,#26.32 Mt 28.16.

33Pa lhechesh pa yicuulh ja Pedro pa yit'esh:

—Ca lhech lhayaashtaja ca ninu'taj'am jayu lhacôm'a napuque, pa ya vooy tanca lhech yijunasha jayu.

34Pa lhechesh pa yit'esha ja Jesús:

—Yijô' ti jayeesh'a, nôque tulh, ti jôjjeclay tanca nit'eyshey jayu pa votôjôj, ti pu'janaesh jayu ti lhteetsha ca niantôfa'clayish.

35Pa yit'esha ja Pedro:

—Apasha ca chinasclôn'atapee, pa tanca vantan'ash'in.

Lhacôm'a jap'elh t'eyjatsjanjas ti lhet lha t'ônashaan.

Pa Jesús t'aalh yiey pa Getsemaní

(Mr 14.32-42; Lc 22.39-46)

36Pa lhechesh pa yamelhey ja Jesús japi t'eyjatsjanjas ja vatcôvjiyanjavat lhey Getsemaní, pa yit'esha:

—Nôque veelh'ech'esha'ne, jôquey jayu naum ca jayaalh yivaatsha.

37Pa yaôychi ja Pedro shi' japi napu' lhcles ja Zebedeo. Pa yalhalha ti nama pa lhtacshinjayash shi' pa t'ajovayi. 38Pa lhechesh pa yit'esha:

—Yitacshin'in jum pa yisôc'ôclit, yamja jayu pa yivafi. Nôque amônlhaaelh'e, pa ovalhelh'in vitsha.

39Pa lhechesh pa tac'uy cle' ja Jesús, pa vanc'umaja cotsjaat, pa t'a'lhey pa Dios, pa yit'esh:

—Na Tata, ca istajop'am, pa at'esh ca nashjatyijop java caclec; taj ti tanca nitôlhyi pa ca yit'esh, a'vooy avaatsha ca nitôôlhtaj'a pa ca eetajesh.

40Pa lhechesh pa tapecley jan yie' japi t'eyjatsjanjas; pa yit'esha ja Pedro:

—¿Ama ca amuqu'eelh ca ovalhelh'in cum vitsha? 41Istaa ca ovalhelh'in ca a'lhelh, ca jaspa ya aj ca namelh'ay pa vatc'alhtanjayash. Yijô' ti t'untaj'in pa vatsôc'ôclit lhshayc'u, pa vooy na vat'asjan nint'un'in.

42Napueesh ti yich ja Jesús, pa t'aalh pa yit'esh:

—Na Tata, ca niistajaajop'am ca naashyijop atesha na vatclôyitsjayash, pa istaa ca asnatesh nava lhteesh.

43Pa vapecley shta japi t'eyjatsjanjas pa yi'van shta ti yimôqu'esha'ne, lhayaash pava lhtôsjey sasjop ca novalhesh'in pa lhanjôti. 44Pa yin'ate pa yich pa pu'janaesh ti t'aalh, lhetlhataj pa t'ônash'in. 45Pa lhechesh pa tapecley shta jan yie' japi t'eyjatsjanjas, pa yit'esha:

—Lhapa cajuqu'e ti lhamôelhch'esha'ne, nôqueesh pa nulhjôqu'eselh. Nôqueesh palha yameyjop na t'aplhu' ti chiyjutey jayu na Nivacle Lhô'sesh napi sasch'e lhavos. 46Aneelhchishamch'e ca shnôquelh'in; lhayaash ti palha nam nan vanqu'eeyjatyish.

Chiyôcfa' pa Jesús

(Mr 14.43-50; Lc 22.47-53; Jn 18.2-11)

47Jôjjeclay ninvaclhitesh ja Jesús ti tasinôy'in ti namac'oya ja Judas, tô'lha japi doce vat'eyjatsjanjas. Tanaôycheelh japi acloj lhcavos japi vatcasinôc lhanvacles shi' japi nitaôvclaseesh lhanvacles japi judíos. Japi lhech nichaaj java clesatas shi' java lhac'uc. 48Ja qu'eeyjanaj Judas yit'esh lhôn ti yiyôjaa japi tanaôycheelh:

—“Jan jafinsham jayu lhashi, lhech jô lhech acumelh'evatam”.

49Pa lhechesh pa namey ja Jesús pa yit'esh:

—¡Tulhjooy, Vanqu'eyjatsjan!

Pa yifin'in. 50Pa yicuulh ja Jesús pa yit'esh:

— Yic'utsfa, ¿ta lhayaash ti lhnam?

Pa lhechesh pa nama jap'elh pa t'acum'e ja Jesús ti yôcfa'.

51Pa t'acum'e ja ve'lha jan voqu'esha'ne'en ja Jesús ja lhclesataj pa yifaashey lhacfe' ja lhcavo ja lhanvacle japi vatcasinôc. 52Pa lhechesh pa yit'esha ja Jesús:

—Achajch'e na lhashiy na aclesataj. Lhayaash ti lhacôm'a papi vancaclônesh pa clesataj pa chiyclônesh jayu vitsha pa clesataj. 53¿Tanca natô'yish ti istajopyam ca yaalhshey ja Tata, pa nanchentajyiy nôqueesh pa docetajeesham pant'ajôjesh papi acloj ángeles? 54Ca lhech lhjunasha, ¿pa ta t'e ca lhjunashtaja ca ninôfisach'e ca t'ônashesh java Vani'sesh'e?

55Pa lhechesh pa yit'esha ja Jesús japi nivacle:

—¿Lhnachelhyiy avaatsheelh nava aclesataselh shi' nava ac'uclelh ca ats'ôôcfeelh lhjunashjulh pa vôncaclônjanaj? Nava nalhus jôvelh'atshi avenna, ti lhasvanelh'in ti javanqu'eyjatsjan'ôcji ja uj vatishjanjavat pa niats'ôôcfeelh jô'lhechesh.*xk* 56Taj ti lhacôm'a cavôque vaclan ca jaspa nofisch'e jan t'ônashesh java yi'sesh'e capi chiytôyjata pava ti vaclan. #26.55 Lc 19.47; 21.37.

Pa lhechesh pa vacumajvatich'e japi t'eyjatsjanjas, pa ve'lha ja Jesús ti mônlhee.

Pa Jesús vatsevat'e t'ajuyish papi lhcaanvacles

(Mr 14.53-65; Lc 22.54-55, 63-71; Jn 18.12-14, 19-24)

57Japin yôcfa' ja Jesús pa yicha'jey ja Caifás, jô lhech lhanvacleesh japi vatcasinôc. Lhech'e ti tc'aeshva'ne japi vanqu'eyjatsjanesh pava lhfanishlhavach shi' japi nitaôvclaseesh japi judíos. 58Lhan'e ja Pedro pa nôque t'aplheemch'een ja Jesús ti yijoqu'esha'ne, yamey ja lhajpôyich ja uj lhanvacleesh japi vatcasinôc. Pa lhechesh pa yich'ôcji pa yi'sha'nejop japi c'afoquelhay, jaspa yi'van jayu pava vaclan.

59Pa vooy japi vatcasinôc lhanvacles, shi' japi nitaôvclaseesh lhanvaclesesh japi judíos shi' shta jap'elh lhanvaclesesh tanch'anjayesh pa ya'clish vo'tajemey'in pa ca nitôlhjat'ejop ca jaspa isaemjop ca nitayôjijanesh ca chinclôn. 60Acloj japi yinôôlhjônchatajesh taj ninvoesh'ôcji. Pa yôjesh'esha'ne ti vatsavat japi napu' cuts'ajis, 61pa yit'esh ts'ivee:

—Yit'esh nôque nivacle: ‘Yivaatsha isjopyam ca javômjat na lhishjanjavat pa Dios, pa pu'janataja pava nalhus ca javaclhitesh ca jasnatajesh shta.’#26.61 Jn 2.19.

62Pa lhechesh pa nitshaam ja lhanvacleesh japi vatcasinôc, pa yit'esha ja Jesús:

—¿Naaculhch'e t'em napi nafacleshch'e pa ajunash?

63Lhan'e ja Jesús pa lhetipa ti nits'iseey. Pa lhechesh pa yit'esha pa lhanvacleesh japi vatcasinôc:

—Jetônajop pa Dios pan mônlha ca yijôa jô pa ca at'esh. Istaa ca anfacleelhyam ti yijô' ti a Cristo, Lhôs'ash pa Dios.

64Pa yit'esha ja Jesús:

—Yiey nan lhteesh avaatsha. Pa jayeetshelhaam shta, lhavanelh jayu na Nivacle Lhô'sesh ca naôvtajey lhfayish ja Dios jan t'un'in, lhavanelh jayu shta ca natpectaj yi'shi' jayu pava vôsey.#26.64 Dn 7.13.

65Pa lhechesh pa yic'asteshlhatapee lhja t'uyjatshiy ja lhanvacleesh japi vatcasinôc, pa yit'esh:

—¡Nôque nivacle tasinôy'in lhjuyjafaesh pa Dios! Tanca suyeeshijoom ca chinanfacjoom shta peelh. Apis ti lhpe'yeelh ti tasinôy'in ti lhjuyjafaesh pa Dios. 66¿Ta lhteetshelh?

Pa yit'esh ts'ivee:

—Istaa ca chinclôn, lhayaash ti yic'amensha'ne.*xn*

67Pa lhechesh pa t'achiych'e ja lhtaco pa yic'ôn'in shta. Vooy jap'elh yipôcôjam lhacu'*xñ* 68pa yit'esh ts'ivee: #26.65-66 Lv 24.16. #26.67 Is 50.6.

—Avaatsha a Cristo, ¡Istaa ca anfacyam papi nat'ijôj!

Pa Pedro vantanesh ja Jesús

(Mr 14.66-72; Lc 22.56-62; Jn 18.15-18, 25-27)

69C'oya ti vaclan cavôque lhan'e ja Pedro pa yi'fach'ee. Pa yichey lhpa vatcavoque pa yit'esha:

—Avaatsha shta lhavoqu'esha'ne na Jesús, Galilea lhavo'.

70Taj ti vantanesh ja Pedro ti yiesh'e t'ajuyish papi lhech yie', pa yit'esh:

—T'e, nastôya papi lhasinôqui.

71Meelh ti yichey ja lhashi ja Pedro pa yi'van shta lhap'elh vatcavoque. Lhpa lhech yit'esha papin yie' t'ajuyish:

—Nôque nivacle voqu'esha'ne shta ja Jesús, Nazaret lhavo'.

72Pa ve'lheesh vantanesh ja Pedro pa vena t'ônashesh, pa yit'esh:

—¡Ninastôfaclesh nôque nivacle!

73Pa nachey shta papi lhech yie' pa yit'esha ts'ivee ja Pedro:

—Yijô t'emma jô, ti alhech shta lhtô'lha japu lhech, lhayaash ti nintaastay ca asinônyash.

74Pa lhechesh pa vatpôfiyuin ja Pedro pa vena t'ônashesh pa yit'esh:

—¡Ninastôfa'clesh nôque nivacle!

Pa tatsha ti t'eyshey pa votôjôj. 75Pa lhechesh pa yaychavalhch'e ja Pedro pavan yit'esha ja Jesús ti yit'esh: ‘Jôjjeclay tanca nit'eyshey jayu pa votôjôj, ca p'alhaa ca pu'janaeesh ca avaantanyish.’ Pa yichfach'ee ja Pedro pa ujesh ti yip'in.

Pa Jesús chiychajey pa Pilato

(Mr 15.1; Lc 23.1-2; Jn 18.28-32)

Currently Selected:

San Mateo 26: NIVA

Highlight

Copy