San Mateo 23

1Pa lhechesh pa yit'esha ja Jesús japi nivacle shi' japi t'eyjatsjanjas:

2“Japi vanqu'eyjatsjanesh pava lhfanishlhavach shi' japi fariseos nitôfaclesh java lhayôjijates ja Moisés pa yitô'yish ti vanqu'eyjatsjanesh. 3Istaa ca ach'anelha, pa anc'ashamshelh shta lhacôm'a java yiyôjeeshelh'a; taj ti ya aj ca ajônshelhch'e java lhfanishlhavach venalhjunash. 4Yôcfashaam java caclec sasjop ca chinenjatchisham, pa yiyôjeesha jap'elh ca nitilhoj. Vooy japi lhech ninteesh ca ve'lhaa pa lhpasch'e ca natcumesh'e. 5Cavôque lhacôm'a jaspa yivanesh japi nivacle. Yen ti yan'e lhtaco java Vani'sesh'e shi' java titjuy yinesh shta java c'atsajch'e yi'shi' java Vani'sesh'e. Yuych'e shta java t'uyjatshiyis pitesch'e java lhtsaclô' ya'sheshc'oya jap'elh nivacle.*xq* *xr* *xs* 6Yen shta ti yie' java isis vatc'oovtes ti tsaccunch'e shi' javan yiey shta java vatvanqu'eyjatsjanjavtes. 7Yen shta ca chintanacjut'esha ca chinacju' ti yiey java nôyishay. Yen shta ca chinteetsha vanqu'eyjatsjan. #23.5 Mt 6.1.,#23.5 Dt 6.8.,#23.5 Nm 15.38.

8Vooy avaatsheelh ya aj ca enelh ca chinteetshelh'a vanqu'eyjatsjan, lhayaash ti alhacôm'aelh ti alhtatvelheyech'elh. Caaj na ve'lha vanqu'eyjatsjan, na lhech Cristo. 9Ya aj ca at'eshelha papu na catsitata yiey nôque cotsjaat, lhayaash ti ve'lha ja Atataelh yiey ja vôôs. 10Ya aj ca enelh ca chinteetshelh'a lhcaanvacle, lhayaash ti ve'lha na Cristo ti Anvacleelh. 11Papu yit'esh ti t'acu'mem'in pap'elh, pa lhech papi ya'shesh ti uj.*xt* 12Lhayaash papu ca ninunataj pa chinachajshicham jayu, vooy papi vanits'aclayan pa lhecha ca chinashjatchisham.*xu* 13“¡Ya'elh'avach avaatsheelh, lhavanqu'eyjatsjaneshelh nava afanishelh'avach chi' napi fariseos, ajôts'ôclônjanjaselh!, lhayaash ti lhp'oelhey ja lhashi ja lhanvacleyash ja Dios jaspa tanca nuyey jayu papu. Naat'eshelh ca uyelhey, pa tanca avashanelhem pap'elh yeetajesh ca nuyey. #23.11 Mt 20.26-27; Mr 9.35; 10.43-44; Lc 22-26.,#23.12 Pr 29.23; Lc 14.11; 18.14.

14“¡Ya'elh'avach avaatsheelh, lhavanqu'eyjatsjaneshelh nava afanishelh'avach shi' napi fariseos, ajôts'oclônjanjaselh!, lhayaash ti lhatcuteshelh java lhajpôyjey japi ôsch'acchey, lhavaatfichtajeshelh pa lhacpiteneshelhch'e ti lht'a'lhelh. Pa nôquen lhayaash ujesh ca chinaclôyitelh jayu.

15“¡Ya'elh'avach avaatsheelh, lhavanqu'eyjatsjaneshelh nava afanishelh'avach shi' napi fariseos, ajôts'ôclônjanjaselh! Uj ti lht'ôtayelhch'e na cotsjaat shi' nava tovjôy ti lhavoolhey pa ve'lha nivacle ti yofiisshelh'ach'e jayu. Ca avantajelh pa ve'lha pa lhasnatshelh pa ya'shesh jayu ti uj ti ojey. Pa lhech pa lhech t'ajuya pa itôj ninmac pa cat'elheesh, nan ajunashelh.

16“¡Ya'elh'avach avaatsheelh, ataclujuyelh ti lhtojontajelh jap'elh!, lhteetshelh: ‘Ca nicaajtaj pa ve'lha ti yetônjop ja uj vatishjanjavat pava nifac, taj ti tanca yijôa jô; taj ti ca netôntajop ja clesanilh cojiyaj ti yiey ja uj vatishjanjavat, pa lhech nôqueesh yijô' jayu.’ 17¡Naacajôyshelhsha'ne, ataclujuyelh shta! ¿She t'e pa ya'shesh ti is: ja clesanilh cojiyaj, ja't'ajesha ja uj vatishjanjavat jan yiisiyan ja clesanilh cojiyaj? 18Lhteetshelh shta avaatsheelh: “Ca nicaajtaj pa ve'lha ti yetônjop ja itôvatc'oya pa vatcufayjat pava nifac; taj ti tanca yijôa jô. Taj ti ca etôntajop pa vatcufayjat pan chiyan'apee ja itôvatc'oya, pa jech nôqueesh yijô'.” 19¡Naacajôyshelhsha'ne, ataclujuyelh shta! ¿She t'e pa ya'shesh ti is: pa vatcufayjat, ja't'ajesha ja itôvatc'oya jan yiisiyan pa vatcufayjat? 20Papu yetônjop pa itôvatc'oya pa yetônjop shta lhacôm'a pava yiapee. 21Vooy papi yetônjop ja uj vatishjanjavat, pa tanca ve'lhaa ja uj vatishjanjavat, yetônjop shta ja Dios jan yie' ja uj vatishjanjavat. 22Shi' shta papu yetônjop ja vôôs, yetônjop shta ja lhc'o'vat ja Dios, shi' shta ja Dios jan yie'sha'ne ja lhc'o'vat.#23.22 Is 66.1; Mt 5.34.

23“¡Ya'elh'avach avaatsheelh, lhavanqu'eyjatsjaneshelh nava afanishelh'avach shi' napi fariseos, ajôts'ôclônjanjaselh! Lhavenchatejeshelh ja Dios ja ve'lheesh chiycatsônjat lhpa mentayuc shi' lhpa anisiyuc shi' lhpa cominoyuc, pa nueveeshts'ivee pava amônlheeshelh, taj ti lhna'shelhjop'in atesha jav'elh vatyôjijates ya'shesh ti isisc'oya. Nava lhech: na vatvoyjayasheshch'e, na vatcavtsaclayjayash shi' na nivatcacujyasha. Tajulhey navôque ti lhasnatshelh, taj ti ya aj ca acla'lheelh jav'elh.#23.23 Lv 27.30.

24“¡Avaatsheelh, ataclujuyelh ti lhtojontajelh jap'elh, lhtôschateshelh pa yinôôt pava tiqu'icsha'ne lhavoquey, pa vooy pa uj lhclatsjanish pa ti vaf yi'shi' pa yinôôt pa t'iyôelhshi!

25“¡Ya'elh'avach avaatsheelh, lhavanqu'eyjatsjaneshelh nava afanishelh'avach shi' napi fariseos, ajôts'ôclônjanjaselh!, lhcleshelhfach'ee pa tacfeey shi' pa titech, taj ti vooy pa tasham pa uj ti sasch'e, yisasiyan pa vatcutsjayash shi' pa vatcuyiyash. 26¡Atacluuc fariseo: ajutsjat ca acleshch'e pa tasham pa t'acfeey shi' pa titech, pa lhecheesh pa isa' jô shta ja fach'ee!

27“¡Ya'elh'avach avaatsheelh, lhavanqu'eyjatsjaneshelh nava afanishelh'avach shi' napi fariseos, ajôts'ôclônjanjaselh!, avaatsheelh ajunashelhjulh java chiyan'apee java nivalhjey ti chiyclimiyansha'ne jaspa isisfach'ee, taj ti pa tasham pava lhanus capi vafsha'ne shi' pa uj lhclatsjanish.*xx* 28Lhech ajunashelh; aisiselhfach'ee ti navanelh napi nivacle, taj ti tasham pa tapooj pa ajôts'ôclônjayashelh shi' pava niyisach'e. #23.27 Hch 23.3.

29“¡Ya'elh'avach avaatsheelh, lhavanqu'eyjatsjaneshelh nava afanishelh'avach shi' napi fariseos, ajôts'ôclônjanjaselh! Lhasnatshelhjop java yiapee java lhnivalhjey japi chiytôyjata pava ti vaclan. Lh'isiyanelh shta java chiyan'apee java lhnivalhjey capi isissha'ne, 30pa lhteetshelha: ‘Ca nascaaj'e lhôn lhapesh yivaatsheelh ca nit'aplhuqu'e ti caaj papi yinavot'elh, pa tanca yefentajeshelh ti yiclônsha'ne papi chiytôyjata pava ti vaclan.’ 31C'oya ca at'eshelh cavôque eem ti lhteetshelha ti yijô' ti lhcleselh'ash papi yiclônsha'ne lhapesh capi chiytôyjata pava ti vaclan. 32¡Istaa ca avaclhiteshelh avaatsheelh nava yisnatesh capi anavot'elh!

33“¡Aôclôselh! ¡Ajunashelhjulh java tosis! ¿Ta ca ajunashelh ca aclôtelhc'oya pa vatclôyitsjayash tô'lha pa itôj ninmac pa cat'elheesh?*xy* 34Nôquen lhayaash jachenelh'ay jayu papi chiytôyjata pava ti vaclan, papi tcajôyshaysha'ne shi' papi vanqu'eyjatsjan. Taj ti avaatsheelh lhclônelh pa lhneshelh jayu shta pava cruz papu lhech papi nayie'in, vooy pap'elh lhc'ônelh'ôcjiin jayu java vatvanqu'eyjatsjanjavtes pa lhjôyjanelhey'in jayu pava yitsates. 35Tamenelh'ash jayu pava lhavoyey papi isissha'ne nivacle ti chiyiclônsha'ne, tôlhesh'e pa yivo'yeshch'e Abel yôjesh'e pa Zacarías, lhaôs pa Berequías. Can lhclônelhshi lhcachivat ja vatishjanjavat ja vatcufayjavat.*xz* *xa* 36Yijô' ti jayeetshelhaam, ti chiyiclôyitesh jayu cavôque matas napuque nivacle nôqueesh. #23.33 Mt 3.7; 12.34; Lc 3.7.,#23.35 Gn 4.8.,#23.35 2 Cr 24.20-21.

Pa Jesús yip'ein pa Jerusalén

(Lc 13.34-35)

37“¡Jerusalén, Jerusalén, lhclônsha'ne capi chiytôyjata pava ti vaclan, pa t'ôôtjatesh'in pava utes capi lhcasinôclesh ja Dios ti nichenelh'ay! ¡Naô t'e ja t'ajô'jesh ti jayeetajesh ca nayjatva'ne napi tsitenas'atshi, nan lhjunash lhpa votôjôj ti yanôcji pava lhcles pava lhafas, taj ti naat'eshelh!*xb* 38A'van avaatsheelh, niyijôa ca amônlhaaelh'e nava ajpôyjeyelh; 39lhech jayeetshelh'am, lhayaash ti tanca asvaneelh jayu, vooy ca namtajeyjop pa nalhu ti lhteetshelh jayu: ‘¡Chiyôclôj pa lhech ti nameshjooy pa lhey pa Lhcaanvacle!’ #23.37 1 R 19.10; Jer 2.30.,#23.39 Sal 118.26.

Yit'esha pa Jes'us ti chiyvômjat jayu pa uj vatishjanjavat

(Mr 13.1-2; Lc 21.5-6)

Currently Selected:

San Mateo 23: NIVA

Highlight

Copy