San Mateo 16

1Japi fariseos shi' japi saduceos yichey ja Jesús ca nivan shi' ca nic'alhtana shta ca jaspa nicôjôyesh. Yiyôjitaesha pa ca nôclitem pa nimatasa papu ca nitô'yish yiey pa vôôs.#16.1 Mt 12.38; Lc 11.16.

2Taj ti yicuulh pa yit'esh: —Ca nuutaja pa lhteetshelh: “Is jayu pa nalhu, lhayaash ti yucsha'ne nava vôsey.” 3Vooy ca nich'a nalhutaja pa lhteetshalh: “Nôqueesh niysa' jayu na nalhu, lhayaash ti yucsha'ne nava vôsey yivôsen shta.” ¡Ajôtsôclônjanjas! Nataôyshelh jayu pan lhjunash jayu pava vôsey, taj ti tanca natôôyshelh nava vaclan navôque nalhus. 4Napi nivacle ojiyis ninvo'yeshch'e shta t'aalhtajeshyi pava nimatasa papu ca nitô'yish ca nôclitem. Taj ti tanca pa caelhchaa ca chinôclitem, apis ti caaj java nimatasa papu ca nitô'yish tô'lha ja chiytôyjata pava ti vaclan lhey Jonás.#16.4 Mt 12.39; Lc 11.29.

Pa tayjop ja Jesus japi lhech pa yich.

Pa yicap'ofiyanshi lhpa yucuve, yitsôt'ajesh papi fariseos

(Mr 8.14-21)

5Meelh ti yichey pacham ja lhjôvcha japi Jesús t'eyjatsjajas, pa nitôvacluey pava yucuvec ca nichaaj. 6Pa lhechesh pa yit'esha ja Jesús:

—A'va; anujumatsenelhjulh japi fariseos shi' japi saduceos, lhayaash ti tô'lha japu lhech pava yicap'ofjatshi pa climshi.#16.6 Lc 12.1.

7Pa tasinôych'e ts'am japi t'eyjatsjajanjas pa yit'esh:

—Jaspa lhech t'ônash t'ejum, lhayaash ti nishtanchaaj pava yucuvec.

8Lhan'e ja Jesús yitô'yish tatsha cavôque pa yit'esha:

—¿Ta lhayaash ti lhteetshelha ca ama lhpa yucuve? ¡Tiqu'in na naacacujayasheelh! 9¿Mônlheesh ti ninatô'yelhch'e, naaychavalhelhch'e java ve'lhanôjesh yucuvec ti chinôcôsishemsha'ne japi cinco mil nivacle, ta jôque t'ajôôj java sisenlhiy tapoojqu'esha'ne cava t'iyas ti chintôqu'e'?*xk* 10¿Naaychavalhelhch'e java napu'yama yucuvec ti chinôcôsemshisha'ne japi cuatro mil nivacle, ta jôque t'ajôôj java sisenlhiy tapoojqu'esha'ne cava t'iyas ti chint'ôqu'e'?*xl* 11¿NInatôôyshelh ti niyasinôquielh'am jô lhpa yucuve ti jayeesh, anujumatsenelhjulh pa t'ajuya lhpa yucuve, yitsôt'ajesh japi fariseos shi' japi saduceos? #16.9 Mt 14.17-21 ,#16.10 Mt 15.34-38

12Pa lhechesh pa yit'ô'yish ts'ivee japi t'eyjatsjanjas ti ninasinôqui jô ja Jesús pa t'ajuya lhpa yucuve. Vooy ca lhneyjatsjanjayash japi fariseos shi' japi saduceos ti yasinôquiem.

Pa Pedro yinôôclhanita pa Jesús ti Cristo

(Mr 8.27-30; Lc 9.18-21)

13Meelh ti yamey ja Jesús ja cotsjaat ja yie' ja yitsaat Cesarea Filipo, pa niyôsesh japi t'eyjatsjanjas pa yit'esh:

—¿She t'e papi tsilheclôjesh napi nivalce ti ya Nivacle Lhô'sesh?

14Japu lhech yicuulh pa yit'esh:

—Nalheclôjtajesh ca alhecha ca Juan Vatnayjayash lhavo'; jap'elh yit'esha ca alhecha pa Elías, vooy jap'elh yit'esha ca alhecha pa Jeremías ja't'ajesha peelh chiytôyjata pava ti vaclan.#16.14 Mt 14.1-2; Mr 6.14-15; Lc 8.7-8

15Pa lhechesh pa yit'esha: —Vooy avaatsheelh, ¿She papi lhaslheclôôjelh?

16Pa yicuulh ja Simón Pedro pa yit'esh:

—A lhech avaatsha a Cristo, Lhôs'ash pa Dios pan mônlha.#16.16 Jn 6.68-69

17Pa yicuulh ja Jesús pa yit'esh:

—Anshamesh, Simón, lhôs'ash ja Jnás, ampapu ca natôyjata côque, vooy ja Tata jan yie' ja vôôs natôyjata côque. 18Vooy yivaatsha jayeetshelh,a ti avaatsha a Perde, nôque yich'e' “utej”, utejesh nava lhteesh na. Vooy nôque utej jan'apee jayu japin tsitsôt'ajesh iglesiaesh. T'un'in jayu lhavaatsha pa tanca nivômjat jayu ja t'unaj ja vatvafi'. 19Jajut'ay jayu lhja yave t'ajuya ja lhanvacleyash ja Dios. Lhacôm'a pava t'ôcfa jayu yiey na cotsjaat mônlheesh jayu shta ca chinôcfa' pava yiey pa vôôs. Vooy lhacôm'a pava lhnuqueesh yiey na cotsjaat pa chinuqueesh jayu shta yiey pa vôôs.*xñ* #16.19 Mt 18.18; Jn 20.23.

20Pa lhechesh pa yiyôjaa ja Jesús japi t'eyjatsjanjas ca ya aj ca nanfacleem pap'elh ti lhech ti Cristo.

Pa Jesús yasinôqui pa lhavafi jayu

(Mr 8.31—9.1; Lc 9.22-27)

21Pa lhech t'aplhuqu'e ti nich'a yasinôquiem ja Jesús japi t'eyjatsjanjas ti iseemjop ca nôquey ja Jeruselén. Pa lhech chiyclôyit'e jayu, yiclôyit jayu japi nitaôvclasa lhcaanvacles, japi vatcasinôc lhanvacles shi' japi vanqu'eyjatsjanesh pava lhfanishlhavach. Jô'tajesh ti yiclôn jayu shta, taj ti ca ninôjtasjeshch'e pava pu'jana nalhus pa chinenjatchisham shta. 22Pa lhechesh pa t'acum'e ja Perdo ja Jesús pa tac'uyesh pa yit'esha ti yiyôjaa:

—¡Ninteesh jayu pa Dios, Lhcaanvacle! ¡Sasjop ca chinavclanjat'am jayu côque!

23Pa tatvaych'aclaja ja Jesús ja Pedro pa yit'esha:

—¡Ayyijop, Satanás!, Lhayaash ti lhasvôcoyan. Nintôlhey ja Dios pa aychavalhjayash, tô'lha jô japi nivacle.

24Pa lhechesh pa yit'esha ja Jesús japi t'eyjatsjanjas:

—Papu ca niteetajesh ca nitatvotajyich'e, pa istaa ca nantôvaclulhavne, pa natcum'e yitsha pava caclec lhjunashayijulh ti jaycum'e lha cruz, ca nanjo'yich'esha'ne.*xo* 25Lhayaash papu ca naôytajesh pa lhamônlhajayash pa lhech ti yac'oyesh jayu. Lhan'e vitsha papu ca nitôôlhtajyi ca chinclôntaj, pa yi'van jayu pa lhamônlhajayash.*xp* 26Cha'lhetajesh'apee pa nivacle ca nitsôt'ajesh lhacôm'a na cotsjaat, ca vo'ya lhôn pa lhsôc'ôclit ca nac'oyesh. ¿She t'e taj lhôn pa ca nichenjulh pa nivacle pa lhsôc'ôclit ca nachajlhavne? 27Lhayaash na Nivacle Lhô'sesh ca natpectajeshshicham ja lhatjumtseyash ja Lhtata shi' japi lh'angeles, pa lhecheesh pa ve'lhaa ts'ivee ca nitis'ôcji pan lhjunash pava yisnatesh.*xq* *xr* 28Yijô' ti jayeetshelh'a, ti caaj napi nayie'in yi'nee ti tanca nivafsha'ne yamjey jayu ca nivantajjulh na Nivacle Lhô'sesh ca ninamtajeshicham na lhanvacleyash. #16.24 Mt 10.38; Lc 14.27; Jn 12.24.,#16.25 Mt 10.39; Lc 17.33; Jn 12.25.,#16.27 Mt 25.31;,#16.27 Sal 62.11-12; Pr 24.12; Jer 17.10; Ez 18.30; 33.20; Ro 2.6.

Tanu'jam pa t'aisiyash pa Jesús

(Mr 9.2-13; Lc 9.28-36)

Currently Selected:

San Mateo 16: NIVA

Highlight

Copy