San Mateo 14

1Java lhech nalhus ti tpeeycheyesh ja Herodes, jan lhanvacleesh ja Galilea, ja Jesús, 2pa yit'esha japi yi'jop:

“Jô lhech Juan Vatnayjayash lhavo', nitshaamshi capi vafsha'ne, lhe'naa can tô'yishts'ishi' lhavaatsha cava ninvôôtôyesh.”

3Lhech ja Herodes ti yicheney japi lhcavos ca Juan ca nôcfa' ca nicha'jey lhpa vatvanc'ôcfajayte, tôlh'ejop lhja Herodías, lhch'acfa ja lhch'inish Felipe. 4Ja Juan yit'esha ja Herodes:

“Nintajulhey ti ajayaesh lha lhech.”*xa* #14.3-4 Lc 3.19-20,#14.4 Lv 18.16; 20.21.

5Ja Herodes yentaj ca niclôn ja Juan, taj ti nijovayem japi nivacle, lhayaash ti yitôôysha ti tasinô'yem pa Dios ja Juan. 6Yisnatesh ja Herodes ja lhclôyjayash, yaychavalheshch'e ti nich'a nivat'aj. Pa yich'ôcji lhja lhôse lhja Herodías pa tclôôy'e t'ajuyish papin chit'a'lheyjop. Pa nishamesh jum ja Herodes 7pa yit'esha ti ninclôquiemch'e pava yijutem jayu can t'aalhtajesha. 8Meelh ti yivaclitesh lhja lhamimi ti tasinô'yelh, pa lhechesh pa yit'esha lhjô lhech ja Herodes:

— Anjuteshyiy pa titech ja lhshatech ja Juan Vatnayjayash lhavo'.

9Côque pa yitacshiyanesh'in ja lhcaanvacle Herodes. Taj ti apis ti ninclôquiemch'e pava yit'esha, yipe'yeesh papi chit'a'lhey, pa nôquen lhayaash pa tayôjijanesh ca chinjutey. 10Pa yicheney pa lhcavo lhpa vatôcôclôjiy, pa lhechesh pa yit'ovôsey pa lhshatech. 11Pa yivaclhitesh pa yicha'jey pa lhshatech yanshi' pa titech pa yijutshey lhja lhutsja. Vooy lhjô lhech yijutshey lhja lhamimi.

12Pa lhechesh pa nam japi t'eyjatsjanjas ja Juan pa yichaaj pa lhavu'vat pa tishc'oya. Pa yivaclhitesh pa yichey ts'ivee ja Jesús pa nifaclem côque.

Pa Jesús yicunjansha'ne papi cinco mil

(Mr 6.30-44; Lc 9.10-17; Jn 6.1-14)

13Meelh ti yipe'yach'e côque ja Jesús, pa yich pa ve'lha, yi'shi' lhja vatôvjatshi, pa yamey pa nintanash'e. Taj ti yitô'ya côque japi nivacle pa t'ôs'ejop cotsjaat tôlhey ts'ivee java yitsates. 14Meelh ti t'ôsfach'ee ja Jesús lhja vatôvjatshi, pa yi'van japi acloj nivacle pa tcavts'aclayesh, pa yilhjensha'ne japi aôytes'in ti chiychajey. 15Meelh ti tulh'in pa yit'esha japi t'eyjatsjanjas ja Jesús:

— A'va, nichinôv'e' nan shnôv'e lhapa tulh'in. Achen'in lhacôm'a napi nivacle ca natcashayey pa lhôc.

16Pa yit'esha ja Jesús:

—Istaa ca ya aj ca nôqu'in napuque, acunjanelh avaatsheelh.

17Japu lhech pa yit'esh ts'ivee:

— Caajtajelhyam nava ve'lhanôjesh yucuve shi nava napu' sajech, lhetlhalhtajôôj ampava caelhchaa.

18Pa yit'esha ja Jesús:

— Istaa ca anchajeelhyiy.

19Pa lhechesh pa yiyôjaa japi nivacle ca nôv'ech'esha'ne ja yitjataj. Pa t'acum'e java ve'lhanôjesh yucuve shi' java napu' sajech, pa yovalheychisham pa vôôs pa yijuteychisham pa tishameesh. Pa lhechesh pa nôcôsshisha'ne java lhech pa yijutey japi t'eyjatsjanjas, yijutey yitsha japi nivacle. 20Pa tuj lhacôm'a pa yapeesha'ne. Pa lhechesh pa nit'ôqu'e java lhqu'iyasesh cava yucuve shi' cava sajech, doce java sisenlhiy tapoojqu'esha'ne. 21Japu lhech tuj cinco mil japi nivalce, nichnatsjuulh japi ôcjeclôy shi' japi taôvclas.

Pa Jesús vaclech'apee pa yinôôt

(Mr 6.45-52; Jn 6.16-21)

22Nôjeshch'e atesha côque, pa yiyôjeesha ja Jesús japi t'eyjatsjanjas ca nôcjaam lhja lhôvjatshi ca nôyineyc'oya ts'ivee pacham ja lhjôvcha. Lhan'e pa jôjjeclay vatsevatjop'in japi nivacle ti vaneecjuelhsha'ne. 23Meelh ti tifeshch'e ti vaneecjuelhsha'ne, pa yichey ja Jesús lhja utiyuc, pa lhech yiesh'e pa ve'lha ti t'aalh. C'oya ti tulh'in pa ve'lha ja Jesús. 24Vooy lhja vatôvjatshi yamji lhcachivat ja lhjôvcha. Java usch'e ja yinôôt pa yuquisham'in lhja vatôvjatshi, lhayaash ti t'ajuyjulh ja lhaviim. 25Vooy ti lhavôôjjulh nalhu pa yofiis ja Jesús, t'ôtay'apee ja yinôôt. 26Meelh ti yivanjulh ts'ivee ja Jesús ti vaclech'apee ja yinôôt, pa uj ti nijovayem ts'ivee japi t'eyjatsjanjas pa yafshiyanch'e, pa yit'esh ts'ivee:

— ¡Lhech ca vatsôcôclit'a! 27Pa yiyôjeey ja Jesús pa yitésh:

—¡Acanoeelh; ya lhech, ya aj ca anjovayelh'in!

28Pa lhechesh pa tasinôy ja Pedro pa yit'esh:

—Lhcaanvacle, ca alhechtaja, pa aniyôjiyiy ca javaclech'apee vitsha na yinôôt ca jôc'ay.

29Pa yit'esha ja Jesús:

— Istaa ca anach.

Pa lhechesh pa tayshi lhja vatôvjatshi ja Pedro pa vaclech'apee shta ja yinôôt ti yichtajey ja Jesús. 30Taj ti meelh ti nichavayey pa lhfactsiniyashch'e pa lhaviim pa nijovayshi, pa yichshicham pa tafshiy'in pa yit'esh:

—¡Ats'efen, Lhcaanvacle!

31Pa tatsha ti t'acum'e ja lhpôcôt ja Jesús pa yit'esh:

—¡Tiqu'in na niacacujayasha! ¿Ta lhayaash ti lhatcacujan?

32C'oya ti yicheelhsham lhja vatôvjatshi, pa shan tatsha ja lhaviim. 33Pa lhechesh pa t'acjatsuy'e'shichamch'e t'ajuyiesh ja Jesús japi yi'shi' lhja vatôvjatshi, pa yit'esh ts'ivee:

—¡Yijô' ti alhech a Dios Lhaôs!

Pa Jesús yilhjensha'ne papi aôvtes'in yiey pa cotsjaat Genesaret

(Mr 6.53-56)

34Pa yiche'lheypacham ja lhjôvcha pa yamelhey ja cotsjaat Genesaret. 35C'oya ti nitôfaclesh ja Jesús japi Genesaret lhavos, pa vaneeyjateshch'e lhacôm'a japi lhech yie', pa nicha'jey'in ts'ivee lhacôm'a japi aôvtes'in. 36Pa t'aalhsha ja Jesús ca nivashanem japi aôvtes'in ca natpaccuna ja yôj'esha'ne lhja t'uyjatshiy; pa lhacôm'a japi t'apaccuna pa vatsjansha'ne.

Pava yisasiyan pa nivacle

(Mr 7.1-23)

Currently Selected:

San Mateo 14: NIVA

Highlight

Copy