San Mateo 10

1Pa lhechesh pa tôney ja Jesús japi doce t'eyjatsjanjas, pa yijutey pa t'unaj jaspa nisaasfach'ee pava tsich'es, pa yilhjensha'ne japi aôytes'in lhacôm'a jap'elh nalhjunash'in ja t'aôyteyash.

2Cavôque lheyis japi doce Jesús t'eyjatsjanjas: Ja vatjutsa', Simón, lhanquey shta Pedro, shi' ja lhchinish Andrés. Ja Jacobo shi' ja lhchinish Juan, japi lhech lhclesesh ja Zebedeo. 3Ja Felipe, ja Bartolomé, ja Tomás shi' ja Mateo, jô lhech yivoyanesh pava lhpesoc pa lhcaanvacle. Ja Jacobo lhô'sesh ja Alfeo; ja Lebeo, lhanquey shta Tadeo. 4Ja Simón, tôlha japi Cana lhavos; shi' ja Judas Iscariote, jô lhech nifac jayu ja Jesús.

Pa Jesús yichen'in papi lhech doce t'eyjatsjanjas jaspa vanqu'eyjatsjan

(Mr 6.7-13; Lc 9.1-6)

5Yichen'in ja Jesús japi lhech doce pa yit'esh ti yiyôjaa:

—Ya aj ca meelhey java yie' japi nijudiosa. Ya aj ca meeelhsham java lhavtsates japi Samaria lhavos. 6Meelhey java tashinshtas vacuclônvatsham'in tôlhshaam japi Israel lhcles. 7Meelhey ca anfacle'lhem ti shalhac'oya ja lhanvacleyash ja Dios. 8Avatsjanchatelh papi tashtôtaysha'ne shi' pap'elh nalhjunash'in aôytes'in. Anenjatelhchisham shta capi vafsha'ne. Asa'selhfach'ee shta java tsich'es. Chinatisshelh nôque vat'unaj, pa ya aj ca chinshayanelh'am ca acuumtajeshelh'in.

9Ya aj ca acha'jelh pa oro, shi' pa nôcshi' clesanilh shi' peelh côjiyaj clesanilh. 10Ya aj na shta pava ayiyelh t'ajuya pa nôyish. Ve'lhaa navan t'uyelhch'e, ya aj ca acha'jelh nava acfiyiselh. Ya aj na shta pa avcôjat'elh; lhayaash ti isjop ti chiyjutey pa vatcumjayash lhavo' pa vatôc.#10.10 1 Co 9.14; 1 Ti 5.18.

11Meelh ca amtajelhey pa yitsaat pa avoolhey pa ve'lha nivacle chitô'ya ti issha'ne pa amônlhaeelhjop amjelhey ca anôcjayutajelh. 12Ca môtajelh'ôcji pa acjueelh pa at'eshelh: “Piiy nôque jpôyich,” 13Ca nicaajtaj papi piiy, lhech papi lhech t'acuumjulh jayu pa vat'aacjujunjayash; vooy ca amtaja, pa napecl'am jayu pa acjujunjayashtaj. 14Ca nichintôntajeelh'ach'e, shi' ca ninteetajeesh shta ca nach'anelh'a pa istaa ca ayishlhaaelhc'oya pa lhech jpôyich shi' pa yitsaat, pa asichateshelh nava afoclelh pa cotsjaat.*xz* 15Yijô' na jayeetshelh'a, pa cat'eelhtajeesh ca namtajey pa nalhu ca chinasclantajch'e lhacôm'a napi yie' na cotsjaat, pa ujesh ti chiyclôyit jayu papi nintônelh'ach'e, ya'sheshc'oya papi Sodoma shi' papi Gamorra lhavos.*xa* #10.14 Hch 13.51.,#10.7-15 Lc 4.10-12.,#10.15 Gn 19.24-28; Mt 11.24.

Pa vatcachanjayash

16“¡A'va! C'achenelh avaatsheelh ajunashelhjulh java tashinshtas ti chiychensham pava cajovonjatas. Istaa ca ajunasheelhjulh pava tosis tcajôyshay, taj ti ajunasheelhjulh jan lhjunash java ofos ti nisuya.*xc* 17Anujumatsenelh'avach, lhayaash ti nacha'jelhey jayu papi nivacle papi lhcaanvacles, pa nac'onelh'in jayu yiey java vatvanqu'eyjatsjanjavtes. 18Pa chinacha'jelhey jayu shta papi us lhcaanvacles, lhayaash ti tôlhyiyijop. Pa lhech'e jayu ti lhasfacle'lhem, pa lhasfaclelhem jayu shta papi nijudiosa. 19Ca lhech lhayaashtaja ca chinachaajtajelhey papi us lhcaanvacles, pa ya aj ca atanapunshelh pa ca eetajeshelh ca aculhjantajelh; lhayaash ca namtajeyjop pan t'ôplhaa ti lhtasinôyelh jayu, pa neyjatsjaneshelh jayu ja Dios pava lhteetshelh jayu. 20Lhayaash ti tanca alhecheelh ca asinô'yelh, vooy ja lh'Espiritu ja Atataelh tasinôyelh'am jayu.#10.16 Lc 10.3.,#10.17-20 Mr 13.9-11; Lc 12.11-12; 21.12-15.

21Caaj jayu papi tayôjijanesh papi lhavelhavot ca chinclôn, lhech jayu lhjunash shta papi lhnavot tayôjijanesh papi lhcles ti chiyclôn. Vooy papi vatacles t'ajuyjulh papi lhnavot pa yit'esh ti chiyclôn.*xe* 22Lhacôm'a papi yie' na cotsjaat ti nacônitshielh jayu, lhayaash ti tôlhyiyijop. Taj papu ca nifiiytajeshlhtapee pa namjeylhac'o java nalhus, japu lhech ti chinalhjen jayu.*xf* *xg* 23Ca nicaajtaj papi tanachanelh'ash yiey pa ve'lha yitsaat pa acumajelheyc'oya peelh yitsaat. Yijô' ti jayeetshelh'a ti tanca atifshelh'e lhacôm'a java yitsates yiey ja lhcootsjat japi Israel lhcles, pa nam jayu na Nivacle Lhô'sesh. #10.21 Mr 13.12; Lc 21.16.,#10.22 Mt 24.9; Mr 13.13; Luc 21.17.,#10.22 Mt 24.13; Mr 13.13.

24Ampa vat'eyjatsjanach'a ca nash'apee pa yeyjatsjan, ampa shta ca vatcavoa ca nash'apee pa lhanvacle.*xh* *xi* 25Tajulhe'mey pa vat'eyjatsjanach ca nijôneshch'e pan yeyjatsjan, shi' pa vatcavo tajulhey ca nijôneshch'e pa lhanvacle. Ca chineytôntajesh pa lhanvacleesh pa jpôyich pa Beelzebú, ya'shesh jayu ca chineytônesh papi ve'lheelhsham.#10.24 Lc 6.40.,#10.24 Jn 13.16; 15.20.,#10.25 Mt 9.34; 12.24; Mr 3.22; Lc 11.15.

Ta yie' papu ca nitanjovayey

(Lc 12.2-7)

26Nôquen lhayaash, ya aj ca anjova'yelhem papi nivacle. Lhayaash ti ampa ca chinp'oe ca jaspa ninô'cla, ampa shta ca chinfiich pava nichintôôytaja.*xk* 27Nava janfaclelh'am ti tulh'in, istaa ca anfaclelhem jap'elh ti nalhuey. Nava janfaclelh'am shta ts'am, istaa ca asitseneshelh ca anfaclelhem jap'elh yiey pa lhcaavju. 28Ya aj ca anjova'yelhem papi yiclôn na vatvuvaat, taj pa vatsôc'ôclit sasemjop ca niclôn; anjova'yelhem jô papi yiclôn na vatvuvaat shi' shta pa vatsôcôclit ti yu'jam pa itôj. #10.26 Mr 4.22; Lc 8.17.

29¿Lhchenelhjulh t'e lhpa tinshanja pava napu' ajôclôs? Taj ti tanca ve'lhaa pa ajôclô ca nancôôtsha'ne ca ninteetajeesh ja Atataelh. 30Chiyitsjuulh shta lhacôm'a nava aye'selh yiesh nava ashatjeselh. 31Ya aj ca anjova'yelh'in; lhayaash ti t'ashelhc'oya pava acloj ajôclôs.

Papi ninvapenesh pa Jesucristo ti yitôyjata pap'elh

(Lc 12.8-9)

32Lhacôm'a papi ninvapeneshyam ti yitôyjatyi pap'elh, yivaatsha shta pa tanca vapeneshem ca jaôtajesh'e t'ajuyish ja Tata yi'shi' ja vôôs. 33Taj ti vooy papi vantanyishc'oya pap'elh, yivaatsha shta javapeneshem jayu ca jaôtajesh'e t'ajuyish ja Tata yi'shi' ja vôôs.#10.33 2 Ti 2.12

Tôlha pa Jesús ti yicatsônjat papi yiey na cotsjaat

(Lc 12.51-53; 14.26-27)

34Ya aj ca alheclôjeshelh ca nichaaj pa vataasclanjayashvatjulh yiey na cotsjaat. Am, ninchaaj pa vatcanoyash vooy pa vatjuyjayashvatjulh janchaaj. 35Janam jaspa t'ajuyjulh pa vataôs pa lhtata, lhpa vatôse t'ajuyjulh lhpa lhamimi, lhpa vatômtee t'ajuyjulh lhpa lhcact'e. 36Pa nôque lhjunash nilhtac'utsfasa papi ve'lhasham.#10.35-36 Mi 7.6.

37Papi ya'sheshyic'oya ti yen pa lhtata shi' lhpa lhamimi pa sasjop ca nastsôt'ajesh; shi' papi ya'sheshyic'oya ti yen pa lhaôs shi' lhpa lhôse pa sasjop ca nastsôt'ajesh. 38Vooy papi ninatcum'e pava cacleclem ca nitatvotajyich'e, nan lhjunash lha yicruz, pa sasjop ca nastsôt'ajesh.*xn* 39Papi yeetajesh ca ninilhjenesh pa lhamônlhajayash pa yac'oyesh jayu. Vooy papi chinjôclesh pa lhamônlhajayash ti tôlhyiyijop papi lhech vanilhjenesh jayu.*ñ* #10.38 Mt 16.24; Mr 8.34; Lc 9.23; Jn 12.24. #10.39 Mt 16.25; Mr 8.35; Lc 9.24; 17.33; Jn 12.25.

Pava vats'ôtes

(Mr 9.4)

40Papi t'acum'ajulh, pa t'acuumyijulh, papi t'acuumyijulh pa t'acuumjulh shta jan tsichen.*xo* *xp* 41Papi t'acuumjulh pa chiytôyjata pava ti vaclan pan nichen ja Dios, pa lhech chiyjutey jayu shta pava lhashac jan lhjunash pa chiytôyjata pava ti vaclan. Vooy papi t'acuumjulh pa nivacle yivo'yeshch'e, lhayaash ti yivo'yeshch'e, pa lhech chiyjutey jayu pava lhashac jan lhjunash papi yivo'yeshch'e. 42Pa ca naôtaj'e papu ca nijutajeshey pa tacfeey pa yinôôt c'uyshi' papi tiquicsha'ne ti ts'ofiis, pa lhech yijô' ti tanca amaemc'oya jayu pa lhasha'. #10.40 Lc 10.16; Jn 13.20.,#10.40 Mr 9.37; Lc 9.48.

Papi lhcachenjas pa Juan, Vatnayjayash lhavo'

(Lc 7.18-35)

Currently Selected:

San Mateo 10: NIVA

Highlight

Copy