San Lucas 23

1Pa lhechesh pa lhacôm'a ti nitshamch'e, pa yicha'jey ts'ivee pa Jesús pa Pilato. 2Lhech yie' ti tfacjanem pa yit'esh:

—Javanelh nôque nivacle ti yeetajesh ti natjôcjanesh napi catsichifas. Lhayaash ti yit'esh ca nichinjuta'ey pa lhcaanvacle vancavoyanesh pava lhpesoc, yit'eshlhavne ti Cristo lhavaatsha, uj lhcaanvacle.

3Pa lhechesh pa niyôs pa Pilato pa yit'esh:

—¿Avaatsha lhanvacleash napi judíos?

Pa yicuulh pa Jesús pa yit'esh:

—Lhjunashjulh can lhteesh na.

4Pa lhechesh pa yit'esha pa Pilato papi lhanvaclesesh papi vatcasinôc shi' pant'ajôôj pap'elh nivacle:

—Nipe'yeesh pa ca ve'lhaa ca ninvo'yeeshch'e nôque nivacle.

5Taj ti papi lhech pa yijô' ti yisitsenesh ti yit'esh:

—Yijô' ti tjôcjanesh lhacôm'a japi Judea lhavos eem ti yeyjatsjanesh cava lhavanqu'eyjatsjanôc. Tôlhesh'e ja Galilea pa nôque namesh'e shta.

Pa Jesús yie' t'ajuyish pa Herodes

6Meelh ti yipe'yach'e cavôque pa Pilato, pa niyôsesh ti tôlhesh'e ja Galilea pa lhech nivacle. 7Meelh ti yicu'lhesh ti yit'esh: Jech, pa lhechesh pa yicheney pa Herodes, pa lhech lhcaanvacleesh yie' ja Galilea, taj ti java lhech nalhus yiey shta ja Jerusalén. 8C'oya ti yi'van pa Herodes pa Jesús, pa uj ti nishamesh; lhayaash ti cajuqu'e ti yeetajesh ca ni'van, yipe'yeesh'in papi yasinôquiesh'in. Nôquen lhayaash yeetajesh ca nivanesh vitsha pa lhfanishlhavach'in lhasnôyech. 9Vooy pa lhech cajuqu'e ti niyôstajesh'in taj ti pa Jesús nincuulh t'ôyish'e. 10Lhech yie' shta papi lhanvacles papi vatcasinôc shi' papi vanqu'eyjatsjanesh pava lhfanishlhavach, papi lhech uj ti vat'suyinatesh ti tfacjanem. 11Pa lhechesh pa yiclôqui pa Herodes shi' papi lhcavos pa yinvacle'matan'in, yiclôquiesh shta pava isis vat'uyjatshiyis ti yuyjatch'e, jan lhjunash pa uj lhcaanvacle. Pa lhechesh pa ve'lheesh yachajey pa Herodes pa Pilato. 12Côque nalhu lhtac'utsfaselh pa Pilato pa Herodes; vooy jav'elh nalhus nilhtac'utsfasa.

Pa Jesús chitculhjanesh ca nivaf

(Mt 27.15-26; Mr 15.6-15; Jn 18.39—19.16)

13Pa lhechesh pa nayjatva'ne pa Pilato papi lhanvaclesesh papi vatcasinôc shi' pap'elh lhcaanvacles shi' papi vatcavos, 14pa yit'esh:

—Avaatsheelh lhanchajeelhyi nôque nivacle, lhteetshelha ti tjôcjanesh napi nivacle; taj ti yivaatsha janiyôstajesh'in ti yie' ajuyishelh, niype'yeesh pa ca ve'lhaa java lhteetshelha ca ninvo'yeeshch'e. 15Ninpe'yeesh shta ja Herodes, nôquen lhayaash chinachajyi. Nivan pa ca lhjunasha pa ca nitôlhejop ca chinclôn. 16Jac'ôn'in jayu atesha pa januqueesh jayu.

17Lhayaash ti lhech lha lhjunash'in ti yamey'in ja chivatc'usinatesh'in pa chinuqueesh'in papi ve'lha vanôôcfaan. 18Taj ti lhacôm'a pant'ajôôj ti yisitsenesh pa yit'esh:

—¡Ya aj lhee na lhech! ¡Vooy ja Barrabás anuqueeshelhyam!

19Pa lhech Barrabás chiychajey lhpa vatvanc'ôcfajayte, lhayaash ti yefenesh papi vapecva'neen ti vatcônitshi pa yiclôn pa ve'lha. 20Vooy pa Pilato yeetajesh ca nuqueesh pa Jesús, pa lhechesh pa ve'lheesh tasinôy shta. 21Taj ti papi lhech ujesh ti tônesh'in pa yit'esh ts'ivee:

—¡Aclônesh'e lhpa cruz! ¡Aclônesh'e lhpa cruz!

22Pu'janaesh ti yit'esh pa Pilato:

—¿Ta lhjunash pa niysa' ti yisnatesh na Jesús? Nivan pa ca tôlh'ejop ca chinclôn. Jaclôyit jayu atesha pa januqueesh jayu.

23Taj ti papi lhech pa yijô' ti yisitsenesh ti t'aalhsha ca chinclôn; pa uj ti tônesh'in papi lhech shi' papi vatcasinôc lhanvacles pa jaspa chiyvashanem. 24Pa lhechesh pa yu'eshch'e atesha pa Pilato pava chit'aalhsha. 25Pa chinuqueesh pa nivacle pan chit'apaya tatsha, pa lhech yie' lhpa vatvanc'ôcfajayte, lhayaash ti yefenesh lhapesh papi vapecva'neen ti vatcônitshi. Vooy pa Jesús chiyjutey papi nivacle jaspa yisnatshem pan t'ônashesh ts'ivee.

Pa Jesús ti chiyclônesh'e lhpa cruz

(Mt 27.32-44; Mr 15.21-32; Jn 19.17-27)

26Meelh ti chiychaaj pa Jesús pa chiyclônesh'e lhpa cruz, pa vatcutelhvach pa ve'lha nivacle pa lhey José, Cirene lhavo', tô'lhey pa joot. Pa lhech chit'acum'ejop pa chiyôji'sha ti tilho'jem pa Jesús lhpa cruz.

27Acloj papi tanaôycheelh nivacle shi' papi ôcjeclôy, pa uj ti yipvatsham'in pa tafshiyvatsham'in shta, lhayaash ti yitacshina ts'ivee. 28Pa yovalhey pa Jesús pa yit'esh:

—Ocjeclôy, Jerusalén lhavoquey, ya aj ca ats'ôyanelh, anôyanelh'avne avaatsheelh shi' papi acleselh. 29Lhayaash ti nam jayu pava nalhus ti chiyit'esh jayu: ‘C'usemvatsham'in papi ôcts'ôtachey, papi nive'lhaaesh ca nituma shi' pava t'ajtey ti ninvancafitsjanesh.’ 30Pa lhechesh pa yit'esha jayu papi nivacle pava uticuy: ‘¡Afalhelhyitapee!’, pa yit'esha jayu shta pava uticuy lhcles: ‘¡Ap'oelhyitapee!’.*xu* 31Lhayaash ti lhech lhfanisheeshem jayu lhpa aacjiyuc cojiyajsham, ¿naô t'e pa lhfanisheeshem jayu lhpa aacjiyuc yic'utsjan? #23.30 Os 10.8; Ap 6.16.

32Chiychajeelhvatjuulh papi napu' vôncaclônjanjas jaspa chiyclôneelh pa Jesús. 33Meelh ti yamey lhpa utiyuc lhey Vatôtôj, pa chiyclônesh'e pa Jesús lhpa cruz shi' papi napu' vancaclônjanjas: ve'lha pa yiey lhfayish vooy paelh yiey lhch'amiyish. 34Meelh ti vacalhesh ti chiyiclônesh'e lhpa cruz pa Jesús pa yit'esh:

Tata, avômjatemch'e, lhayaash napi lhech nintô'yish pa ca nasnatesh. Vooy papi c'afoquelhay yueshjop ts'ivee ti vatvoyjateshôcji pa yie' papi yiey jayu pava t'uyjatshiyis pa Jesús.*xv* 35Papi lhech yie'jop nivacle pa yovalhsha'nevatam, jô'tajesh papi lhcaanvacles yinvaclematan, pa yit'esh: #23.34 Sal 22.18.

—Yiyôych'een pap'elh ti yilhjen, pa ninilhjen shta lhavaatsha nôqueesh, ca yijô'taja ti lhech pa Cristo ti nichen pa Dios.

36Lhech lha t'ônasha shta papi c'afoquelhay ti yinvaclematan pa nicaaysuyeesh'in, pa tac'uytajesha ca niyôjayanshi pa cumjôtajesh nivayshi, 37pa yit'esha:

—Ca alhechtaja ti yijô' ti Lhanvacleash napi judíos, pa anilhjen.

38Pa chiyinesh lhpa cruz pa vatqu'isjayanach lhatôj'e pa Jesús. Chiyisesh'e pa lhcliish pa griego, pa latin shi' pa hebreo, pa yit'esh: “Nôque Lhanvacle napi judíos.”

39Ve'lha pa vôncaclônjanaj, chiyinesh shta lhpa cruz, yijuvanesh'in pa Jesús pa yit'esh:

—Ca yijô'taja ti a'lhech ti a Cristo, pa anilhjen yiin, pa atsilhjenelh shta.

40Vooy paelh t'iyôyjafa yishantesh pa yit'esha:

—¿Naanjovayem pa Dios, ti ve'lhasham na catsinclôyitsjayashelh? 41Vooy casvaatsha uj ti yijô' ti lhech catsinfanash, lhayaash ti tôlh'ejop pa sasch'e ti shtasnatesh; taj ti nôque nivacle nive'lhaa pa ca sasach'e ca nasnatesh.

42Pa lhechesh pa yit'esh:

—Jesús, anaychavalhyiy ca amtajey pa avtsateyish.

43Pa yicuulh pa Jesús pa yit'esh:

—Yijô' ti jayeesh'a, nôqueesh shtatanôycheey jan yie' capi vafsha'ne, ja lhey paraíso.

Pa lhavafi pa Jesús

(Mt 27.45-56; Mr 15.33-41; Jn 19.28-30)

44Palha yamey lhnalhcachivat, pa lhechesh pa tulh'e na cotsjaat yamja ti tanjuyshicham na jumcuclaay. 45Tulhey na jumcuclaay, vooy pa vatishjajavat pan chiyp'oevatjulh pa yic'assham lhcachivat.*xw* 46Pa lhechesh pa tôn'in pa Jesús pa yit'esh:

—¡Tata, acumesh'e java apôcôtôy na yisôc'ôclit lhshayc'u! Meelh ti yit'esh côque pa vaf.#23.45 Ex 26.31-32; 2 Cr 3.14.,#23.46 Sal 31.5;Hch 7.59.

47Meelh ti yi'van côque pa lhcaanvacle tô'lha pa Roma, pa yôclôj pa Dios pa yit'esh'in:

—Uj ti yijô' lhavaatsha, nôque nivacle yivo'yeshch'e.

48Lhacôm'a papi nivacle ti yi'van cavôque pa yipôcôj'e t'oot pa vapequ'in. 49Taj ti lhacôm'a papi nitôfaclesh pa Jesús shi' papi ôcjeclôy tanaôycheelh tôlh'e' ja Galilea, taj ti tojey pa vatsavat'ejop ti yovalhey pava matas.#23.49 Lc 8.2-3.

Chiyp'o'e pa Jesús

(Mt 27.57-61; Mr 15.42-47; Jn 19.38-42)

50Caaj pa ve'lha nivacle yivo'yeshch'e, pa lhech nôque lhey José tô'lhey pa Arimatea, ve'lheelhch'e ja Judea. Pa lhech ve'lheelhsham papi us lhcaanvaclesesh papi judíos. 51Pa lhech José tach'anc'oya pa Dios lhanvacleyash ca namtaj. Pa lhech nint'ujanesh pava yit'esh pap'elh lhcaanvacles. 52Pa lhech nivacle yichey jaspa yi'van pa Pilato pa t'aalhsha pa lhavu'vat pa Jesús. 53C'oya ti niclanesh'e lhpa cruz, pa yiclôpjalheshch'e pa sivôclôclhayeech pa yanch'e' pa nivalhech yi'shi' lhpa utiyuc, yiey pa nive'lhaaesh ca chinan'e' papu ti vaf. 54Pa lhech nalhu ti chiyisclanshaneen pava chiyjuyjata pa vat'ichashiy, lhayaash ti isc'oya ca nama.

55Papi ôcjeclôy tanaôycheelh pa Jesús tôlh'e ja Galilea, yichey shta pa yi'van pa nivalhech jaspa yitô'yey pa chiyan'e' pa lhavu'vat. 56Meelh ti vapecley pa lhajpôyich pa yisclanesha'ne pava vatshachivos shi' pava lhapec, pa t'ichay ts'ivee, lhayaash ti yama pa nalhu ti chit'ichayshi, jan t'ônash java vatyôjijates. #23.56 Ex 20.10; Dt 5.14.

Pa lhneetshamjayash pa Jesús

(Mt 28.1-10; Mr 16.1-8; Jn 20.1-10)

Currently Selected:

San Lucas 23: NIVA

Highlight

Copy