San Lucas 22
22
1Shalhee ja chivatc'usinatesh'in ti chituj pava yucuvec ameyshi pa yic'ap'ofiyanshi, lhanquey shta Pascua.*xk* 2Pa lhechesh pa tanaychavalhtajesh pa ca lhfanishaesh ca niclôn pa Jesús papi vatcasinôc lhanvacles shi' papi vanqu'eyjatsjanesh pava lhfanishlhavach, taj ti nijovayem papi nivacle. #22.1 Ex 12.1-27; Dt 16.1-8.
3Pa lhechesh pa yich'e' pa Satanás pa Judas, lhey shta Iscariote, pa lhech tô'lha japi doce vat'eyjatsjanjas. 4Pa lhech yichey papi lhanvacles papi vatcasinôc shi' pap'elh lhcaanvaclesesh pa vatishjanjavat, pa yasinôquivatam pa ca lhfanisheesh ca nôcfa' pa Jesús. 5Nishamesh ts'ivee pa nifaclem ti yijutey jayu pava pesoc pa Judas. 6Vooy pa lhech t'acuumjulh pa yaychavalhey pa ca lhfanisheesh ca natcufaaytajesh pa Jesús ca amtaja papi nivacle.
Pa lhtsaccunjayash pa Lhcaanvacle
(Mt 26.17-29; Mr 14.12-25; Jn 13.21-30; 1 Co 11.23-26)
7Yamjam ja nalhu ti chituj pava yucuvec ameyshi pa yic'ap'ofiyanshi, lhech t'aplhuqu'e ti chiyclôn pa tashinshtaj pascua t'ajuya. 8Pa yichen pa Jesús ja Pedro shi' ja Juan pa yit'esh:
—Meelh clap ca asnatshelhyam pa vatôc t'ajuya ja pascua.
9Niyôsesh ts'ivee pa yit'esh:
—¿Ta yie' pa lhteetajesh ca yisnatshelh'e pa vatôc?
10Pa yicuulh pa Jesús pa yit'esh:
—Meelh ca amtajelhsham ja yitsaat, pa lhcuteshelh jayu pa ve'lha nivacle vat'acjuesh lhpa lhôjque. Lhech jô lhech amjelhey pa jpôyich yiey pa ca nuytaj'e. 11Pa at'eshelha pan yitsôt'ajesh pa jpôyich: ‘Yit'esh'ay ja Vanqu'eyjatsjan: ¿Ta yie' pa lhtôvash pa jpôyich jôveshelh'ôcji jayu napi yeyjatsjanjas ca jatujelh'e pa vatôc pascua t'ajuya?’ 12Lhechesh pa natpayelhaam pa lhtôvash c'atsaj'ôcji tojquisham shta, apis ti chiyisclan'ôcji; lhech jô lhech asclanelh'esha'nec'oya pa vatôc.
13Japu lhech pa yichvatich'e pa yi'van lhacôm'a pan t'ônasha pa Jesús, pa tatômjalheshc'oya ts'ivee pa vatôc pa pascua.
14Meelh ti yameyjop pan lhc'ôplhuesh, pa yi'sha'nejop pa Jesús shi' japi t'eyjatsjanjas pa vattsaccunjavat. 15Pa lhechesh pa yit'esha pa Jesús:
—¡Uj ti jayeesh ca shtatuj na vatôc t'ajuya na pascua, lhayaash ti pa lha yu'jac'oya pa yivafi! 16Lhayaash ti jayeetshelhaam ti tanca t'ôyisheey ca tuj, vooy pa cat'eelhtajeesh ca nôfiistajch'e ja Dios lhanvacleyash.
17Pa lhechesh pa t'acum'e pa t'iyôjatshiy, pa t'aalh pa yit'esh:
—Acuumjelhyijulh nôque ca atatcôyôjelh; 18lhayaash ti jayeetshelhaam ti tanca t'ôyisheey ca yiyô'ji ja t'i' java ôtjayetas, vooy pa cat'eelhtajeesh ca namtaj ja Dios lhanvacleyash.
19Pa yivaclhitesh côque pa t'acum'e shta lhpa yucuve, pa t'aalh pa yic'asatsha'ne pa yijutch'e pa yit'esh:
—Nôque yivu'vat, na lhech chiyjutelh'am avaatsheelh. Asnatshelh navôque jaspa anaychavalhelhyich'e.
20Lhech lha lhfanishesh shta pa t'iyôjatshiy ti yivaclhitesh ti tsaccunch'e, pa yit'esh:#22.20 Jer 31.31-34.
—Nôque yiyôjatshiy tôlh'ejop ti nich'a lhnôôcfeeshelhsham nava yivoyey, lhayaash ti nitonelhsha'neam jayu.
21Taj ti nôqueesh na nivacle ti vanqu'eeyjatyish jayu nan javancufanelh'apee na vattsaccunjavat.*xm* 22Vooy na Nivacle Lhô'sesh pa natjuyey na nôyish nan chinôclitem, taj ti ¡shiya'lhavach na nivacle nan vanqu'eeyjatyish! #22.21 Sal 41.9.
23Pa lhechesh pa taniyôseshch'evatam pan yie' papi vanqu'eeyjatesh jayu.
Pa yie' papi ya'shesh pa lhjunash
24Pa lhechesh pa taniyôstajesh ts'ivee pa ca nôv'e' papu ca na'shesh pa lhjunash.*xn* 25Taj ti yit'esh pa Jesús: #22.24 Mt 18.1; Mr 9.34; Lu 9.46.
“Papi us lhcaanvacles tayôjijan'in atesha, vooy pap'elh lhacaanvacles yit'eshlhavne ca nivo'yeshch'e pava lhfanishlhavach.*xñ* #22.25-26 Mt 20.25-27; Mr 10.42-44. 26Vooy avaatsheelh ya aj ca lhech ajunasheelh; papu ca nashjatajeshelh'ac'oya pa lhjunash pa isjop ca achajelhey ti taôvclajesh, vooy na tayôjijan'in isjop ca ajônelhey papi ti chiycumjat.*xo* 27¿She t'e papi yaash napuque, lhet nataney na t'ajuy'apee na vattsaccunjavat ti tsaccun, ja't'ajesha ca lhecha nan yisnatshem pa lhôc? ¿Ni lhecha na yi'jop na vattsaccunjavat? Taj ti yivaatsha ti jôvelh'ajop pa jaycumelh'am'in.#22.26 Mt 23.11; Mr 9.35.,#22.27 Mt 20.28; Mr 10.45; Jn 13.12-15.
28Avaatsheelh yajatesh ti amônlheelhyijop ti tsitsic'alhtanaan. 29Nôquen lhayaash jajutelh'ay na vatavtsateyish, jan lhjunash ja Tata ti nijutyiy, 30pa jaspa atsaccunelh'e pa ayôelh'e shta na vattsaccunjavat yiey na yivtsateyish, jaspa lhôvelh'e jayu shta java lhasnôyjes vatc'oovtes pa asclane'lhemsha'ne japi doce ve'lheelhsham ja Israel.#22.30 Mt 19.28.
Pa Jesús nifac ti vantanesh jayu pa Pedro
(Mt 26.31-35; Mr 14.27-31; Jn 13.36-38)
31Yit'esh shta pa Lhcaanvacle:
—Simón, Simón, t'aalhelh'a ja Satanás ca natôschatelh jan lhjunash ja trigo; 32taj ti yivaatsha palha ti jayalh'am jaspa tanca amac'oya pa niacacujayasha. Avaatsha ca atpectajyiy pa aniyitem papi avelhavot.
33Pa yit'esh ja Simón:
—Lhcaanvacle, javatvaclhit ca shtatanôychi ca môtajey lhpa vatvanc'ôcfajayte, secl'esh ca shtavafvatjuulh.
34Pa yit'esha pa Jesús:
—Pedro, jayeesh'a tatsha nôqueesh, jôjjeclay jayu nint'eyshey pa votôjôj ca p'alha ca pu'janaaesh ca avaantanyish ca niantôfa'clayish.
Shalheemjulh pan t'aplhu' ti uj ti chiyc'alhtanesh
35Pa lhechesh pa niyôs pa Jesús:
—Vooy jav'elh nalhus ti c'achenelh'in nic'achajchiyinshelh'in java avonsaclelh shi' java apesojiyiselh shi' java acfiyiselh, ¿caaj pa amelhc'oyaam?
Pa yit'esh ts'ivee:
—Ama.#22.35 Mt 9.9-10; Mr 6.8-9; Lc 9.3; 10.4.
36Pa lhechesh pa yit'esha:
—Taj ti nôqueesh vena lhjunash, napi caaj nava lhavonsac, istaa ca acha'jelh, shi' shta nava apesojiyiselh; vooy napi ampa lhclesataja, istaa ca nuyjat'ôcji nava t'uyjatshiyis. 37Nôque jayeetshelh'a jaspa nôfisch'eyam ti lhech t'ônashesh nava Vani'sesh'e: ‘Jô lhech chiyu'elhvatsham papi niysisasha'ne.’ Lhacôm'a nava tsits'isesh'e ti yôfisch'eyam jayu.#22.37 Is 53.12.
38Pa lhechesh pa yit'esha ts'ivee:
—Lhcaanvacle, navôque napu' clesatas.
Pa yicuulh pa yit'esh:
—Tajulhsham.
Pa Jesús ti t'aalh yiey lhpa Getsemaní
(Mt 26.36-46; Mr 14.32-42)
39Pa lhechesh pa yich pa Jesús t'ajuyey lhja utiyuc yie' ja Olivochat, pan lhjunash ti yifayjanesh ti yajatesh ti yichey'in tanaôycheelh shta japi t'eyjatsjanjas. 40Meelh ti yamey lhjô lhech pa yit'esh: A'lhelh, secl'esh ca ninameelh'a pa vatc'alhtanjayash.
41Pa lhechesh pa tac'uy pa Jesús pan t'ôplheey lhpa utej ti chiycacha'yesh, pa t'acjatsuyshicham pa t'aalh. 42Pa yit'esh: “Tata, ca eetajesh, pa atsilhjenesh nan tsitsic'alhtanesh'in; lhech jan t'acônash ja t'apôôy vatyôjatshiy. Taj ti ya aj ca nitôlhyiy pa ca yisnatesh vooy avaatsha nitôlh'a.”
43Pa lhechesh pa nam pa ve'lha ángel tôlhey pa vôôs jaspa yunitjat. 44Meelh ti yamjam pa uj lhanclôyitsjayash, pa vaniyit ti t'aalh, pa natsha'ne ti lhavcu'jesh pava lhavoyey pa niton'een na cotsjaat.
45Meelh ti yivaclhitesh ti t'aalh pa nitshaam, pa yichey japi t'eyjatsjanjas, taj ti yimôqu'esha'ne japi lhech, yimôjayan pa lhtacshinjayash. 46Pa lhechesh pa yit'esha:
—¿Ta lhayaash ti lhamôelhch'esha'ne? Aneelhchisham ca a'lhelh, jaspa tanca namelh'a pa vatc'alhtanjayash.
Chiyôcfa' pa Jesús
(Mt 26.47-56; Mr 14.43-50; Jn 18.2-11)
47Jôjjeclay tasinôy'in pa Jesús ti yamey papi acloj nivacle. Jô lhech jan lhey Judas, tô'lha japi doce vat'eyjatsjanjas, vanôyinc'oya papi lhech pa yichey pa Jesús jaspa yifinsham lhashi. 48Pa lhechesh pa yit'esha pa Jesús:
—Judas, ¿lhavanqu'eyjatesh na Nivacle Lhô'sesh ti lhfinsham lhashi?
49Meelh ti yi'van cavôque japi lhech yi'jop pa Jesús pa niyôsesh ts'ivee pa yit'esh:
—Lhcaanvacle, ¿tajulhey ca jaycumelh'e nava clesatas ca jayjuyeelhjulh?
50Vooy ja ve'lha yifa'shey lhpa lhfayishey lhacfe' pa lhcavo pa uj lhanvacleesh papi vatcasinôc. 51Taj ti yit'esha pa Jesús:
—An'ate; junashlhaa.
Pa lhechesh pa yicôt'at'e pa Jesús pa lhacfe' pa lhech vatcavo pa vatsjanesh. 52Pa yit'esha pa Jesús papi lhanvaclesesh papi vatcasinôc shi' papi lhanvaclesesh ja vatishjanjavat shi' papi nitaôvclasaesh lhcaanvacles, papi lhech nachey jaspa yichaaj:
—¿Lhnamelh pa lhcha'jelh nava aclesataselh shi' nava yeclôy, ya vôncaclônjanaj nataney? 53Java nalhus yamônlheelh'ajop ti yiey ja vatishjanjavat pa tanca acumelhyi; nôqueesh nam na t'aplhu' ti natsôt'ajeshelh nan tô'lha ja lhanvacleesh na tulh.#22.53 Lc 19.47; 21.37.
Pa Pedro vantanesh pa Jesús
(Mt 26.57-58, 69-75; Mr 14.53-54, 66-72; Jn 18.12-18, 25-27)
54Pa lhechesh pa t'acum'e vatam pa Jesús pa yicha'jey pa lhajpôyich pa lhanvacle papi vatcasinôc; vooy ja Pedro yijoqu'esha'ne. 55Yilhônshi lhcachivat pa itôj pa clayôych'e, pa yich'esha'nejop ts'ivee. Pa yi'sha'nejop shta ja Pedro. 56Meelh ti yi'van lhpa ve'lha vatcavoque ti yi'sha'nejop pa itôj, pa yovalhsha'ne pa yit'esh:
—Nôque nivacle yi'jop'in shta jô lhech.
57Ja Pedro vantanesh pa yit'esh:
—Nivacche, ninastôfa'clesh jô lhech.
58Nichinach'e, pa yi'van shta paelh pa yit'esh:
—Avaatsha shta lhtô'lha japi lhech.
Taj ti yit'esh ja Pedro:
—Am, nivacle, ni yalhecha.
59Pa chinch'e atesha pa yit'esha paelh:
—Yijô', nôque nivacle yi'jop'in jô lhech, lhayaash ti tôlhey shta ja Galilea.
60Pa lhechesh pa yit'esh ja Pedro:
—Nivacle, ninastôych'e cava lhteesh.
Jôjjeclay ninôjeshch'e ti tasinôy'in ja Pedro pa t'eyshey pa votôjôj. 61Pa lhechesh pa yovalheylhtapee pa Lhcaanvacle ja Pedro. Pa yaychavalhch'e ja Pedro pava yit'eshem pa Lhcaanvacle ti yit'esh: “Jôjjeclay jayu nint'eyshey pa votôjôj, pa pu'janaesh jayu ca avaantanyish.” 62Pa lhechesh pa yichfach'ee ja Pedro pa ujesh ti yip'in.
Pa lhanclôquijayash pa Jesús
(Mt 26.67-68; Mr 14.65)
63Papi yiclôvalh pa Jesús pa uj ti yiclôqui pa yic'ôn'in shta. 64Pa yip'o'apee pava lhtôsjey pa yic'ôn'een lhtaco, pa yit'esh ts'ivee:
—¡Navooyqueesh'ôcji ajaalh papi nac'ôn! 65Pa acloj pava matas yit'eshaan ti yinvaclematanesh'in.
Pa Jesús yie' t'ajuyish papi lhcaanvacles
(Mt 26.59-66; Mr 14.55-64; Jn 18.19-24)
66Meelh ti clasimch'e pa tulh, pa tayesh'eva'ne papi nitaôvclasa lhanvacles japi judíos, shi' papi lhanvaclesesh papi vatcasinôc, shi' papi vanqu'eyjatsjanesh pava lhfanishlhavach, pa yichaaj ts'ivee pa Jesús pa yan'e t'ajuyish papi us lhcaanvacles. Lhech yie' ti niyôs'in ts'ivee:
67—Anfacleelhyam, ¿A'lhech a Cristo?
Pa lhech pa yicuulh:
—Ca yit'esh lhôn jech, pa lhascacu'jelh jayu. 68Vooy ca c'aniyôseshelh, pa tanca ascu'lheelh, tanca shta ca asnuqueeshelh. 69Taj ti nôqueesh tôlh'ejop na Nivacle Lhô'sesh ti yiey jayu lhfayish ja Dios, ampa ca amac'oya ja vat'unaj.
70Pa lhechesh pa lhacôm'a ti niyôsesh'in ts'ivee pa yit'esh:
—¿Yijô' ti a'lhech Lhôs'ash pa Dios?
Pa yicuulh pa Jesús pa yit'esh:
—Jech, yalhech, jan lhjunash ti lhteetshelh na.
71Pa lhechesh pa yit'esh ts'ivee:
—¿She t'e paelh suyeshijop ti chicaclecleshc'oya? Vooy casvaatsha shtape'ya java tô'lha na lhashi.
Pa Jesús yie' t'ajuyish pa Pilato
(Mt 27.1-2, 11-14; Mr 15.1-5; Jn 18.28-38)
Currently Selected:
San Lucas 22: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.
